2 KUOROO 20 - WƖA TENIŊ

Hezikaaya nyanyalaa

¹ Bʋa-la lɛ dɩ Hezikaaya faa wɩɩlʋ, a ka mʋa dɩ ʋ sʋba. Ŋɩɩ nɛ Wɩa wʋlaabʋlla Azaaya sɩ ŋaa Amos nanʋala sii mʋ ʋ teeŋ a bʋl, “La TƖƖNA sɩ: ‘Kɛŋ ŋ tinteeŋ wɩaa kala hɛ dɔŋɔ, bɛɛ wɩaa ŋ jaŋ sʋʋ, ŋ bɩ jaŋ duori.’ ”

² Ŋɩɩ nɛ Hezikaaya kɛŋ ʋ sɩaa bɩrɩma chaasɛ jeeŋ aŋ sʋl La TƖƖNA.

³ “Mɩ Tɩɩna, liisi ŋɩɩ mɩ sɩ laaŋ dii a toŋ arɩ mɩ tʋɔŋ kala, a ŋaa wɩalɩŋ sɩɩ tɔrɛ ŋ tʋɔŋ.” Ʋ bʋl ŋɩɩ aŋ chaasa yel woruŋ.

⁴ Ka dɩ Azaaya-na fa mɩɩra lɩɩ kuoru dɩa kaala sɩ hɛ tʋtʋɔbaanɩŋ lɛ, La TƖƖNA fa bʋla pʋ,

⁵ “Mɩɩra mʋ bʋla pɩ mɩ nɩaa sɩpaalaara Hezikaaya arɩ mɩ-na ma TƖƖNA sɩ ŋaa ʋ naabalɩma Devit Wɩa sɩ, ‘Mɩ nɩɩ ŋ sʋla nɛ a na ŋ sɩlɩɩrɩŋ ma. Mɩ jaŋ leŋ dɩ ŋ duori. A lɩɩ jɩnɩŋ kaa mʋ tapʋlaa batori chɛɛŋ, ŋ jaŋ mɩɩra jʋʋ mɩ-na Wɩa dɩɩ-bal-la.

⁶ Mɩ jaŋ kɛŋ jɩsɩŋ fii arɩ banɔŋ a pɛ ŋ mɩɩsɩŋ lɛ. Mɩ jaŋ laa ŋ dɩ Jerusalɛm nɩaa kala ta Asiiria kuoro nɩsɩŋ lɛ. Mɩ jaŋ pɔ taŋ deeŋ woruŋ a tɩŋ mɩ dɩ mɩ tɩntɩnna Devit wɩaa.’ ”

⁷ Azaaya fa bʋla pɩ Hezikaaya, “Leŋ dɩ ba tugi tutogo nɛnɛɛ a paa taa mɔpʋla-la.” Ba ŋaa ŋɩɩ ʋ fɩɛlɛ.

⁸ Hezikaaya ma pɩɛsɛ Azaaya, “Magɩlɩ bɛɛ nɛ La TƖƖNA jaŋ joŋo dagɛ arɩ mɩ jaŋ duori a mʋ La TƖƖNA dɩɩ-bal-la tapʋlaa batori chɛɛŋ?”

⁹ Ŋɩɩ nɛ Azaaya bʋl, “Magɩlɩŋ deeŋ nɛ La TƖƖNA jaŋ kaa dagɛ wɩɩ-la ʋ sɩ sɩ ʋ jaŋ ŋaa. Ŋ jaŋ cho dɩ wɩɩpɔsʋŋ daaliimiŋ mʋ sɩpaaŋ naakieliŋ fii koo ŋ jaŋ cho dɩ ʋ mʋ harɩŋ naakieliŋ fii?”

¹⁰ Hezikaaya bʋl, “Ʋ ŋaa mɔlɩɩ nɛ dɩ daaliimiŋ mʋ sɩpaaŋ naakieliŋ fii, ama mɩɩ chɛ dɩ ʋ mɩɩra mʋ harɩŋ nɛ naakieliŋ fii.”

¹¹ Ŋɩɩ nɛ Azaaya, Wɩa wʋlaabʋllʋ-la ŋmoo niiŋ a pɩ La TƖƖNA, ʋ leŋ wɩɩpɔsʋŋ daaliimiŋ mɩɩra mʋ harɩŋ naakieliŋ fii, lee-la kuoro Ahas lusuŋ-choluŋ sɩ chɩna.

Tɩndaara-la sɩ lɩɩ Babɩlɔŋ

¹² Bʋa-la lɛ baal kʋbala ba sɩɩ yɩrɛ Merodak-Baladaŋ nɛ fa ŋaa Babɩlɔŋ kuoro. Ʋ fa ŋaa Baladaŋ nanʋala nɛ. Ʋ sɩ nɩa dɩ Hezikaaya wɩɩla nɛ aŋ duori, ʋ ŋmʋnsɛ teniŋ a joŋ kɩaa pɛ, a tɩŋ nɩaa dɩ ba kaa mʋ dii zile ʋ lɛ.

¹³ Hezikaaya cheme laa tɩndaara-la, a kɛmba gɔllɔ dagɛ ʋ dʋa-la kala sɩ hɛ ʋ chʋgʋsʋŋ dɩɩsɩŋ lɛ: hɔpʋla, sɛlɩmɛ, tegisiŋ, nʋʋ-zɔŋŋɔɔ arɩ ʋ bayuori kɩaa a pɛ kʋŋkala ʋ sɩ kɛnɛ lɛ. Kʋŋkala fa tuo ʋ kuoru dɩa arɩ lee-la kala ʋ sɩɩ beŋ lɛ ʋ bɩ kaa dagɛba.

¹⁴ Ŋɩɩ nɛ Azaaya Wɩa wʋlaabʋllʋ-la kɔ kuoro Hezikaaya teeŋ a pɩɛsʋ, “Nɩɩ nɛ nɩalɩŋ sɩ kɔ ŋ teeŋ lɩɩ? Wʋbɛɛ nɛ ba kʋ bʋl?” Ŋɩɩ nɛ Hezikaaya sɩ, “Ba lɩɩ dɩ-bolii nɛ, Babɩlɔŋ nɛ ba lɩɩ.”

¹⁵ Azaaya bɩra pɩɛsɛ, “Bɛɛ kɩaa nɛ ba na ŋ dɩa lɛ?” Hezikaaya sɩ, “Ba na kʋŋkala sɩ hɛ mɩ kuoru dɩa lɛ nɛ. Kʋŋkala tuo mɩ kɩaa tʋɔŋ mɩ sɩ bɩ kaa dagɛba.”

¹⁶ Ŋɩɩ nɛ Azaaya bʋla pɩ Hezikaaya, “Jegile nɩɩ wɩɩ-la La TƖƖNA sɩ bʋla:

¹⁷ Bʋa kʋbala jaŋ yi, kɩalɩŋ kala sɩ hɛ ŋ kuoru dɩa lɛ arɩ kɩalɩŋ ŋ naabalɩmaba sɩ dʋa a kaa kɔ jɩnɩŋ, ba jaŋ chʋŋ ba kala a kaa mʋ Babɩlɔŋ. Kʋŋkala bɩ jaŋ ka. La TƖƖNA nɛ bʋla.

¹⁸ Ba jaŋ kɛsɛ ŋ doho nɩaa dɔnsʋŋ arɩ ŋ tɩtɩa bii-lʋlaa a kaa mʋ Babɩlɔŋ a feriba dɩ ba tɩtɩŋ Babɩlɔŋ kuoro dɩa lɛ.”

¹⁹ Ŋɩɩ nɛ Hezikaaya bʋla pɩ Azaaya, “Wɩɩ-la La TƖƖNA sɩ bʋla ŋaa wʋzɔŋ nɛ.” Ʋ bʋl ŋɩɩ bɛɛ wɩaa ʋ-na fa bɩɩna La TƖƖNA sɩ ʋ mɩɩsɩŋ kala lɛ fɩɛlɩŋ jaŋ hɛ nɩmɛ, wʋwalɩmɩɩ kala bɩ jaŋ jʋʋ-ʋ.

²⁰ Wɩalɩŋ dɔnsʋŋ Hezikaaya sɩ dii kuoruŋ a ŋaa, wɩalɩŋ kala ʋ sɩ ŋaa a laa yɩrɩŋ arɩ ŋɩɩ ʋ sɩ lu pɩlɩŋ a hɛ lɩɩ-libe lɩɩŋ pɛllɛ kʋʋ jʋʋ ba taŋ tʋɔŋ, ba kala nɛ ba ŋmʋnsa hɛ Juda tinteeŋ kuoroo wʋŋaalaa teniŋ tʋɔŋ.

²¹ Ŋɩɩ nɛ Hezikaaya sʋʋ, ka ʋ nanʋala Manasɛ dii kuoruŋ ʋ nyuŋ lɛ.