2 KUOROO 2 - WƖA TENIŊ

La TƖƖNA joŋ Ɩlaaja kaa jɩl Wɩa-jaŋ

¹ Bʋa-la sɩ yie dɩ La TƖƖNA to pel-vinvilimiŋ lɛ a joŋ Ɩlaaja a kaa jɩl Wɩa-jaŋ, Ɩlaaja arɩ Elaasa fa lɩɩ Gɩlɩgal lɛ nɛ a mʋmʋ.

² Ɩlaaja bʋla pɩ Elaasa, “Hɔŋ daha, La TƖƖNA tɩmmɛ nɛ Bɛtɛl lɛ.” Elaasa bʋla pʋ, “La TƖƖNA sɩ weye, arɩ ŋ ma sɩ weye wɩaa, mɩ bɩ jaŋ mɩɩrɛ ŋ harɩŋ.” Ŋɩɩ nɛ ba kala to dɔŋɔ a mʋ Bɛtɛl.

³ Wɩa wʋlaabʋllaa sɩ hɛ Bɛtɛl lɛ kʋ lɩɩ pɩɛsɛ Elaasa, “Ŋ jɩma arɩ La TƖƖNA jaŋ joŋ ŋ nɩhɩaŋ jɩnɩŋ a kaa viiri koo?” Ʋ bʋl, “Oo, mɩ jɩma nɛ, ama, má tɔrɛ ma niiŋ.”

⁴ Ɩlaaja bɩra bʋla pɩ Elaasa, “Hɔŋ daha, La TƖƖNA tɩmmɛ nɛ Jeriko lɛ.” Elaasa bɩra bʋl, “La TƖƖNA sɩ weye, arɩ ŋ ma sɩ weye wɩaa, mɩ bɩ jaŋ mɩɩrɛ ŋ harɩŋ.” Ŋɩɩ nɛ ba kala to dɔŋɔ a mʋ Jeriko.

⁵ Wɩa wʋlaabʋlla-la sɩ hɛ Jeriko lɛ ma kʋ lɩɩ pɩɛsɛ Elaasa, “Ŋ jɩma arɩ La TƖƖNA jaŋ joŋ ŋ nɩhɩaŋ jɩnɩŋ a kaa viiri koo?” Ʋ bʋl, “Oo, mɩ jɩma nɛ, ama, má tɔrɛ ma niiŋ.”

⁶ Ɩlaaja bɩra bʋla pɩ Elaasa, “Hɔŋ daha, La TƖƖNA tɩmmɛ nɛ Jɔdaŋ fuo-la lɛ.” Elaasa bʋl, “La TƖƖNA sɩ weye, arɩ ŋ ma sɩ weye wɩaa, mɩ bɩ jaŋ mɩɩrɛ ŋ harɩŋ.” Ŋɩɩ nɛ ba kala bɩra to dɔŋɔ a mʋ Jɔdaŋ fuo-la.

⁷ Wɩa wʋlaabʋllaa mahɩŋ balɩa arɩ fii to Ɩlaaja arɩ Elaasa harɩŋ a mʋ chɩŋ dɩ-bolii mʋa, a bibeŋ ka ba balɩa mʋ chɩŋ Jɔdaŋ fuo-la niiŋ.

⁸ Ŋɩɩ nɛ Ɩlaaja wuri ʋ gɛrɩŋ a kaa kpeŋ a kaa ŋmoo lɩɩ-la, ʋ pɔɩ balɩa. Ka tintee-hɩlɩŋ pɩŋ, ba to tintee-hɩlɩɩ-la lɛ a chol.

⁹ Ba sɩ cholo a dɛrɛ, Ɩlaaja pɩɛsɛ Elaasa, “Dagɛmɛ wɩɩ-la ŋ sɩɩ chɛ dɩ mɩ ŋaa pɩŋ, ka dɩ La Tɩɩna-na jommi kaa jɩl Wɩa-jaŋ.” Elaasa bʋl, “Leŋ dɩ mɩ kɛŋ dol-la ŋ sɩ kɛnɛ naansɩɩŋ bʋlɩa.”

¹⁰ Ŋɩɩ nɛ Ɩlaaja bʋl, “Wʋduo nɛ ŋ pɩɛsaa chɛ ŋɩɩ, ama dɩ La TƖƖNA nɛ jommi ŋ sɩɩŋ lɛ, ŋ jaŋ na wɩɩ-la ŋ sɩ pɩɛsaa chɛ. Ama dɩ ŋ nɛ bɩ ŋɩɩ na, ŋ bɩ jaŋ na wɩɩ-la ŋ sɩ pɩɛsaa chɛ.”

¹¹ Ɩlaaja arɩ Elaasa ha sɩ vɛnɛ aŋ bʋbʋl wɩaa ŋɩɩ, dɩ laalɩŋ janɩŋ lɛrɛ toruko arɩ nyiniŋ a guu kʋ to ba pɛgɛ, a kɛmba pɔrɛ dɔŋɔ lɛ. Ɩlaaja to pel-vinvilimiŋ lɛ a jɩl Wɩa-jaŋ.

¹² Elaasa sɩ na ŋɩɩ, ʋ ŋmoo niiŋ, “Mɩ nyɩmma, mɩ nyɩmma. Iziral tɩŋŋaa laataarɩ-duoŋ lɛlɛ. Ɛɛ nɛ la jaŋ ŋaa?” Elaasa sɩɩŋ bɩra bɩ ʋ na. Ŋɩɩ nɛ ʋ kɛŋ ʋ gɛnnɩŋ kɩɛsɛ.

¹³ Dɩ Ɩlaaja gɛrɩŋ foro tel. Ŋɩɩ nɛ Elaasa joŋ a kaa mɩɩra mʋ chɩŋ Jɔdaŋ fuo-la niiŋ.

¹⁴ Ʋ joŋ Ɩlaaja gɛrɩ-la sɩ tele a kaa ŋmoo lɩɩ-la aŋ pɩɛsɛ, “Nɩɩ nɛ La TƖƖNA Ɩlaaja Wɩa hɛ?” Ʋ sɩ ŋmoo lɩɩ-la ŋɩɩ, ʋ kpaa balɩa, ʋ wuo chol.

¹⁵ Wɩa wʋlaabʋlla-la mahɩŋ balɩa arɩ fii sɩ lɩɩ Jeriko sɩ chɩŋ nɩmɛ a bibenu bʋl, “Wɩa Dɩma-la sɩ hɛ Ɩlaaja lɛ lɩɩ jʋʋ Elaasa nɛ.” Ŋɩɩ nɛ ba mʋ chemu a kpirimi ʋ sɩpaaŋ.

¹⁶ Ba bɩra bʋl, “Bee na, la-na ŋ tɩntɩnnaa ŋaa nɩduoruŋ mahɩŋ balɩa arɩ fii nɛ a hɛ daha. Leŋ dɩ la mʋ gɔllɔ chɛ ŋ nɩhɩaŋ. Kapo La TƖƖNA Dɩma-la joŋu jɩla sagɛ peeliŋ nyuŋ nɛ, koo ʋ kɛnʋ kaa tuu ta fuonaaŋ lɛ nɛ.” Elaasa bʋl, “Aɩ, Má sɩ́ mʋ.”

¹⁷ Ba ha vɩa aŋ pɛsɛ ŋɩɩ deeŋ deeŋ, Elaasa walɩma ka aŋ bʋl, “Má mʋ.” Ŋɩɩ nɛ nɩalɩŋ mahɩŋ balɩa arɩ fii kala mʋ gɔllɔ chɛʋ ŋɩɩ deeŋ deeŋ tapʋlaa batori aŋ bɩ ʋ na.

¹⁸ Ba sɩ mɩɩra kɔ Elaasa teeŋ Jeriko lɛ, ʋ pɩɛsɛba, “Mɩ bɩ bʋla pɩma arɩ má sɩ́ mʋʋ?”

Elaasa leŋe lɩɩŋ zɔŋ

¹⁹ Tapʋlɩɩ kʋbala Jeriko nɩaa sii bʋla pɩ Elaasa, “La jaŋ deeŋ chɩŋ dɩ-zɔŋ nɛ, aŋ ka la lɩɩŋ bɩ zɔŋ, ŋɩɩ leŋ la tinteeŋ kɩaa bɩ wasɛ.”

²⁰ Elaasa bʋl, “Má ŋaa yɩsɩŋ a hɛ gbaŋ-falɩŋ lɛ a kaa kʋ pɩmɛ.” Ŋɩɩ nɛ ba ŋaa hɛ a kaa mʋ pʋ.

²¹ Ʋ sii kaa mʋ lɩɩ-bul-sɩɩŋ leriŋ, a bɩsɛ yɩsɩ-la hɛ ʋ lɛ aŋ bʋl, “Wɩɩ-la La TƖƖNA sɩ bʋla nɛ ŋ-la: Mɩ leŋe lɩɩŋ deeŋ zɔŋ nɛ. Ʋ bɩra bɩ jaŋ ŋaa dɩ ma kʋŋ sʋʋ koo dɩ ma tinteeŋ kɩaa sɩ́ wasʋ.”

²² Lɩɩ-la ha zɔmɔ nɛ arɩ jɩnɩŋ kala arɩ Elaasa sɩ bʋl ŋɩɩ.

²³ Elaasa lɩɩ Jeriko lɛ a mʋmʋ Bɛtɛl. Ʋ sɩɩ mʋ, bapʋɔsɛ biisiŋ lɩɩ taŋ-la lɛ a sieri ʋ lɛ a bʋl, “Nyu-puoro tɩɩna, mʋ lɩɩ daha.”

²⁴ Ʋ mɩɩra bɩrɩma bemba, aŋ kalɩba hɛ ba lɛ La TƖƖNA yɩrɩŋ lɛ. Ŋɩɩ nɛ lʋgʋmaa balɩa lɩɩ gɩrɩŋ tʋɔŋ a kʋ kɛsɛ bapʋɔsɛ biisi-la mahɩŋ balɩa arɩ balɩa kala a chaŋ.

²⁵ Ka Elaasa mʋ jɩl peel-la ba sɩɩ yɩrɛ Kamɛl a lɩɩ nɩmɛ a mɩɩra mʋ taŋ-la ba sɩɩ yɩrɛ Samarɩa.