2 KUOROO 18 - WƖA TENIŊ

Hezikaaya dii kuoruŋ Juda tinteeŋ lɛ

¹ Ɛla nanʋala Hosia sɩ dii kuoruŋ Iziral tinteeŋ lɛ, ʋ jɩ-tori lɛ nɛ Ahas nanʋala Hezikaaya ma dii kuoruŋ Juda tinteeŋ lɛ.

² Hezikaaya fa ŋaa jɩsɩŋ mara arɩ banɔŋ nɛ aŋ dii kuoruŋ Juda tinteeŋ lɛ. Ʋ hɔŋ Jerusalɛm lɛ a bemba jɩsɩŋ mara arɩ nibi. Ʋ naaŋ yɩrɩŋ nɛ fa Abija, a ŋaa Zɛkarɩya tolo.

³ Ʋ fa ŋaa wɩalɩŋ sɩɩ tɔrɛ La TƖƖNA tʋɔŋ nɛ a nagɛ ʋ naabalɩma Devit fa sɩ ŋaa ŋɩɩ.

⁴ Hezikaaya fa chei vesiŋ dɩ-kpaarɩa-la nɛ, a yɛrɛ tabɩa-la ma ba fa sɩɩ kpaarʋ, aŋ keri Asɩra daasɩ-la ma lo. Ʋ fa ŋmoo dɩŋ-la ma Mosis fa sɩ kɛŋ kɔlɩɩŋ libi ba nyɩgɛ kʋsʋɔrʋsʋŋ pʋpʋ a bori nɛ. Iziral tɩŋŋaa faa yɩrɛ dɩŋ-la Nɛhʋsɩtaŋ nɛ.

⁵ Hezikaaya fa laa La TƖƖNA Iziral tɩŋŋaa Wɩa dii nɛ woruŋ. Juda tinteeŋ kuoroo kala tʋɔŋ, ba kʋŋkala fa tuo a nagʋ, nɩalɩŋ sɩ laa sɩpaaŋ a dii kuoruŋ ʋ lɛ koo nɩalɩŋ sɩ to ʋ harɩŋ a dii kuoruŋ.

⁶ Ʋ fa joŋ ʋ wʋtɩtɩɩ kala hɛ La TƖƖNA lɛ nɛ, a tuto wɩalɩŋ kala La TƖƖNA sɩ joŋo dagɛ Mosis ʋ ŋmʋnsa bil dɩ nɩaa tuto.

⁷ La TƖƖNA fa chɩŋ ʋ harɩŋ nɛ, ʋ wɩɩkala wasɛ. Hezikaaya fa vɩa Asiiria kuoro nɛ a bɩ ʋ niiŋ to.

⁸ Ʋ fa yuo dii Fɩlɩsɩtɩa tɩŋŋaa tabala-la kala ba sɩ saa kɛrɛ golli arɩ tabiisi-la ba sɩ bɩ kɛrɛ saa golli, a kɛŋ ŋɩɩ mʋ yi taŋ-la ba sɩɩ yɩrɛ Gaza arɩ lere-la sɩ gollu.

⁹ Hezikaaya sɩ dii kuoruŋ Juda tinteeŋ lɛ, ʋ jɩ-nɛsɛ lɛ, dɩ Ɛla nanʋala Hosia ma sɩ dii kuoruŋ Iziral tinteeŋ lɛ, ʋ ma jɩ-pɛɩ lɛ nɛ ŋɩɩ. Ŋɩɩ nɛ Asiiria tinteeŋ kuoro Salɩmanɛsa kʋ tɔ Samarɩa hɛ a yuyuou.

¹⁰ Ʋ yuou ŋɩɩ nɛ jɩsɩŋ batori, aŋ yuo dii. Bʋa deeŋ lɛ dɩ Hezikaaya sɩ dii Juda tinteeŋ kuoruŋ ʋ jɩsɩŋ balɩdʋ lɛ nɛ ŋɩɩ. Hosia ma sɩ dii Iziral tinteeŋ kuoruŋ, ʋ ma jɩ-nibi lɛ nɛ ŋɩɩ.

¹¹ Ŋɩɩ nɛ Asiiria kuoro kɛsɛ Iziral tɩŋŋaa kala a kaa mʋ Asiiria tinteeŋ. Ʋ kɛmba mʋ a leŋ dɔnsʋŋ hɔŋ taŋ-la ba sɩɩ yɩrɛ Hala lɛ, dɔnsʋŋ ma hɔnɔ kpagɛ fuo-la ba sɩɩ yɩrɛ Habɔ sɩ hɛ Gozaŋ tinteeŋ. Ka dɔnsʋŋ ma hɔŋ tasɩ-la kala sɩ hɛ Medis tɩŋŋaa tinteeŋ lɛ.

¹² Wɩaa deemba kala ŋaa Iziral tɩŋŋaa lɛ, a tɩŋ ba sɩ bɩ ba TƖƖNA Wɩa niiŋ to nɛ, aŋ chei nii-la ʋ sɩ bile ʋ dɩ ba pɛgɛ arɩ wɩalɩŋ La TƖƖNA tɩntɩnna Mosis sɩ dagɛba. Ba bɩ wɩalɩŋ jegile nɩɩ koo a toba.

¹³ Hezikaaya sɩ kʋ dii kuoruŋ Juda tinteeŋ lɛ, ʋ jɩsɩŋ fii arɩ banɛsɛ tʋɔŋ nɛ, Asiiria kuoro Sanakɛrɩb arɩ ʋ nɩaa sii kʋ yuo dii Juda tabala-la kala ba sɩ saa kɛrɩsɩŋ golli, a kɛsɛba.

¹⁴ Ŋɩɩ nɛ Hezikaaya tɩŋ ba mʋ bʋla pɩ Asiiria tinteeŋ kuoro Sɛnakɛrɩb sɩ hɛ taŋ-la ba sɩɩ yɩrɛ Lakɩs lɛ, “Mɩ cheye nɛ. Bɩra sɩ́ mɩ tinteeŋ yuo. Mɩ jaŋ pɩŋ kʋŋ na-kala ŋ sɩɩ chɛ.” Ŋɩɩ nɛ Asiiria tinteeŋ kuoro bʋla pɩ Hezikaaya arɩ ʋ jaŋ laa hɔpʋla yuŋuŋ sɩ ŋaa kilo bʋɩ fii arɩ sɛlɩmɛ yuŋuŋ sɩ ŋaa kilo bʋɩ ʋ teeŋ.

¹⁵ Ŋɩɩ nɛ Hezikaaya paa hɔpʋla-la kala sɩ hɛ La TƖƖNA dɩɩ-bal-la arɩ kuoru dɩa kala lɛ a pʋ.

¹⁶ Bʋa-la lɛ nɛ Hezikaaya lɛrɛ sɛlɩmɛ-la kala ba sɩ joŋo taarɛ La TƖƖNA dɩɩ-bal-la borusuŋ arɩ boro daasɩŋ kala, a joŋo pa ba kaa mʋ pɩ Asiiria kuoro Sɛnakɛrɩb.

Sɛnakɛrɩb fugisi Jerusalɛm tɩŋŋaa

¹⁷ Asiiria kuoro tɩŋ ʋ nɩaa deemba batori: Ʋ laalɩyuoroo kala nɩhɩaŋ, ʋ tɩntɩnnaa kala nɩhɩaŋ arɩ ʋ laal-baga nɩhɩaŋ ba kɛŋ laalɩyuori daŋ lɩɩ taŋ-la ba sɩɩ yɩrɛ Lakɩs a mʋ Hezikaaya teeŋ Jerusalɛm lɛ. Laalɩyuori-hɩasɩ-la arɩ ba nɩaa sɩ kɔ Jerusalɛm, ba chɩŋ pɩl-la sɩ hɛ nyuŋ lɩɩ-libe-la sɩɩ pɛllʋ a hɛ wombii-la sɩɩ mʋ lee-la ba sɩɩ chɛsɛ kɩaa lɛ nɛ.

¹⁸ Ŋɩɩ nɛ aŋ yɩrɛ kuoro Hezikaaya arɩ Ɛlɩakɩm nanʋala Hɩlɩkaaya, nɩɩ-la sɩ ŋaa kuoro dɩa tɩntɩnnɩ-hɩaŋ, Sɛbɩna, nɩɩ-la sɩɩ ŋmʋnsɛ ba tenniŋ, a pɛ Asaf nanʋala Jʋab lɛ, nɩɩ-la ma sɩɩ bil ba tenniŋ. Ba kʋ chemba.

¹⁹ Laal-baga nɩhɩa-la bʋla pɩba, “Má pɩɛsɛ kuoro Hezikaaya dɩ wɩɩ-la Asiiria kuoru-balɩŋ sɩɩ chɛ ʋ jɩŋ nɛ, ‘Kʋbɛɛ lɛ nɛ ma yɩɛlaa paala hɛ?’

²⁰ Ma sɩ sɩ ma kɛŋ laalɩŋ-yuonuŋ jɩma arɩ doluŋ nɛ, ama ma wʋbʋlɩɩ-la kala ŋaa pɛɩ nɛ. Kʋbɛɛ lɛ nɛ ma joŋ ma yɩɛlaa a daŋ aŋ vɩamɛ?

²¹ Ijipiti tinteeŋ kuoro lɛ nɛ ma joŋ ma yɩɛlaa daŋ. Ʋ saa nagɛ mɔrʋŋ nɩa sɩ joŋo a kaa ŋaa dantɩga a vɩvɛŋ nɛ. Ʋ jaŋ bori a tʋrɛ ma nɩsaa lɛ a pɩrɛma. Ŋɩɩ nɛ ʋ nagɛ nɩalɩŋ kala sɩ joŋ ba yɩɛlaa daŋ ʋ lɛ.

²² Dɩ ma nɛ saa bɩra bʋla pɩmɛ arɩ ma TƖƖNA Wɩa lɛ nɛ ma yɩɛlaa hɛ, ʋ leree arɩ ʋ Wɩɩsʋlʋŋ korunuŋ dee Hezikaaya ŋmoo giri ŋɩɩ, aŋ bʋla pɩ Juda arɩ Jerusalɛm nɩaa, arɩ ʋ maga dɩ ba dɛnnɛ La TƖƖNA Wɩɩsʋllɩ koruŋ deeŋ sɩ hɛ Jerusalɛm lɛ nɛɛ?

²³ Má kɔ dɩ ma dɩ mɩ nɩhɩaŋ sɩ ŋaa Asiiria kuoro bʋla nɩɩ dɔŋɔ lɛ. Mɩ jaŋ joŋ janɩŋ bʋɩ balɩa a pɩma, dɩ ma nɛ jaŋ wuo na nɩaa dɩ ba jɩlba.

²⁴ Ma sɩ paala joŋ ma wɩɩkala a daŋ Ijipiti janɩŋ torukoba arɩ ba ja-jɩllaa lɛ ŋɩɩ, ma bɩɩna ma jaŋ wuo yuo dii mɩ nɩhɩaŋ tɩntɩnnaa tʋɔŋ kʋbie naa?

²⁵ Ma bɩɩna mɩ tɩtɩa doluŋ lɛ nɛ mɩɩ kɔ dɩ mɩ yuo tinteeŋ deeŋ a cheyu ŋɩɩ? La TƖƖNA tɩtɩa nɛ pɩmɛ wombiiŋ dɩ mɩ kʋ yuo ma tinteeŋ a cheyu.”

²⁶ Ŋɩɩ nɛ Hɩlɩkaaya nanʋala Ɛlɩakɩm arɩ Sɛbɩna arɩ Jʋa ma bʋla pɩ Asiiria kuoro laalɩyuori-hɩaŋ-la, “Laa sʋlʋŋ, kɛŋ Aramek tɩŋŋaa yikoro bʋl wɩalɩŋ a pɩla, laa nɩɩʋ nɛ, aŋ leŋ Hiburu tɩŋŋaa yikoro. La bɩ chɛ dɩ nɩalɩŋ sɩ sagɛ kɛrɛ nyuŋ nɩɩ.”

²⁷ Ŋɩɩ nɛ Asiiria kuoro laalɩyuori-hɩaŋ-la ma bʋl, “Ma bɩɩna ma nɩhɩaŋ arɩ ma dʋndʋŋa teeŋ nɛ mɩ nɩhɩaŋ tɩmmɛ dɩ mɩ kʋ bʋl wɩaa deemba? Nɩalɩŋ ma sɩ sagɛ kɛrɛ-la nyuŋ pɛ nɛ. Ma kala jaŋ gʋra dii ma tɩtɩa bɩnɩŋ aŋ nyʋa ma tɩtɩa fɩɩrɩŋ ma.”

²⁸ Ŋɩɩ nɛ laalɩyuori-hɩaŋ-la kɛŋ Hiburu yikoro a faasa bʋl, “Má jegile nɩɩ wɩalɩŋ Asiiria kuoro sɩ ŋaa kuoru-balɩŋ sɩ bʋla.

²⁹ Ba nɛ ŋ-la: Má sɩ́ leŋe dɩ Hezikaaya nyɩsɛma, ʋ bɩ ma wuo laa ta.

³⁰ Má sɩ́ leŋe dɩ Hezikaaya nyɩsɛma dɩ ma joŋ ma yɩɛlaa hɛ ma TƖƖNA lɛ, arɩ ʋ sɩ sɩ ma TƖƖNA bɩ jaŋ sɛɩ joŋ ma tabal-la a pɩ Asiiria kuoro.

³¹ Má sɩ́ Hezikaaya teeŋ jegilu. Asiiria kuoro sɩ: Má kɔ mɩ teeŋ dɩ la ŋaa sɩma, ŋɩɩ nɛ ma kʋŋkala jaŋ wuo dii ma tɩtɩa girep nɛnɛɛ aŋ nyʋa ma vilee ma lɩɩŋ,

³² ŋɩɩ deeŋ deeŋ a mʋ yi bʋa-la lɛ mɩ sɩ jaŋ kɛmma mʋ lee-la sɩ nagɛ ma tɩtɩa tinteeŋ, a kɛŋ mɩaa ma sɩ jaŋ kaa ŋaa kʋdiilee, girep nɛnɛɛ ma sɩ jaŋ kaa ŋaa sɩnɩŋ, nʋʋŋ tɩɩsɩŋ arɩ tʋʋŋ. Má bagɩsa lɩɩsɛ mɩɩsɩŋ aŋ leŋ sʋʋŋ. Má sɩ́ leŋe dɩ Hezikaaya kɛmma yeŋŋi, dɩ ʋ nɛ sɩ, ‘Ma TƖƖNA jaŋ laama ta.’

³³ Ma ha na tintee dɔŋ vene dɩ ʋ wuo laa ʋ tinteeŋ Asiiria kuoro nɩsɩŋ lɛɛ?

³⁴ Nɩɩ nɛ tasɩ-la ba sɩɩ yɩrɛ Hamaf arɩ Apad vesiŋ hɛ? Nɩɩ nɛ tasɩ-la ma ba sɩɩ yɩrɛ Sɛfavem, Hɛna arɩ Iva vesiŋ hɛ? Ba wuo laa Samarɩa ta nɛ mɩ nɩsɩŋ lɛɛ?

³⁵ Vesiŋ deemba kala tʋɔŋ, ba kʋbɛɛ nɛ wuo laa ʋ tinteeŋ mɩ nɩsɩŋ lɛ? Ɛɛ nɛ saa ma TƖƖNA jaŋ wuo ŋaa a laa Jerusalɛm ta mɩ nɩsɩŋ lɛ?”

³⁶ Ka nɩalɩŋ kala tɔrɛ ba niiŋ, bɛɛ wɩaa kuoro Hezikaaya bʋla pɩba nɛ arɩ ba sɩ́ wɩɩkala laa bʋl ʋ teeŋ.

³⁷ Ŋɩɩ nɛ Hɩlɩkaaya nanʋala Ɛlɩakɩm sɩ ŋaa kuoru dɩa tɩntɩnnɩ-hɩaŋ arɩ Sɛbɩna ma sɩɩ ŋmʋnsɛ ba tenniŋ arɩ Jʋa ma sɩɩ bil ba tenniŋ, kɛŋ ba gɛnnɩŋ kɩɛsɛ aa dagɛ tʋɔ-cheeŋ, aŋ mɩɩra mʋ Hezikaaya teeŋ a bʋl wɩalɩŋ kala Asiiria kuoro laalɩyuori-hɩaŋ-la sɩ bʋla a pʋ.