2 KUOROO 16 - WƖA TENIŊ

Ahas dii kuoruŋ Juda tinteeŋ lɛ

¹ Remalia nanʋala Pɛka sɩ dii kuoruŋ Iziral tinteeŋ lɛ, ʋ jɩsɩŋ fii arɩ balɩpɛ lɛ nɛ, Jotam nanʋala Ahas ma dii kuoruŋ Juda tinteeŋ lɛ.

² Ahas fa ŋaa jɩsɩŋ mara nɛ aŋ dii kuoruŋ Juda tinteeŋ lɛ. Ʋ hɔŋ Jerusalɛm lɛ a bemba jɩsɩŋ fii arɩ balɩdʋ nɛ. Ʋ fa bɩ ʋ naabalɩma Devit naabʋɔsʋŋ to. Ʋ-na fa ŋaa wɩalɩŋ sɩ bɩ ʋ TƖƖNA Wɩa tʋɔŋ ka tɔrɛ nɛ.

³ Ʋ fa to Iziral tinteeŋ kuoroo naabʋɔsʋŋ nɛ. Ʋ paala kɛŋ ʋ nanʋala nɛ a kaa kpaarɛ tɔmʋŋ a nyɩga pʋ, a ŋaa wɩalɩŋ sɩɩ kɩsʋ La TƖƖNA teeŋ. Wɩalɩŋ tɩtɩa nɛ tinteye-la nɩaa fa ŋɩŋaa tintee-la lɛ, La TƖƖNA kiriba ta ka Iziral tɩŋŋaa kʋ hɔŋ.

⁴ Ʋ faa kpaarɛ vʋɩyaa nɛ aŋ nyɩnyɩgɛ kʋsʋɔrʋsʋŋ vesiŋ dɩ-kpaaraa, dundolluŋ nyuŋ arɩ tɩɩ-lugunuŋ bʋbʋɔsʋŋ kala.

⁵ Ŋɩɩ nɛ Siiria kuoro Reziŋ arɩ Iziral kuoro Pɛka sii kʋ yuo Jerusalɛm, a golli kuoro Ahas chu, ama ba bɩ wuo yuo diiu.

⁶ Bʋa-la lɛ nɛ Siiria kuoro Reziŋ bɩra yuo laa taŋ-la ba sɩɩ yɩrɛ Ɛlaf, aŋ kiri Juda nɩalɩŋ fa sɩ hɔŋ nɩmɛ ta. Ka Ɛdɔm tɩŋŋaa mɩɩra mʋ hɔŋ Ɛlaf lɛ. Arɩ jɩnɩŋ kala ba ha hɛ nɩmɛ.

⁷ Ŋɩɩ nɛ Ahas tɩŋ tɩndaaraa, ba mʋ bʋla pɩ Asiiria tinteeŋ kuoro Tɩgɩlaf Pɩlɩsa, “Mɩ ŋaa ŋ tɩntɩnnʋ sɩ joŋ mɩ tɩtɩa pɩŋ nɛ. Kʋ laamɛ ta Siiria tinteeŋ kuoro arɩ Iziral tinteeŋ kuoro nɩsɩŋ lɛ, baa yuomi nɛ.”

⁸ Tɩndaara-la sɩɩ mʋ, kuoro Ahas pɛ paa hɔpʋla arɩ sɛlɩmɛ-la kala sɩ hɛ La TƖƖNA dɩɩ-bal-la lɛ arɩ kuoru dɩa lɛ ba kaa mʋ dii zile pɩ Asiiria kuoro.

⁹ Asiiria kuoro Tɩgɩlaf Pɩlɩsa sɩ laa tɩndaarɩ-la, ʋ dɩ ʋ laalɩyuoroo sii mʋ yuo Siiria tinteeŋ. Ba yuo dii ba tabalɩŋ ba sɩɩ yɩrɛ Damasɩkʋs a kɛsɛ nɩalɩŋ kala sɩ hɛ nɩmɛ ba ŋaa ʋ yosi. Ʋ kaa mʋ taŋ-la ba sɩɩ yɩrɛ Kɛɛ, aŋ kpʋ kuoro Reziŋ.

¹⁰ Ŋɩɩ nɛ kuoro Ahas sii mʋ Damasɩkʋs dɩ ʋ cheŋ Asiiria tinteeŋ kuoro Tɩgɩlaf Pɩlɩsa. Ʋ sɩ mʋa, ʋ na koruŋ, a tuuri koru-la nagɩsɩŋ kala arɩ ŋɩɩ ŋ sɩ jaŋ saaʋ a joŋo pa ba kaa mʋ pɩ Yuria sɩ ŋaa Wɩɩsʋllɩ sɩpaalaara dɩ ʋ laa beŋ aŋ saa ʋ dɔŋɔ.

¹¹ Ŋɩɩ nɛ Yuria laa koru-la nagɩsɩŋ beŋ aŋ saa ʋ dɔŋɔ. Ʋ nagɛ kʋ-la tɩtɩa sɩ hɛ Damasɩkʋs lɛ. Ka kuoro Ahas-na lɩɩ Damasɩkʋs kɔ.

¹² Ahas sɩ kɔ, ʋ mʋ dɩ ʋ na koru-la aŋ pɛ ŋaa Wɩɩsʋlʋŋ ʋ nyuŋ.

¹³ Ʋ sɩ mʋa, ʋ kpʋ pʋsʋŋ a ŋaa kʋnyɩgaa Wɩɩsʋlʋŋ arɩ mɩaa Wɩɩsʋlʋŋ, a ŋaa kʋnyʋalaa Wɩɩsʋlʋŋ, aŋ joŋ nii-magɛ dɔŋɔ Wɩɩsʋlʋŋ pʋsʋŋ chalɩŋ a mɩsɛ koru-la.

¹⁴ Ŋɩɩ nɛ ʋ kɛŋ kɔlɩɩŋ koru-la fa sɩ chɩŋ Wɩa dɩɩ-balɩŋ sɩpaaŋ a joŋ a kaa mʋ bil Wɩa dɩa wɩɩpɔsʋŋ nagʋa, ka koru-falɩɩ-la mɩɩra chɩŋ Wɩa dɩɩ-bal-la sɩpaaŋ.

¹⁵ Ŋɩɩ nɛ ʋ bʋla pɩ Wɩɩsʋllɩ sɩpaalaara Yuria, “A chɩŋ lɛɛlɛ a kaa mʋ, ʋ maga dɩ ŋ nyɩnyɩgɛ chʋchʋɔŋ kʋnyɩgaa Wɩɩsʋlʋŋ arɩ dɩdaanɩŋ mɩaa Wɩɩsʋlʋŋ, kuoro kʋnyɩgaa Wɩɩsʋlʋŋ arɩ ʋ mɩaa Wɩɩsʋlʋŋ arɩ nɩalɩŋ kala sɩ hɛ tinteeŋ deeŋ lɛ kʋnyɩgaa Wɩɩsʋlʋŋ arɩ ba mɩaa Wɩɩsʋlʋŋ arɩ ba kʋnyʋalaa Wɩɩsʋlʋŋ kala koru-falɩŋ deeŋ sɩ yʋga lɛ nɛ. Joŋ pʋsʋ-la kala ba sɩ kpʋa a ŋaa Wɩɩsʋlʋŋ chalɩŋ a mɩsɛ koru-la. Ama leŋ kɔlɩɩŋ koru-la-na pɩmɛ, ʋ nɛ mɩ ma jaŋ kaa chɛ nɩna wɩalɩŋ Wɩa sɩɩ chɛ dɩ mɩ ŋaa.”

¹⁶ Ŋɩɩ nɛ Yuria, Wɩɩsʋllɩ sɩpaalaara ŋaa wɩalɩŋ kala Ahas sɩ bʋla.

¹⁷ Kuoro Ahas chaarɛ hɔɔ-daaterigeba-la sɩ hɛ torukoba-la lɛ aŋ dʋɔrɛ gbansɩ-la sɩ sagɛ ba nyuŋ, a bɩra dʋɔrɛ taasɩ-gbaŋ-bal-la ma sɩ sagɛ nɛ-belli-la nyuŋ, a joŋo daŋ tabɩɩŋ nyuŋ.

¹⁸ A tɩŋ ʋ sɩɩ chɛ Asiiria kuoro tʋɔŋ tɔrɛ, ʋ polli pal-la sɩ tɔ kuoru kpasa, aŋ tɔ wombii-la kuoro sɩ to jʋjʋʋ La TƖƖNA dɩɩ-balɩŋ.

¹⁹ Wɩalɩŋ dɔnsʋŋ Ahas sɩ dii kuoruŋ a ŋaa, ba kala nɛ ba ŋmʋnsa hɛ Juda tinteeŋ kuoroo wʋŋaalaa teniŋ tʋɔŋ.

²⁰ Ŋɩɩ nɛ Ahas sʋʋ, ba joŋu hugi kuoroo dɩ-huguŋ, Jerusalɛm lɛ. Ka ʋ nanʋala Hezikaaya dii kuoruŋ ʋ nyuŋ lɛ.