2 KUOROO 14 - WƖA TENIŊ

Amazɩa dii kuoruŋ Juda tinteeŋ lɛ

¹ Jehuahas nanʋala Jehuas sɩ dii kuoruŋ Iziral tinteeŋ lɛ, ʋ jɩ-lɩa lɛ nɛ Jʋas nanʋala Amazɩa ma dii kuoruŋ Juda tinteeŋ lɛ.

² Amazɩa fa ŋaa jɩsɩŋ mara arɩ banɔŋ nɛ aŋ dii kuoruŋ Juda tinteeŋ lɛ. Ʋ hɔŋ Jerusalɛm lɛ a bemba jɩsɩŋ mara arɩ nibi. Ʋ naaŋ yɩrɩŋ nɛ fa Jehuadiŋ, a lɩɩ Jerusalɛm.

³ Amazɩa fa ŋaa wɩalɩŋ sɩɩ tɔrɛ La TƖƖNA tʋɔŋ nɛ, ama ʋ fa bɩ ʋ naabalɩma Devit maga. Ʋ fa to ʋ nyɩmma Jʋas naabʋɔsʋŋ nɛ wɩɩkala lɛ.

⁴ Ʋ fa bɩ veŋ-kpaarɛ lere-la ŋmoo ta. Nɩaa fa haa kpaarɛ vesiŋ nɛ a nyɩnyɩgɛ kʋsʋɔrʋsʋŋ nɩmɛ.

⁵ Amazɩa kuoruŋ sɩ chɩna dɛrɛ, ʋ kɛsɛ tɩntɩnnɩ-hɩasɩ-la fa sɩ kpʋ ʋ nyɩmma fa sɩ ŋaa kuoro a kpʋba.

⁶ Ama ʋ fa bɩ tɩntɩnnɩ-hɩasɩ-la sɩ kpʋ ʋ nyɩmma hambolibiisiŋ-na kpʋa, bɛɛ wɩaa wɩalɩŋ La TƖƖNA sɩ joŋo dagɛ Mosis ʋ ŋmʋnsa bil dɩ nɩaa tuto bʋl ŋ-la nɛ: “Dɩ nʋʋ bii nɛ ŋaa wʋbɔŋ, ʋ bɩ maga dɩ ba kpʋ ʋ nyɩmma a tɩŋ wɩɩ-la wɩaa. Dɩ nyɩmma ma nɛ ŋaa wʋbɔŋ, ʋ bɩ maga dɩ ba kpʋ ʋ bie a tɩŋ wɩɩ-la ʋ sɩ ŋaa wɩaa. Nʋʋkala maga dɩ ba kpʋʋ a tɩŋ ʋ tɩtɩa wʋbɔŋ-la ʋ sɩ ŋaa wɩaa nɛ.”

⁷ Amazɩa sɩ dii kuoruŋ, bʋa kʋbala lɛ ʋ fa kpʋ Ɛdɔm tɩŋŋaa bʋɩ fii nɛ fuonaa-la ba sɩɩ yɩrɛ yɩsɩŋ fuonaaŋ lɛ. Ʋ nɛ bɩra yuo dii taŋ-la ba sɩɩ yɩrɛ Sɛla laalɩŋ lɛ, aŋ mɩɩra hɛ ʋ yɩrɩŋ Jɔkɩtɛl. Arɩ jɩnɩŋ kala, ŋɩɩ nɛ baa yɩrʋ.

⁸ Tapʋlɩɩ kʋbala, Amazɩa tɩŋ ba mʋ bʋla pɩ Iziral tinteeŋ kuoro Jehuas sɩ ŋaa Jehuahas nanʋala aŋ ŋaa Jehu ma nihiŋ, “Dɩ ŋ nɛ ŋaa baal, kʋ lɩɩ chemmi dɩ la yuo laalɩŋ.”

⁹ Ŋɩɩ nɛ Iziral tinteeŋ kuoro Jehuas mɩɩra tɩŋ ba mʋ bʋl ŋ-la pɩ Juda tinteeŋ kuoro Amazɩa: “Sɔ-pugu-bie nɛ fa hɛ Lɛbanɔŋ lɛ, a tɩŋ ba mʋ bʋla pɩ kuolu tɩa ma sɩ hɛ Lɛbanɔŋ tinteeŋ lɛ, ‘Joŋ ŋ tolo pɩ mɩ nanʋala dɩ ʋ jaa.’ Ŋɩɩ nɛ baga kʋŋ ma fa sɩ hɛ Lɛbanɔŋ lɛ kʋ nʋɔsɛ sɔ-pugu-bie-la a bʋrɩgɛ.

¹⁰ Amazɩa, ŋ bɩɩna ŋ dolie nɛ ŋɩɩ ŋ sɩ yuo dii Ɛdɔm tɩŋŋaa a bibigisi ŋ tɩtɩa lɛ. Hɔŋ ŋ dɩa lɛ sɔm, sɩ́ wɩaa lɔgɔ hɛ ŋ tɩtɩa arɩ Juda tinteeŋ nɩaa kala lɛ.”

¹¹ Ama Amazɩa bɩ jegile nɩɩ. Ŋɩɩ nɛ Iziral tinteeŋ kuoro Jehuas arɩ ʋ laalɩyuoroo kʋ yuo Juda tinteeŋ kuoro Amazɩa arɩ ʋ laalɩyuoroo taŋ-la ba sɩɩ yɩrɛ Bɛf Sɛmɛs sɩ hɛ Juda tinteeŋ lɛ.

¹² Iziral tɩŋŋaa yuo dii Juda tɩŋŋaa, ba kala fá mʋ ba dɩɩsɩŋ,

¹³ ka Iziral tinteeŋ kuoro Jehuas sɩ ŋaa Jʋas nanʋala, a ŋaa Ahazɩa ma nihiŋ yuo kɛŋ Juda tinteeŋ kuoro Amazɩa Bɛf Sɛmɛs lɛ. Ŋɩɩ lɛ nɛ Jehuas mʋ ŋmoo jebii-la ba sɩ saa golli Jerusalɛm lo, a chɩŋ Efirem Boi-baalɩŋ a kaa mʋ yi Je-gʋnʋŋ Boi-baalɩŋ lɛ. Ʋ duomuŋ fa ŋaa arɩ naakieliŋ zɔɔ-balɩa nɛ.

¹⁴ Ka Jehuas paa sɛlɩmɛ, hɔpʋla arɩ kɩalɩŋ kala ba sɩ kaa tɩtɩŋ La TƖƖNA dɩɩ-bal-la arɩ dʋa-la kala sɩ hɛ kuoru dɩa lɛ, a pɛ nɩalɩŋ ʋ sɩ yuo kɛsɛ lɛ, a kaa mɩɩra mʋ Samarɩa.

¹⁵ Wɩalɩŋ dɔnsʋŋ Jehuas sɩ dii kuoruŋ a ŋaa arɩ wɩalɩŋ ʋ sɩ ŋaa laa yɩrɩŋ, a pɛ ʋ sɩ kɛŋ Juda tinteeŋ kuoro Amazɩa yuo laalɩŋ, ba kala nɛ ba ŋmʋnsa hɛ Iziral tinteeŋ kuoroo wʋŋaalaa teniŋ tʋɔŋ.

¹⁶ Ŋɩɩ nɛ Jehuas sʋʋ. Ba joŋu hugi Samarɩa lɛ Iziral tinteeŋ kuoroo dɩ-huguŋ. Ka ʋ nanʋala Jerobuam dii kuoruŋ ʋ nyuŋ lɛ.

¹⁷ Jehuahas nanʋala Jehuas sɩ ŋaa Iziral tinteeŋ kuoro sʋʋŋ harɩŋ lɛ, Jʋas nanʋala Amazɩa sɩ ŋaa Juda tinteeŋ kuoro ha hɛ ʋ mɩɩsɩŋ lɛ jɩsɩŋ fii arɩ banɔŋ nɛ.

¹⁸ Wɩalɩŋ dɔnsʋŋ Amazɩa sɩ dii kuoruŋ a ŋaa, ba kala nɛ ba ŋmʋnsa hɛ Juda tinteeŋ kuoroo wʋŋaalaa teniŋ tʋɔŋ.

¹⁹ Ŋɩɩ nɛ nɩaa dɔnsʋŋ sɩ hɛ Jerusalɛm lɛ vʋʋrɛ a sii chɩŋ Amazɩa lɛ. Ʋ lɩɩ fá mʋ taŋ-la ba sɩɩ yɩrɛ Lakɩs. Ama ba hɛ nɩaa ba kiri ʋ libe, a mʋ kpʋʋ nɩmɛ.

²⁰ Ba kɛŋ jaaba joŋ ʋ kʋsʋʋŋ a kaa mɩɩra kɔ, a hugu ʋ nyɩmmaba dɩ-huguŋ Jerusalɛm lɛ.

²¹ Juda tinteeŋ nɩaa kala lɩɩsɛ ʋ nanʋala Uzia sɩ ŋaa jɩsɩŋ fii arɩ balɩdʋ, ʋ dii kuoruŋ ʋ nyɩmma nyuŋ lɛ.

²² Ʋ nyɩmma sʋʋŋ harɩŋ lɛ nɛ ʋ bɩra yuo laa taŋ-la ba sɩɩ yɩrɛ Ɛlaf a wasa paa saa pɩ Juda tinteeŋ nɩaa.

Jerobuam dɔŋɔ ma bɩra dii kuoruŋ Iziral tinteeŋ lɛ

²³ Jʋas nanʋala Amazɩa sɩ dii kuoruŋ Juda tinteeŋ lɛ ʋ jɩsɩŋ fii arɩ banɔŋ lɛ nɛ, Jehuas nanʋala Jerobuam ma dii kuoruŋ Iziral tinteeŋ lɛ. Ʋ hɔŋ Samarɩa lɛ a bemba jɩsɩŋ mahɩŋ balɩa arɩ kʋbala nɛ.

²⁴ Jerobuam deeŋ ma fa ŋaa wʋbɔŋŋɔɔ nɛ La TƖƖNA teeŋ, ʋ fa to Nɛbat nanʋala Jerobuam bumbuŋ-la naabʋɔsʋŋ nɛ a ŋaa wʋbɔmɔ-la ʋ sɩ ŋaa, a leŋ Iziral tɩŋŋaa ma ŋaa ba tɩtɩa.

²⁵ Jerobuam deeŋ nɛ fa kɛŋ Iziral tinteeŋ bʋa jalla pɛ, a chɩŋ lee-la ba sɩɩ yɩrɛ Lebo Hamaf a kaa mʋ yi mʋgʋ-bal-la ba sɩɩ yɩrɛ Mʋgʋ-sʋʋŋ sɩ hɛ wɩɩpɔsʋŋ nagʋa dɩɩrɩŋ. La TƖƖNA Iziral Wɩa fa to ʋ tɩntɩnna Jona sɩ ŋaa Amɩtaɩ nanʋala lɛ a bʋl ŋɩɩ nɛ. Jona fa ŋaa Wɩa wʋlaabʋllʋ nɛ a lɩɩ taŋ-la ba sɩɩ yɩrɛ Gaf Hefa.

²⁶ La TƖƖNA fa na ŋɩɩ Iziral tɩŋŋaa nɩalɩŋ sɩ ŋaa yosuŋ arɩ nɩalɩŋ sɩ tɩɩ ba tɩtɩa kala sɩ chaasaa na hɛɛŋ ŋɩɩ nɛ, ka nʋʋ tuo dɩ ʋ pɛ ba lɛ.

²⁷ A tɩŋ La TƖƖNA fa sɩ sɩ ʋ bɩ jaŋ leŋ dɩ Iziral tɩŋŋaa yɩrɩŋ lɛl wɩaa, ŋɩɩ nɛ ʋ to Jehuas nanʋala Jerobuam deeŋ lɛ a laaba ta.

²⁸ Wɩalɩŋ dɔnsʋŋ Jerobuam deeŋ sɩ dii kuoruŋ a ŋaa, arɩ laala-la ʋ sɩ yuo dii arɩ ŋɩɩ ʋ sɩ yuo laa Damasɩkʋs arɩ Hamaf kala a pɩ Iziral tɩŋŋaa, ba kala nɛ ba ŋmʋnsa hɛ Iziral tinteeŋ kuoroo wʋŋaalaa teniŋ tʋɔŋ.

²⁹ Ŋɩɩ nɛ Jerobuam sʋʋ, ba joŋu hugi Iziral kuoroo dɩ-huguŋ. Ka ʋ nanʋala Zɛkarɩya dii kuoruŋ ʋ nyuŋ lɛ.