2 KUOROO 13 - WƖA TENIŊ

Iziral tinteeŋ kuoro Jehuahas

¹ Kuoro Ahazɩa nanʋala Jʋas sɩ dii kuoruŋ Juda tinteeŋ lɛ ʋ jɩsɩŋ mara arɩ batori lɛ nɛ, Jehu nanʋala Jehuahas ma dii kuoruŋ Iziral tinteeŋ lɛ. Ʋ hɔŋ Samarɩa lɛ a bemba jɩsɩŋ fii arɩ balɩpɛ.

² Ʋ fa to Nɛbat nanʋala Jerobuam naabʋɔsʋŋ nɛ a ŋaa wʋbɔŋŋɔɔ La TƖƖNA teeŋ, a leŋ Iziral tɩŋŋaa ma ŋaa ba tɩtɩa. Ʋ fa bɩ wʋbɔŋŋɔɔ ŋaanɩŋ leŋe.

³ Ŋɩɩ leŋ La TƖƖNA na baanɩŋ Iziral tɩŋŋaa nyuŋ, a leŋ Siiria kuoro Hazɛɛl arɩ ʋ nanʋala Bɛŋ-Hadad yuo diiba, a bemba dieni.

⁴ Ŋɩɩ nɛ Jehuahas sʋl La TƖƖNA dɩ ʋ pɛ ba lɛ. La TƖƖNA na ŋɩɩ Siiria kuoro Hazɛɛl sɩ chaasaa dɔgɩsɛ Iziral tɩŋŋaa, a laa ʋ sʋla.

⁵ La TƖƖNA pɩ Iziral tɩŋŋaa Laataara. Ʋ laaba ta Siiria kuoro nɩsɩŋ lɛ. Iziral tɩŋŋaa lɛɛlɛ hɔŋ arɩ fɩɛlɩŋ arɩ ba fa sɩ hɔŋ ŋɩɩ.

⁶ Ama ba fa bɩ Jerobuam wʋbɔmɔ-la ʋ sɩ ŋaa, a leŋ Iziral tɩŋŋaa ma ŋaa ba tɩtɩa leŋe. Veŋ-haal-la ba sɩɩ yɩrɛ Asɩra daaŋ ma fa ha pɛ Samarɩa lɛ nɛ ba kpʋkpaarɛ.

⁷ Siiria kuoro Hazɛɛl fa chaasa kpʋ Jehuahas laalɩyuoroo jesiŋ kala nɛ aŋ ka ja-jɩllaa mahɩŋ balɩa arɩ fii, laalɩŋ janɩŋ torukoba fii, laalɩyuoro-la ma sɩɩ vɛŋ naasɩŋ lɛ bʋɩ fii.

⁸ Wɩalɩŋ dɔnsʋŋ Jehuahas sɩ dii kuoruŋ a ŋaa, ba kala nɛ ba ŋmʋnsa hɛ Iziral tinteeŋ kuoroo wʋŋaalaa teniŋ tʋɔŋ.

⁹ Ŋɩɩ nɛ Jehuahas sʋʋ, ba joŋu hugi Samarɩa lɛ, aŋ ka ʋ nanʋala Jehuas dii kuoruŋ ʋ nyuŋ lɛ.

Jehuas dii kuoruŋ Iziral tinteeŋ lɛ

¹⁰ Jʋas sɩ dii kuoruŋ Juda tinteeŋ lɛ, ʋ jɩsɩŋ mara arɩ fii arɩ balɩpɛ lɛ nɛ Jehuahas nanʋala Jehuas ma dii kuoruŋ Iziral tinteeŋ lɛ. Ʋ hɔŋ Samarɩa lɛ a bemba jɩsɩŋ fii arɩ balɩdʋ.

¹¹ Jehuas fa ŋaa wʋbɔŋŋɔɔ nɛ La TƖƖNA teeŋ, arɩ Nɛbat nanʋala Jerobuam fa sɩ ŋaa wʋbɔŋŋɔɔ ŋɩɩ, a leŋ Iziral tɩŋŋaa ma ŋaa ba tɩtɩa.

¹² Wɩalɩŋ dɔnsʋŋ Jehuas sɩ dii kuoruŋ a ŋaa arɩ wɩalɩŋ ʋ sɩ ŋaa laa yɩrɩŋ, a pɛ ʋ sɩ kɛŋ Juda tinteeŋ kuoro Amazɩa yuo laalɩŋ, ba kala nɛ ba ŋmʋnsa hɛ Iziral tinteeŋ kuoroo wʋŋaalaa teniŋ tʋɔŋ.

¹³ Ŋɩɩ nɛ Jehuas sʋʋ. Ba joŋu hugi Samarɩa lɛ Iziral tinteeŋ kuoroo dɩ-huguŋ. Ka ʋ nanʋala Jerobuam dii kuoruŋ ʋ nyuŋ lɛ.

¹⁴ Ka dɩ Iziral tinteeŋ kuoro Jehuas-na sʋʋ, bʋa kʋbala lɛ Wɩa wʋlaabʋlla Elaasa chaasa wʋwɩɩlɛ a chɩchɛ dɩ ʋ sʋʋ. Kuoro Jehuas mʋ dɩ ʋ naʋ a chɩŋ ʋ sɛmɛ a yel, aŋ bʋl, “Mɩ nyɩmma, mɩ nyɩmma. Ŋ ŋaa Iziral tɩŋŋaa laataarɩ-duo nɛ, dɩ ŋ nɛ sʋba, ɛɛ nɛ la jaŋ ŋaa?”

¹⁵ Ŋɩɩ nɛ Elaasa bʋla pʋ, “Kɛŋ toŋ arɩ to-hɛŋŋɛɛ kaa kɔ.” Jehuas kaa mʋ.

¹⁶ Ʋ bɩra bʋla pɩ Jehuas, “Joŋ toŋ-la a kori.” Ʋ joŋo kori. Ŋɩɩ nɛ Elaasa joŋ ʋ nɩsaa a daŋ Iziral tinteeŋ kuoro Jehuas nɩsaa lɛ,

¹⁷ aŋ bʋl, “Kɛŋ tokoro-la sɩ hɛ wɩɩpɔsʋŋ dɩɩrɩŋ suri.” Jehuas kaa suri. Elaasa bʋl, “Yuo.” Ŋɩɩ nɛ ʋ yuo toŋ-la. Elaasa bɩra bʋl, “To-hɛmɩŋ deeŋ daga arɩ La TƖƖNA jaŋ pɛ ma lɛ dɩ ma chaasa yuo dii Siiria tɩŋŋaa lee-la ba sɩɩ yɩrɛ Afɛk.”

¹⁸ Ŋɩɩ nɛ Elaasa bɩra bʋl, “Paa to-hɛmɛ-la a vɩɩrɛ tinteeŋ.” Jehuas paa a vɩɩrɛ tinteeŋ naansɩɩŋ butori aŋ leŋ.

¹⁹ Wɩa wʋlaabʋlla Elaasa na baanɩŋ ʋ nyuŋ a bʋl, “Ʋ fa maga dɩ ŋ joŋo vɩɩrɛ tinteeŋ naansɩɩŋ bʋnɔŋ koo bʋlɩdʋ nɛ, ka dɩ ma fa wuo yuo dii Siiria tɩŋŋaa a kaa mʋ wuu. Ama ŋ sɩ ŋaa ŋ-la, naansɩɩŋ butori dʋndʋŋ nɛ ma jaŋ yuo diiba aŋ bɩra bɩ jaŋ wuoba.”

²⁰ Ŋɩɩ nɛ Elaasa sʋʋ, ba joŋu hugi. Jɩna na-kala duoŋ-puso lɛ, Mʋab tɩŋŋaa yie hɛ laalɩyuoroo ba mʋ yuo Iziral tɩŋŋaa nɛ.

²¹ Bʋa kʋbala lɛ Iziral tɩŋŋaa huhugi baal kʋbala sɩ sʋba, a na Mʋab laalɩyuoro-la dɩ baa kɔ, ba guu joŋ sʋʋ-la a lo hɛ bʋa-la lɛ ba sɩ hugi Elaasa aŋ fá. Sʋʋ-la sɩ tuu digi Elaasa haŋgbelee, baal-la sii sʋʋŋ lɛ a sii chɩŋ.

²² Jehuahas kuoruŋ bʋa kala lɛ, Siiria kuoro Hazɛɛl walɩmɛ Iziral tɩŋŋaa nɛ woruŋ.

²³ Ama La TƖƖNA fa fá Iziral tɩŋŋaa nenige, a tɩŋ nii-la sɩ hɛ ʋ dɩ Iziral tɩŋŋaa naabalɩmaba, Abɩraham, Aɩzɩk arɩ Jekɔb pɛgɛ wɩaa. Ʋ ha maachie bɩ leŋe ba cheiba, ʋ ha bɩ chaasa vɩaba ta ma.

²⁴ Siiria kuoro Hazɛɛl sʋʋ, ka ʋ nanʋala Bɛŋ-Hadad dii kuoruŋ ʋ nyuŋ lɛ.

²⁵ Ŋɩɩ nɛ Jehuahas nanʋala Jehuas yuo dii Hazɛɛl nanʋala Bɛŋ-Hadad a laa tasɩ-la kala ʋ nyɩmma Hazɛɛl fa sɩ yuo laa Jehuas nyɩmma Jehuahas teeŋ. Naansɩɩŋ butori nɛ Jehuas yuo dii Bɛŋ-Hadad aŋ laa Iziral tɩŋŋaa tasɩŋ.