2 KUOROO 12 - WƖA TENIŊ

Jʋas wasa bɩrɩmɛ Wɩa dɩa

¹ Jehu sɩ dii kuoruŋ Iziral tinteeŋ lɛ, ʋ jɩ-pɛɩ lɛ nɛ Jʋas ma dii kuoruŋ Juda tinteeŋ lɛ. Ʋ hɔŋ Jerusalɛm lɛ a bemba jɩsɩŋ mahɩŋ balɩa. Ʋ naaŋ yɩrɩŋ nɛ fa Zɩbɩa, a lɩɩ taŋ-la ba sɩɩ yɩrɛ Bɛɛsɩba.

² Jʋas mɩɩsɩŋ kala lɛ, ʋ fa ŋaa wɩalɩŋ sɩɩ tɔrɛ La TƖƖNA tʋɔŋ nɛ, bɛɛ wɩaa, Wɩɩsʋllɩ sɩpaalaara Jehoyada nɛ faa dagʋ.

³ Ama, Jʋas fa bɩ vesiŋ dɩ-kpaarɩa-la ŋmoo ta, nɩaa fa haa kpaarɛ vesiŋ nɛ a nyɩnyɩgɛ kʋsʋɔrʋsʋŋ nɩmɛ.

⁴ Tapʋlɩɩ kʋbala Jʋas bʋla pɩ Wɩɩsʋllɩ sɩpaalaaraa, “Má laa moribie-la kala ba sɩ kaa kʋʋ ŋaa Wɩɩsʋlʋŋ La TƖƖNA dɩɩ-bal-la lɛ a bil, moribie-la ba sɩ dɩɩsɛ nɩaa ba tiŋ, moribie-la ba sɩ kaa kʋ lɩɩsɛ niiriŋ arɩ moribie-la nɩaa tʋɔŋ sɩ tɔrɛ ba kaa kɔ Wɩa dɩɩ-bal-la.

⁵ Wɩɩsʋllɩ sɩpaalaarʋ kala maga dɩ ʋ laa moribie-la lee-la ʋ sɩɩ beŋ nɛ, nɩɩ-la sɩɩ bil moribiee teeŋ a leŋ dɩ ba kaa wasɛ Wɩa dɩɩ-bal-la lere-la sɩ cheye.”

⁶ Ama Jʋas sɩ dii kuoruŋ ʋ jɩsɩŋ mara arɩ batori lɛ, dɩ Wɩɩsʋllɩ sɩpaalaaraa ha bɩ Wɩa dɩɩ-bal-la wasa.

⁷ Ŋɩɩ nɛ Jʋas yɩrɛ Jehoyada arɩ Wɩɩsʋllɩ sɩpaalaaraa dɔnsʋŋ a pɩɛsɛba, “Bɛɛ nɛ tɩɩ ma ha bɩ Wɩa dɩɩ-balɩŋ lere-la sɩ cheye kʋŋkala wasa? A chɩŋ lɛɛlɛ a kaa mʋ, ma kʋŋkala bɩra sɩ́ moribie-la laa bil. Dɩ ma nɛ laa, má joŋo pa dɩ ba kaa wasɛ Wɩa dɩɩ-bal-la.”

⁸ Ŋɩɩ nɛ Wɩɩsʋllɩ sɩpaalaaraa sɛɩ arɩ ba bɩra bɩ jaŋ laa moribie-la nɩaa teeŋ a bil, ba tɩtɩa ma dee bɩra bɩ jaŋ beŋ Wɩa dɩɩ-bal-la wasɩŋ wɩaa.

⁹ Jehoyada chɛ dagɩ-bie a luri bʋa daga-la nii-tɔlɔ lɛ, a joŋo bil ŋ sɩɩ jʋʋ Wɩa dɩɩ-bal-la nadiiŋ Wɩɩsʋllɩ koru-la sɛmɛ. Wɩɩsʋllɩ sɩpaalaaraa sɩɩ pɔ Wɩa dɩɩ-bal-la boiŋ niiŋ joŋ moribie-la kala nɩaa sɩ kaa kɔ a hɩhɛ dagɩ-bie-la tʋɔŋ.

¹⁰ Bʋa na-kala lɛ dɩ ba nɛ na dɩ moribie-la yʋga daga-la tʋɔŋ, nɩɩ-la sɩɩ ŋmʋnsɛ kuoro teniŋ arɩ Wɩɩsʋllɩ sɩpaalaaraa nɩhɩaŋ nɛ yie kʋ chaarɛ moribie-la a dɩɩsɛ, aŋ paa hɛ lʋagaba lɛ.

¹¹ Ba yie joŋ moribie-la pɩ nɩalɩŋ ba sɩ lɩɩsa ba bibeŋ nɩalɩŋ sɩɩ wasɛ Wɩa dɩɩ-bal-la. Ba laa tiŋ kapɩntaba arɩ dɩɩ-saara-la a pɛ

¹² meesimba lɛ arɩ nɩalɩŋ sɩɩ yɛrɛ tabɩaa. Moribie-la tʋɔŋ nɛ ba yie lɩɩsa yɔɔ daasɩŋ arɩ tabɩa-la ba sɩ kaa wʋwasɛ Wɩa dɩɩ-bal-la, arɩ chɩŋ na-kala ba sɩ ŋmobo dɩa-la wasɩŋ lɛ.

¹³ Moribie-la nɩaa sɩ kaa kʋ pa Wɩa dɩa lɛ, ba bɩ ba tʋɔŋ lɩɩsa yɔɔ hɔpʋla taasɩ-gbansɩŋ, kɩalɩŋ ba sɩ kaa wasɛ chaaŋ ŋmɛnɩŋ tɩta, kʋmɩsɩrɩ gbansɩŋ, banyilliŋ koo kʋŋ na-kala ba sɩ kɛŋ sɛlɩmɛ koo hɔpʋla ŋaa sɩ hɛ La TƖƖNA dɩɩ-bal-la lɛ.

¹⁴ Ba yie joŋo tiŋ tɩntɩnna-la nɛ, aŋ pɛ kaa yɔɔ kɩalɩŋ ba sɩ kaa wʋwasɛ Wɩa dɩɩ-bal-la.

¹⁵ Nɩalɩŋ sɩ beŋ tɩntɩnna-la ba wʋwasɛ Wɩa dɩɩ-bal-la kɛŋ wʋtɩtɩɩ, ŋɩɩ wɩaa nʋʋkala bɩ ba pɩɛsa chɩchɛ dɩ ʋ na ŋɩɩ ba sɩ kɛŋ moribie-la tɩtɩŋ.

¹⁶ Moribie-la ba sɩ time a pɛ cheeriŋ Wɩɩsʋlʋŋ arɩ wʋbɔŋŋɔɔ joŋo chɛnɩŋ Wɩɩsʋlʋŋ lɛ, ba bɩ ba kaa jʋʋ hɛ dagɩ-bie-la sɩ chɩŋ La TƖƖNA dɩɩ-bal-la tʋɔŋ, Wɩɩsʋllɩ sɩpaalaaraa nɛ tɩɩba.

¹⁷ Bʋa deeŋ tɩtɩa lɛ nɛ Siiria kuoro Hazɛɛl mʋ yuo dii taŋ-la ba sɩɩ yɩrɛ Gaf, aŋ bɩra mʋ dɩ ʋ yuo Jerusalɛm ma.

¹⁸ Ŋɩɩ nɛ Juda tinteeŋ kuoro Jʋas sii paa kʋzɔmɔ-la kala ʋ dɩ ʋ naabalɩmaba: Jehosafat, Jehoram arɩ Ahazɩa fa sɩ joŋo pɩ La TƖƖNA, a pɛ sɛlɩmɛ-la kala fa sɩ hɛ La TƖƖNA dɩɩ-bal-la lɛ arɩ ʋ kuoru dɩa lɛ, a kaa mʋ pɩ Siiria tinteeŋ kuoro Hazɛɛl. Ʋ laa aŋ bɩra bɩ Jerusalɛm yuo.

¹⁹ Wɩalɩŋ dɔnsʋŋ Jʋas sɩ dii kuoruŋ a ŋaa, ba kala nɛ ba ŋmʋnsa hɛ Juda tinteeŋ kuoroo wʋŋaalaa teniŋ tʋɔŋ.

²⁰ Ŋɩɩ nɛ Jʋas tɩntɩnnɩ-hɩasɩŋ sii chɩŋ ʋ lɛ, a kpʋʋ dɩa kʋbala lɛ ba sɩ dɩŋ tinteeŋ aŋ saa, Jerusalɛm wɩɩpɔsʋŋ dɩɩrɩŋ a hɛ Sɩla wombiiŋ.

²¹ Tɩntɩnnɩ-hɩasɩ-la fa sɩ kpʋʋ nɛ ŋaa Sɩmɩaf nanʋala Jozabad arɩ Sɔma nanʋala Jehozabad. Ʋ sɩ sʋba, ba joŋu hugi ʋ nyɩmmaba dɩ-huguŋ Devit taŋ-la lɛ. Ka ʋ nanʋala Amazɩa dii kuoruŋ ʋ nyuŋ lɛ.