2 KUOROO 11 - WƖA TENIŊ

Atalɩa arɩ Jʋas

¹ Ahazɩa naaŋ Atalɩa sɩ kʋ jɩŋ arɩ ʋ nanʋala Ahazɩa sɩ ŋaa Juda kuoro sʋba nɛ, ʋ wʋwalɩmɛ dɩ ʋ kpʋ nʋʋkala sɩ jaŋ wuo dii kuorii-la ba dɩa lɛ.

² Ama kuoro Jehoram tolo Jehoseba sɩ ŋaa Ahazɩa dɩhaala lʋara kɛŋ kuoro Ahazɩa hambolibiisi-la ba sɩɩ chɛ dɩ ba kpʋ tʋɔŋ dɔŋɔ a faa. Bile yɩrɩŋ nɛ fa Jʋas. Ʋ fa kɛŋ ʋ dɩ nɩɩ-la sɩɩ benu nɛ a kaa jʋʋ faa Wɩa dɩɩ-balɩŋ dɩɩ-pɩnɩŋ dɔŋɔ lɛ. Ŋɩɩ nɛ Atalɩa fa bɩ wuo kpʋʋ.

³ Jʋas arɩ nɩɩ-la sɩɩ benu faa La TƖƖNA dɩɩ-bal-la lɛ ŋɩɩ nɛ jɩsɩŋ balɩdʋ, ka Ahazɩa naaŋ Atalɩa dii kuoruŋ a bibeŋ Juda tinteeŋ.

⁴ Ʋ jɩ-pɛɩ lɛ nɛ Jehoyada sɩ ŋaa Wɩɩsʋllɩ sɩpaalaara tɩma yɩrɛ laalɩyuori-hɩasɩ-la sɩɩ beŋ laalɩyuoroo zɔlɔba arɩ laalɩyuoro-la sɩɩ pɔ kuoro arɩ nɩalɩŋ sɩɩ pɔ kuoro dɩa ba nɩhɩasɩŋ, a kɛmba jʋʋ Wɩa dɩɩ-bal-la tʋɔŋ. Jehoyada arɩ ba bil niiŋ pɩ dɔŋɔ, aŋ ka ʋ leŋ ba ŋmɩɛsɛ arɩ ba jaŋ chɩŋ wɩɩ-la ʋ sɩ bɩɩna dɩ ʋ ŋaa lɛ. Ŋɩɩ nɛ ka ʋ kɛŋ kuoro bile dagɛba.

⁵ Ŋɩɩ nɛ aŋ bʋla pɩba, “Wɩɩ-la sɩ maga dɩ ma ŋaa nɛ ŋ-la: Chɛ-wiesii-la chɛɛŋ, ma laalɩyuori bugoo batori nɛ jaŋ tɩŋ, buguŋ dɔŋɔ jaŋ pɔ kuoro dɩa,

⁶ dɩ dɔŋɔ ma pɔ boi-baal-la ba sɩɩ yɩrɛ Suu. Ka dɩ dɔŋɔ ma pɔ boiŋ nii-la sɩ hɛ nɩalɩŋ sɩɩ pɔ Wɩa dɩɩ-bal-la boiŋ niiŋ harɩŋ.

⁷ Ma bugo-la balɩa sɩ bɩ tɩntɩŋŋaa ka kɔ chɛ-wiesii-la chɛɛŋ, má maga dɩ ma ma kʋ pɔ kuoro Jʋas nɛ Wɩa dɩɩ-balɩŋ lɛ tapʋlɩɩ-la.

⁸ Má kala kori ma laalɩyuori kɩaa a chɩna golli kuoro a pɔʋ, dɩ nʋʋkala nɛ kʋ kpagɛma, má kpʋʋ. Má kpagɛ kuoro lee na-kala ʋ sɩɩ mʋ.”

⁹ Ŋɩɩ nɛ laalɩyuori-hɩasɩ-la sɩɩ beŋ laalɩyuoroo zɔlɔba ŋaa ŋɩɩ Jehoyada sɩ ŋaa Wɩɩsʋllɩ sɩpaalaara sɩ dagɛba. Ba kʋŋkala kɛŋ ʋ nɩalɩŋ sɩ maga dɩ ba mʋ tɩntɩŋŋaa chɛ-wiesii-la chɛɛŋ arɩ nɩalɩŋ fa sɩ maga dɩ ba wiesi, ba kala mʋ Jehoyada teeŋ.

¹⁰ Ʋ paa kuoro Devit tiŋŋee arɩ ʋ hɔɔtaalɩ-la laalɩyuoroo sɩ kaa kɛrɛɛ laa bayuori hɛŋŋɛɛ sɩ hɛ La TƖƖNA dɩɩ-bal-la lɛ, a pɩ laalɩyuori-hɩasɩ-la.

¹¹ Nɩalɩŋ sɩɩ pɔ leriŋ kori ba laalɩyuori kɩaa a chɩna golli kuoro a kpagɛ Wɩɩsʋllɩ koru-la arɩ Wɩa dɩɩ-bal-la a pɔ kuoro Jʋas, a chɩŋ Wɩa dɩɩ-bal-la wɩɩpɔsʋŋ nadiiŋ dɩɩrɩŋ a kaa mʋ wɩɩpɔsʋŋ nagʋa dɩɩrɩŋ.

¹² Ŋɩɩ nɛ Jehoyada kɛŋ Ahazɩa nanʋala Jʋas kʋ lɩɩ a joŋ kuoru nyunchuulo chuu, aŋ joŋ teniŋ pʋ. Teŋ-la lɛ nɛ ba ŋmʋnsɛ wombie-la kuoroo sɩ maga dɩ ba to a bibeŋ tintee-la hɛ. Ŋɩɩ nɛ ba joŋ nʋʋŋ tɩsʋ a dagɛ arɩ ʋ nɛ lɛɛlɛ ŋaa kuoro. Nɩalɩŋ kala porisi nɩsaa aŋ ŋaa goŋ, “A leŋ dɩ kuoro mɩɩsɩŋ duomi.”

¹³ Atalɩa sɩ nɩɩ goŋ-la nɩalɩŋ sɩɩ pɔ leriŋ arɩ nɩaa dɔnsʋŋ sɩ ŋaa, ʋ mʋ nɩalɩŋ teeŋ La TƖƖNA dɩɩ-bal-la.

¹⁴ Ʋ sɩ bene, ʋ na kuoro Jʋas dɩ ʋ chɩna a kpagɛ jebiiŋ arɩ ba naabarɩŋ sɩ dagɛ ŋɩɩ. Ka laalɩyuori-hɩasɩŋ arɩ nɩalɩŋ sɩɩ ŋmʋʋ nyilliŋ chɩŋ ʋ sɛmɛ. Tintee-la nɩaa kala jʋjʋɔsɛ aŋ ŋmʋŋmʋʋ nyilliŋ. Ŋɩɩ nɛ Atalɩa tʋɔŋ chei, ʋ kɛŋ ʋ gɛnnɩŋ kɩɛsɛ aŋ ŋaa goŋ a bʋl, “Ma ŋaamɛ zɛmbɛ, ma ŋaamɛ zɛmbɛ.”

¹⁵ Jehoyada bɩra bʋla pɩ laalɩyuori-hɩasɩ-la sɩɩ beŋ laalɩyuoroo zɔlɔba, “Má kɛŋ Atalɩa pɩɛga to nɩalɩŋ sɩɩ pɔ leriŋ tʋɔŋ kʋ lɩɩ, má kpʋ nʋʋkala sɩɩ chɛ dɩ ʋ laaʋ ta, ama má sɩ́ Atalɩa kpʋ a kpagɛ La TƖƖNA dɩɩ-bal-la lee-kala.”

¹⁶ Ŋɩɩ nɛ ba kɛnʋ, dɩ ʋ yi lee-la janɩŋ sɩ yie to a jʋjʋʋ kuoro dɩa a kpʋʋ nɩmɛ.

¹⁷ Jehoyada sɩ ŋaa Wɩɩsʋllɩ sɩpaalaara, leŋ kuoro Jʋas arɩ nɩalɩŋ hɛ niiŋ arɩ ba jaŋ ŋaa La TƖƖNA nɩaa. Ʋ bɩra leŋ nɩalɩŋ arɩ kuoro ma hɛ niiŋ pɩ dɔŋɔ arɩ ba jaŋ bʋla nɩnɩɩ dɔŋɔ lɛ.

¹⁸ Ŋɩɩ nɛ nɩalɩŋ kala sɩ hɛ tintee-la lɛ mʋ ŋmoo Baal vene-la dɩa-la lo a yɛrɛ ʋ korunuŋ kala, a ŋmoo tɔmɔ-la kala yɛrɛ muno muno, aŋ kpʋ nɩɩ-la sɩɩ kpaarɛ Baal baa yɩrɛ Mataŋ korunu-la sɩpaaŋ. Ŋɩɩ nɛ Jehoyada lɩɩsɛ nɩaa ba pʋpɔ Wɩa dɩɩ-bal-la.

¹⁹ Ka ʋ kɛŋ laalɩyuori-hɩasɩ-la sɩɩ beŋ laalɩyuoroo zɔlɔba arɩ nɩalɩŋ sɩɩ pɔ kuoro arɩ nɩalɩŋ sɩɩ pɔ kuoro dɩa arɩ taŋ-la nɩaa kala ba kɛŋ kuoro Jʋas a lɩɩ Wɩa dɩɩ-bal-la lɛ. Ba to nɩalɩŋ sɩɩ pɔ leriŋ boi-baalɩŋ a jʋʋ kuoru dɩa, a hollu ʋ kuoru kpasa nyuŋ.

²⁰ Ŋɩɩ nɛ nɩalɩŋ kala sɩ hɛ tintee-la lɛ jʋjʋɔsɛ. Jerusalɛm kala lɛɛlɛ fɩɛla pɩŋ sɔm, a tɩŋ ba sɩ kpʋ Atalɩa kuoru dɩa lɛ wɩaa.

²¹ Jʋas fa ŋaa jɩsɩŋ balɩpɛ nɛ aŋ dii kuoruŋ.