2 KUOROO 10 - WƖA TENIŊ

Ba kpʋ Ahab doho nɩaa

¹ Ahab doho nɩaa mahɩŋ batori arɩ fii nɛ fa hɛ Samarɩa lɛ. Ŋɩɩ nɛ Jehu ŋmʋnsɛ tenniŋ a pa ba kaa mʋ Samarɩa a pɩ taŋ-la tɩntɩnnɩ-hɩasɩŋ, arɩ ba nɩhɩasɩŋ arɩ nɩalɩŋ sɩɩ beŋ Ahab doho nɩaa. Ŋ-la nɛ ʋ ŋmʋnsa hɛ teŋ-la lɛ:

² “Ma nɩɩ beŋ kuoro doho nɩaa, ma kɛŋ janɩŋ arɩ laalɩŋ janɩŋ torukoba nɛ, a kɛŋ laalɩyuori kɩaa, aŋ saa kɛrɛ golli ma taŋ ma. Ŋɩɩ wɩaa, dɩ ma nɛ laa teniŋ deeŋ,

³ má lɩɩsɛ ma nɩhɩaŋ biiriŋ tʋɔŋ dɔŋɔ ma sɩ bene dɩ ʋ maga, a leŋ dɩ ʋ dii ʋ nyɩmma kuoruŋ, ka ma chɩŋ ʋ harɩŋ a yuo laa Ahab doho nɩaa.”

⁴ Ŋɩɩ nɛ fawʋllʋŋ chaasa kɛmba ba bʋl, “Dɩ kuoroo balɩa nɛ paala bɩ wuo yuo dii Jehu, ɛɛ nɛ saa la-na jaŋ ŋaa a wuou?”

⁵ Ŋɩɩ nɛ kuoro dɩa tɩntɩnnɩ-hɩaŋ, arɩ tɩntɩnnɩ-hɩaŋ-la sɩɩ beŋ taŋ-la, taŋ-la nɩhɩasɩŋ arɩ nɩalɩŋ sɩɩ beŋ Ahab doho nɩaa tɩŋ ba mʋ bʋla pɩ Jehu, “La ŋaa ŋ tɩntɩnnaa nɛ, ŋɩɩ wɩaa la jaŋ ŋaa wɩɩ na-kala ŋ sɩ bʋla. La-na bɩ jaŋ lɩɩsɛ nʋʋkala dɩ ʋ ŋaa la kuoro, ŋ-na ŋaa wɩɩ-la kala ŋ sɩ cho.”

⁶ Ŋɩɩ nɛ Jehu bɩra ŋmʋnsɛ teŋ lɩa a pɩba a bʋl, “Dɩ ma nɛ ŋaa mɩ nɩaa aa nɩɩ mɩ niiŋ wɩaa, má keri ma nɩhɩaŋ biiriŋ nyusuŋ chie bʋa deeŋ lɛ a kaa kɔ Jɛzɩrɛl a pɩmɛ.” Bʋa deeŋ lɛ dɩ kuoro Ahab biiriŋ mahɩŋ batori arɩ fii-la fa hɛ taŋ-la nɩhɩasɩŋ nɩsɩŋ lɛ nɛ ba bibemba.

⁷ Ba sɩ laa teŋ-la, ba kɛsɛ kuori-biiri-la mahɩŋ batori arɩ fii a keri ba nyusuŋ a hɛ sinsiŋ lɛ a kaa mʋ pɩ Jehu Jɛzɩrɛl lɛ.

⁸ Tɩndaara kʋ bʋla pɩ Jehu, “Ba kɛŋ kuori-biiri-la nyusuŋ kɔ nɛ.” Jehu bʋl, “Má jomba bil puguloo balɩa taŋ-la boi-baalɩŋ lɛ dɩ taŋ pʋl.”

⁹ Taŋ sɩ pʋla chʋchʋɔŋ, Jehu sii lɩɩ bʋla pɩ nɩalɩŋ kala sɩ hɛ lee-la, “Ma nɩaa deemba bɩ wɩɩkala cheye. Mɩ-na nɛ sii chɩŋ mɩ nɩhɩaŋ kuoro Joram lɛ a kpʋʋ. Ka nɩaa deemba ma saa, kʋbɛɛ nɛ kpʋba?

¹⁰ Ma jɩŋ arɩ La TƖƖNA nɛ ŋaa ŋɩɩ, dɩ wɩalɩŋ kala ʋ sɩ bʋla kʋ ŋaa wʋtɩtɩɩ. Ʋ fa to ʋ tɩntɩnna Ɩlaaja lɛ nɛ a bʋl wɩaa deemba kala sɩ jaŋ ŋaa Ahab dɩa nɩaa lɛ.”

¹¹ Ŋɩɩ nɛ Jehu kpʋ Ahab doho nɩkaanaa kala sɩ hɛ Jɛzɩrɛl lɛ. Ʋ tɩntɩnnɩ-hɩasɩŋ, ʋ nandɔnsʋŋ arɩ ʋ nɩalɩŋ sɩɩ kpaarɛ vesiŋ. Ba kʋŋkala bɩ ka.

¹² Jehu lɩɩ nɩmɛ a to Samarɩa dɩɩrɩŋ mʋmʋ. Ʋ sɩ mʋ yi Bɛf Ɛkɛd, lee-la ba sɩɩ yɩrɛ pie-daaraa buguŋ,

¹³ nɩmɛ nɛ ʋ cheŋ Juda tinteeŋ kuoro Ahazɩa naambiiriŋ dɔnsʋŋ a pɩɛsɛba, “Kʋbɛɛba nɛ ma ŋaa?” Ba bʋl, “La ŋaa Ahazɩa naambiiriŋ nɛ. Laa mʋ dɩ la lɔllɛ Kuoro Ahab arɩ ʋ haala Jɛzɛbɛl dɩa nɩaa nɛ.”

¹⁴ Jehu bʋla pɩ ʋ tɩntɩnnɩ-hɩasɩŋ, “Má kɛsɛba.” Ŋɩɩ nɛ ba kɛsɛba, ba nɩaa mahɩŋ balɩa arɩ balɩa a kpʋba vil kʋbala sɩ kpagɛ nɩmɛ bʋbʋɔŋ. Ba kʋŋkala bɩ ka.

¹⁵ Ʋ sɩ lɩɩ nɩmɛ, ʋ bɩra mʋ cheŋ baal kʋbala baa yɩrɛ Jehonadab. Ʋ fa ŋaa Rekab nanʋala nɛ. Ŋɩɩ nɛ Jehu chʋɔlʋ aŋ pɩɛsɛ, “Ŋ chɩŋ mɩ harɩŋ arɩ mɩ sɩ chɩŋ ŋ harɩŋ ŋɩɩ nɛɛ?” Jehonadab bʋl, “Oo mɩ chɩŋ ŋ harɩŋ nɛ.” Jehu bɩra bʋl, “Ŋɩɩ-na kɛŋ ŋ nɩsɩŋ kɔ.” Ŋɩɩ nɛ Jehonadab kɛŋ ʋ nɩsɩŋ mʋ. Jehu kɛŋ a pɛ ʋ lɛ a lɛrʋ hɛ ʋ laalɩŋ jaaba toruko lɛ.

¹⁶ Ŋɩɩ nɛ aŋ bʋl, “Kɔ dɩ la mʋ dɩ ŋ na ŋɩɩ mɩ sɩɩfɩɛsɩŋ sɩ maga La TƖƖNA lɛ.” Ŋɩɩ nɛ ba balɩa jɩl Jehu laalɩŋ jaaba toruko-la a mʋ Samarɩa.

¹⁷ Ba sɩ yi nɩmɛ, Jehu kpʋ Ahab doho nɩkaana-la ma kala sɩ hɛ nɩmɛ. Ba kʋŋkala bɩ ka, arɩ La TƖƖNA fa sɩ to ʋ tɩntɩnna Ɩlaaja lɛ a bʋl ŋɩɩ.

Ba kpʋ Baal veŋ-kpaaraa

¹⁸ Ŋɩɩ nɛ Jehu yɩrɛ nɩalɩŋ kala sɩ hɛ Samarɩa lɛ hɛ dɔŋɔ a bʋla pɩba, “Kuoro Ahab kpaarɛ vene-la ba sɩɩ yɩrɛ Baal mʋa nɛ, ama mɩ-na nɛ jaŋ chaasa kpaarʋ.

¹⁹ Ŋɩɩ wɩaa, má yɩrɛ Baal kpʋkpaaraa kala arɩ nɩalɩŋ kala sɩɩ tou arɩ nɩalɩŋ sɩ kpʋ pʋsʋŋ pʋpʋ. Má sɩ́ ba kʋŋkala kere ta, bɛɛ wɩaa mɩɩ chɛ dɩ mɩ chaasa kpaarɛ Baal nɛ woruŋ. Nɩɩ-la kala nɛ bɩ kɔ, mɩ jaŋ kpʋ tɩɩna.” Jehu ŋaa ŋɩɩ dɩ ʋ nyɩsa kpʋ nɩalɩŋ kala sɩɩ kpaarɛ vene-la ba sɩɩ yɩrɛ Baal nɛ.

²⁰ Jehu bʋl, “Má hɛ tapʋlʋŋ a heele pɩ nɩalɩŋ kala sɩɩ to Baal, dɩ ba kʋ hilimi a kpaarʋ.” Ŋɩɩ nɛ ba heele bʋl wɩɩ-la.

²¹ Jehu leŋ ba tɩma yɩrɛ nɩalɩŋ kala sɩɩ to Baal Iziral tinteeŋ lɛ ba kɔ, ba kʋŋkala bɩ ka. Ba kʋ jʋʋ su Baal dɩa kala pɩlɩm pɩlɩm.

²² Ŋɩɩ nɛ Jehu bʋla pɩ nɩɩ-la sɩɩ beŋ gɛnnɩ-la ba sɩ laala a kpʋkpaarɛ Baal, “Paa gɛnnɩ-la kaa kʋ lɩɩ pɩ nɩalɩŋ sɩɩ to Baal.” Ŋɩɩ nɛ ʋ paa kʋ lɩɩ pɩba.

²³ Ŋɩɩ harɩŋ nɛ, Jehu arɩ Rekab nanʋala Jehonadab ma jʋʋ Baal dɩa-la tʋɔŋ. Ŋɩɩ nɛ Jehu bʋla pɩ nɩalɩŋ sɩɩ kpaarɛ Baal, “Má beŋ ma tʋɔŋ woruŋ a sɩ́ leŋe dɩ La TƖƖNA tɩntɩnnaa guoli ma tʋɔŋ, see ma nɩalɩŋ sɩɩ to Baal dʋndʋŋ.”

²⁴ Ŋɩɩ nɛ ba jʋʋ dɩ ba kpʋ pʋsʋŋ a ŋaa wɩɩ-sʋlʋŋ arɩ kʋnyɩgaa wɩɩ-sʋlʋŋ a pɩ Baal. Bʋa-la lɛ dɩ Jehu leŋe laalɩyuoroo mahɩŋ banɛsɛ chɩŋ jeeŋ harɩŋ. Ʋ bʋla pɩba, “Má kpʋ nɩalɩŋ kala. Dɩ ma kʋŋ nɛ leŋe dɩ ba tʋɔŋ dɔŋɔ fá lɛl, ŋ jaŋ sʋʋ ʋ nyuŋ lɛ.”

²⁵ Jehu sɩ ŋaa kʋnyɩgaa Wɩɩ-sʋla-la dɛrɛ, ʋ bʋla pɩ ʋ nɩalɩŋ sɩ pɔ leriŋ arɩ ʋ laalɩyuori-hɩasɩŋ: “Má jʋʋ kpʋ ba kala, má sɩ́ leŋe dɩ ba kʋbala ma fá lɛl.” Ŋɩɩ nɛ ba jʋʋ a kpʋ ba kala. Nɩalɩŋ sɩ pɔ leriŋ arɩ laalɩyuori-hɩasɩŋ lɛrɛ ba kʋsʋʋnʋŋ kaa lɩɩ dɩ-jalɩŋ, aŋ mɩɩra jʋʋ vene-la dɩa sɩpaaŋ,

²⁶ a paa Baal tabɩa-la kala ba sɩ bile dɩa-la tʋɔŋ a kaa kʋ lɩɩ nyɩgɛ.

²⁷ Ba ŋmoo vene-la kɩaa yɛrɛ aŋ ŋmoo Baal dɩa-la ma lo, a kaa bɩrɩmɛ bɩnɩŋ dɩa, arɩ jɩnɩŋ kala lee-la ha ŋaa bɩnɩŋ dɩa nɛ.

²⁸ Ŋɩɩ nɛ Jehu ŋaa a giri Baal kpaarɩŋ ta Iziral tinteeŋ lɛ.

²⁹ Ama ʋ fa bɩ Nɛbat nanʋala Jerobuam wʋbɔmɔ-la ʋ sɩ ŋaa a leŋ Iziral tɩŋŋaa ma ŋaa ba tɩtɩa leŋe. Ʋ fa haa kpaarɛ ba sɩ kɛŋ sɛlɩmɛ libi nɛ-bel-biisi-la bil tasɩ-la ba sɩɩ yɩrɛ Bɛtɛl arɩ Daŋ lɛ nɛ.

³⁰ Ŋɩɩ nɛ La TƖƖNA bʋla pɩ Jehu, “A tɩŋ ŋ sɩ ŋaa wɩaa woruŋ mɩ teeŋ a to wɩalɩŋ kala mɩ fa sɩ bɩɩna dɩ mɩ ŋaa Ahab dɩa nɩaa lɛ, ŋ doho nɩaa jaŋ dii Iziral tinteeŋ kuoruŋ naansɩɩŋ bʋnɛsɛ a tɩgɛ dɔŋɔ lɛ.”

³¹ Jehu bɩ La TƖƖNA Iziral tɩŋŋaa Wɩa wombii-la ʋ sɩ bile to arɩ ʋ tʋɔŋ kala. Ʋ bɩ Jerobuam wʋbɔmɔ-la ʋ sɩ ŋaa a leŋ Iziral tɩŋŋaa ma ŋaa ba tɩtɩa leŋe.

³² Bʋa-la lɛ nɛ La TƖƖNA suomo leŋ Iziral tɩŋŋaa tinteeŋ mumuuri. Siiria kuoro Hazɛɛl yuo dii Iziral tɩŋŋaa nɛ ba tinteeŋ sɛmɛ na-kala lɛ,

³³ a chɩŋ Jɔdaŋ wɩɩpɔsʋŋ (Gad, Rubiŋ arɩ Manasɛ tinteeŋ), a kaa kɔ Arʋa a kɛŋ Gɩlɩad arɩ Basaŋ pɛ.

³⁴ Jehu sɩ dii kuoruŋ a ŋaa wɩalɩŋ dɔnsʋŋ arɩ wʋduoru-la ʋ sɩ ŋaa, ba kala nɛ ba ŋmʋnsa hɛ Iziral kuoroo wʋŋaalaa teniŋ tʋɔŋ.

³⁵ Ŋɩɩ nɛ Jehu sʋʋ. Ba joŋu hugi ʋ nyɩmmaba dɩ-huguŋ Samarɩa lɛ. Ka ʋ nanʋala Jehuahas dii kuoruŋ ʋ nyuŋ lɛ.

³⁶ Jɩsɩŋ mara arɩ chori nɛ Jehu dii Iziral tinteeŋ kuoruŋ a hɔŋ Samarɩa lɛ a bemba.