2 KUOROO 1 - WƖA TENIŊ

Ɩlaaja arɩ kuoro Ahazɩa

¹ Kuoro Ahab sʋʋŋ harɩŋ, Mʋab tɩŋŋaa vɩa dɩ ba to Iziral tɩŋŋaa.

² Bʋa kʋbala lɛ Iziral kuoro Ahazɩa lɩɩ ʋ lusuŋ nyuŋ a tuu tele bolimi woruŋ Samarɩa lɛ. Ŋɩɩ nɛ ʋ tɩŋ nɩaa a bʋla pɩba, “Má mʋ taŋ-la ba sɩɩ yɩrɛ Ɛkʋrɔŋ a pɩɛsɛ ba vene-la ba sɩɩ yɩrɛ Baal Zebub a na mɩ jaŋ duori?”

³ Ama Wɩa tɩndaara kʋbala kʋ bʋla pɩ Ɩlaaja, Tisibi tɩɩna-la, “Sii mʋ cheŋ Samarɩa kuoro tɩndaara-la a pɩɛsɛba, ‘Wɩa tuo Iziral lɛ nɛ tɩɩ ma mʋmʋ dɩ ma chɛ na wɩaa Ɛkʋrɔŋ tɩŋŋaa vene Baal Zebub teeŋ koo?’

⁴ Má mʋ bʋla pɩ kuoro Ahazɩa arɩ La TƖƖNA sɩ ʋ bɩ jaŋ duori, ʋ jaŋ sʋʋ.” Ŋɩɩ nɛ Ɩlaaja mʋ ŋaa ŋɩɩ La TƖƖNA sɩ bʋla pʋ.

⁵ Tɩndaara-la sɩ mɩɩra kɔ kuoro teeŋ, ʋ pɩɛsɛba, “Bɛɛ nɛ tɩɩ ma mɩɩrɛ ŋɩɩ lɩma?”

⁶ Ba bʋla pʋ, “Baal kʋbala nɛ kʋ cheŋ la, a bʋla pɩla arɩ la mɩɩra kʋ bʋla pɩŋ arɩ La TƖƖNA sɩ, ‘Bɛɛ nɛ tɩɩ ŋ tɩnla dɩ la mʋ Ɛkʋrɔŋ tɩŋŋaa vene-la ba sɩɩ yɩrɛ Baal Zebub teeŋ a chɛ na wɩaa? Ŋ bɩɩna Wɩa tuo Iziral lɛ nɛ koo? A tɩŋ ŋ sɩ ŋaa ŋɩɩ, ŋ bɩ jaŋ duori, ŋ jaŋ sʋʋ.’ ”

⁷ Kuoro pɩɛsɛba, “Ɛɛ nɛ baal-la nagɛ?”

⁸ Ba bʋla pʋ, “Baal-la laalɛ teniŋ gɛrɩŋ nɛ a joŋ tembiiŋ a vɔɔ ʋ tɩŋa.” Kuoro bʋl, “Ɩlaaja nɛ, Tisibi tɩɩna-la.”

⁹ Ŋɩɩ nɛ kuoro tɩŋ ʋ laalɩyuori-hɩaŋ arɩ laalɩyuoroo mahɩŋ balɩa arɩ fii dɩ ba mʋ yɩrɛ Ɩlaaja. Laalɩyuori-hɩaŋ-la mʋa dɩ Ɩlaaja hɔŋ dundolo nyuŋ. Ʋ bʋla pʋ, “Wɩa wʋlaabʋllʋ, kuoro sɩ ŋ kɔ.”

¹⁰ Ɩlaaja bʋla pɩ laalɩyuori-hɩaŋ-la, “Dɩ mɩ nɛ ŋaa Wɩa wʋlaabʋllʋ, a leŋ dɩ nyiniŋ lɩɩ wɩa-nyuŋ a kʋ tuu dii ŋ dɩ ŋ laalɩyuoro-la mahɩŋ balɩa arɩ fii kala.” Ŋɩɩ nɛ nyiniŋ lɩɩ wɩa-nyuŋ a kʋ tuu joŋ laalɩyuori-hɩaŋ-la arɩ ʋ nɩaa kala dii.

¹¹ Ahazɩa sɩ nɩɩ wɩɩ-la sɩ ŋaa, ʋ bɩra tɩŋ laalɩyuori-hɩaŋ dɔŋɔ ma arɩ ʋ laalɩyuoroo mahɩŋ balɩa arɩ fii Ɩlaaja teeŋ. Laalɩyuori-hɩaŋ-la mʋ Ɩlaaja teeŋ a bʋla pʋ, “Wɩa wʋlaabʋllʋ, kuoro sɩ dɩ ŋ sii kɔ lɩma.”

¹² Ɩlaaja bɩra bʋl, “Dɩ mɩ nɛ ŋaa Wɩa wʋlaabʋllʋ, a leŋ dɩ nyiniŋ lɩɩ wɩa-nyuŋ a kʋ tuu joŋ ŋ dɩ ŋ laalɩyuoroo mahɩŋ balɩa arɩ fii-la kala dii.” Ŋɩɩ nɛ nyiniŋ lɩɩ wɩa-nyuŋ a kʋ tuu joŋ laalɩyuori-hɩaŋ-la arɩ ʋ nɩaa kala dii.

¹³ Kuoro sɩ nɩɩ wɩɩ-la sɩ ŋaa, ʋ bɩra tɩŋ laalɩyuori-hɩaŋ dɔŋɔ ma tori arɩ ʋ laalɩyuoroo mahɩŋ balɩa arɩ fii. Laalɩyuori-hɩaŋ-la-na sɩ mʋ Ɩlaaja teeŋ, ʋ tuu kpirimi ʋ sɩpaaŋ, aŋ bʋl, “Wɩa wʋlaabʋllʋ, mɩɩ sʋlʋŋ, fá mɩ dɩ mɩ nɩaa deemba nenige aŋ leŋ dɩ la kɛŋ mɩɩsɩŋ, la ŋaa ŋ tɩntɩnnaa nɛ.

¹⁴ Nyiniŋ laa sɩpaaŋ dii laalɩyuori-hɩasɩŋ balɩa arɩ ba nɩaa nɛ, ama laa sʋlʋŋ, sɩ́ leŋe dɩ ŋɩɩ ŋaa la-na lɛ.”

¹⁵ Wɩa tɩndaara bɩra bʋla pɩ Ɩlaaja, “Sii to ʋ harɩŋ dɩ ma mʋ, sɩ́ fawʋllʋŋ fá.” Ŋɩɩ nɛ Ɩlaaja sii to ʋ harɩŋ ba mʋ kuoro teeŋ.

¹⁶ Ɩlaaja sɩ kɔ, ʋ bʋla pɩ kuoro, “La TƖƖNA sɩ, bɛɛ nɛ tɩɩ ŋ tɩŋ nɩaa dɩ ba mʋ Ɛkʋrɔŋ tɩŋŋaa vene Baal Zebub teeŋ a chɛ na wɩaa? Ŋ bɩɩna Wɩa tuo Iziral lɛ nɛ koo? A tɩŋ ŋ sɩ ŋaa ŋɩɩ wɩaa, ŋ bɩ jaŋ duori. Ŋ jaŋ sʋʋ.”

¹⁷ Ŋɩɩ nɛ kuoro Ahazɩa sɛnɛ sʋʋ arɩ La TƖƖNA sɩ to Ɩlaaja lɛ a bʋl ŋɩɩ. Ahazɩa fa bɩ hambolibie kɛnɛ. Ŋɩɩ nɛ ʋ naambie Joram laa ʋ nyuŋ a dii kuoruŋ. Jehosafat nanʋala Jehoram sɩ dii Juda tinteeŋ kuoruŋ, ʋ jɩ-lɩa lɛ nɛ ŋɩɩ.

¹⁸ Ahazɩa sɩ dii kuoruŋ a ŋaa wɩalɩŋ dɔnsʋŋ, ba kala nɛ ba ŋmʋnsa hɛ Iziral tinteeŋ kuoroo wʋŋaalaa teniŋ tʋɔŋ.