2 SAMƲƐL 9 - WƖA TENIŊ

Devit arɩ Mɛfɩbɔsɛf

¹ Tapʋlɩɩ kʋbala Devit pɩɛsɛ, “Nʋʋ ha hɛ Sɔɔl dɩa lɛ mɩ sɩ jaŋ wuo dii zile ʋ lɛ, a tɩŋ Jonataŋ wɩaa?”

² Bʋa-la lɛ dɩ Sɔɔl dɩa tɩntɩnnaa dɔŋɔ hɛ nɩmɛ baa yɩrɛ Ziba. Ba yɩrʋ ʋ kɔ kuoro Devit sɩpaaŋ, ʋ pɩɛsʋ, “Ŋ nɛ baa yɩrɛ Ziba?” Tɩntɩnnʋ-la bʋl, “Kuoro, mɩ nɛ.”

³ Kuoro bɩra pɩɛsɛ, “Nʋʋ dɔŋ bɩra tuo Sɔɔl dɩa lɛ mɩ sɩ jaŋ wuo dagɛ Wɩa chonuŋ ʋ lɛɛ?” Zɩba bʋla pɩ kuoro, “Jonataŋ bii nɛ ha hɛ nɩmɛ, ama ʋ ŋaa gbɛrɩgʋ nɛ.”

⁴ Kuoro pɩɛsɛ, “Nɩɩ nɛ ʋ hɛ?” Ziba bʋl, “Ʋ nɛ hɛ Amɩɛl nanʋala Makɩɩ dɩa sɩ hɛ taŋ-la ba sɩɩ yɩrɛ Lo Dɛba lɛ.”

⁵ Ŋɩɩ nɛ kuoro Devit ŋaa ba mʋ Lo Dɛba, Amɩɛl nanʋala Makɩɩ dɩa a kɛnʋ kɔ.

⁶ Jonataŋ nanʋala Mɛfɩbɔsɛf, Sɔɔl nihiŋ sɩ kɔ Devit teeŋ, ʋ tuu kpirimi ʋ sɩpaaŋ nɛ a zilu. Devit yɩrʋ, “Mɛfɩbɔsɛf!” Ʋ bʋl, “Namɛ, kuoro.”

⁷ Devit bʋla pʋ, “Sɩ́ leŋe dɩ ŋ bɔyɛ joŋ, mɩ jaŋ chaasa dagɛ mɩ chonuŋ a pɩŋ a tɩŋ ŋ nyɩmma Jonataŋ wɩaa. Mɩ jaŋ joŋ tintee-la kala sɩ ŋaa ŋ naabalɩma Sɔɔl kʋŋ a pɩŋ, aŋ ka dɩ ŋ didii kɩaa ma mɩ dɩa lɛ bʋa na-kala.”

⁸ Mɛfɩbɔsɛf bɩra tuu kpirimi aŋ bʋl, “Bɛɛ nɛ tɩɩ ŋ chɩl mɩ wɩaa ŋ-la? Mɩ paala bɩ va-sʋʋŋ lɛ kpɩa.”

⁹ Ŋɩɩ nɛ kuoro yɩrɛ Ziba, Sɔɔl tɩntɩnnʋ-la a bʋla pʋ, “Mɩ joŋ kʋŋ na-kala sɩ ŋaa ŋ nɩhɩaŋ Sɔɔl arɩ ʋ dɩa nɩaa kʋŋ a pɩ ʋ nihiŋ nɛ.

¹⁰ Ŋ dɩ ŋ hambolibiisiŋ arɩ ŋ tɩntɩnnaa nɛ jaŋ pɩpɛrɛ tintee-la lɛ, a kɛŋ baga-la kɩaa kʋʋ pɩ ŋ nɩhɩaŋ dɩa nɩaa dɩ ba didii. Ŋ nɩhɩaŋ nihiŋ Mɛfɩbɔsɛf-na jaŋ didii kɩaa mɩ dɩa lɛ.” (Ziba fa kɛŋ hambolibiisiŋ fii arɩ banɔŋ nɛ, tɩntɩnnaa ma mara.)

¹¹ Ŋɩɩ nɛ Ziba bʋla pɩ kuoro, “Mɩ-na ŋ tɩntɩnna jaŋ ŋaa wɩɩ-la kala ŋ sɩ bʋla.” Ŋɩɩ nɛ ka Mɛfɩbɔsɛf didii kɩaa Devit dɩa lɛ a nagɛ ʋ ma ŋaa kuoro biiriŋ dɔŋɔ nɛ.

¹² Mɛfɩbɔsɛf lʋl hambolibii-bie kʋbala nɛ baa yɩrɛ Mɩka. Ziba dɩa nɩaa kala fa ŋaa Mɛfɩbɔsɛf tɩntɩnnaa nɛ.

¹³ Mɛfɩbɔsɛf naasɩŋ kala balɩa nɛ fa sʋba. Ʋ fa hɛ Jerusalɛm lɛ nɛ, a didii kɩaa kuoro dɩa lɛ.