2 SAMƲƐL 8 - WƖA TENIŊ

Lere-la Devit sɩ yuo dii

¹ Bʋa kʋbala lɛ nɛ, Devit yuo dii Fɩlɩsɩtɩa tɩŋŋaa, aŋ laa taŋ-la ba sɩɩ yɩrɛ Mɛtɛg Ama ba teeŋ.

² Devit fa bɩra yuo dii Mʋab tɩŋŋaa ma, a leŋ ba laalɩyuoroo pɩŋ tinteeŋ a kɩɛlɛ. Ʋ kɛŋ ŋmɛnɩŋ a magɩsɛba. Dɩ ʋ nɛ magɩsɛ ŋmɛŋ-la naansɩɩŋ butori, ʋ yie kpʋ leree balɩa nɛ aŋ ka kʋbala. Mʋab tɩmma-la sɛɩ Devit bibemba ba tiŋ lampoo a pʋpʋ.

³ Devit bɩra yuo dii Zɔba tinteeŋ kuoro ba sɩɩ yɩrɛ Hadadɛza, Rehob nanʋala. Bʋa-la lɛ dɩ Hadadɛza mʋa dɩ ʋ yuo nɩalɩŋ sɩ hɛ Yufireti fuo-la leriŋ, aŋ laa lee-la bibeŋ.

⁴ Devit fa yuo laa ʋ laalɩŋ janɩŋ torukoba bʋɩ nɛ, a kɛsɛ ʋ ja-jɩllaa ma bʋɩ balɩpɛ, laalɩyuoro-la ma sɩɩ vɛŋ naasɩŋ lɛ bʋɩ mara. Devit fa leŋ janɩŋ sɩ jaŋ wuo lɛrɛ torukoba zɔlɔ nɛ, aŋ gbɛrɩgɛ janɩ-la kʋkaanaa kala.

⁵ Bʋa-la lɛ Siiria tɩmma-la sɩ hɛ Damasɩkʋs lɛ sɩ sii kɔ dɩ ba pɛ Zɔba tinteeŋ kuoro Hadadɛza lɛ, Devit kpʋ ba nɩaa bʋɩ mara arɩ balɩa.

⁶ Devit fa leŋe ʋ laalɩyuoroo dɔnsʋŋ gɔllɔ ŋmoo bugoo Damasɩkʋs tinteeŋ lɛ nɛ, a hɔŋ Siiria tɩmma-la sɩ hɛ lee-la. Ŋɩɩ nɛ Siiria tɩmma-la sɛɩ Devit bibemba, ba tiŋ lampoo pʋpʋ. Lee na-kala Devit sɩ mʋa, La TƖƖNA yie pɛ ʋ lɛ nɛ ʋ yuo dii.

⁷ Devit fa paa laalɩyuori kɩalɩŋ ba sɩ kɛŋ sɛlɩmɛ ŋaa nɛ, hɔɔtaalɩ-la Hadadɛza laalɩyuori-hɩasɩŋ sɩ kaa kɛrɛɛ laa bayuori hɛŋŋɛɛ, a kaa mʋ Jerusalɛm.

⁸ Tasɩŋ deemba: Tɛba arɩ Berotai sɩ ŋaa Hadadɛza lere, kuoro Devit fa paa kɔlɩɩŋ yʋgɛ nɛ woruŋ ba lɛ.

⁹ Taŋ-la ba sɩɩ yɩrɛ Hamaf, ʋ kuoro Tou sɩ nɩa dɩ Devit yuo dii Hadadɛza laalɩyuoroo kala,

¹⁰ ʋ tɩŋ ʋ nanʋala Joram dɩ ʋ mʋ lɔllɛ kuoro Devit, a tɩŋ ʋ sɩ yuo dii Hadadɛza wɩaa. Tou arɩ Hadadɛza ma fa laa sɩpaaŋ yuo laalɩŋ nɛ. Joram kɛŋ hɔpʋla, sɛlɩmɛ arɩ kɔlɩɩŋ kɩaa a kaa mʋ pʋ.

¹¹ Devit fa sɩ laa kɩalɩŋ, ʋ joŋo hɛ La TƖƖNA nɩsɩŋ lɛ nɛ, a nagɛ ʋ sɩ joŋ hɔpʋla arɩ sɛlɩmɛ-la ʋ sɩ yuo laa tinteyee deemba kala teeŋ a hɛ ʋ nɩsɩŋ lɛ ŋɩɩ:

¹² Ɛdɔm, Mʋab, Amɔŋ, Fɩlɩsɩtɩa arɩ Amalɛk tɩŋŋaa teeŋ, a pɛ kɩalɩŋ ʋ sɩ yuo laa Zɔba kuoro Hadadɛza, Rehob nanʋal-la teeŋ.

¹³ Devit yɩrɩŋ fa faasa sii nɛ woruŋ, ʋ sɩ kpʋ Ɛdɔm tɩŋŋaa laalɩyuoroo bʋɩ fii arɩ chori fuonaa-la ba sɩɩ yɩrɛ yɩsɩŋ fuonaaŋ lɛ, aŋ mɩɩra kɔ.

¹⁴ Ʋ bɩra leŋ ʋ laalɩyuoroo gɔllɔ ŋmoo bugoo Ɛdɔm tinteeŋ lɛ a hɔŋ nɩmɛ. Ŋɩɩ nɛ Ɛdɔm tɩŋŋaa sɛɩ Devit bibemba. Lee na-kala Devit sɩ mʋa, La TƖƖNA yie pɛ ʋ lɛ nɛ ʋ yuo dii.

Devit tɩntɩnnɩ-hɩasɩŋ

¹⁵ Devit fa dii kuoruŋ Iziral tinteeŋ kala lɛ nɛ, a ŋaa wɩaa ba bʋa lɛ a pɩpɩ ʋ nɩaa kala.

¹⁶ Zeruya nanʋala Jʋab nɛ fa ŋaa laalɩyuoro-la nɩhɩaŋ, ka Ahilud nanʋala Jehosafat ma ŋaa nɩɩ-la sɩ ŋmʋnsɛ ba wɩaa bibil,

¹⁷ Ahitub nanʋala Zadɔk arɩ Abɩata nanʋala Ahɩmɛlɛk nɛ fa ŋaa Wɩɩsʋllɩ sɩpaalaaraa. Sɛraaya ma nɛ ŋaa nɩɩ-la sɩɩ ŋmʋnsɛ ba tenniŋ.

¹⁸ Jehoyada nanʋala Bɛnaaya ma nɛ fa ŋaa nɩalɩŋ sɩɩ pɔ Devit nɩhɩaŋ, ka Devit hambolibiisiŋ ma ŋaa nɩalɩŋ sɩ bʋl wɩaa a chɩchagɩlʋ.