2 SAMƲƐL 7 - WƖA TENIŊ

Wɩa hɛ niiŋ pɩ Devit

¹ Kuoro Devit sɩ mʋ hɔŋ ʋ kuoru dɩɩ-falɩŋ lɛ, La TƖƖNA pɔʋ nɛ woruŋ. Ʋ dʋndɔmɔ-la kala sɩ gollu bɩra bɩ ʋ walɩma.

² Ŋɩɩ nɛ ʋ bʋla pɩ Wɩa wʋlaabʋlla ba sɩɩ yɩrɛ Netaŋ, “Mɩɩ jʋʋ kuoru dɩa ba sɩ kɛŋ kuolu daasɩŋ sɩ chaasa zɔŋ a saa nɛ, ka Wɩa niiriŋ daga-la hɛ lɛbɩŋ lɛ.”

³ Ŋɩɩ nɛ Netaŋ bʋla pɩ kuoro Devit, “Ŋaa wɩɩ-la kala ŋ sɩ bɩɩna dɩ ʋ zɔmɔ pɩŋ, La TƖƖNA chɩŋ ŋ harɩŋ nɛ.”

⁴ Ama tɩtaŋ-la tɩtɩa nɛ La TƖƖNA fa bʋl wɩaa pɩ Netaŋ:

⁵ “Mʋ bʋla pɩ mɩ tɩntɩnna Devit, Wɩɩ-la mɩ-na ma TƖƖNA sɩ bʋla nɛ ŋ-la: Ŋ dee bɩ maga dɩ ŋ saa dɩa pɩmɛ dɩ mɩ jʋjʋʋ.

⁶ Mɩ ha bɩ dɩa kala jʋa a chɩŋ tapʋlɩɩ-la mɩ sɩ kɛŋ Iziral tɩŋŋaa a lɩɩ Ijipiti tinteeŋ lɛ a kaa kɔ jɩnɩŋ. Mɩ gɔllɔɔ baarɛ nɛ a jʋjʋʋ lɛbɩŋ.

⁷ Mɩ sɩ kɛŋ mɩ nɩaa Iziral tɩŋŋaa vɩvɛŋ, mɩ ha bɩ ba sɩpaalaara-la mɩ sɩ lɩɩsa dɩ ba bibemba kʋŋ pɩɛsa, ‘Bɛɛ nɛ tɩɩ ŋ bɩ kuolu daasɩŋ kaa saa dɩa pɩmɛ?’

⁸ Ŋɩɩ wɩaa, bʋla pɩ mɩ tɩntɩnna Devit, wɩɩ-la mɩ-na ma TƖƖNA doluŋ kala Tɩɩna sɩ bʋla nɛ ŋ-la: Mɩ lɩɩsɩŋ pie-daalɩŋ lɛ nɛ a leŋ ŋ ŋaa mɩ nɩaa Iziral tɩŋŋaa kuoro.

⁹ Lee na-kala ŋ sɩ mʋa, mɩ chɩŋ ŋ harɩŋ nɛ, a yuo dii ŋ dʋndɔŋŋɔɔ kala. Lɛɛlɛ mɩ jaŋ leŋ dɩ ŋ yɩrɩŋ sii, arɩ dʋnɩa nɩbalaa yɩrɩŋ sɩ sii ŋɩɩ.

¹⁰ Mɩ jaŋ joŋ leriŋ a pɩ mɩ nɩaa Iziral tɩŋŋaa, a leŋ ba hɔŋ nɩmɛ dɩ ʋ ŋaa ba tɩtɩa lee, dɩ nʋʋ bɩra sɩ́ ba walɩmʋ. Nɩbɔŋŋɔɔ bɩra bɩ jaŋ dɔgɩsɛba arɩ ba fa sɩ ŋaaba ŋɩɩ bumbuŋ-la,

¹¹ bʋa-la lɛ mɩ fa sɩ lɩɩsɛ sɩpaalaaraa ba bibemba. Mɩ sɩ mɩ jaŋ leŋ dɩ ma wiesi ma dʋndɔŋŋɔɔ kala nɩsɩŋ lɛ. Mɩ-na ŋ TƖƖNA tɩtɩa nɛ bʋla pɩŋ arɩ mɩ jaŋ leŋ dɩ ŋ dɩa chaasa chɩŋ woruŋ.

¹² Dɩ ŋ tapʋlaa nɛ yie dɩ ŋ sʋʋ a mʋ ŋ nyɩmmaba teeŋ, mɩ jaŋ lɩɩsɛ ŋ bii-lʋlʋŋ dɩ ʋ dii kuoruŋ ŋ nyuŋ. Mɩ jaŋ leŋ dɩ ʋ kuoruŋ chɩŋ.

¹³ Ʋ nɛ nɩɩ-la sɩ jaŋ saa dɩa pɩmɛ. Mɩ jaŋ leŋ dɩ ʋ kuoruŋ chɩŋ a kaa mʋ wuu.

¹⁴ Mɩ jaŋ ŋaa ʋ nyɩmma, dɩ ʋ ma ŋaa mɩ bie. Dɩ ʋ nɛ ŋaa wɩɩ a chei, mɩ jaŋ lɛrɛ ʋ dɩgɩlɩŋ a nagɛ nuhuobiine sɩ yie lɛrɛ ʋ bie dɩgɩlɩŋ ŋɩɩ.

¹⁵ Ama mɩ chonuŋ bɩ jaŋ kɔ dɩ ʋ dɛrɛ ʋ teeŋ, arɩ ʋ sɩ dɛrɛ Sɔɔl teeŋ ŋɩɩ, mɩ lɩɩsʋ, ka ŋ mɩɩra dii kuoruŋ.

¹⁶ Ŋ doho nɩaa nɛ jaŋ didii kuoruŋ a kaa mʋ wuu.”

¹⁷ Ŋɩɩ nɛ Netaŋ bʋl wɩalɩŋ kala Wɩa sɩ joŋo dagʋ a pɩ Devit.

Devit Wɩɩsʋlʋŋ

¹⁸ Ŋɩɩ nɛ kuoro Devit sii mʋ jʋʋ lɛbɩ-la lɛ Wɩa niiriŋ daga sɩ hɛ, a hɔŋ La TƖƖNA sɩpaaŋ, aŋ chʋɔlʋ a bʋl: “La TƖƖNA Wɩɩjarɩbakɔ, mɩ dɩ mɩ dɩa nɩaa nɛ kʋbɛɛba, ŋ ŋaa wʋbalɩŋ deeŋ la lɛ?

¹⁹ La TƖƖNA Wɩɩjarɩbakɔ, a nagɛ dɩ bumbuŋ wɩɩ-la paala bɩ yʋgɛ, ŋ bɩra wasa dagɛ ŋɩɩ mɩ-na ŋ tɩntɩnna dɩa maachie sɩ jaŋ nagɛ. La TƖƖNA Wɩɩjarɩbakɔ, mɩ jɩma ŋɩɩ dee ŋ vɛnɛ ŋaa wɩaa pɩpɩ nɩaa.

²⁰ La TƖƖNA Wɩɩjarɩbakɔ, mɩ ŋaa ŋ tɩntɩnnʋ nɛ, ŋ jɩŋ mɩ wɩɩkala nɛ. Mɩ bɩra bɩ wɩɩkala kɛnɛ mɩ bʋl.

²¹ Ŋ ŋaa wʋbalɩŋ deeŋ, a leŋ mɩ-na ŋ tɩntɩnna jɩmʋ a tɩŋ ŋ niiŋ wɩaa arɩ wɩɩ-la ŋ sɩɩ chɛ wɩaa nɛ.

²² La TƖƖNA Wɩɩjarɩbakɔ, ŋ nɛ kɩɩ kʋŋkala. Kʋŋkala tuo a magɩŋ. Wɩalɩŋ kala la sɩ nɩa daga arɩ ŋ nɛ Wɩa.

²³ Tintee dɔŋ tuo dʋnɩa lɛ a magɛ ŋ nɩaa Iziral tɩŋŋaa. Ba nɛ ŋ laa ta Ijipiti tɩŋŋaa nɩsɩŋ lɛ faafaa, bʋa-la lɛ ba sɩ ŋaa yosuŋ. Ŋ laaba ta dɩ ba ŋaa ŋ nɩaa. Wʋbala-la arɩ wʋkpuŋkperisi-la ŋ sɩ ŋaa pɩba leŋe ŋ yɩrɩŋ yɩrɛ nɛ dʋnɩa kala lɛ. Ŋ kiri tinteyee arɩ ba vesiŋ ta nɛ ŋ nɩaa sɩpaaŋ. Ba nɛ nɩalɩŋ ŋ sɩ laa ta Ijipiti tinteeŋ lɛ.

²⁴ Ŋ leŋe Iziral tɩŋŋaa chaasa chɩŋ nɛ a ŋaa ŋ nɩaa a kaa mʋ wuu. Ŋ-na La TƖƖNA nɛ lɛɛlɛ ŋaa ba Wɩa.

²⁵ Mɩ Tɩɩna Wɩa, mɩɩ sʋlʋŋ, kɛŋ nii-la ŋ sɩ hɛ a tɩgɛ mɩ-na ŋ tɩntɩnna arɩ mɩ doho nɩaa lɛ kaa tɩŋ a kaa mʋ wuu. Ŋaa wɩalɩŋ kala ŋ sɩ bʋla,

²⁶ dɩ ŋ yɩrɩŋ yɩrɛ a kaa mʋ wuu. Ŋɩɩ nɛ nɩaa jaŋ bʋl, ‘La TƖƖNA doluŋ kala Tɩɩna nɛ ŋaa Iziral Wɩa.’ Ŋ jaŋ leŋ dɩ mɩ-na ŋ tɩntɩnna Devit dɩa chaasa chɩŋ.

²⁷ La TƖƖNA doluŋ kala Tɩɩna, Iziral Wɩa, ŋ leŋe mɩ-na ŋ tɩntɩnna jɩŋ arɩ mɩ doho nɩaa nɛ jaŋ dii kuoruŋ. Ŋɩɩ nɛ tɩɩ mɩ-na ŋ tɩntɩnna wuo nyɩrɛ bɔyɛ aŋ sʋsʋl wɩɩŋ deeŋ ŋ teeŋ.

²⁸ La TƖƖNA Wɩɩjarɩbakɔ, ŋ nɛ Wɩa. Ŋ niiŋ wɩaa ŋaa wʋtɩtɩɩba nɛ, ŋɩɩ nɛ ŋ hɛ niiŋ arɩ ŋ jaŋ ŋaa wʋzɔŋŋɔɔ deemba a pɩ mɩ-na ŋ tɩntɩnna.

²⁹ Mɩɩ sʋlʋŋ, pɛ mɩ-na ŋ tɩntɩnna doho nɩaa lɛ, a leŋ dɩ ba ŋaa nɩalɩŋ ŋ sɩ jaŋ lɩɩsɛ dɩ ba didii kuoruŋ. Ŋ-na La TƖƖNA Wɩɩjarɩbakɔ, ŋ laa sɩpaaŋ a bʋl wɩɩŋ deeŋ nɛ. Mɩ laa dii arɩ ŋ jaŋ pɛ mɩ doho nɩaa lɛ a kaa mʋ wuu.”