Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 SAMƲƐL 6 - WƖA TENIŊ


Ba kɛŋ Wɩa niiriŋ daga kɔ Jerusalɛm

1 Devit bɩra yɩrɛ Iziral laalɩyuoro-la sɩ chaasa jɩŋ laalɩŋ yuonuŋ, nɩaa bʋɩ mara arɩ fii.

2 Ʋ dɩ ʋ nɩaa kala sii mʋ taŋ-la ba sɩɩ yɩrɛ Baala sɩ hɛ Juda tinteeŋ lɛ, dɩ ba joŋ Wɩa niiriŋ daga-la a kaa mɩɩra mʋ Jerusalɛm. Ʋ nyuŋ nɛ La TƖƖNA doluŋ kala Tɩɩna hɔŋ ʋ kuoru kpasa lɛ kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ pɛgɛ.

3 Ba fa joŋ Wɩa niiriŋ daga-la daŋ nɛsɩŋ toruko falɩŋ lɛ nɛ, a kaa lɩɩ Abɩnadab dɩa-la sɩ chɩŋ dundolo nyuŋ a kʋ lɩɩ. Uza arɩ Ahio sɩ ŋaa Abɩnadab biiriŋ nɛ fa kɛŋ toruko-la vɩvɛŋ,

4 ka Wɩa niiriŋ daga-la daŋ ʋ lɛ. Ahio nɛ fa laa toruko-la sɩpaaŋ.

5 Ka Devit arɩ Iziral tɩmma-la kala sɩ hɛ nɩmɛ, faasa jʋjʋɔsɛ arɩ ba doluŋ kala La TƖƖNA sɩpaaŋ, a yɩɩ yɩɩlaa a du chenniŋ, kɔnɛba, gugonnuŋ, a chɩchɩgɩsɛ chɩnchɩgɩsɩŋ arɩ buguloo.

6 Ba sɩ kʋ yi baal kʋbala ba sɩɩ yɩrɛ Nakɔŋ taha, nɛsɩ-la gɛrɛ. Uza guu mʋ kɛŋ Wɩa niiriŋ daga-la.

7 La TƖƖNA Wɩa fa chaasa na baanɩŋ Uza nyuŋ a tɩŋ ʋ sɩ digi Wɩa niiriŋ daga-la. Ŋɩɩ faa kɩsɛ nɛ. Ʋ ŋmobu kpʋ a bil daga-la sɛmɛ.

8 Ŋɩɩ nɛ Devit ma na baanɩŋ a tɩŋ La TƖƖNA sɩ kpʋ Uza. A kaa kɔ arɩ jɩnɩŋ kala ba kɛŋ lee-la a yɩyɩrɛ Pɛrɛs Uza nɛ. (Ʋ bʋbʋɔŋ nɛ: Wɩa dɔgɩsɛ Uza.)

9 Fawʋllʋŋ kɛŋ Devit tapʋlɩɩ-la a tɩŋ La TƖƖNA wɩaa. Ʋ bʋl, “Ɛɛ nɛ mɩ jaŋ wuo ŋaa a joŋ Wɩa niiriŋ daga-la kaa kɔ mɩ teeŋ?”

10 Ʋ fa bɩ chɛ dɩ ʋ joŋ La TƖƖNA niiriŋ daga-la mʋ ʋ teeŋ Jerusalɛm lɛ. Ŋɩɩ nɛ ʋ mɩɩra joŋ a kaa mʋ bil baal kʋbala baa yɩrɛ Ɔbɛd-Ɛdɔm dɩa lɛ, ʋ ŋaa Giti tɩɩna nɛ.

11 La TƖƖNA niiriŋ daga-la fa hɛ Ɔbɛd-Ɛdɔm dɩa lɛ chɛnsɩŋ batori nɛ. Ŋɩɩ nɛ La TƖƖNA pɛ ʋ dɩ ʋ dɩa nɩaa kala lɛ woruŋ.

12 Ŋɩɩ nɛ ba bʋla pɩ kuoro Devit, “La TƖƖNA pɛ Ɔbɛd-Ɛdɔm arɩ ʋ dɩa nɩaa arɩ kʋŋ na-kala ʋ sɩ kɛnɛ lɛ nɛ woruŋ, a tɩŋ Wɩa niiriŋ daga-la sɩ hɛ ʋ dɩa lɛ wɩaa.” Ŋɩɩ nɛ Devit mʋ joŋ Wɩa niiriŋ daga-la Ɔbɛd-Ɛdɔm dɩa lɛ, a kaa kʋkɔ Jerusalɛm, aŋ ka ba chaasa gbigbieli.

13 Nɩalɩŋ sɩ chʋŋ Wɩa niiriŋ daga-la sɩ joŋ naakieliŋ bʋlɩdʋ, Devit leŋ ba chɩŋ, ka ʋ kpʋ nɛ-bele arɩ nɛ-pɔrʋŋ sɩ kɛŋ nammɩa a sʋl Wɩɩsʋlʋŋ.

14 Devit fa laalɛ gɛrɩpɛ-fʋfʋl gɛrɩ-laala-daŋɩŋ dʋndʋŋa nɛ, aŋ gʋgʋa arɩ ʋ doluŋ kala La TƖƖNA sɩpaaŋ.

15 Ka ʋ dɩ Iziral tɩŋŋaa kala kɛŋ La TƖƖNA niiriŋ daga-la kʋʋ jʋʋ Jerusalɛm a ŋɩŋaa goŋ arɩ tʋɔtɔrʋŋ aŋ ŋmʋŋmʋʋ nyilliŋ.

16 Ba fa sɩ kɛŋ La TƖƖNA niiriŋ daga-la kʋʋ jʋʋ Jerusalɛm ŋɩɩ, Sɔɔl tolo Mɩkal to tokoro a nyilime na Devit. Ʋ sɩ naʋ dɩ ʋ fɩla aŋ pɛ gʋgʋa La TƖƖNA sɩpaaŋ, ʋ tʋɔŋ lɩɩʋ.

17 Ba kɛŋ La TƖƖNA niiriŋ daga-la jʋʋ bil ʋ dɩ-biliŋ lɛbɩ-la lɛ kuoro Devit sɩ hɛ a pʋ. Devit ŋaa kʋnyɩgaa Wɩɩsʋlʋŋ arɩ nii-magɛ dɔŋɔ Wɩɩsʋlʋŋ La TƖƖNA sɩpaaŋ.

18 Ʋ sɩ sʋl Wɩɩsʋlɩɩ-la a dɛrɛ, ʋ sʋl Wɩa pɩ nɩalɩŋ, La TƖƖNA doluŋ kala Tɩɩna yɩrɩŋ lɛ.

19 Ʋ joŋ boroboro, kpʋla nɛnɛɛ arɩ girep nɛŋ-hɩlaa a kpaa Iziral tɩŋŋaa nɩ-daŋ-la kala, baalaa arɩ haalaa. Ba kala mɩɩra mʋ ba dɩɩsɩŋ.

20 Devit fa sɩ mɩɩra kɔ ʋ dɩa dɩ ʋ sʋl Wɩa pɩ ʋ dɩa nɩaa lɛ, Sɔɔl tolo Mɩkal lɩɩ chemu a bʋl, “Bɛɛ kɩaa hɩɩsɛ wɩaa nɛ ŋ-na Iziral kuoro ŋaa ŋɩɩ jɩnɩŋ, a wuri ŋ kɩaa ta ŋ tɩntɩnnaa haalaa sɩpaaŋ a nagɛ nɩyaarɩ?”

21 Devit bʋla pʋ, “La TƖƖNA leŋ ŋ nyɩmma arɩ ʋ dɩa nɩaa kala ta nɛ, aŋ lɩɩsɛmɛ mɩ ŋaa Iziral tɩŋŋaa sɩpaalaara, ŋɩɩ nɛ tɩɩ mɩ gʋgʋa ʋ sɩpaaŋ ŋɩɩ.

22 Mɩ ha jaŋ gʋa a hɩɩsɛ mɩ tɩtɩa a kɩɩ ŋɩɩ. Ʋ jaŋ nagɛ mɩɩ hɩɩsɛ mɩ tɩtɩa nɛ, ama tɩntɩnnɩ-haala-la wɩaa ŋ sɩ bʋla jaŋ zilmi.”

23 Ŋɩɩ nɛ Sɔɔl tolo Mɩkal bɩ bii kala lʋla aŋ sʋʋ.

©Ghana Institute of Linguistics Literacy and Bible Translation 1984, 2014

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ