2 SAMƲƐL 5 - WƖA TENIŊ

Devit dii kuoruŋ Iziral tinteeŋ lɛ

¹ Iziral doho doho-la kala kɔ Devit teeŋ Hɛbʋrɔŋ lɛ a bʋl, “La ŋaa ŋ doho nɩaa nɛ.

² Faafaa-la, Sɔɔl fa sɩ paala ŋaa la kuoro ma, ŋ nɛ ŋaa nɩɩ-la sɩ laa Iziral tɩŋŋaa sɩpaaŋ laalɩŋ lɛ. Ŋɩɩ nɛ La TƖƖNA bʋla pɩŋ, ‘Ŋ nɛ jaŋ ŋaa mɩ nɩaa Iziral tɩŋŋaa sɩpaalaara a bibemba, a nagɛ pie-daara sɩɩ beŋ ʋ piesee ŋɩɩ.’ ”

³ Iziral nɩhɩasɩŋ kala sɩ sii kɔ kuoro Devit teeŋ ŋɩɩ Hɛbʋrɔŋ lɛ, Devit leŋ ʋ dɩ nɩhɩasɩ-la hɛ niiŋ pɩ dɔŋɔ La TƖƖNA sɩpaaŋ. Ba joŋ nʋʋŋ a tɩsɛ Devit nyuŋ a dagɛ arɩ ʋ nɛ ŋaa Iziral tɩŋŋaa kuoro.

⁴ Devit fa ŋaa jɩsɩŋ mara arɩ fii nɛ aŋ dii kuoruŋ, a bemba jɩsɩŋ mahɩŋ balɩa.

⁵ Hɛbʋrɔŋ lɛ, Devit beŋ Juda nɩaa jɩsɩŋ balɩpɛ arɩ chɛnsɩŋ balɩdʋ nɛ. Jerusalɛm ma lɛ, ʋ beŋ Iziral arɩ Juda kala nɩaa jɩsɩŋ mara arɩ fii arɩ batori nɛ.

Devit yuo laa Jerusalɛm

⁶ Bʋa kʋbala lɛ kuoro Devit arɩ ʋ nɩaa sii a mʋ Jerusalɛm dɩ ba yuo Jebus tɩmma-la sɩ hɔŋ nɩmɛ. Jebus tɩmma-la bʋla pʋ, “Ŋ bɩ jaŋ wuo jʋʋ daha. Dɩ la nɛ paala gbɛrɩgɛ koo a nyʋlɩmɛ ma, la bɩ jaŋ leŋ dɩ ŋ yuo dii la tabalɩŋ.” Ba bɩɩna Devit bɩ jaŋ wuo yuo diiba.

⁷ Ama Devit arɩ ʋ nɩaa wuo yuo dii Zaayɔŋ (Jerusalɛm nɛ ŋɩɩ) dɩɩ-duo-la, ʋ nɛ lɛɛlɛ baa yɩrɛ Devit taŋ ŋɩɩ.

⁸ Tapʋlɩɩ-la nɛ Devit bʋl, “Nɩɩ-la kala sɩ cho dɩ ʋ yuo dii Jebus tɩmma-la, tɩɩna maga dɩ ʋ joŋ lɩɩ-libe-la a mʋ yuo Devit dʋndɔmɔ-la sɩ nagɛ gbɛrɩgɛɛ arɩ nyʋlɩmaa.” Ŋɩɩ nɛ tɩɩ ba yie bʋl, “Nyʋlɩmaa arɩ gbɛrɩgɛɛ bɩ maga dɩ ba jʋʋ Wɩa dɩa-la sɩ hɛ Jerusalɛm lɛ.”

⁹ Devit sɩ yuo laa dɩɩ-duo-la, ʋ hɔŋ nɩmɛ, a kɛŋ lee-la yɩyɩrɛ Devit taŋ. Ʋ chɩŋ dundolo-la wɩɩpɔsʋŋ dɩɩrɩŋ ba sɩ dɩŋa lɛ, aŋ saa taŋ-la ʋ yʋga pɛ.

¹⁰ Ŋɩɩ nɛ La TƖƖNA Wɩa doluŋ kala Tɩɩna chɩŋ Devit harɩŋ woruŋ, ʋ doluŋ wasa pʋŋa pɛ.

¹¹ Bʋa-la lɛ nɛ Taaya tinteeŋ kuoro ba sɩɩ yɩrɛ Hiram tɩŋ tɩndaaraa ba kɔ Devit teeŋ, a kɛŋ kuolu daasɩŋ arɩ kapɩntaba arɩ nɩalɩŋ sɩ jɩŋ tabɩaa tɩntɩŋŋaa, ba kʋ saa kuoru dɩa a pɩ Devit.

¹² Ŋɩɩ lɛ nɛ Devit jɩŋ arɩ La TƖƖNA nɛ leŋe ʋ kuoruŋ chɩŋ woruŋ Iziral tinteeŋ lɛ, a leŋ ʋ tinteeŋ wɩaa vɩvɛŋ woruŋ a tɩŋ ʋ nɩaa Iziral tɩŋŋaa wɩaa.

¹³ Devit sɩ sii Hɛbʋrɔŋ lɛ a mʋ Jerusalɛm, ʋ kɛŋ haala-la ʋ sɩ bile aŋ bɩ jaa ma yʋgɛ nɛ a pɛ ha-daŋ-la ʋ sɩ jaa a to ba naasɩŋ lɛ. Haala-la lʋl hambolibiisiŋ arɩ toloo a yʋgɛ a pʋ.

¹⁴ Biiri-la ʋ sɩ lʋla Jerusalɛm lɛ nɛ ŋ-la: Samʋa, Sobab, Netaŋ, Solomoŋ,

¹⁵ Ɩbɩha, Ɛlɩsʋa, Nɛfɛg, Jafɩa,

¹⁶ Ɛlɩsama, Ɛlɩada arɩ Ɛlɩfɛlɛt.

Devit yuo dii Fɩlɩsɩtɩa tɩŋŋaa

¹⁷ Fɩlɩsɩtɩa tɩŋŋaa sɩ nɩa dɩ ba lɩɩsɛ Devit nɛ a joŋ nʋʋŋ tɩsʋ ʋ ŋaa Iziral tinteeŋ kuoro, ba laalɩyuoroo kala sii mʋ a chɩchɛʋ arɩ sɩɩfɩɛsɩŋ dɩ ba kɛnʋ. Devit nɩɩ a sii tuu faa dɩ-duo kʋbala lɛ.

¹⁸ Bʋa-la lɛ dɩ Fɩlɩsɩtɩa tɩmma-la kʋ lɩɩ jɛrɛ su Refem fuonaaŋ.

¹⁹ Ŋɩɩ nɛ Devit pɩɛsɛ La TƖƖNA, “Mɩ mʋ yuo Fɩlɩsɩtɩa tɩmma-laa? Ŋ jaŋ jomba hɛ mɩ nɩsɩŋ lɛɛ?” La TƖƖNA bʋla pʋ, “Mʋ, mɩ jaŋ jomba hɛ ŋ nɩsɩŋ lɛ.”

²⁰ Devit sii a mʋ lee-la ba sɩɩ yɩrɛ Baal Pɛrazɩm. Nɩmɛ nɛ ʋ yuo diiba, aŋ bʋl, “La TƖƖNA leŋe mɩ yuo dii mɩ dʋndɔŋŋɔɔ nɛ, a nagɛ fuoŋ sɩ suo a gbu lɩɩ pɛllɛ paa kɩaa.” Ŋɩɩ nɛ ba kɛŋ lee-la a yɩyɩrɛ Baal Pɛrazɩm. (Ʋ bʋbʋɔŋ nɛ: La TƖƖNA yuo lɩɩ nɛ.)

²¹ Fɩlɩsɩtɩa tɩmma-la fá a vɩa ba tɔŋŋɔɔ ta nɩmɛ, Devit arɩ ʋ nɩaa paa kaa viiri.

²² Tapʋlɩɩ dɔŋ Fɩlɩsɩtɩa tɩmma-la bɩra kʋ lɩɩ a jɛrɛ su Refem fuonaa-la kala.

²³ Ŋɩɩ nɛ Devit bɩra pɩɛsɛ La TƖƖNA dɩ ʋ na ʋ jaŋ bɩra wuo mʋ yuobaa. La TƖƖNA sɩ, “Sɩ́ ba leriŋ tegi tegi mʋ, gollo to ba harɩŋ a chɩŋ tʋrʋ tɩɩsɩ-la sɩpaaŋ aŋ yuoba.

²⁴ Dɩ ŋ nɛ kʋ nɩɩ laalɩyuoroo naasɩŋ dɔmɔ tʋrʋsʋ-la nyuŋ, guu mʋ, bɛɛ wɩaa ŋɩɩ daga arɩ mɩ-na ma TƖƖNA laa ŋ sɩpaaŋ mʋ nɛ dɩ mɩ yuo dii Fɩlɩsɩtɩa tɩŋŋaa laalɩyuoro-la.”

²⁵ Ŋɩɩ nɛ Devit ŋaa ŋɩɩ La TƖƖNA sɩ dagʋ, a kire kpʋ Fɩlɩsɩtɩa tɩŋŋaa a chɩŋ Gibioŋ lɛ ŋɩɩ deeŋ deeŋ a kaa mʋ Gɛza.