2 SAMƲƐL 4 - WƖA TENIŊ

Ba kpʋ Ɩsɩ-Bɔsɛf

¹ Sɔɔl nanʋala Ɩsɩ-Bɔsɛf sɩ nɩa dɩ Abɩna sʋʋ Hɛbʋrɔŋ lɛ, ʋ nandaasɩŋ yʋɔrɛ, Iziral tɩŋŋaa kala ŋaa holumoŋ.

² Sɔɔl nanʋala fa kɛŋ baalaa balɩa sɩ ŋaa laalɩyuoru bugo-la sɩ gɔllɔ kpʋ nɩaa tasɩŋ lɛ aŋ lɩlaa kɩaa sɩpaalaaraa nɛ. Dɔŋɔ yɩrɩŋ nɛ Baana, dɔŋɔ ma yɩrɩŋ nɛ Rekab. Ba nyɩmma nɛ Rimoŋ, a ŋaa Bɛrɔf tɩɩna, a lɩɩ Bɛnjamɩŋ doho nɩaa tʋɔŋ. Ba fa joŋ Bɛrɔf ʋ ma pɛ Bɛnjamɩŋ tinteeŋ lɛ nɛ.

³ Bɛrɔf nɩaa fa lɩɩ mʋ hɔŋ Gitem lɛ nɛ, a ŋaa nʋhʋɔra a kaa kɔ arɩ jɩnɩŋ kala.

⁴ (Sɔɔl nanʋala Jonataŋ fa kɛŋ hambolibie nɛ, ʋ yɩrɩŋ nɛ Mɛfɩbɔsɛf a ŋaa gbɛrɩgʋ. Ʋ fa ŋaa jɩsɩŋ banɔŋ nɛ, ka ba lɩɩ Jɛzɩrɛl a kʋ bʋl Sɔɔl arɩ Jonataŋ sʋʋŋ wɩaa. Bʋa-la lɛ nɩɩ-la sɩɩ benu sii joŋu dɩ ʋ fá, ʋ sɩɩ pesi ŋɩɩ dɩ ʋ lɩɩ, bile foro tel a gbɛrɩgɛ.)

⁵ Rimoŋ, Bɛrɔf tɩɩna-la hambolibiisiŋ Rekab arɩ Baana, sii a mʋmʋ Ɩsɩ-Bɔsɛf dɩa, a mʋ yi nɩmɛ wɩɩ-hɛɛ-siese, dɩ Ɩsɩ-Bɔsɛf pɩna aa wiesi.

^6-7 Ba mʋ jʋʋ ʋ dɩa sɩpaaŋ a nagɛ dɩ ba jʋa dɩ ba ŋaa mɛmpɛ nɛ, aŋ tɔɔ ʋ luoruŋ lɛ ʋ kʋpɩnɩŋ nyuŋ ʋ sʋʋ. Rekab arɩ ʋ naambie Baana keri ʋ nyuŋ a joŋo kaa lʋara lɩɩ tɩtaŋ-la kala a to Jɔdaŋ fuonaa-la a viiri.

⁸ Ba kɛŋ Ɩsɩ-Bɔsɛf nyuŋ-la kɔ kuoro Devit teeŋ Hɛbʋrɔŋ lɛ, a bʋl, “Na ŋ dʋndɔmɔ Sɔɔl, nɩɩ-la sɩ walɩma dɩ ʋ kpʋŋ nanʋala Ɩsɩ-Bɔsɛf nyuŋ. Jɩnɩŋ La TƖƖNA joŋ ŋ-na mɩ nɩhɩaŋ sɩ ŋaa kuoro baanɩŋ a fɩɩsɛ Sɔɔl arɩ ʋ doho nɩaa lɛ nɛ.”

⁹ Devit mɩɩra bʋla pɩ Rekab arɩ ʋ naambie Baana, “La TƖƖNA sɩ weye wɩaa, ʋ nɛ laamɛ ta mɩ wʋjʋʋlaa kala lɛ,

¹⁰ baal-la fa sɩ kɔ Zɩkɩlag a bʋla pɩmɛ arɩ Sɔɔl sʋba, aŋ bɩɩnɛ arɩ wʋzɔŋ nɛ ʋ kʋ bʋl ŋɩɩ, mɩ kɛnʋ nɛ a kpʋʋ. Ʋ time mɩ sɩ joŋo timu nɛ ŋɩɩ a tɩŋ wɩɩ-la ʋ sɩ kʋ bʋla pɩmɛ.

¹¹ Ɛɛ nɛ saa maga dɩ mɩ ŋaa ma nɩbɔŋŋɔɔ deemba sɩ ŋaa wʋbɔmʋŋ deeŋ lɛ? Ma kpʋ nʋʋ sɩ bɩ wɩɩkala cheye nɛ ʋ dɩɩ-pɩnɩŋ tʋɔŋ. Mɩ jaŋ joŋ ŋɩɩ chɩmɩŋ a tiŋ ma lɛ, a leŋ dɩ ma nyɩɩgɛ dʋnɩa lɛ.”

¹² Ŋɩɩ nɛ Devit leŋ ʋ nɩaa kpʋba, a keri ba nɩsaa arɩ ba naasɩŋ, aŋ joŋ ba yaraa sagɛ a kpagɛ lɩɩŋ sɩ pɩŋ lee-la Hɛbʋrɔŋ lɛ. Ama ba joŋ Ɩsɩ-Bɔsɛf-na nyuŋ a hugi Abɩna bʋa lɛ Hɛbʋrɔŋ lɛ.