2 SAMƲƐL 3 - WƖA TENIŊ

¹ Laal-la sɩ sii Sɔɔl dɩa nɩaa arɩ nɩalɩŋ sɩ chɩŋ Devit harɩŋ pɛgɛ fa diene nɛ woruŋ. Devit nɩaa doluŋ fa pʋŋa pɩpɛ nɛ, ka Sɔɔl nɩaa doluŋ tutuu tinteeŋ.

² Devit fa lʋl hambolibiisiŋ nɛ Hɛbʋrɔŋ lɛ: Ʋ bii-hɩaŋ nɛ fa Amɩnɔŋ. Amɩnɔŋ naaŋ nɛ Ahɩnʋam sɩ lɩɩ Jɛzɩrɛl.

³ Ʋ bii-lɩamɩŋ nɛ Kɩlɩab, ʋ naaŋ nɛ Kamɛl tɩŋŋaa Nabal yo-haal-la Devit sɩ jaa, ba sɩɩ yɩrɛ Abɩgɛl. Ʋ bii-tori ma nɛ ŋaa Abɩsalɔm. Abɩsalɔm naaŋ nɛ Maaka. Maaka nyɩmma nɛ Talɩmaɩ. Talɩmaɩ nɛ ŋaa Gesu tɩŋŋaa kuoro.

⁴ Devit bii-nɛsɛ nɛ Adonija, ʋ naaŋ nɛ Hagɩf. Ʋ bii-nɔŋ nɛ Sɛfatɩa, ʋ ma naaŋ nɛ Abɩtal.

⁵ Ʋ bii-dʋ ma nɛ Ɩtɩrɩm. Ɩtɩrɩm naaŋ nɛ Ɛgɩla. Hambolibiisi-la Devit sɩ lʋla Hɛbʋrɔŋ lɛ nɛ ŋɩɩ.

Abɩna mʋ pɛ Devit lɛ

⁶ Laal-la sɩ sii Sɔɔl dɩa nɩaa arɩ Devit nɩaa pɛgɛ, Abɩna doluŋ nɛ fa pʋŋa pɩpɛ Sɔɔl dɩa nɩaa kala tʋɔŋ.

⁷ Sɔɔl fa bil haal kʋbala nɛ aŋ bɩ jaa ba yɩyɩrɛ Rɩzɩpa. Haal-la fa ŋaa Ayɩa tolo nɛ. Sɔɔl nanʋala Ɩsɩ-Bɔsɛf pɩɛsɛ Abɩna, “Bɛɛ nɛ tɩɩ ŋ kɛŋ mɩ nyɩmma haal-la ʋ sɩ bile aŋ bɩ jaa pɩŋ?”

⁸ Wɩɩ-la Ɩsɩ-Bɔsɛf sɩ bʋla leŋ Abɩna baanɩŋ chaasa sii. Ʋ pɩɛsɛ, “Ŋ bɩɩna mɩ ŋaa kʋpɛɩ nɛ a pɩpɛ Juda nɩaa lɛɛ? Bumbuŋ kala a kaa kɔ arɩ jɩnɩŋ, mɩ chaasa chɩŋ ŋ nyɩmma Sɔɔl arɩ ʋ dɩa nɩaa arɩ ʋ nandɔnsʋŋ kala harɩŋ nɛ woruŋ. Mɩ ha bɩ wɩɩkala ŋaa a joŋuŋ hɛ Devit nɩsɩŋ lɛ. Ka ŋ chichei mɩ yɩrɩŋ a mʋ tɩgɛ haala deeŋ lɛ.

⁹ A leŋ dɩ Wɩa dɔgɩsɛ mɩ-na Abɩna kɩŋkɛŋ, dɩ mɩ nɛ bɩ Devit lɛ pɛ dɩ ʋ na wɩɩ-la La TƖƖNA sɩ hɛ niiŋ arɩ ʋ jaŋ ŋaa pʋ. La TƖƖNA hɛ niiŋ pʋ

¹⁰ arɩ ʋ jaŋ laa kuoruŋ Sɔɔl doho nɩaa teeŋ a pɩ Devit dɩ ʋ ŋaa kuoro Iziral arɩ Juda tinteeŋ kala lɛ, a chɩŋ Daŋ tinteeŋ sɩ hɛ wɩɩpɔsʋŋ nagʋa dɩɩrɩŋ a kaa mʋ yi Bɛɛsɩba tinteeŋ sɩ hɛ wɩɩpɔsʋŋ nadiiŋ dɩɩrɩŋ.”

¹¹ Ŋɩɩ nɛ fawʋllʋŋ kɛŋ Ɩsɩ-Bɔsɛf woruŋ, ʋ bɩra bɩ wuo bʋl wɩɩkala Abɩna teeŋ.

¹² Ŋɩɩ nɛ Abɩna tɩŋ tɩndaaraa ba mʋ Devit teeŋ, a bʋl, “Ŋ nɛ nɩɩ-la fa sɩ maga dɩ ŋ bibeŋ tinteeŋ deeŋ. Ŋɩɩ wɩaa leŋ dɩ la niiŋ ŋaa kʋbala, ka dɩ mɩ pɛ ŋ lɛ a leŋ dɩ Iziral tɩŋŋaa kala kʋ tutoŋ.”

¹³ Devit bʋl, “Ʋ zɔmɔ. La niiŋ jaŋ ŋaa kʋbala. Ama wʋbala nɛ mɩɩ chɛ dɩ ŋ ŋaa pɩmɛ: Dɩ ŋ nɛ mɩɩra kʋkɔ mɩ teeŋ, pɛ kɛŋ Sɔɔl tolo Mɩkal kaa kʋ pɩmɛ.”

¹⁴ Ŋɩɩ nɛ Devit tɩŋ tɩndaaraa ba mʋ Sɔɔl nanʋala Ɩsɩ-Bɔsɛf teeŋ a bʋl, “Joŋ mɩ haala Mɩkal pɩmɛ, nɩɩ-la jaarɩŋ mɩ sɩ kpʋ Fɩlɩsɩtɩa tɩŋŋaa zɔlɔ a keri ba penee puroo tiŋ.”

¹⁵ Ɩsɩ-Bɔsɛf leŋ ba mʋ laa Mɩkal ʋ bal-falɩŋ Palɩtɩɛl teeŋ. Palɩtɩɛl nyɩmma nɛ Las.

¹⁶ Ʋ bala-la lɩɩ yele tuto ʋ harɩŋ ŋɩɩ halɩɩ a mʋ yi taŋ-la ba sɩɩ yɩrɛ Bahurim. Abɩna bʋla pʋ, “Mɩɩra mʋ dɩa.” Ŋɩɩ nɛ ʋ mɩɩrɛ.

¹⁷ Ŋɩɩ nɛ Abɩna arɩ Iziral nɩhɩasɩŋ bʋl wɩaa. Ʋ bʋla pɩba, “Faafaa kala ma cho dɩ Devit nɛ ŋaa ma kuoro.

¹⁸ Lɛɛlɛ wombiiŋ hɛ nɩmɛ dɩ ma ŋaa ŋɩɩ, bɛɛ wɩaa La TƖƖNA hɛ niiŋ a pɩ Devit nɛ a bʋl, ‘Mɩ jaŋ to mɩ tɩntɩnna Devit lɛ a laa mɩ nɩaa Iziral tɩŋŋaa ta Fɩlɩsɩtɩa tɩŋŋaa arɩ ba dʋndɔŋŋɔɔ kala nɩsɩŋ lɛ.’ ”

¹⁹ Abɩna bʋl wɩaa a pɩ Bɛnjamɩŋ doho nɩaa ma. Ŋɩɩ nɛ aŋ sii mʋ Hɛbʋrɔŋ, dɩ ʋ bʋla pɩ Devit wɩalɩŋ kala Iziral tɩŋŋaa arɩ Bɛnjamɩŋ doho nɩaa kala sɩɩ chɛ dɩ ba ŋaa.

²⁰ Abɩna sɩ mʋ Devit teeŋ Hɛbʋrɔŋ lɛ, ʋ dɩ baalaa mara nɛ mʋa. Devit ŋaa kʋdiilee pɩba. Ba dii aŋ gbieli.

²¹ Ŋɩɩ nɛ Abɩna bʋla pɩ Devit, “Mɩ nɩhɩaŋ, leŋ dɩ mɩ lɛɛlɛ mʋ a kɛŋ Iziral nɩalɩŋ hɛ dɔŋɔ a kɛmba kɔ ŋ teeŋ dɩ ma niiŋ ŋaa kʋbala, dɩ ŋ dii ba kuoruŋ arɩ ŋɩɩ ŋ sɩɩ chɛ.” Ŋɩɩ nɛ Devit ta Abɩna ʋ viiri arɩ yarɩfɩɛlaa.

Jʋab kpʋ Abɩna

²² Abɩna sɩ mʋa harɩŋ, Devit nɩaa arɩ Jʋab mɩɩra lɩɩ laalɩŋ kɔ ʋ teeŋ, a kɛŋ kʋ-daŋ ba sɩ yuo laa a kaa kɔ. Ama bʋa-la lɛ dɩ Abɩna bɩra tuo Hɛbʋrɔŋ lɛ, bɛɛ wɩaa Devit taʋ ʋ viiri nɛ arɩ yarɩfɩɛlaa.

²³ Jʋab arɩ laalɩyuoro-la sɩ kɔ ŋɩɩ, ba bʋla pʋ arɩ Nɛɛ nanʋala Abɩna kɔ kuoro teeŋ nɛ, ka kuoro leŋ ʋ mɩɩra viiri arɩ yarɩfɩɛlaa.

²⁴ Ŋɩɩ nɛ Jʋab sii a mʋ kuoro Devit teeŋ a pɩɛsʋ, “Bɛɛ nɛ ŋ ŋaa ŋɩɩ? Abɩna sɩ kɔ ŋ teeŋ, bɛɛ nɛ tɩɩ ŋ leŋ ʋ mʋ? Lɛɛlɛ ʋ viire nɛ!

²⁵ Ŋ jɩŋ Nɛɛ nanʋala Abɩna sɩ nagɛ ŋɩɩ nɛ. Ʋ kɔ dɩ ʋ nyɩsɩŋ nɛ, a jɩŋ ŋ vɛnɩŋ maŋŋaa, aŋ pɛ na wɩalɩŋ kala ŋ sɩɩ ŋaa.”

²⁶ Jʋab sɩ sii Devit teeŋ, ʋ tɩŋ tɩndaaraa ba kiri Abɩna harɩŋ a mʋ kɛnʋ Sɩra viliŋ leriŋ, a kaa mɩɩra kɔ. Ama Devit fa bɩ ŋɩɩ lɛ jɩŋ.

²⁷ Abɩna sɩ mɩɩra kɔ Hɛbʋrɔŋ, Jʋab kɛnʋ a bal boi-baalɩŋ niiŋ a nagɛ ʋʋ chɛ ʋ dɩ ʋ dʋndʋŋa bʋl wɩaa nɛ. Nɩmɛ nɛ ʋ joŋ ʋ naambie Asahɛl, Abɩna sɩ kpʋa chɩmɩŋ a tiŋ ʋ lɛ, a tɔɔ ʋ luoruŋ lɛ ʋ sʋʋ.

²⁸ Ŋɩɩ harɩŋ, Devit nɩɩ wɩɩ-la, a bʋl, “La TƖƖNA jɩma mɩ dɩ mɩ nɩaa bɩ wɩɩkala jɩŋ a mʋ tɩgɛ Nɛɛ nanʋala Abɩna sʋʋŋ lɛ.

²⁹ A leŋ dɩ Jʋab arɩ ʋ nyɩmma dɩa nɩaa na hɛɛŋ a tɩŋ Abɩna sʋʋŋ wɩaa, a leŋ dɩ Jʋab dɩa lɛ bʋa na-kala dɩ nʋʋ kɛŋ naawalɩŋ sɩɩ lɩɩ nʋɔlʋŋ koo dayalɩmɩŋ koo dɩ nʋʋ ŋaa puwuol koo dɩ ba kpʋkpʋba laalɩŋ lɛ koo dɩ kʋdiilee nyaa ba dɩa lɛ.”

³⁰ (Jʋab arɩ ʋ naambie Abɩsaɩ nɛ kpʋ Abɩna, a tɩŋ ʋ sɩ kpʋ ba naambie Asahɛl Gibioŋ lɛ laalɩŋ tʋɔŋ.)

³¹ Ŋɩɩ nɛ Devit bʋla pɩ Jʋab arɩ nɩalɩŋ kala sɩ hɛ ʋ teeŋ, “Má kɛŋ ma gɛnnɩŋ kɩɛsɛ, aŋ laalɛ tʋɔ-chei gɛnnɩŋ a laa Abɩna kʋsʋʋŋ sɩpaaŋ a yiyel.” Ŋɩɩ nɛ ka kuoro Devit tɩtɩa tuto sʋʋ-la harɩŋ.

³² Ba kɛŋ Abɩna mʋ a hugi Hɛbʋrɔŋ lɛ, Abɩna bʋa leriŋ. Kuoro faasa ŋmoo niiŋ, nɩalɩŋ ma kala yel woruŋ.

³³ Ŋɩɩ nɛ kuoro yel aŋ ta jembiiŋ deeŋ a mʋ tɩgɛ Abɩna lɛ: “Abɩna maga dɩ ʋ sʋʋ nɩyaarɩ sʋʋŋ deeŋ nɛɛ?

³⁴ Ba bɩŋ nɩsaa vɔbɔ, ba bɩra bɩ ŋ naasɩŋ ma vɔbɔ. Ka ŋ sʋʋ arɩ nɩbɔŋŋɔɔ sɩ kpʋ nɩa.” Nɩalɩŋ kala bɩra yel ʋ lɛ woruŋ.

³⁵ Ŋɩɩ nɛ nɩalɩŋ kala kɔ a sʋsʋl Devit dɩ ʋ dii kɩaa dɩ taŋ ha bɩ bire, ama Devit ŋmɩɛsɛ a bʋl, “A leŋ dɩ Wɩa dɔgɩsɛmɛ kɩŋkɛŋ, dɩ mɩ nɛ dii kʋŋkala ka dɩ wɩɩ-muluŋ-na jʋʋ.”

³⁶ Nɩalɩŋ kala sɩ nɩɩ wɩalɩŋ, ba tʋɔŋ chaasa tɔrɛ. Wʋtɩtɩɩ, wɩɩ na-kala kuoro sɩ ŋaa tɔrɛ ba tʋɔŋ nɛ.

³⁷ Tapʋlɩɩ-la nɛ Juda nɩaa arɩ Iziral nɩaa kala jɩŋ arɩ kuoro bɩ Nɛɛ nanʋala Abɩna sʋʋŋ lɛ jɩŋ.

³⁸ Ŋɩɩ nɛ kuoro pɩɛsɛ ʋ nɩaa, “Ma bɩ jɩŋ arɩ sɩpaalaarɩ-duo arɩ nɩbal nɛ sʋʋ Iziral tinteeŋ lɛ ŋɩɩ jɩnɩŋ?

³⁹ Jɩnɩmba, mɩ nɛ La TƖƖNA lɩɩsɛ mɩ dii kuoruŋ, ama Zeruya biiriŋ Jʋab arɩ Abɩsaɩ dolie kɩɩ mɩ nɛ. A leŋ dɩ La TƖƖNA joŋ wʋbɔŋ-la ba sɩ ŋaa chɩmɩŋ a tiŋ ba lɛ!”