2 SAMƲƐL 24 - WƖA TENIŊ

Devit dɩɩsɛ laalɩyuoroo

¹ Bʋa kʋbala lɛ La TƖƖNA bɩra na baanɩŋ Iziral tɩŋŋaa nyuŋ, a yigi kuoro Devit hɛ ba lɛ a bʋl, “Mʋ a dɩɩsɛ Iziral arɩ Juda nɩaa kala.”

² Ŋɩɩ nɛ kuoro bʋla pɩ Jʋab arɩ ʋ laalɩyuori-hɩasɩ-la kala sɩ hɛ ʋ teeŋ, “Má mʋ Iziral doho doho-la kala tʋɔŋ a chɩŋ Daŋ sɩ hɛ wɩɩpɔsʋŋ nagʋa dɩɩrɩŋ a kaa mʋ Bɛɛsɩba sɩ hɛ wɩɩpɔsʋŋ nadiiŋ dɩɩrɩŋ, a dɩɩsɛ laalɩyuoroo kala dɩ mɩ wuo jɩŋ ba niiŋ.”

³ Jʋab bʋla pɩ kuoro, “A leŋ dɩ ŋ TƖƖNA Wɩa ŋaa dɩ laalɩyuoro-la pʋŋa pɛ naansɩɩŋ zɔlɔ, dɩ ŋ-na kuoro mɩ nɩhɩaŋ sɩɩŋ naba. Ama bɛɛ nɛ tɩɩ ŋ chɩchɛ dɩ ŋ ŋaa wʋdoho deeŋ?”

⁴ Ama kuoro fa sɩ bʋl wɩɩ-la nɛ chɩna a kɩɩ wɩɩ-la Jʋab arɩ laalɩyuori-hɩasɩ-la sɩ bʋla. Ŋɩɩ nɛ ba sii kuoro sɩpaaŋ a mʋ dɩ ba dɩɩsɛ laalɩyuoro-la kala sɩ hɛ Iziral tinteeŋ lɛ.

⁵ Ba sɩ chol Jɔdaŋ fuo-la, ba ŋmoo buguŋ a kpagɛ Arʋa, taŋ-la sɩ hɛ fuonaa luŋii-la wɩɩpɔsʋŋ nadiiŋ dɩɩrɩŋ, a mʋ to Gad a joŋo mʋ Jaza.

⁶ Ba bɩra joŋ ŋɩɩ nɛ a mʋ Gɩlɩad arɩ Tatɩm Hosi tinteeŋ, a mʋ Daŋ Jaaŋ a joŋ ŋɩɩ gollo to Sɩdɔŋ.

⁷ Ba lɩɩ nɩmɛ a mʋ Taaya, taŋ-la ba sɩ saa kɛrɛ a golli, a joŋo mʋ Hivi tɩŋŋaa arɩ Kɛnaŋ tɩŋŋaa tasɩŋ kala. Dɩdɛrɩŋ ba mʋ Bɛɛsɩba sɩ hɛ Juda tintee-hɩlɩŋ wɩɩpɔsʋŋ nadiiŋ dɩɩrɩŋ.

⁸ Ba joŋ chɛnsɩŋ nibi arɩ tapʋlaa mara nɛ a gɔllɛ tintee-la kala dɛrɛ, aŋ mɩɩra kɔ Jerusalɛm.

⁹ Jʋab dagɛ laalɩyuoro-la kala niiŋ a pɩ kuoro: Iziral tinteeŋ lɛ nɩalɩŋ sɩ jaŋ wuo yuo laalɩŋ ŋaa bʋɩ zɔlɔ chori nɛ, Juda ma nɩaa ŋaa bʋɩ zɔɔ-banɔŋ.

¹⁰ Devit sɩ dɩɩsɛ laalɩyuoro-la kala dɛrɛ, ʋ tʋɔbɩɩnaa walɩmʋ. Ʋ bʋla pɩ La TƖƖNA, “Wɩɩ-la mɩ sɩ ŋaa, ʋ chaasa wʋbɔŋ nɛ. Mɩɩ sʋlʋŋ La TƖƖNA, joŋo chɛmɛ, aŋ lɩɩsɛ cheerii-la mɩ-na ŋ tɩntɩnna lɛ. Nɩyaarɩ wɩɩ nɛ mɩ ŋaa.”

¹¹ Ka dɩ taŋ-na pʋl, Devit sii chʋchʋɔŋ, dɩ La TƖƖNA bʋl wɩaa pɩ Gad sɩ ŋaa ʋ wʋlaabʋllʋ. Gad nɛ fa ŋaa Devit sɩɩ-naara.

¹² Ʋ sɩ, “Mʋ a bʋla pɩ Devit, ‘Wɩɩ-la mɩ-na ma TƖƖNA sɩ bʋla nɛ ŋ-la: Wɩaa batori nɛ mɩ joŋo bibil ŋ sɩpaaŋ. Lɩɩsɛ ba tʋɔŋ kʋ-la ŋ sɩ jaŋ cho dɩ mɩ joŋo ŋaa ŋ lɛ.’ ”

¹³ Ŋɩɩ nɛ Gad mʋ Devit teeŋ a bʋl wɩalɩŋ kala La TƖƖNA sɩ bʋla, aŋ pɩɛsʋ, “Ŋŋ chɛ dɩ losuŋ jʋʋ ŋ tinteeŋ jɩsɩŋ batori nɛ koo ŋŋ chɛ dɩ ŋ dʋndɔŋŋɔɔ kiriŋ baarɛ chɛnsɩŋ batori nɛ koo ŋŋ chɛ dɩ nyanyal bɔŋŋɔɔ jʋʋ ŋ tinteeŋ tapʋlaa batori nɛ? Bɩɩnɛ a joŋ ba tʋɔŋ kʋ-la ŋ sɩɩ chɛ, dɩ mɩ mʋ bʋla pɩ nɩɩ-la sɩ tɩmmɛ.”

¹⁴ Ŋɩɩ nɛ Devit bʋla pɩ Gad, “Mɩ tʋɔŋ chaasa chei nɛ. Leŋ dɩ la jʋʋ La TƖƖNA nɩsɩŋ, bɛɛ wɩaa ʋʋ fá nɩaa nenige nɛ woruŋ, ama sɩ́ leŋe dɩ la jʋʋ nuhuobiine nɩsɩŋ.”

¹⁵ Ŋɩɩ nɛ La TƖƖNA joŋ nyanyal bɔŋŋɔɔ hɛ Iziral tinteeŋ lɛ, a chɩŋ chʋchʋɔ-la a kaa mʋ bʋa-la ʋ sɩ daga. Nɩaa bʋɩ mahɩŋ batori arɩ fii sʋʋ, a chɩŋ Daŋ sɩ hɛ wɩɩpɔsʋŋ nagʋa dɩɩrɩŋ a kaa mʋ yi Bɛɛsɩba sɩ hɛ wɩɩpɔsʋŋ nadiiŋ dɩɩrɩŋ.

¹⁶ Wɩa tɩndaara fa sɩ kɛŋ ʋ nɩsɩŋ je dɩ ʋ chei Jerusalɛm, La TƖƖNA tʋɔŋ chei, a tɩŋ cheerii-la ʋ tɩndaarʋ-la fa sɩɩ chɛ ʋ joŋo hɛ nɩalɩŋ lɛ. Ʋ bʋla pɩ ʋ tɩndaarʋ-la sɩɩ kpʋ nɩalɩŋ, “Ʋ maga nɛ, lemba magɛ ŋɩɩ.” Bʋa-la lɛ dɩ La TƖƖNA tɩndaarʋ-la fa hɛ Jebus tɩɩna kʋbala ba sɩɩ yɩrɛ Araʋna taha lɛ.

¹⁷ Devit sɩ na Wɩa tɩndaarʋ-la sɩɩ kpʋ nɩalɩŋ, ʋ bʋla pɩ La TƖƖNA, “Mɩ nɛ nɩɩ-la sɩ ŋaa wʋbɔŋ-la a chei wɩaa. Nɩaa deemba nagɛ piesee nɛ. Bɛɛ nɛ ba ŋaa? Mɩɩra dɔgɩsɛ mɩ dɩ mɩ dɩa nɩaa nɛ.”

Devit saa Wɩɩsʋllɩ koruŋ

¹⁸ Tapʋlɩɩ-la Gad bɩra mʋ Devit teeŋ a bʋla pʋ, “Sii jɩl Araʋna, Jebus tɩɩna-la taha a saa Wɩɩsʋllɩ koruŋ pɩ La TƖƖNA nɩmɛ.”

¹⁹ Ŋɩɩ nɛ Devit mʋ, arɩ La TƖƖNA sɩ to Gad lɛ a bʋl ŋɩɩ pʋ.

²⁰ Araʋna sɩ na kuoro arɩ ʋ nɩaa dɩ ba chaasʋ a kʋkɔ, ʋ lɩɩ mʋ chemba, a tuu kpirimi kuoro sɩpaaŋ a kɛŋ ʋ sɩaa chu tinteeŋ.

²¹ Ʋ pɩɛsɛ, “Bɛɛ nɛ tɩɩ kuoro mɩ nɩhɩaŋ kɔ mɩ-na ŋ tɩntɩnna teeŋ?” Devit bʋl, “Mɩ kɔ dɩ mɩ yɔɔ ŋ taha-la nɛ, a saa koruŋ pɩ La TƖƖNA, dɩ nyanyal-bɔmɔ-la sɩ jʋʋ nɩalɩŋ ba sʋsʋʋ dɩ ʋ dɛrɛ.”

²² Araʋna bʋla pɩ Devit, “Kuoro mɩ nɩhɩaŋ, ŋ jaŋ wuo joŋ kʋŋ na-kala ŋ sɩɩ chɛ a kaa sʋl Wɩɩsʋlɩɩ-la. Na nɛ-ferisiŋ, ŋ jaŋ wuo kaa sʋl kʋnyɩgaa Wɩɩsʋlʋŋ. Na mɩɩ-ŋmoori daasɩŋ arɩ daasɩŋ ba sɩ joŋo hɩhɛ nɛsɩŋ baŋŋaa nɛ ŋ-la, ŋ jaŋ wuo kaa hɛ nyiniŋ.

²³ Kɩaa deemba kala nɛ mɩ-na Araʋna joŋo pɩ ŋ-na kuoro.” Ʋ bɩra bʋla pɩ kuoro, “A leŋ dɩ ŋ TƖƖNA Wɩa laa ŋ sʋla.”

²⁴ Kuoro ma bɩra bʋl, “Aɩ, mɩ cho dɩ mɩ timiŋ nɛ. Mɩ bɩ chɛ dɩ mɩ kɛŋ kʋŋkala kpʋ a sʋl kʋnyɩgaa Wɩɩsʋlʋŋ a pɩ La TƖƖNA Wɩa dɩ mɩ bɩ chɩmɩŋ ŋmobo kʋ-la lɛ.” Ŋɩɩ nɛ Devit yɔɔ taha-la arɩ nɛ-ferisi-la a tiŋ warɩpʋla mahɩŋ balɩa arɩ fii.

²⁵ Ŋɩɩ nɛ Devit saa Wɩɩsʋllɩ koruŋ nɩmɛ a pɩ La TƖƖNA, a sʋl kʋnyɩgaa Wɩɩsʋlʋŋ arɩ nii-magɛ dɔŋɔ Wɩɩsʋlʋŋ. La TƖƖNA laa ʋ sʋla, nyanyalɩɩ-la fa sɩ hɛ Iziral tinteeŋ lɛ kala dɛrɛ.