2 SAMƲƐL 22 - WƖA TENIŊ

Devit yɩɩ yɩɩlɩŋ a dɛnnɛ La TƖƖNA

¹ Yɩɩlɩŋ deeŋ nɛ Devit yɩɩ a dɛnnɛ La TƖƖNA bʋa-la lɛ La TƖƖNA sɩ laaʋ ta ʋ dʋndɔŋŋɔɔ arɩ Sɔɔl nɩsɩŋ lɛ.

² Ʋ sɩ, “La TƖƖNA, ŋ nagɛ bʋŋ nɛ mɩ teeŋ, ŋ nɛ mɩ dɩ-duoŋ, ŋ nɛ laamɛ tɩta.

³ Mɩ Wɩa, ŋ nagɛ bʋŋ nɛ mɩ teeŋ, ŋ nɛ mɩ yuori. Ŋ nɛ chu tɔmɛ, ŋ nɛ laamɛ tɩta. Ŋ nɛ mɩ dɩ-duoŋ, Ŋ nɛ mɩ yie yuori ŋ laamɛ ta. Ŋ nɛ laamɛ ta nɩduoruŋ nɩsɩŋ lɛ.

⁴ Mɩɩ dɛnnɩŋ La Tɩɩna, mɩ sʋla yɩrɩŋ nɛ, ŋ laamɛ ta mɩ dʋndɔŋŋɔɔ nɩsɩŋ lɛ.

⁵ Sʋʋŋ fa nagɛ lɩɩ-pel-duoŋ nɛ a tɔ mɩ hɛ a chɩchɛ ʋ jommi liŋ.

⁶ Sʋʋŋ ŋmɛsɩŋ vɔɔmɛ nɛ a golli, aŋ ka ʋ bɛrɩsɩŋ ma gbɛrɛmɛ.

⁷ Wɩaa fa chaasa jʋʋmɛ nɛ, mɩ yɩrɛ ŋ-na mɩ TƖƖNA Wɩa. Ŋ hɛ ŋ dɩɩ-bal-la lɛ nɛ aŋ nɩɩ mɩ yikoro. Mɩ nii-ŋmobo-la kala jʋʋ ŋ dɩgɩlaa nɛ.

⁸ Ŋ sɩ na baanɩŋ, tinteeŋ zigile nɛ, wɩa-nyuŋ kɩaa ma kala jigisi a kɛŋ ba gentisiŋ pɛ.

⁹ Ka nyʋɔsʋŋ lɩlɩɩ ŋ-na La TƖƖNA mɩɩ-boyee lɛ, nyiŋgeliŋ arɩ nyiŋ-hal-muloo ma lɩlɩɩ ŋ niiŋ lɛ.

¹⁰ Ŋ kɛŋ wɩa-nyuŋ bɛgɛ ta nɛ aŋ kʋ tuu, ka duoŋ-bɩlɩmbaaŋ-bisiŋ hɛ ŋ naasɩŋ bʋbʋɔŋ.

¹¹ Ŋ sagɛ kɩalɩŋ sɩ kɛŋ kɩŋkɛnsɩŋ a nagɛ Wɩa tɩndaaraa nyuŋ nɛ a file to peliŋ lɛ a kʋ tuu.

¹² Ŋ leŋe birimiŋ nagɛ lɛbɩŋ nɛ a golluŋ, ka duoŋ-bɩlɩmbaaŋ-bine ma tɔŋ.

¹³ Pʋlʋmʋŋ chaanɛ ŋ sɩpaaŋ nɛ, a nagɛ duonuŋ sɩ lɩgɩsa leriŋ pʋllɛ.

¹⁴ La TƖƖNA sɩ kɩɩ kʋŋkala, ŋ sɩ kpɩa goŋ wɩa-nyuŋ, leriŋ kala chɩɩma nɛ.

¹⁵ Ŋ yuo ŋ to-hɛŋŋɛɛ nɛ ŋ dʋndɔŋŋɔɔ pɩsɛ, ba nagɛ duonuŋ sɩ lɩgɩsa nɛ a kiriba ta ba fá.

¹⁶ La TƖƖNA, ŋ sɩ kpɩa mʋgʋ-balɩŋ lɛ, ʋ lɩɩŋ kala hʋa nɛ a nyɩɩsɛ tinteeŋ lɛ, ŋ sɩ wiese ma, tinteeŋ zigile nɛ.

¹⁷ Ŋ lɩɩ wɩa-nyuŋ nɛ kʋ tuu, a liirimi lɩɩŋ sɩ luŋie tʋɔŋ.

¹⁸ Ŋ nɛ laamɛ ta mɩ dʋndɔŋŋɔɔ nɩsɩŋ lɛ, nɩalɩŋ sɩ chaasa kɛŋ doluŋ a kɩɩmɛ.

¹⁹ Tapʋlɩɩ-la wʋlɔrʋnʋŋ sɩ jʋʋmɛ, ba sii kɔ dɩ ba yuomi, ŋ-na La TƖƖNA sii chɩŋ nɛ a pɔmɛ.

²⁰ Ba sɩ tɔmɛ hɛ, ŋ nɛ lɩɩsɛmɛ ta pʋlʋŋ-jaala lɛ, ŋ chomi nɛ, ŋɩɩ nɛ tɩɩ ŋ laamɛ ta.

²¹ La TƖƖNA ŋaa wɩalɩŋ mɩ lɛ a tɩŋ mɩ sɩ ŋaa tʋɔpʋl tɩɩna wɩaa nɛ. Mɩ sɩ bɩ disiŋ kala kɛnɛ nɛ tɩɩ ŋ siilimi.

²² Mɩɩ to La TƖƖNA wombiee nɛ, mɩ ha bɩ Wɩa harɩŋ lɩa a ŋaa wʋbɔŋ.

²³ Mɩɩ to wombie-la ŋ sɩ bile nɛ, mɩ bɩ wɩalɩŋ ŋ sɩ daga dɩ la tuto kʋŋkala vɩa.

²⁴ Mɩ bɩ wʋcheeli kɛnɛ ŋ sɩpaaŋ. Mɩ kɛŋ mɩ tɩtɩa nɛ dɩ mɩ sɩ́ wʋbɔŋ kala ŋaa.

²⁵ Mɩ sɩ ŋaa tʋɔpʋl tɩɩna wɩaa nɛ tɩɩ La TƖƖNA siilimi, mɩ sɩ bɩ disiŋ kɛnɛ ʋ sɩpaaŋ nɛ tɩɩ ʋ ŋaa ŋɩɩ mɩ lɛ.

²⁶ Nɩalɩŋ sɩ kɛŋ wʋtɩtɩɩ ŋ teeŋ, ŋ ma yie dagɛ ŋ wʋtɩtɩɩ pɩba nɛ. Nɩɩ-la ma sɩɩ ŋaa wɩaa ba bʋa lɛ, ŋ yie ŋaa wɩaa ba bʋa lɛ nɛ a pʋ.

²⁷ Nɩalɩŋ ma sɩ kɛŋ tʋɔpʋla, ŋ yie pʋllɛ ŋ tʋɔŋ pɩba nɛ, ama nɩalɩŋ wɩaa sɩ golibo, ŋ yie hosi ba nyuŋ nɛ.

²⁸ Ŋ laa nɩalɩŋ sɩ kɛŋ ba tɩtɩa muuri a ta nɛ, aŋ kɛŋ nɩalɩŋ sɩɩ bigisi ba tɩtɩa lɛ muuri.

²⁹ Mɩ TƖƖNA nɛ ŋaa mɩ chaanɩŋ, ŋ leŋe biriŋ-la tʋɔŋ mɩ sɩ hɛ bɩrɩmɛ pʋlʋmʋŋ nɛ.

³⁰ Ŋ pɛ mɩ lɛ nɛ mɩ yuo dii laalɩyuoroo, ŋ-na Wɩa leŋe mɩ yuo tasɩŋ ba sɩ saa kɛrɩsɩŋ golli nɛ.

³¹ Mɩ Wɩa, ŋ wombiiŋ chaasa zɔŋ nɛ, ʋ wɩaa ma tʋʋlɛ. Ŋ nagɛ hɔɔtaala-la laalɩyuoroo sɩ kaa kɛrɛɛ laa bayuori hɛŋŋɛɛ nɛ a chu tɔ nɩalɩŋ sɩ kʋ yuoruŋ.

³² Wɩa dɔŋ hɛ nɩmɛ a pɛ LA TƖƖNA Wɩa lɛɛ? Kʋbɛɛ nɛ kɛŋ doluŋ dɩ la Wɩa dee?

³³ Wɩa nɛ pɩmɛ doluŋ, a leŋ mɩ wombiiŋ chaasa zɔŋ.

³⁴ Ŋ nɛ leŋe mɩ naachɛɛŋ lɩŋ a nagɛ aamɩŋ. Ŋ pɛ mɩ lɛ mɩ wuo jɩla chɩŋ peelee nyuŋ.

³⁵ Ŋ nɛ gʋnnɛmɛ laalɩŋ yuonuŋ. Mɩ jaŋ wuo yuo toŋ-la ba sɩ kɛŋ kɔlɩɩŋ ŋaa.

³⁶ Ŋ chu tɔmɛ nɛ a laamɛ ta. Ŋ pɛ mɩ lɛ nɛ a leŋ mɩ ŋaa nɩbal.

³⁷ Ŋ nɛ pori mɩ wombiiŋ ʋ jal, dɩ mɩ sɩ́ mɩ naaŋ joŋo ŋmoo.

³⁸ Mɩ kire to mɩ dʋndɔŋŋɔɔ harɩŋ nɛ a kpʋba, mɩ bɩ harɩŋ mɩɩra aŋ cheiba.

³⁹ Mɩ ŋmooba lo mɩ naasɩŋ bʋbʋɔŋ nɛ, ba bɩ wuo sii. Mɩ yuo diiba.

⁴⁰ Ŋ pɩmɛ doluŋ nɛ mɩ kaa yuo laalɩŋ, a yuo dii mɩ dʋndɔŋŋɔɔ.

⁴¹ Ŋ leŋe mɩ dʋndɔmɔ-la mɩɩra fɩfá nɛ, ka mɩ kire kpʋba.

⁴² Ba ŋmoo niiŋ a chɩchɛ nʋʋ nɛ dɩ ʋ pɛ ba lɛ, ka nʋʋ tuo dɩ ʋ laaba ta. Ba yɩrɛ ŋ-na La TƖƖNA ma, ŋ fʋʋla yagɛba.

⁴³ Mɩ ŋmooba nɛ ba bɩɩ a nagɛ hagɩlɩ-nʋkʋŋ. Mɩ tigisiba, a fɩrɩgɛba a nagɛ vʋchɔɔŋ sɩ hɛ womporuŋ lɛ.

⁴⁴ Ŋ nɛ laamɛ ta nɩalɩŋ sɩɩ yuomi nɩsɩŋ lɛ, a leŋ mɩ ŋaa tintee-wogusuŋ sɩpaalaara. Lɛɛlɛ ba ŋaa mɩ tɩntɩnnaa nɛ.

⁴⁵ Tintee-wogusuŋ nɩaa kʋ kpirimi mɩ sɩpaaŋ nɛ. Dɩ mɩ nɛ bʋl wɩɩ, ba yie to mɩ niiŋ nɛ.

⁴⁶ Ba nandaasɩŋ kala nɛ yʋɔra, ba lɩɩ ba dɩ-duoruŋ lɛ a chele kʋkɔ.

⁴⁷ Ŋ-na La TƖƖNA weye nɛ. Mɩ jaŋ dɛnnɩŋ, ŋ kɛŋ doluŋ a nagɛ bʋŋ nɛ. Mɩ jaŋ heele bʋl Wɩa sɩ laamɛ ta yɩrɩ-balɩŋ wɩaa.

⁴⁸ Ŋ nɛ Wɩa a laa mɩ dʋndɔŋŋɔɔ yuo pɩmɛ, a joŋ tinteyee nɩaa pɩmɛ mɩ bibeŋ.

⁴⁹ Ŋ nɛ laamɛ ta mɩ dʋndɔmɔ-la sɩ cho yuosuŋ woruŋ nɩsɩŋ lɛ, a leŋ mɩ ŋaa nɩbal a kɩɩ ba kala.

⁵⁰ Ŋɩɩ wɩaa, mɩ TƖƖNA, mɩ jaŋ dɛnnɩŋ tinteyee nɩaa tʋɔŋ. Mɩ jaŋ yɩɩ yɩɩlaa a dɛnnɩŋ.

⁵¹ Ŋ nɛ leŋe mɩ-na ŋ kuoro Devit yuo dii. Ŋ dagɛ ŋ chono-la sɩ bɩ dɛrɛ nɛ a pɩ mɩ-na, nɩɩ-la ŋ sɩ lɩɩsa arɩ mɩ doho nɩaa a kaa mʋ wuu.”