2 SAMƲƐL 21 - WƖA TENIŊ

Gibioŋ tɩŋŋaa joŋ ba baanɩŋ fɩɩsɛ Sɔɔl biiriŋ lɛ

¹ Bʋa-la lɛ Devit sɩ ŋaa kuoro, losuŋ fa jʋʋ Iziral tinteeŋ nɛ jɩsɩŋ batori a tɩgɛ dɔŋɔ lɛ. Devit pɩɛsɛ La TƖƖNA dɩ ʋ na wɩɩ-la sɩ tɩɩ. Ŋɩɩ nɛ La TƖƖNA bʋl, “Cheeriŋ lɩɩ Sɔɔl arɩ ʋ dɩa nɩaa nɛ, a tɩŋ nɩalɩŋ ʋ sɩ kpʋa wɩaa, ʋ nɛ kpʋ Gibioŋ tɩŋŋaa.”

² Ŋɩɩ nɛ Devit yɩrɛ Gibioŋ tɩŋŋaa kala hɛ dɔŋɔ. (Gibioŋ tɩmma-la fa bɩ Iziral tɩmma ŋaa, ba ŋaa Amɔrɩ tɩŋŋaa nɩkaanaa nɛ, Iziral nɩaa fa ŋmɩɛsa pɩba nɛ arɩ ba bɩ jaŋ kpʋba, ka Sɔɔl chɩchɛ dɩ Iziral arɩ Juda tinteeŋ kɛŋ doluŋ, ʋ tɩŋ ŋɩɩ wɩaa a chɩchɛ dɩ ʋ kpʋ Gibioŋ nɩalɩŋ.)

³ Ŋɩɩ nɛ kuoro Devit yɩrɛ Gibioŋ tɩmma-la a pɩɛsɛba, “Bɛɛ nɛ ma chɩchɛ dɩ mɩ ŋaa pɩma? Ɛɛ nɛ mɩ jaŋ ŋaa a wasɛ wɩɩ-la ka dɩ ma sʋl La TƖƖNA dɩ ʋ bɩra pɛ ʋ nɩaa lɛ?”

⁴ Gibioŋ tɩmma-la bʋl, “La bɩ wombiiŋ kɛnɛ dɩ la chɩchɛ hɔpʋla koo sɛlɩmɛ, Sɔɔl koo ʋ dɩa nɩaa teeŋ, la bɩ wombiiŋ ma kɛnɛ dɩ la kpʋ nʋʋ Iziral tinteeŋ lɛ.” Devit bɩra pɩɛsɛba, “Bɛɛ nɛ saa ma chɩchɛ dɩ mɩ ŋaa pɩma?”

⁵ Ba bɩra bʋla pɩ Devit, “Sɔɔl nɛ faa chɛ dɩ ʋ kpʋ la nɩaa kala, dɩ la sɩ́ lee-kala kɛŋ Iziral tinteeŋ lɛ.

⁶ Leŋ dɩ ba kɛsɛ Sɔɔl doho nɩaa baalaa balɩpɛ pɩla dɩ la kpʋ, a kɛmba lɩɩ bil dɩ-jalɩŋ La TƖƖNA sɩpaaŋ, Sɔɔl, nɩɩ-la La TƖƖNA sɩ lɩɩsa ʋ ŋaa kuoro, ʋ jaŋ Gɩbɩa lɛ.” Ŋɩɩ nɛ kuoro bʋl, “Mɩ jaŋ kɛsɛba pɩma.”

⁷ Kuoro Devit fa leŋ Sɔɔl nanʋala Jonataŋ bie Mɛfɩbɔsɛf-na nɛ, a tɩŋ nii-la ʋ dɩ Sɔɔl nanʋala Jonataŋ fa sɩ hɛ pɩ dɔŋɔ La TƖƖNA sɩpaaŋ wɩaa.

⁸ Ama Devit fa kɛsɛ Aamoni arɩ Mɛfɩbɔsɛf nɛ. Ba ŋaa Aya tolo Rɩzɩpa biiriŋ nɛ ʋ sɩ lʋla pɩ Sɔɔl, a bɩra kɛsɛ Sɔɔl tolo Mɛrab hambolibiisiŋ banɔŋ, ʋ ma sɩ lʋla pɩ Adɩrɩɛl sɩ ŋaa Bazɩlaɩ Mehola tɩɩna-la nanʋala.

⁹ Devit jomba a pɩ Gibioŋ tɩmma-la, ba kpʋba a joŋo sagɛ dundolo nyuŋ La TƖƖNA sɩpaaŋ Gɩbɩa lɛ. Ba kala balɩpɛ nɛ ba kpʋ hɛ dɔŋɔ. Ba kpʋba tapʋlɩɩ-la ba sɩ suomo kʋkʋŋ ba mɩɩ-bumbumba nɛ.

¹⁰ Aya tolo Rɩzɩpa, Sɔɔl hɩɩla dɔŋɔ sii joŋ bɔtɔ-kɔsʋmɔɔ a lɩɩ mʋ jɛrɛ bʋŋ nyuŋ a pɩna pɔ sʋʋnʋ-la, a chɩŋ baga kɩaa ŋaanɩŋ bʋa lɛ a kaa mʋ yi bʋa-la lɛ duonuŋ sɩ nɩɩ hɛ ba lɛ. Ʋ bɩ leŋe diibie kala digiba wɩɩhɛyɛ, koo gɩrɩŋ kʋŋ digiba tɩtaŋɩŋ.

¹¹ Ba sɩ bʋl wɩɩ-la Rɩzɩpa sɩ ŋaa a pɩ Devit,

¹² Devit sii mʋ Jabɛs Gɩlɩad nɩaa teeŋ, a laa Sɔɔl arɩ ʋ nanʋala Jonataŋ haŋgbelee. (Ba fa lʋara paaba Bɛf Saŋ, lee-la nʋʋkala sɩɩ hɔŋ nɛ, lee-la Fɩlɩsɩtɩa tɩŋŋaa sɩ joŋ Sɔɔl kʋsʋʋŋ sagɛ, ba fa sɩ kpʋba Gɩlɩbʋa lɛ harɩŋ.)

¹³ Devit kɛŋ Sɔɔl arɩ ʋ nanʋala Jonataŋ haŋgbelee kɔ, a paa nɩalɩŋ ma balɩpɛ ba sɩ kpʋa haŋgbelee pɛ.

¹⁴ Ba joŋ Sɔɔl arɩ ʋ nanʋala Jonataŋ haŋgbelee hugi Sɔɔl nyɩmma Kɩs bʋa lɛ, taŋ-la ba sɩɩ yɩrɛ Zɛla lɛ, Bɛnjamɩŋ tinteeŋ, aŋ ŋaa wɩalɩŋ kala kuoro sɩ sɩ ba ŋaa. Ʋ ŋɩɩ harɩŋ nɛ, Wɩa laa ba sʋla a pɛ ba tinteeŋ lɛ.

Iziral tɩŋŋaa arɩ Fɩlɩsɩtɩa tɩŋŋaa yuo laalɩŋ

¹⁵ Bʋa kʋbala lɛ, laalɩŋ bɩra sii Fɩlɩsɩtɩa tɩŋŋaa arɩ Iziral tɩŋŋaa pɛgɛ. Devit sii kɛŋ ʋ laalɩyuoroo mʋ dɩ ba yuo Fɩlɩsɩtɩa tɩmma-la. Ŋɩɩ nɛ lɔlʋŋ jʋʋ-ʋ woruŋ.

¹⁶ Fɩlɩsɩtɩa tɩmma-la fa kɛŋ laa-yuori-babiibal nɛ, baa yɩrɛ Ɩsɩbɩ-Bɛnɔb. Ʋ fa ŋaa Rafa doho nɩwaayiile-la dɔŋɔ nɛ. Ba kɛŋ kɔlɩɩŋ nɛ libi ʋ timiŋ, ʋ nyuŋ yuŋuŋ ŋaa kilo batori arɩ kpaa magɛ dɔŋɔ. Ʋ fa kori tokobii-falɩŋ ma nɛ. Ʋ bʋl arɩ ʋ jaŋ kpʋ Devit.

¹⁷ Ama Zeruya nanʋala Abɩsaɩ kʋ kpʋ Fɩlɩsɩtɩa tɩɩna-la, a laa Devit ta. Ŋɩɩ nɛ Devit laalɩyuoroo ŋmɩɛsa pʋ a bʋl, “La bɩra bɩ chɛ dɩ ŋ to la harɩŋ a mʋ laalɩŋ. Iziral tɩŋŋaa yɩɛlaa kala hɛ ŋ lɛ nɛ, la bɩ jaŋ cho dɩ ba kpʋŋ.”

¹⁸ Bʋa dɔŋɔ ma lɛ nɛ laalɩŋ fa bɩra sii ba dɩ Fɩlɩsɩtɩa tɩŋŋaa pɛgɛ Gob lɛ. Bʋa-la lɛ nɛ Sɩbɛkaɩ sɩ ŋaa Husa tɩɩna kpʋ Rafa doho nɩaa dɔŋɔ ba sɩɩ yɩrɛ Saf.

¹⁹ Laalɩŋ dɔŋɔ bɩra sii Gob-la lɛ ba dɩ Fɩlɩsɩtɩa tɩŋŋaa pɛgɛ, Ɛlɩhanaŋ, Jaarɛ Ɔrɛgɩm, sɩ ŋaa Bɛtɩlɛhɛm tɩɩna bie, kpʋ Gɩtɩ tɩɩna kʋbala baa yɩrɛ Golɩaf. Ʋ timiŋ daaŋ fa chaasa barɩmɛ nɛ a nagɛ gɛrɩpɛ-yuori daaŋ.

²⁰ Laalɩŋ dɔŋɔ fa bɩra sii Gaf lɛ. Baal kʋbala fa hɛ nɩmɛ a waayi woruŋ a kɛŋ neniee fii arɩ balɩa, naaniee ma fii arɩ balɩa. Ba kala ŋaa mara arɩ banɛsɛ. Ʋ fa ŋaa Rafa doho nʋʋ nɛ.

²¹ Ʋ sɩ joŋ Iziral tɩŋŋaa dɩ ʋ hɛ sɩɩŋ lɛ, Devit naambie Sɩmɩa nanʋala Jonataŋ nɛ kpʋʋ.

²² Baalaa deemba banɛsɛ fa ŋaa Rafa doho nɩaa nɛ a hɔŋ Gaf lɛ. Ŋɩɩ nɛ ba jʋʋ Devit arɩ ʋ nɩaa nɩsɩŋ ba kpʋba.