2 SAMƲƐL 20 - WƖA TENIŊ

Sɛba lɩɩ Devit harɩŋ

¹ Wʋhɛɛrʋ kʋbala nɛ fa hɛ nɩmɛ baa yɩrɛ Sɛba. Ʋ ŋaa Bikiri nanʋala nɛ, aŋ ŋaa Bɛnjamɩŋ doho nʋʋ. Ʋ ŋmʋʋ banyile, aŋ kpɩa goŋ a bʋl, “La nɩsɩŋ tuo Jesi nanʋala Devit lɛ. Iziral tɩmma, má leŋ la mɩɩra mʋ la dɩɩsɩŋ.”

² Ŋɩɩ nɛ Iziral tɩmma-la kala vɩa Devit, aŋ tuto Bikiri nanʋala Sɛba. Ama Juda doho nɩaa na-kala chɩna gbɛrɛ ba kuoro Devit nɛ, a to ʋ harɩŋ a lɩɩ Jɔdaŋ fuo-la a mʋ yi Jerusalɛm.

³ Devit sɩ mɩɩra kɔ ʋ kuoru dɩa sɩ hɛ Jerusalɛm lɛ, ʋ kɛŋ haala-la ʋ sɩ bile aŋ bɩ jaa a leŋ ba pɔ ʋ kuoru dɩa, a tɔ hɛ dɩa lɛ a leŋ laalɩyuoroo bibemba. Ʋ pɩpɩba kɩalɩŋ ba sɩɩ chɛ, ama ʋ dɩ ba kʋŋkala bɩ bɔsɔ ka pɛ. Ba tɔba ŋɩɩ nɛ, ba hɛ nɩmɛ deeŋ deeŋ a mʋ yi tapʋlɩɩ-la ba sɩ sʋba. Ba hɛ nɩmɛ a nagɛ yo-haalaa.

⁴ Ŋɩɩ nɛ kuoro bʋla pɩ Amasa sɩ ŋaa laalɩyuoru-hɩaŋ, “Yɩrɛ Juda tɩmma-la kala dɩ ŋ dɩ ba kɔ mɩ teeŋ a chɩŋ jɩnɩŋ a kaa mʋ tapʋlaa batori chɛɛŋ.”

⁵ Ama Amasa sɩ mʋa dɩ ʋ yɩrɛ Juda tɩmma-la, ʋ diene kɩɩ tapʋlɩa-la batori kuoro sɩ dagʋ nɛ.

⁶ Devit fa bʋla pɩ Abɩsaɩ, “Lɛɛlɛ Bikiri nanʋala Sɛba jaŋ ŋaa wʋbɔŋ la lɛ a kɩɩ wɩalɩŋ Abɩsalɔm sɩ ŋaa. Kɛsɛ mɩ laalɩyuoroo a kiri Sɛba libe, dɩ ŋɩɩ dee ʋ jaŋ wuo mʋ jʋʋ tabala-la ba sɩ saa kɛrɛ golli dɔŋɔ, a fori la nɩsɩŋ lɛ.”

⁷ Ŋɩɩ nɛ Abɩsaɩ sii kɛŋ Jʋab arɩ ʋ laalɩyuoroo arɩ nɩalɩŋ sɩɩ pɔ Devit arɩ laalɩyuori-babiibala-la kala. Ba lɩɩ Jerusalɛm lɛ a kikiri dɩ ba kɛŋ Bikiri nanʋala Sɛba.

⁸ Ba sɩ mʋ yi bʋ-bal-la sɩ hɛ Gibioŋ lɛ, Amasa kʋ chemba, dɩ Jʋab laalɛ ʋ laalɩyuori-gɛnnɩŋ, a joŋ gɛrɩpɛlɩɛɛ-bie vɔɔ ʋ tɩŋa, aŋ joŋ sɩɩ-chɔrɔ sɩ hɛ ʋ pɛɛŋ lɛ a vɔɔ gɛrɩpɛlɩɛɛ-bie-la lɛ. Ʋ fa sɩɩ mʋ dɩ ʋ chemu ŋɩɩ, sɩa-la fuoso tel. Ʋ joŋ arɩ nagʋa.

⁹ Jʋab chʋɔlɛ Amasa a bʋl, “Mɩ naambii, ŋ yaraa fɩɛlaa?” Ŋɩɩ nɛ aŋ kɛŋ Amasa tɔŋŋɔɔ lɛ arɩ ʋ nadiiŋ nɩsɩŋ a nagɛ ʋʋ chɛ dɩ ʋ guoru nɛ.

¹⁰ Amasa fa bɩ sɩa-la sɩ hɛ Jʋab nɩsɩŋ dɔŋɔ lɛ na, ka Jʋab joŋ sɩa-la a tɔɔ ʋ luoruŋ lɛ, ʋ luobiee lɩɩ tel tinteeŋ. Jʋab tɔbʋ bala dʋndʋŋ nɛ, ka Amasa sʋʋ. Ŋɩɩ nɛ ka Jʋab arɩ ʋ naambie Abɩsaɩ kiri Sɛba libe a mʋ.

¹¹ Jʋab laalɩyuoroo dɔŋɔ kʋ chɩŋ Amasa sɛmɛ aŋ bʋl, “Nɩɩ-la kala sɩ cho Jʋab, a ŋaa Devit nʋʋ, ʋ kʋ to Jʋab harɩŋ.”

¹² Dɩ Amasa fa pɩŋ ʋ chalɩŋ tʋɔŋ wombiiŋ tʋtʋɔbaanɩŋ, laalɩyuoro-la kʋŋkala yie kʋ naʋ, a chɩŋ. Baal-la sɩ na dɩ nʋʋkala yie kʋ na Amasa a chɩŋ, ʋ lɛrʋ kaa mʋ ta gɩrɩŋ tʋɔŋ, a joŋ gɛrɩŋ tɔʋ.

¹³ Ba sɩ kɛŋ Amasa joŋ wombiiŋ lɛ ŋɩɩ, laalɩyuoro-la kala to Jʋab harɩŋ ba kiri Bikiri nanʋala Sɛba libe dɩ ba kɛnʋ.

¹⁴ Sɛba to Iziral doho doho-la kala tʋɔŋ ŋɩɩ a mʋ yi taŋ-la ba sɩɩ yɩrɛ Abɛl Bɛf Maaka. Bɛrɩ tɩŋŋaa kala sii kʋ chemu ba jʋʋ taŋ-la tʋɔŋ.

¹⁵ Ŋɩɩ nɛ Jʋab arɩ ʋ laalɩyuoro-la kala kʋ golli Abɛl Bɛf Maaka chu a tɔ Sɛba hɛ. Ba kɛŋ tɩɛrɩŋ saa vaŋkumba a yelli kɛrɛ-la dɩ ba to ba lɛ jʋʋ taŋ-la, aŋ suomo ŋmuŋmoo kɛrɛ-la dɩ ba lo.

¹⁶ Ŋɩɩ nɛ dɩ ha-wʋjɩnnʋ kʋbala hɛ taŋ-la lɛ. Ʋ jɩl kɛrɛ-la a ŋaa goŋ a bʋl, “Má jegile nɩɩ mɩ teeŋ. Má jegile nɩɩ mɩ teeŋ. Má bʋla pɩ Jʋab dɩ ʋ kɔ daha dɩ mɩ bʋl wɩɩ pʋ.”

¹⁷ Jʋab mʋ, haal-la pɩɛsʋ, “Ŋ nɛ ŋaa Jʋab?” Ʋ bʋl, “Mɩ nɛ.” Haal-la bɩra bʋl, “Jegile nɩɩ wɩɩ-la mɩ-na ŋ tɩntɩnna sɩ kɛnɛ dɩ mɩ bʋl.” Jʋab bʋl, “Mɩɩ jegili nɛ.”

¹⁸ Haal-la bʋl, “Faafaa-la ba yie bʋl, ‘Dɩ ŋ nɩɩ chɛ dɩ ŋ pɩɛsa jɩŋ wɩɩ sɩaa, mʋ taŋ-la ba sɩɩ yɩrɛ Abɛl, ŋ jaŋ jɩŋ.’ Wɩalɩŋ ba sɩ dagɛba lee-la nɛ yie leŋ ba jɩŋ ba wɩɩkala sɩaa.

¹⁹ La ŋaa nɩa sɩ bɩ yuosuŋ ka chɛ nɛ arɩ nɩalɩŋ sɩ kɛŋ wʋtɩtɩɩ Iziral tinteeŋ lɛ. Maa chɛ dɩ ma chei taŋ-la sɩ nagɛ Iziral tinteeŋ tasɩŋ kala naaŋ nɛ. Bɛɛ nɛ tɩɩ ŋ chɩchɛ dɩ ŋ kpʋ La TƖƖNA nɩaa kala?”

²⁰ Jʋab bʋl, “Aɩ, ŋɩɩ bɩ jaŋ ŋaa, mɩ bɩ jaŋ kpʋma koo a chei ma jaŋ!

²¹ Ŋɩɩ dee la bɩɩnɛ. Bikiri nanʋal-la ba sɩɩ yɩrɛ Sɛba, a lɩɩ Efirem tintee-la peelee sɩ yʋga nɛ sie a yuyuo kuoro Devit. Dɩ ma nɛ kɛŋ baal-la pɩmɛ, la bɩra bɩ jaŋ ŋaa wɩɩkala ma jaŋ lɛ.” Haal-la bʋla pɩ Jʋab, “La jaŋ keri ʋ nyuŋ a yuo ta ʋ to kɛrɛ kʋ lɩɩ a pɩŋ.”

²² Ŋɩɩ nɛ haal-la kɛŋ ʋ wʋjɩmɩɩ-la mʋ dagɛ ʋ jaŋ nɩaa. Ba sɛɩ a keri Bikiri nanʋala Sɛba nyuŋ a yuo ta ʋ to kɛrɛ kʋ lɩɩ a pɩ Jʋab. Ŋɩɩ nɛ Jʋab ŋmʋʋ banyile a giri laalɩyuoro-la kala taŋ-la lɛ, ba kʋŋkala mɩɩra mʋ ʋ dɩa. Jʋab ma mɩɩra mʋ kuoro Devit teeŋ Jerusalɛm lɛ.

²³ Jʋab nɛ fa ŋaa Iziral laalɩyuoroo kala nɩhɩaŋ. Jehoyada nanʋala Benaaya ma nɛ ŋaa nɩalɩŋ sɩɩ pɔ Devit nɩhɩaŋ.

²⁴ Adoniram ma nɛ faa beŋ nɩalɩŋ ba sɩ fʋga hɛ ba tɩtɩŋ. Ahilud nanʋala Jehosafat ma nɛ nɩɩ-la sɩ ŋmʋnsɛ ba wɩaa bibil.

²⁵ Sɛva nɛ fa ŋaa nɩɩ-la sɩɩ ŋmʋnsɛ ba tenniŋ. Zadɔk arɩ Abɩata ma nɛ ŋaa Wɩɩsʋllɩ sɩpaalaaraa.

²⁶ Jaɩrɩ tɩŋŋaa Ɩra ma nɛ fa ŋaa nɩɩ-la sɩ kpʋ Devit pʋsʋŋ a pʋpʋ.