2 SAMƲƐL 2 - WƖA TENIŊ

Ba lɩɩsɛ Devit ʋ ŋaa Juda tinteeŋ kuoro

¹ Wɩalɩŋ kala harɩŋ lɛ nɛ, Devit pɩɛsɛ La TƖƖNA, “Mɩ jaŋ wuo mɩɩra mʋ Juda tasɩ-la dɔŋɔɔ?” Ŋɩɩ nɛ La TƖƖNA bʋla pʋ, “Mʋ.” Devit bɩra pɩɛsɛ, “Tabɛɛ nɛ maga mɩ mʋ?” La TƖƖNA bʋl, “Mʋ Hɛbʋrɔŋ.”

² Ŋɩɩ nɛ Devit kɛŋ ʋ haala-la balɩa ba mʋ Hɛbʋrɔŋ: Jɛzɩrɛl tɩŋŋaa tolo Ahɩnʋam arɩ Kamɛl tɩŋŋaa Nabal yo-haal-la ʋ sɩ jaa baa yɩrɛ Abɩgɛl.

³ Devit fa pɛ kɛŋ baala-la sɩ hɛ ʋ teeŋ ma mʋ nɛ, ba dɩ ba dɩa nɩaa. Ba hɔŋ Hɛbʋrɔŋ arɩ tasɩ-la kala sɩ gollu lɛ.

⁴ Ŋɩɩ nɛ Juda doho nɩaa kɔ Hɛbʋrɔŋ, a joŋ Wɩɩsʋllɩ nʋʋŋ tɩsɛ Devit a dagɛ arɩ ʋ nɛ ŋaa ba kuoro. Ba sɩ bʋla pɩ Devit arɩ Jabɛs Gɩlɩad nɩaa nɛ hugi Sɔɔl,

⁵ ʋ tɩŋ nɩaa dɩ ba mʋ bʋla pɩba, “La TƖƖNA jaŋ pɛ ma lɛ, a tɩŋ ma sɩ zil ma nɩhɩaŋ Sɔɔl a hugu.

⁶ Mɩɩ sʋl La TƖƖNA dɩ ʋ dagɛ ʋ zile arɩ ʋ wutɩtɩɩ ma teeŋ. Mɩ ma jaŋ kɛmma woruŋ, a tɩŋ wʋzɔŋ-la ma sɩ ŋaa wɩaa.

⁷ Má nyɩrɛ bɔyɛ a kɛŋ bɔɩ-duoŋ, bɛɛ wɩaa ma nɩhɩaŋ Sɔɔl sʋba nɛ, ka Juda nɩaa lɩɩsɛmɛ mɩ ŋaa ba kuoro.”

Laalɩŋ sii Devit dɩa nɩaa arɩ Sɔɔl dɩa nɩaa pɛgɛ

⁸ Ama bʋa deeŋ lɛ, dɩ Sɔɔl laalɩyuoroo nɩhɩaŋ Abɩna sɩ ŋaa Nɛɛ nanʋala, sii kɛŋ Sɔɔl nanʋala ba sɩɩ yɩrɛ Ɩsɩ-Bɔsɛf ba chol Jɔdaŋ fuoŋ a mʋ Mahanem.

⁹ Nɩmɛ nɛ ʋ leŋ Ɩsɩ-Bɔsɛf dii tinteyee deemba kuoruŋ: Gɩlɩad, Asuri, Jɛzɩrɛl, Efirem, Bɛnjamɩŋ arɩ Iziral tinteeŋ kala.

¹⁰ Ɩsɩ-Bɔsɛf fa ŋaa jɩsɩŋ mahɩŋ balɩa nɛ aŋ dii Iziral tinteeŋ kuoruŋ, a bemba jɩsɩŋ balɩa. Ama Juda doho nɩaa-na faa to Devit nɛ.

¹¹ Devit dii kuoruŋ a hɔŋ Hɛbʋrɔŋ lɛ a beŋ Juda doho nɩaa jɩsɩŋ balɩpɛ arɩ chɛnsɩŋ balɩdʋ nɛ.

¹² Ŋɩɩ nɛ Nɛɛ nanʋala Abɩna arɩ Sɔɔl nanʋala Ɩsɩ-Bɔsɛf laalɩyuoroo sii Mahanem lɛ a mʋ Gibioŋ.

¹³ Zeruya nanʋala Jʋab, ʋ dɩ Devit tɩntɩnnɩ-hɩasɩŋ lɩɩ chemba lɩɩŋ sɩ pɩŋ lee-la Gibioŋ lɛ. Jʋab sɩ ŋaa Devit nɩaa sɩpaalaara, ʋ dɩ ʋ nɩaa hɔŋ vil-la sɛmɛ dɔŋɔ, Abɩna arɩ ʋ nɩaa ma hɔŋ sɛmɛ dɔŋɔ, ba chaasɛ dɔŋɔ.

¹⁴ Ŋɩɩ nɛ Abɩna bʋla pɩ Jʋab, “Leŋ dɩ la ŋaa dɩ la ba-pʋɔsa-la dɔnsʋŋ sii tʋʋ vaasɩŋ loo dɩ la na.” Ŋɩɩ nɛ Jʋab bʋl, “Ʋ zɔmɔ, leŋ dɩ ba sii loo.”

¹⁵ Ŋɩɩ nɛ ba lɩɩsɛ nɩaa fii arɩ balɩa Bɛnjamɩŋ arɩ Ɩsɩ-Bɔsɛf nɩaa tʋɔŋ, a lɩɩsɛ nɩaa fii arɩ balɩa Devit ma nɩaa tʋɔŋ dɩ ba loo.

¹⁶ Dɔŋɔ yie kɛŋ dɔŋɔ nyuŋ lɛ, aŋ tɔɔ ʋ sɛmɛ lɛ arɩ sɩɩ-chɔrɔ. Ŋɩɩ nɛ ba ŋaa a kala sʋʋ lee-la. Ŋɩɩ nɛ ba kɛŋ lee-la yɩyɩrɛ Hɛlɩkaf Hazurim. (Ʋ bʋbʋɔŋ nɛ sɩɩ-chɔrɔba buguŋ.)

¹⁷ Nʋʋkala suomo yuyuo ʋ dɔŋɔ tapʋlɩɩ-la, laalɩŋ chaasa hosi woruŋ. Ŋɩɩ nɛ Devit nɩaa yuo dii Abɩna arɩ Iziral nɩaa.

¹⁸ Dɩ Zeruya hambolibiisi-la batori ma hɛ nɩmɛ: Jʋab, Abɩsaɩ arɩ Asahɛl. Asahɛl faa fá nɛ woruŋ a nagɛ tɛhɩɩ.

¹⁹ Ʋ kire to Abɩna harɩŋ tegi tegi, ʋ bɩ nagʋa koo nadiiŋ gɛbɛ

²⁰ Ŋɩɩ nɛ Abɩna daasɛ harɩŋ a pɩɛsʋ, “Ŋ nɛɛ Asahɛl?” Ʋ bʋl, “Mɩ nɛ.”

²¹ Abɩna bʋla pʋ, “Sɩ́ mɩ harɩŋ kire to, laalɩyuoroo nɛ gollila, gɛbɛ mʋ ŋ nadiiŋ koo nagʋa, a kpʋ bapʋɔsɛ biisi-la dɔŋɔ aŋ laa ʋ laalɩyuori kɩaa.” Ama Asahɛl vɩa aŋ ha kire to ʋ harɩŋ.

²² Abɩna bɩra bʋla pɩ Asahɛl, “Sɩ́ mɩ harɩŋ kire to! Bɛɛ nɛ tɩɩ ŋ chɩchɛ dɩ mɩ kpʋŋ? Dɩ mɩ nɛ ŋaa ŋɩɩ, ɛɛ nɛ mɩ jaŋ wuo ŋaa beŋ ŋ naambie Jʋab sɩaa lɛ?”

²³ Ama Asahɛl ha vɩa aŋ kire to. Ŋɩɩ nɛ Abɩna joŋ ʋ timiŋ gentine a yɩ hɛ Asahɛl luoruŋ lɛ, ʋ lɩɩ gɩrɩgɛ. Ʋ tele sʋʋ lee-la tɩtɩa. Dɩ nʋʋkala nɛ kʋ yi lee-la Asahɛl sɩ sʋʋ pɩŋ, ʋ yie chɩŋ nɛ a beŋ.

²⁴ Jʋab arɩ Abɩsaɩ ma bɩra kire to Abɩna harɩŋ. Wɩa tuu jʋjʋʋ dɩ ba yi dundolo kʋbala ba sɩɩ yɩrɛ Ama, a kpagɛ lee-la ba sɩɩ yɩrɛ Gɩa sɩ hɛ wombii-la ba sɩɩ mʋ, Gibioŋ tintee-hɩlɩɩ-la.

²⁵ Ŋɩɩ nɛ Bɛnjamɩŋ doho nɩaa dɔnsʋŋ sii pɛ Abɩna lɛ. Ba hɛ dɔŋɔ lɛ a jɩla chɩŋ dundolo nyuŋ a kɛŋ ba tɩtɩa hɛ dɔŋɔ dɩ ba yuo laalɩŋ.

²⁶ Abɩna yɩrɛ Jʋab a pɩɛsʋ, “Ʋ maga dɩ la kpʋkpʋ dɔŋɔ deeŋ deeŋ nɛɛ? Ŋ bɩ jɩŋ ʋ ŋɩɩ harɩŋ jaŋ kɛŋ tʋɔ-cheeŋ a pɩla? Ɛɛ nɛ ŋ chɛ ʋ diene magɛ ka dɩ ŋ kiri ŋ nɩaa dɩ ba sɩ́ ba naambiiriŋ harɩŋ kire to?”

²⁷ Jʋab bʋl, “Wʋtɩtɩɩ, mɩ ŋmɩɛsɛ Wɩa sɩ weye, dɩ ŋ nɛ fa bɩ ŋ-la bʋla, mɩ nɩaa fa jaŋ kiri ba naambiiri-la baarɛ ŋɩɩ deeŋ deeŋ dɩ taŋ pʋl.”

²⁸ Ŋɩɩ nɛ Jʋab ŋmʋʋ banyile sɩ ŋaa magɩl a pɩ ʋ nɩaa kala ba guu chɩŋ. Ba bɩra bɩ Iziral tɩŋŋaa harɩŋ kire to a yuoba.

²⁹ Tɩtaŋ-la kala Abɩna arɩ ʋ nɩaa vɛŋ Jɔdaŋ fuonaa-la tʋɔŋ ŋɩɩ nɛ aŋ-na chol Jɔdaŋ fuo-la. Taŋ pʋl chʋchʋɔŋ ba vɛŋ ŋɩɩ a bɩra mʋ yi Mahanem.

³⁰ Ŋɩɩ nɛ Jʋab leŋ Abɩna harɩŋ kire tonuŋ, aŋ yɩrɛ ʋ nɩaa kala a hɛ dɔŋɔ lɛ. Ʋ sɩ dɩɩsɛba, ʋ na dɩ Devit nɩaa fii arɩ nibi nɛ tuo a pɛ Asahɛl lɛ.

³¹ Laal-la lɛ Devit nɩaa fa kpʋ Bɛnjamɩŋ doho nɩalɩŋ sɩ hɛ Abɩna nɩsɩŋ lɛ, nɩaa zɔɔ-batori arɩ mahɩŋ batori nɛ.

³² Jʋab arɩ ʋ nɩaa joŋ Asahɛl a hugi ʋ nyɩmma bʋa-la sɩ hɛ Bɛtɩlɛhɛm lɛ. Ka ʋ dɩ ʋ nɩaa vɛŋ tɩtaŋɩŋ ŋɩɩ deeŋ deeŋ a mʋ yi Hɛbʋrɔŋ sɩɩ-pʋʋraa.