2 SAMƲƐL 19 - WƖA TENIŊ

¹ Nʋʋ dɔŋ mʋ bʋla pɩ Jʋab, “Kuoro ka yel nɛ a tɩŋ Abɩsalɔm sɩ sʋba wɩaa.”

² Tʋɔtɔrʋ-la laalɩyuoro-la kala sɩ kɛnɛ tapʋlɩɩ-la mɩɩra bɩrɩmɛ yele, bɛɛ wɩaa ba nɩa arɩ kuoro tʋɔŋ cheye nɛ, ʋ yiyel ʋ bie wɩaa.

³ Laalɩyuoro-la lʋara jʋʋ taŋ tʋɔŋ tapʋlɩɩ-la, a nagɛ nɩaa ba sɩ kire ba fá laalɩŋ lɛ hɩɩsɩŋ kɛmba.

⁴ Kuoro fa paa nɩsaa nɛ a tɔ ʋ sɩaa, aŋ faasa yiyel, “Mɩ bii Abɩsalɔm! Abɩsalɔm, mɩ bii, mɩ bii!”

⁵ Ŋɩɩ nɛ Jʋab mʋ kuoro dɩa a bʋla pʋ, “Jɩnɩŋ ŋ joŋ hɩɩsɩŋ hɛ nɩaa kala lɛ nɛ, nɩalɩŋ sɩ laa ŋ mɩɩsɩŋ, ŋ hambolibiisiŋ, toloo arɩ ŋ haala-la ŋ sɩ bile aŋ bɩ jaa.

⁶ Ŋ cho nɩalɩŋ sɩ bɛrɩŋ nɛ, aŋ bɛrɛ nɩalɩŋ sɩ choŋ. Jɩnɩŋ ŋ leŋe la chaasa jɩŋ arɩ ŋ laalɩyuori-hɩasɩŋ arɩ ba nɩaa kala bɩ kɩaa ŋaa ŋ teeŋ. Mɩ bɩra na jɩnɩŋ arɩ ŋ fa cho dɩ Abɩsalɔm nɛ wei, ka dɩ la kala sʋʋ.

⁷ Sii lɛɛlɛ a lɩɩ bʋl wɩaa pɩ ŋ laalɩyuoroo dɩ ba nyuŋ nyaasɛ, dɩ ŋɩɩ dee, mɩ ŋmɩɛsɛ La TƖƖNA, nɩbala ma bɩ jaŋ chɩna gbɛrɩŋ chie chʋchʋɔŋ. Ŋɩɩ nɛ jaŋ lɔrɔ pɩŋ a kɩɩ wʋlɔrʋnʋ-la kala sɩ ŋaa ŋ lɛ, a chɩŋ ŋ hambiiriŋ kala lɛ a kaa kɔ bʋa deeŋ lɛ.”

⁸ Ŋɩɩ nɛ kuoro sii a lɩɩ hɔŋ jaŋ boiŋ niiŋ. Ba bʋla pɩ nɩalɩŋ, “Kuoro nɛ hɔŋ jaŋ boiŋ niiŋ.” Ŋɩɩ nɛ ba kala kɔ ʋ sɩpaaŋ. Bʋa-la lɛ dɩ Iziral tɩŋŋaa kala fa fá mʋ ba dɩɩsɩŋ.

Devit mɩɩra mʋ Jerusalɛm

⁹ Iziral doho doho-la kala lɛ, nɩaa kɛŋ wɩaa lɩlɛrɛ dɔŋɔ teeŋ a bʋbʋl, “Kuoro Devit nɛ laala ta la dʋndɔŋŋɔɔ nɩsɩŋ lɛ, ʋ nɛ nɩɩ-la sɩ laala ta Fɩlɩsɩtɩa tɩŋŋaa ma nɩsɩŋ lɛ. Ama lɛɛlɛ ʋ tɩŋ Abɩsalɔm wɩaa a lɩɩ fá nɛ la tinteeŋ lɛ.

¹⁰ Abɩsalɔm-la ma, la sɩ lɩɩsa dɩ ʋ nɛ bibenla sʋba nɛ laalɩŋ lɛ. Bɛɛ nɛ saa tɩɩ ma bɩ wɩɩkala ka bʋl dɩ ma kɛŋ kuoro mɩɩra kɔ?”

¹¹ Kuoro Devit nɩɩ wɩalɩŋ Iziral tɩmma-la sɩɩ bʋl, a tɩŋ tɩndaarɩŋ deeŋ a pɩ Zadɔk arɩ Abɩata, Wɩɩsʋllɩ sɩpaalaaraa: “Má pɩɛsɛ Juda nɩaa sɩpaalaaraa na, bɛɛ nɛ tɩɩ ba chɩchɛ dɩ ba nɛ to harɩŋ a kɛŋ kuoro kɔ ʋ dɩa?”

¹² Ʋ bɩra bʋl, “Má ŋaa mɩ naambiiriŋ nɛ, mɩ chalɩŋ nɛ ka ma. Bɛɛ nɛ tɩɩ ma chɩchɛ dɩ ma nɛ to harɩŋ a kɛŋ mɩ-na kuoro kɔ?”

¹³ Aŋ bɩra pɩɛsɛ Amasa ma, “Mɩ chalɩŋ dee bɩŋ kaa? A lɩɩ bʋa deeŋ lɛ a kaa mʋ, dɩ mɩ nɛ bɩ leŋe dɩ ŋ ŋaa mɩ laalɩyuoroo nɩhɩaŋ, a laa Jʋab nyuŋ, a leŋ dɩ Wɩa dɔgɩsɛmɛ kɩŋkɛŋ.”

¹⁴ Kuoro Devit sɩ bʋl wɩɩ-la leŋ Juda nɩaa kala tʋɔŋ tɔrɛ ʋ nyuŋ. Ba tɩŋ ba mʋ bʋla pʋ, “Ŋ dɩ ŋ nɩaa kala, má mɩɩra kɔ.”

¹⁵ Ŋɩɩ nɛ kuoro mɩɩra kʋkɔ, a kʋ yi Jɔdaŋ fuo-la. Dɩ Juda doho nɩaa kala kɔ Gɩlɩgal dɩ ba cheŋ kuoro a kɛnʋ chol Jɔdaŋ fuo-la.

¹⁶ Gɛra nanʋala Sɩmɛɩ, Bɛnjamɩŋ tɩŋŋaa baal-la sɩ lɩɩ Bahurim, sii lɩma lɩma, ʋ dɩ Juda tɩmma-la kʋ tuu dɩ ba cheŋ kuoro Devit.

¹⁷ Bɛnjamɩŋ tɩmma-la fa sɩ to ʋ harɩŋ ŋaa nɩaa bʋɩ nɛ, a pɛ Sɔɔl dɩa tɩntɩnnɩ-hɩaŋ Ziba lɛ, arɩ ʋ hambolibiisiŋ fii arɩ banɔŋ, ʋ tɩntɩnnaa ma mara. Ba fá tuu Jɔdaŋ fuo-la, lee-la kuoro sɩ hɛ.

¹⁸ Ba chol fuo-la, lee-la sɩ bɩ luŋ dɩ ba kɛŋ kuoro dɩa nɩaa chol, aŋ ŋaa wɩɩ-la kala ʋ sɩɩ chɛ. Gɛra bie Sɩmɛɩ sɩ chol Jɔdaŋ fuo-la, ʋ tuu kpirime yi tinteeŋ kuoro sɩpaaŋ,

¹⁹ aŋ bʋla pʋ, “Mɩɩ sʋlʋŋ mɩ nɩhɩaŋ, sɩ́ cheeriŋ joŋo pɩmɛ. Sɩ́ ŋɩɩ mɩ-na ŋ tɩntɩnna fa sɩ tʋʋsʋŋ bʋa-la lɛ ŋ sɩɩ lɩɩ Jerusalɛm lɛ liisu. Kuoro, paala sɩ́ wɩɩ-la joŋo hɛ ŋ tʋɔŋ lɛ,

²⁰ bɛɛ wɩaa mɩ-na ŋ tɩntɩnna jɩma arɩ mɩ ŋaa wɩaa cheyiŋ nɛ. Ŋɩɩ nɛ tɩɩ jɩnɩŋ Iziral doho doho-la kala sɩ hɛ wɩɩpɔsʋŋ nagʋa tʋɔŋ, mɩ nɛ laa sɩpaaŋ kɔ daha dɩ mɩ na ŋ-na kuoro, mɩ nɩhɩaŋ.”

²¹ Ŋɩɩ nɛ Zeruya nanʋala Abɩsaɩ bʋl, “Sɩmɛɩ maga dɩ la kpʋʋ nɛ a tɩŋ wɩɩŋ deeŋ wɩaa. Ʋ tʋʋsɛ nɩɩ-la La TƖƖNA sɩ lɩɩsa ʋ ŋaa kuoro nɛ.”

²² Devit bʋl, “Ma-na Zeruya biiriŋ, ma wɩɩ tuo wɩɩŋ deeŋ lɛ. Sɩ́ wɩaa lɔgɔ hɛ mɩ lɛ. Jɩnɩŋ ʋ maga dɩ la kpʋ nʋʋ nɛ Iziral lɛɛ? Ŋ bɩɩna mɩ bɩ jɩŋ arɩ mɩ nɛ bɩra ŋaa Iziral kuoro jɩnɩŋ?”

²³ Ŋɩɩ nɛ Kuoro hɛ niiŋ pɩ Sɩmɛɩ, a bʋl, “Ŋ bɩ jaŋ sʋʋ.”

²⁴ Sɔɔl nihiŋ Mɛfɩbɔsɛf ma sii tuu dɩ ʋ na kuoro. A chɩŋ bʋa-la lɛ kuoro Devit sɩ lɩɩ Jerusalɛm lɛ a kaa kɔ bʋa-la lɛ ʋ sɩ mɩɩra kɔ, Mɛfɩbɔsɛf fa bɩ ʋ naasɩŋ nyuŋ ka beŋ, ʋ bɩ ʋ tɔŋŋɔɔ ma ka kɛ, ʋ bɩ ʋ gɛnnɩŋ maa chɛsɛ.

²⁵ Ʋ sɩ mʋ yi, kuoro pɩɛsʋ, “Mɛfɩbɔsɛf, bɛɛ nɛ tɩɩ ŋ bɩ mɩ harɩŋ to mʋ?”

²⁶ Ʋ bʋl, “Kuoro, mɩ nɩhɩaŋ, ŋ jɩma mɩ ŋaa gbɛrɩgʋ nɛ. Mɩ bʋla pɩ mɩ tɩntɩnna Ziba nɛ, dɩ ʋ kpɩɛrɛ mɩ kakumo pɩmɛ dɩ mɩ jɩla to ŋ harɩŋ. Ʋ nyɩsɛmɛ ta aŋ mʋ,

²⁷ a nyɩɛ wɩaa a tɩgɛ mɩ lɛ a pɩŋ. Kuoro mɩ nɩhɩaŋ, ŋ kɛŋ wʋjɩmɩŋ a nagɛ Wɩa tɩndaara nɛ. Wɩɩ-la kala sɩ tɔrɛ ŋ tʋɔŋ, ŋaa.

²⁸ Kuoro, mɩ nɩhɩaŋ, mɩ nyɩmma dɩa nɩaa kala paala magɛ dɩ ŋ fa kpʋla nɛ. Ama ŋ wuo pɩmɛ wombiiŋ nɛ, mɩ didii kɩaa ŋ dɩa lɛ. Ŋɩɩ wɩaa wombii bɛɛ nɛ mɩ kɛŋ dɩ mɩ ma bɩra pɩɛsa chɩchɛ wɩɩ ŋ-na kuoro teeŋ?”

²⁹ Kuoro bʋla pʋ, “Bɛɛ nɛ tɩɩ ŋ bʋl wɩaa a nɩna hɛɛŋ? Ŋ dɩ Ziba kɛŋ Sɔɔl dʋa kpaa dɔŋɔ.”

³⁰ Mɛfɩbɔsɛf bɩra bʋla pɩ kuoro, “Kuoro, mɩ nɩhɩaŋ, ŋ sɩ folo kɔ dɩa arɩ yarɩfɩɛlaa, leŋ dɩ ʋ kɛŋ dʋa-la kala.”

³¹ Gɩlɩad tɩɩna-la ba sɩɩ yɩrɛ Bazɩlaɩ ma sii a lɩɩ Rɔgɛlɩm a kɔ dɩ ʋ kɛŋ Devit chol Jɔdaŋ fuo-la, a hɛʋ wɛnɩŋ lɛ.

³² Bazɩlaɩ fa hɩɛsa nɛ woruŋ. Ʋ ŋaa jɩsɩŋ mahɩŋ banɛsɛ nɛ. Ʋ fa ŋaa kɩaa tɩɩna nɛ. Bʋa-la lɛ Devit fa sɩ hɛ taŋ-la ba sɩɩ yɩrɛ Mahanem lɛ, ʋ nɛ pʋ kʋdiilee.

³³ Kuoro bʋla pʋ, “Chol fuo-la dɩ la mʋ hɔŋ Jerusalɛm lɛ. Mɩ jaŋ bibeniŋ.”

³⁴ Bazɩlaɩ pɩɛsɛ kuoro, “Jɩsɩŋ baŋmɛɛ nɛ mɩ bɩra jaŋ hɛ dʋnɩa deeŋ lɛ, a magɛ mɩ dɩ mɩ kuoro mʋ hɔŋ Jerusalɛm lɛ?

³⁵ Lɛɛlɛ mɩ ŋaa jɩsɩŋ mahɩŋ banɛsɛ nɛ. Mɩ bɩra bɩ jaŋ wuo nɩɩ sɩma wɩɩkala lɛ. Mɩ-na ŋ tɩntɩnna bɩra bɩ jaŋ wuo nɩɩ kʋdiile-la mɩ sɩɩ dii sɩma koo kɩalɩŋ mɩ sɩɩ nyʋa sɩma. Mɩ bɩra bɩ jaŋ wuo nɩɩ baalaa arɩ haalaa ma yɩɩlaa. Bɛɛ nɛ tɩɩ mɩ jaŋ ŋaa chʋga a daŋ kuoro, mɩ nɩhɩaŋ nyuŋ?

³⁶ Mɩ-na ŋ tɩntɩnna jaŋ to ŋ harɩŋ dɩ la chol Jɔdaŋ fuo-la, a vɛnɛ mʋ mʋa. Bɛɛ nɛ tɩɩ kuoro jaŋ dii zile kɩŋkɛŋ mɩ lɛ ŋ-la?

³⁷ Leŋ dɩ mɩ mɩɩra mʋ dɩa, a sʋʋ mɩ jaŋ lɛ, dɩ ba hugimi kpagɛ mɩ nyɩmma arɩ mɩ naaŋ vaamɩŋ. Ama, na ŋ tɩntɩnna Kɩmɩham nɛ ŋ-la. Kuoro, mɩ nɩhɩaŋ, leŋ dɩ ʋ ma to ŋ harɩŋ a chol fuo-la. Ŋaa wɩɩ-la kala ŋ sɩ bene dɩ ʋ zɔmɔ a pʋ.”

³⁸ Kuoro bʋl, “Kɩmɩham jaŋ to mɩ harɩŋ chol, wɩɩ-la kala sɩ tɔrɛ ŋ tʋɔŋ, mɩ jaŋ ŋaa pʋ. Kʋŋ na-kala ŋ ma tɩtɩa sɩɩ chɛ mɩ teeŋ, mɩ jaŋ ŋaa pɩŋ.”

³⁹ Ŋɩɩ nɛ laalɩyuoro-la kala chol Jɔdaŋ fuo-la, kuoro ma chol. Kuoro arɩ Bazɩlaɩ guori dɔŋɔ. Kuoro sʋl Wɩa pʋ. Ka Bazɩlaɩ mɩɩra mʋ dɩa.

⁴⁰ Kuoro sɩ chol fuo-la a mʋ Gɩlɩgal, Kɩmɩham ma chol a to ʋ harɩŋ. Juda laalɩyuoroo kala arɩ Iziral laalɩyuoroo kpaa magɛ dɔŋɔ nɛ fa kɔ dɩ ba kɛŋ kuoro chol a hɛʋ wɛnɩŋ lɛ.

⁴¹ Ʋ bɩ diene ka Iziral laalɩyuoroo kala sii kɔ kuoro Devit teeŋ a pɩɛsʋ, “Bɛɛ nɛ tɩɩ la naambiiriŋ, Juda laalɩyuoroo kʋ lʋara kɛŋ ŋ-na kuoro arɩ ŋ dɩa nɩaa arɩ ŋ nɩaa kala a chol Jɔdaŋ fuo-la?”

⁴² Juda laalɩyuoro-la kala bʋla pɩ Iziral laalɩyuoroo, “La dɩ kuoru-la ŋaa naambiiri nɛ, ŋɩɩ nɛ tɩɩ la ŋaa ŋɩɩ. Bɛɛ nɛ tɩɩ ma na baanɩŋ? Kuoro kʋdiilii nɛ la laa dii? La laa kʋŋ nɛ ʋ teeŋ?”

⁴³ Iziral laalɩyuoro-la ma bʋla pɩ Juda laalɩyuoroo, “La tɩɩ Devit a kɩɩma naansɩɩŋ fii, dɩ ʋ nɛ ŋaa ma kʋŋ ma, bɛɛ nɛ tɩɩ ma bee gʋʋnɛla? La dee bɩ sɩpaaŋ laa bʋl arɩ ma leŋ la kɛŋ la kuoro mɩɩra kɔɔ?” Ama Juda tɩmma-la ha faasa hosi a kɩɩ Iziral tɩmma-la.