2 SAMƲƐL 18 - WƖA TENIŊ

Abɩsalɔm sʋba

¹ Ŋɩɩ nɛ Devit kɛŋ ʋ laalɩyuoroo kala kpaa, dɔnsʋŋ bʋɩba, dɔnsʋŋ ma zɔlɔba, a lɩɩsɛ kʋhɩasɩŋ ba bibemba.

² Ʋ kɛŋ laalɩyuoro-la kala kpaa leree batori nɛ. Jʋab laa dɔnsʋŋ sɩpaaŋ, Jʋab naambie Abɩsaɩ, Zeruya nanʋala ma laa dɔnsʋŋ sɩpaaŋ, ka Ɩtaɩ, Giti tɩɩna-la ma laa dɔnsʋŋ sɩpaaŋ. Kuoro Devit fa bʋla pɩba, “Mɩ tɩtɩa jaŋ to ma harɩŋ a mʋ laal-la.”

³ Ŋɩɩ nɛ laalɩyuoro-la bʋl, “Ʋ bɩ maga dɩ ŋ mʋ, dɩ la dʋndɔŋŋɔɔ nɛ kirila dɩ la fá, ba sɩpaaŋ jaŋ tuo la-na lɛ. Dɩ ba nɛ kpʋ la kpaa magɛ dɔŋɔ ma, ʋ bɩ jaŋ ŋaaba wɩɩkala. Ama ŋ kɩɩ la nɩaa bʋɩ fii nɛ. Ʋ jaŋ kpɩa dɩ ŋ nɛ hɛ dɩa lɛ, dɩ la nɛ kɛŋ wɩɩ, dɩ ŋ pɛ la lɛ.”

⁴ Kuoro bʋl, “Wɩɩ-la kala ma sɩ na dɩ ʋ zɔmɔ pɩma, mɩ jaŋ ŋaa.” Ŋɩɩ nɛ kuoro chɩŋ boi-baalɩŋ lɛ a bibeŋ, ka laalɩyuoro-la kala lɩlɩɩ bʋɩba arɩ zɔlɔba.

⁵ Kuoro chaasa bʋla pɩ Jʋab, Abɩsaɩ arɩ Ɩtaɩ, “A tɩŋ mɩ wɩaa, má sɩ́ Abɩsalɔm, bapʋɔsɩ-bie-la wʋbɔŋ kala ŋaa.” Laalɩyuoro-la kala nɩɩ wɩɩ-la kuoro sɩ bʋla pɩ laalɩyuori-hɩasɩ-la a mʋ tɩgɛ Abɩsalɔm lɛ.

⁶ Laalɩyuoro-la lɩɩ mʋ laal-baga, a yuo Iziral tɩŋŋaa Efirem tinteeŋ duuŋ lɛ.

⁷ Devit laalɩyuoroo chaasa yuo dii Iziral laalɩyuoroo, a kpʋ ba nɩaa bʋɩ mara tapʋlɩɩ-la.

⁸ Laalɩŋ pusi lee-la kala. Nɩalɩŋ duu-la sɩ leŋe ba sʋʋ tapʋlɩɩ-la nɛ kɩɩ nɩalɩŋ ba sɩ kpʋa laalɩŋ lɛ.

⁹ Bʋa deeŋ lɛ dɩ Abɩsalɔm mʋ cheŋ Devit laalɩyuoroo. Ʋ fa jɩl kakumo nɛ. Kakumo-la kɛnʋ jʋʋ piiŋ-lugu kʋbala bʋbʋɔŋ. Tɩa-la naakelee kɛŋ Abɩsalɔm nyu-pʋnaa lɛ a soru kakumo-la nyuŋ ʋ lilieŋi, ka kakumo-la kiele mʋmʋ.

¹⁰ Laalɩyuoro-la dɔŋɔ sɩ na ŋɩɩ, ʋ bʋla pɩ Jʋab, “Mɩ na Abɩsalɔm dɩ ʋ sagɛ piine kʋbala nyuŋ, a lilieŋi.”

¹¹ Jʋab bʋla pɩ baal-la sɩ bʋl wɩɩ-la pʋ, “Bɛɛba! Ŋ naʋ nɛɛ? Bɛɛ nɛ tɩɩ ŋ bɩ ʋ ŋmoo lo tinteeŋ lee-la? Mɩ fa jaŋ pɩŋ warɩpʋla fii arɩ laalɩyuoroo ŋmɛnɩŋ.”

¹² Baal-la bʋl, “Dɩ ŋ nɛ paala joŋ warɩpʋla bʋɩ ma pɩmɛ, mɩ bɩ jaŋ kɔ dɩ mɩ joŋ mɩ nɩsɩŋ digi kuoro nanʋala. La kala nɩa nɛ ka kuoro bʋla pɩ ŋ dɩ Abɩsaɩ arɩ Ɩtaɩ, arɩ ma tɩŋ ʋ wɩaa a sɩ́ Abɩsalɔm, bapʋɔsɩ-bie-la wʋbɔŋ kala ŋaa.

¹³ Wɩɩkala nɛ kuoro nɩnɩɩ, dɩ mɩ fa vɩa ʋ niiŋ aŋ kpʋ Abɩsalɔm, ŋ fa bɩ jaŋ chɩŋ mɩ harɩŋ.”

¹⁴ Jʋab bʋl, “Mɩ bɩ jaŋ leŋ dɩ ŋ chɩna kɛmmɛ didieni.” Ŋɩɩ nɛ aŋ joŋ tiŋŋee batori a yagɛ hɛ Abɩsalɔm bɔyɛ lɛ, dɩ Abɩsalɔm ha weye, a sagɛ piine-la nyuŋ.

¹⁵ Ŋɩɩ nɛ Jʋab laalɩyuoro-la fii sɩ kori ʋ laalɩyuori kɩaa kʋ golli Abɩsalɔm chu a kpʋʋ.

¹⁶ Ŋɩɩ nɛ Jʋab ŋmʋʋ banyile a giri ʋ laalɩyuoroo dɩ ba bɩra sɩ́ Iziral laalɩyuoroo kiru.

¹⁷ Ba joŋ Abɩsalɔm kʋsʋʋŋ a yuo hɛ buotuo-luŋii lɛ duu-la tʋɔŋ, a paa tabɩaa yʋgɛ a daŋ ʋ lɛ, ba sii chʋɔrɛ. Bʋa-la lɛ dɩ Iziral tɩŋŋaa kala fá a mʋ ba dɩɩsɩŋ.

¹⁸ Abɩsalɔm fa sɩ hɛ ʋ mɩɩsɩŋ lɛ, ʋ kɛŋ tabɩaa nɛ a saa kɛrɛ ʋ chɩŋ kuoro fuonaaŋ lɛ ba sɩ jaŋ kaa liliisi ʋ wɩaa. Ʋ sɩ, “Mɩ bɩ bii kala kɛnɛ sɩ jaŋ leŋ dɩ mɩ yɩrɩŋ sɩ́ dɩsʋ.” Ʋ joŋ ʋ tɩtɩa yɩrɩŋ a hɛ pɩ jebii-la. Arɩ jɩnɩŋ kala ba haa yɩrɛ jebii-la Abɩsalɔm jebiiŋ nɛ.

Devit yel Abɩsalɔm lɛ

¹⁹ Ŋɩɩ nɛ Zadɔk nanʋala Ahɩmaas bʋla pɩ Jʋab, “Leŋ dɩ mɩ fá mʋ hɛ duoso pɩ kuoro Devit, arɩ La TƖƖNA laaʋ ta nɛ ʋ dʋndɔŋŋɔɔ nɩsɩŋ lɛ.”

²⁰ Jʋab bʋla pʋ, “Jɩnɩŋ, ŋ dee nɩɩ-la sɩ jaŋ kɛŋ duoso-la mʋ. Tapʋlɩɩ dɔŋ nɛ ŋ jaŋ kɛŋ duoso-la mʋ, ama jɩnɩŋ-na dee, bɛɛ wɩaa kuoro nanʋala sʋba nɛ.”

²¹ Ŋɩɩ nɛ Jʋab bʋla pɩ Kus tɩɩna kʋbala, “Mʋ a bʋl wɩɩ-la ŋ sɩ na a pɩ kuoro.” Baal-la tuu kpirimi Jʋab sɩpaaŋ a zilu, aŋ sii fá mʋ.

²² Zadɔk nanʋala Ahɩmaas bɩra bʋla pɩ Jʋab, “Ʋ cho dɩ ʋ nagɛ ŋɩɩ kala, mɩɩ sʋlʋŋ, leŋ dɩ mɩ ma ha to mʋ.” Ama Jʋab bɩra pɩɛsɛ, “Mɩ bii, bɛɛ nɛ tɩɩ ŋ cho dɩ ŋ mʋa? Ŋ bɩ wɩɩkala kɛnɛ ŋ sɩ jaŋ mʋ bʋl a laa siilee.”

²³ Ahɩmaas ha bʋl, “Ʋ cho dɩ ʋ nagɛ ŋɩɩ kala, mɩ ha cho mɩ mʋa nɛ.” Ŋɩɩ nɛ Jʋab bʋl, “Saa fá mʋ ba.” Ahɩmaas lɩɩ a joŋ wombii-la sɩ to Jɔdaŋ fuonaaŋ, a fá mʋ kieli Kus tɩɩna-la.

²⁴ Bʋa-la lɛ dɩ Devit hɔŋ ba jaŋ boiŋ niiree balɩa-la pɛgɛ, kʋ-la sɩ hɛ tʋɔŋ arɩ kʋ-la sɩ hɛ jeeŋ harɩŋ. Nɩɩ-la sɩɩ pɔ ba taŋ-la sii jɩl boiŋ niiŋ jee-la lusuŋ nyuŋ. Ʋ sɩ bene, ʋ na baal kʋbala dɩ ʋ dʋndʋŋa fá a kʋkɔ.

²⁵ Baal-la sɩɩ pɔ ba taŋ yɩrɛ kuoro a bʋl wɩɩ-la pʋ. Kuoro bʋl, “Dɩ ʋ nɛ ŋaa ʋ dʋndʋŋa, ŋɩɩ-na wʋzɔmɔ nɛ ʋ kaa kʋkɔ.” Ka baal-la kʋʋ kpagɛ.

²⁶ Ŋɩɩ nɛ nɩɩ-la sɩɩ pɔ ba taŋ bɩra na baal dɔŋ ma, dɩ ʋ fá kʋkɔ. Ʋ yɩrɛ nɩɩ-la sɩ pɔ boi-baalɩŋ a bʋl, “Bee na, baal dɔŋ ma dʋndʋŋ nɛ bɩra fá a kʋkɔ.” Kuoro bɩra bʋl, “Ŋ bɩ pɔ wʋzɔmɔ nɛ ʋ ma kaa kɔ.”

²⁷ Baal-la sɩɩ pɔ ba taŋ bʋl, “Mɩ-na teeŋ bumbuŋ nɩɩ-la sɩɩ fá nagɛ Zadɔk nanʋala Ahɩmaas nɛ.” Kuoro bʋl, “Ʋ wɩaa zɔmɔ. Wʋzɔŋŋɔɔ nɛ ʋ jaŋ kaa kɔ.”

²⁸ Ŋɩɩ nɛ Ahɩmaas yɩrɛ kuoro a bʋl, “La die nɛ! La die nɛ!” Ŋɩɩ nɛ aŋ tuu kpirimi kuoro Devit sɩpaaŋ a zilu aŋ bʋl, “Dɛnnɛ ŋ TƖƖNA Wɩa! Ʋ nɛ leŋe ŋ yuo dii ŋ dʋndɔŋŋɔɔ.”

²⁹ Kuoro pɩɛsʋ, “Ka bapʋɔsɩ-bie-la, Abɩsalɔm, wɩɩkala bɩ ʋ ŋaa?” Ahɩmaas bʋl, “Mɩ fa na leriŋ chaasa vʋgʋmɛ nɛ bʋa-la lɛ Jʋab sɩɩ tɩŋ ʋ tɩntɩnna arɩ mɩ-na, ama mɩ bɩ jɩŋ wɩɩ-la kala sɩ tɩɩ.”

³⁰ Kuoro bʋl, “Gɛbɛ chɩŋ daha a gbɛrɛ.” Ŋɩɩ nɛ ʋ gɛbɛ chɩŋ.

³¹ Kus tɩɩna-la ma kɔ a bʋl, “Kuoro, mɩ nɩhɩaŋ, nɩɩ wʋzɔŋ-la mɩ sɩ kaa kɔ. La TƖƖNA laaŋ ta nɛ jɩnɩŋ ŋ dʋndɔŋŋɔɔ kala nɩsɩŋ lɛ.”

³² Ŋɩɩ nɛ kuoro bɩra pɩɛsʋ ma, “Ka Abɩsalɔm, wɩɩkala bɩ ʋ ŋaa?” Kus tɩɩna-la bʋl, “Mɩ fa jaŋ cho dɩ nɩalɩŋ kala sɩ ŋaa ŋ-na kuoro mɩ nɩhɩaŋ dʋndɔŋŋɔɔ arɩ nɩalɩŋ kala sɩ vɩaŋ aŋ yuyuoŋ, dɩ ba dɩdɛrɩŋ kala nagɛ bapʋɔsɩ-bie-la.”

³³ Kuoro kala chichel. Ʋ sii jɩla jʋʋ dɩa-la sɩ hɛ boiŋ niiŋ lusuŋ nyuŋ a yel. Ʋ sɩɩ jʋʋ ŋɩɩ, ʋ bʋl: “Mɩ bii Abɩsalɔm! Mɩ bii, mɩ bii Abɩsalɔm! Mɩ nɛ fa maga dɩ mɩ sʋʋ aŋ kaŋ. Mɩ bii Abɩsalɔm, mɩ bii.”