2 SAMƲƐL 17 - WƖA TENIŊ

¹ Ʋ bɩ diene ka Ahitofɛl bʋla pɩ Abɩsalɔm, “Leŋ dɩ mɩ tʋɔsɛ laalɩyuoroo bʋɩ fii arɩ balɩa a kiri Devit harɩŋ tɩtaŋɩŋ deeŋ.

² Mɩ jaŋ yuou bʋa-la lɛ lɔlʋŋ sɩ jʋʋ-ʋ, ʋ nandaasɩŋ kala yʋɔrɛ. Mɩ jaŋ guu mʋ dɩ ʋ lɛ, dɩ fawʋllʋŋ kɛnʋ, dɩ ʋ nɩaa kala fá viiri. Ka dɩ mɩ kpʋ ʋ dʋndʋŋa,

³ aŋ kɛŋ nɩalɩŋ kala a mɩɩra kʋ pɩŋ, a nagɛ ba sɩ kpɩɛrɛ ha-falɩŋ a kaa mʋ pɩ ʋ bala. Kuoro dʋndʋŋa mɩɩsɩŋ nɛ ŋ chɩchɛ dɩ ŋ lɩɩsɛ, ka dɩ nɩkaanaa kɛŋ mɩɩsɩŋ.”

⁴ Abɩsalɔm arɩ Iziral doho doho-la sɩpaalaaraa kala na dɩ wɩalɩŋ Ahitofɛl sɩ daga ŋaa wʋzɔmɔ.

⁵ Ŋɩɩ nɛ Abɩsalɔm bʋl, “Má yɩrɛ Husai, Aakɩ tɩɩna-la dɩ ʋ kɔ, dɩ la nɩɩ wɩɩ-la ʋ ma sɩ jaŋ bʋl.”

⁶ Husai sɩ kɔ, Abɩsalɔm bʋl wɩɩ-la Ahitofɛl sɩ dagɛba, aŋ pɩɛsʋ, “La ŋaa koo la leŋ? Dɩ ŋɩɩ dee, ŋ ma bʋl wɩɩ-la ŋ sɩ kɛnɛ.”

⁷ Husai bʋla pɩ Abɩsalɔm, “Bʋa deeŋ-na lɛ, wɩɩ-la Ahitofɛl sɩ dagɛma bɩ zɔŋ.

⁸ Ŋ jɩma woruŋ ŋ nyɩmma arɩ ʋ nɩaa chaasa ŋaa laalɩyuoro nɛ. Lɛɛlɛ ŋ-la ba yaraa kala hoso nɛ a nagɛ lʋgʋmʋŋ bie ba sɩ kpʋa ʋ yaraa hosi. Ŋɩɩ ma dʋndʋŋa dee, ŋ nyɩmma ŋaa laalɩyuori-bɩnɩɩ nɛ, a bɩ ʋ laalɩyuoroo tʋɔŋ ka guoli tɩtaŋɩŋ.

⁹ Magɛ ŋ-la ʋ paala jʋʋ faa bʋ-bʋa lɛ koo lee dɔŋ. Dɩ nʋʋ nɛ nɩa dɩ Devit kpʋ ma laalɩyuoroo dɔnsʋŋ, nɩaa jaŋ bɩɩnɛ laalɩyuoro-la kala sɩɩ to Abɩsalɔm harɩŋ nɛ ba kpʋ ŋɩɩ.

¹⁰ Ŋ laalɩyuoro-la ma kala sɩ paala ŋaa baalaa, a kɛŋ bɔɩ-duoŋ a nagɛ naachigiŋ, fawʋllʋŋ jaŋ jʋʋba dɩ ba nandaasɩŋ yʋɔrɛ, bɛɛ wɩaa nʋʋkala sɩ hɛ Iziral tinteeŋ lɛ jɩma dɩ ŋ nyɩmma ŋaa laalɩyuori-babiibal nɛ, ʋ nɩaa ma kala ŋaa bɔɩ-duo tɩmma.

¹¹ Wɩɩ-la mɩ-na sɩ jaŋ bʋl nɛ: Leŋ dɩ la yɩrɛ laalɩyuoro-la kala sɩ hɛ Iziral tinteeŋ lɛ, a chɩŋ Daŋ sɩ hɛ wɩɩpɔsʋŋ nagʋa dɩɩrɩŋ, a kaa mʋ Bɛɛsɩba ma sɩ hɛ wɩɩpɔsʋŋ nadiiŋ dɩɩrɩŋ, dɩ ba kala kʋ hɛ dɔŋɔ, dɩ ŋ laalɩyuoroo yʋgɛ a nagɛ hagɩlɩ-bumbugulo sɩ pɩŋ fuoŋ niiŋ, dɩ ŋ-na tɩtɩa Abɩsalɔm laa ba sɩpaaŋ a kɛmba mʋ laalɩŋ,

¹² dɩ la kala mʋ yuo Devit lee-la kala la sɩ jaŋ naʋ. La jaŋ tuu ʋ lɛ a nagɛ nyalɩŋ sɩ yie kʋ tuu tinteeŋ ŋɩɩ. Dɩ la nɛ ŋaa ŋɩɩ, ʋ dɩ ʋ nɩaa kʋŋkala bɩ jaŋ kɛŋ mɩɩsɩŋ.

¹³ Dɩ ʋ nɛ leŋe aŋ fá jʋʋ taŋ-la ba sɩ saa kɛrɛ a golli, la nɩaa kala jaŋ kɛŋ ŋmɛsɩŋ a kʋ vɔɔ taŋ-la jebiee a lɛrɛ lo, a lɛrʋ tuu fuonaaŋ. La bɩ jaŋ leŋ dɩ tabɩɩ-bie ma ka nɩmɛ.”

¹⁴ Abɩsalɔm arɩ Iziral nɩaa kala bʋl, “Wɩɩ-la Husai, Aakɩ tɩɩna-la sɩ bʋla nɛ kpɩa wɩɩ-la Ahitofɛl sɩ bʋla.” La TƖƖNA faa chɛ dɩ ba sɩ́ wʋzɔŋ-la Ahitofɛl sɩ bʋla to nɛ, ka dɩ ʋ joŋ wʋlɔrʋŋ a ŋaa Abɩsalɔm lɛ.

¹⁵ Ŋɩɩ nɛ Husai mʋ bʋla pɩ Zadɔk arɩ Abɩata, Wɩɩsʋllɩ sɩpaalaaraa, “Ahitofɛl dagɛ Abɩsalɔm arɩ Iziral tɩŋŋaa sɩpaalaaraa dɩ ba ŋaa ŋ-la arɩ ŋ-la nɛ, ama mɩ ma dagɛba dɩ ba ŋaa ŋ-la arɩ ŋ-la nɛ.”

¹⁶ Ʋ bɩra bʋl, “Ŋaa lɩma a leŋ dɩ ba mʋ bʋla pɩ Devit, dɩ ʋ sɩ́ fuonaa-la ŋ sɩ yie kieli aŋ jʋʋ tintee-hɩlɩŋ lɛ chʋa. Má bʋla pʋ dɩ ʋ chol fuo-la, dɩ ŋɩɩ dee, ba jaŋ kpʋ ʋ dɩ ʋ nɩaa kala.”

¹⁷ Abɩata nanʋala Jonataŋ arɩ Zadɔk bie Ahɩmaas fa hɛ Ɛŋ-Rɔgɛl lɩɩ-bulo-la leriŋ nɛ, Jerusalɛm niiŋ aa gbɛrɛ, bɛɛ wɩaa dɩ ba nɛ naba dɩ baa jʋʋ taŋ-la, ʋ bɩ jaŋ zɔŋ a pɩba. Tɩntɩnnɩ hantolibie kʋbala nɛ fa yie mʋ bʋl wɩalɩŋ kala sɩ ŋaa a pɩba, ba ma kaa mʋ bʋla pɩ kuoro Devit.

¹⁸ Ama bapʋɔsɩ-bie kʋbala naba, a mʋ bʋla pɩ Abɩsalɔm. Ŋɩɩ nɛ Jonataŋ arɩ Ahɩmaas sii lɩma lɩma a mʋ faa baal kʋbala sɩ hɛ taŋ-la ba sɩɩ yɩrɛ Bahurim dɩa lɛ. Dɩ baal-la fa kɛŋ viliŋ ʋ kaala tʋɔŋ, ba tuu faa ʋ tʋɔŋ.

¹⁹ Ʋ haala joŋ kʋa a tɔ vil-la niiŋ a joŋ mɩaa a yieni, dɩ nʋʋkala sɩ́ wuo jɩŋ.

²⁰ Ŋɩɩ nɛ Abɩsalɔm nɩaa kɔ haal-la teeŋ a pɩɛsʋ, “Nɩɩ nɛ Ahɩmaas arɩ Jonataŋ hɛ?” Haal-la bʋla pɩba, “Ba chol fuoŋ cholo nɛ.” Nɩalɩŋ gɔllɔ chɛba, a bɩ ba na aŋ mɩɩra mʋ Jerusalɛm.

²¹ Nɩalɩŋ sɩ chɛba ka aŋ mɩɩra viiri, Ahɩmaas arɩ Jonataŋ kʋ lɩɩ vil-la tʋɔŋ, a mʋ bʋla pɩ kuoro Devit. Ba sɩ, “Sii lɩma a chol fuo-la.” Ŋɩɩ nɛ ba bʋl wɩalɩŋ Ahitofɛl sɩ bʋla a tɩgɛ ʋ lɛ a pʋ.

²² Devit arɩ ʋ nɩaa kala sii a chol Jɔdaŋ fuo-la. Taŋ ka pʋl dɩ ba kala cholo dɛrɛ, ba kʋŋkala bɩ ka.

²³ Ahitofɛl sɩ na dɩ Abɩsalɔm arɩ Iziral tɩŋŋaa sɩpaalaaraa bɩ wɩalɩŋ ʋ sɩ daga to, ʋ sii kpɩɛrɛ ʋ kakumo a mɩɩra mʋ ʋ jaŋ Gilo. Ʋ sɩ mʋa, ʋ dagɛ ʋ dɩa nɩaa arɩ ʋ tɩntɩnnaa wɩalɩŋ ba sɩ jaŋ ŋaa, aŋ lieŋi ʋ tɩtɩa, a sʋʋ. Ba joŋu hugi ʋ nyɩmma bʋa lɛ.

²⁴ Ŋɩɩ nɛ Devit sii a mʋ taŋ-la ba sɩɩ yɩrɛ Mahanem, ka Abɩsalɔm arɩ Iziral nɩalɩŋ kala chol Jɔdaŋ fuo-la.

²⁵ Bʋa deeŋ lɛ, dɩ Abɩsalɔm lɩɩsɛ Amasa nɛ ʋ laa Jʋab nyuŋ a ŋaa ʋ laalɩyuoroo nɩhɩaŋ. Amasa nyɩmma yɩrɩŋ nɛ fa Jɛta, a ŋaa Iziral tɩɩna, a jaa Abɩgɛl sɩ ŋaa Nahas tolo, aŋ ŋaa Zeruya ma naambii. Zeruya nɛ fa ŋaa Jʋab naaŋ.

²⁶ Abɩsalɔm arɩ Iziral tɩŋŋaa kala fa ŋmoo buguŋ Gɩlɩad tinteeŋ lɛ nɛ.

²⁷ Devit sɩ kɔ Mahanem, Nahas nanʋala Sobi sɩ lɩɩ taŋ-la ba sɩɩ yɩrɛ Raba a hɛ Amɔŋ tɩŋŋaa tinteeŋ lɛ, arɩ Amɩɛl nanʋala Makɩɩ ma sɩ lɩɩ taŋ-la ba sɩɩ yɩrɛ Lo Dɛba, arɩ Baazɩlaɩ, Gɩlɩad tɩɩna-la ma sɩ lɩɩ Rɔgɛlɩm,

²⁸ ba kɛŋ kʋpɩnaa arɩ gbansɩŋ arɩ pupoyee kaa kʋ pɩ Devit arɩ ʋ nɩaa. Ba pɛ kɛŋ mɛmpɛ, mɩaa, munuŋ, mɩɩ-halaa, suonoo, arɩ sinsuoŋ,

²⁹ tʋʋŋ arɩ nɛyɩl-dɩndɛrɩŋ, piesee arɩ nɛyɩl-nʋʋŋ, a kaa kʋ pɩba dɩ ba dii, bɛɛ wɩaa ba sɩ, “Losuŋ kɛŋ nɩalɩŋ nɛ, lɩɩnyʋasʋŋ ma kɛmba, lɔlʋŋ ma jʋʋba tintee-hɩlɩŋ lɛ.”