2 SAMƲƐL 16 - WƖA TENIŊ

Devit arɩ Ziba

¹ Kuoro Devit sɩ kieli Olif peel-la nyu-gbaŋa a mʋ sɩpaaŋ mʋa, dɩ Mɛfɩbɔsɛf tɩntɩnnɩ-hɩaŋ ba sɩɩ yɩrɛ Ziba nɛ ŋɩɩ, a kʋ chemu. Ʋ fa kɛŋ kakusuŋ nɛ a daŋŋɛ dɔŋɔ ba chʋŋ boroboroba zɔɔ-balɩa, tɩɩnɛŋ hɩlaa kɩŋkɛsɩmɛɛ zɔlɔ, tutogi-nambɩlaa kɩŋkɛsɩmɛɛ zɔlɔ arɩ tɩɩnɛnɛɛ sɩnɩŋ puruŋ sɩɩ.

² Kuoro pɩɛsɛ Ziba, “Bɛɛ nɛ ŋ kɛŋ kɩaa deemba kala kɔ dɩ ŋ ŋaa?” Ziba bʋl, “Kakusu-la ŋaa ŋ dɩa nɩaa kɩaa nɛ dɩ ba jɩjɩl, boroboroba-la arɩ tɩɩnɛnɛ-la ŋaa ŋ nɩaa kʋdiilee nɛ dɩ ba didii, tɩɩnɛnɛɛ sɩŋ-la ma nɛ nɩalɩŋ sɩ lɔlɔ tintee-hɩlɩŋ lɛ jaŋ nyʋa a bɩra kɛŋ doluŋ.”

³ Kuoro Devit bɩra pɩɛsɛ, “Nɩɩ nɛ ŋ nɩhɩaŋ Sɔɔl nihiŋ Mɛfɩbɔsɛf hɛ?” Ziba bʋl, “Ʋ nɛ hɔŋ Jerusalɛm lɛ, bɛɛ wɩaa ʋ bɩɩna Iziral tɩŋŋaa jaŋ joŋ ʋ naabalɩma kuoruŋ a pʋ.”

⁴ Ŋɩɩ nɛ kuoro bɩra bʋla pɩ Ziba, “Mɛfɩbɔsɛf fa sɩ tɩɩ kɩalɩŋ kala, lɛɛlɛ ba ŋaa ŋ kɩaa nɛ.” Ziba bʋl, “Kuoro mɩ nɩhɩaŋ, mɩ ŋaa ŋ tɩntɩnnʋ nɛ, a leŋ dɩ ŋ tʋɔŋ tɔrɛ mɩ nyuŋ bʋa na-kala.”

Sɩmɛɩ bʋl wʋbɔŋŋɔɔ hɛ Devit lɛ

⁵ Kuoro Devit sɩ mʋ yi taŋ-la ba sɩɩ yɩrɛ Bahurim, baal kʋbala sɩ ŋaa Sɔɔl nyɩŋ-nɩaa dɔŋɔ kʋ lɩɩ a suomo bʋl wʋbɔŋŋɔɔ hɩhɛ ʋ lɛ. Baal-la yɩrɩŋ nɛ Sɩmɛɩ a ŋaa Gɛra nanʋala.

⁶ Ʋ paa tabɩaa a yɩyagɛ Devit arɩ ʋ tɩntɩnnɩ-hɩasɩŋ kala. Devit laalɩyuoroo arɩ nɩalɩŋ sɩɩ pɔʋ kala fa hɛ Devit nadiiŋ arɩ ʋ nagʋa kala nɛ, ka baal-la ŋɩŋaa ŋɩɩ.

⁷ Sɩmɛɩ tʋʋsʋ aŋ bʋl “Mʋ lɩɩ, mʋ lɩɩ, ŋ ŋaa nɩkpʋʋrʋ nɛ, a ŋaa nɩbɔŋ.

⁸ La TƖƖNA joŋ nɩalɩŋ kala ŋ sɩ kpʋa Sɔɔl dɩa lɛ chɩmɩŋ nɛ a tiŋ ŋ lɛ. Ʋ kuoruŋ nɛ ŋ gaa dii ŋɩɩ. La TƖƖNA laa kuorii-la nɛ ŋ teeŋ a joŋo pɩ ŋ nanʋala Abɩsalɔm. Ŋ ŋaa nɩkpʋʋrʋ nɛ, ŋɩɩ nɛ tɩɩ wɩaa deemba kala jʋʋŋ.”

⁹ Ŋɩɩ nɛ Zeruya nanʋala Abɩsaɩ pɩɛsɛ kuoro, “Bɛɛ nɛ tɩɩ va-sʋʋŋ deeŋ tʋtʋʋsɛ kuoro, mɩ nɩhɩaŋ? Leŋ dɩ mɩ mʋ keri ʋ nyuŋ.”

¹⁰ Ama kuoro Devit sɩ, “Ŋ wɩɩ tuo wɩɩŋ deeŋ lɛ, dɩ La TƖƖNA nɛ sɩ Sɩmɛɩ tʋʋsɛmɛ, kʋbɛɛ nɛ kaŋ dɩ ŋ bʋl ʋ sɩ́ ŋɩɩ ŋaa?”

¹¹ Ŋɩɩ nɛ Devit bɩra bʋla pɩ Abɩsaɩ arɩ ʋ tɩntɩnnɩ-hɩasɩŋ kala, “Mɩ tɩtɩa bii-lʋlʋŋ nɩɩ walɩmɛ dɩ ʋ kpʋmɛ. Bɛɛ nɛ jaŋ tɩɩ Bɛnjamɩŋ doho nɩa deeŋ-na bɩ jaŋ chɩchɛ dɩ ʋ kpʋmɛ? Má leŋu dɩ ʋ tʋʋsɛmɛ ŋɩɩ kala ʋ sɩɩ chɛ. La TƖƖNA nɛ sɩ ʋ tʋʋsɛmɛ.

¹² Kapo La TƖƖNA jaŋ bɩra wuo na wɩalɩŋ sɩ jʋʋmɛ jɩnɩŋ arɩ ŋɩɩ ba sɩɩ tʋʋsɛmɛ, a fá mɩ nenige a joŋ wʋzɔŋŋɔɔ a timmi.”

¹³ Devit arɩ ʋ nɩaa joŋ wombiiŋ a vɩvɛŋ, aŋ ka Sɩmɛɩ ma kpɛrɛ to dundolo sɛmɛ a chaasʋ, a tʋtʋʋsʋ a bʋl wʋbɔŋŋɔɔ hɩhɛ ʋ lɛ, aŋ paa tabɩaa arɩ hagɩla a yuyuou.

¹⁴ Kuoro arɩ ʋ nɩaa kala sɩ kʋ yi Jɔdaŋ fuo-la, dɩ ba chaasa lɔl, ba hɔŋ nɩmɛ a wiesi.

Wɩalɩŋ Husai arɩ Ahitofɛl sɩ dagɛ Abɩsalɔm

¹⁵ Bʋa-la lɛ, dɩ Abɩsalɔm, Ahitofɛl arɩ Iziral tɩŋŋaa kala kɔ Jerusalɛm.

¹⁶ Ŋɩɩ nɛ Husai, Aakɩ tɩɩna-la, Devit nandɔŋɔ, sii mʋ Abɩsalɔm teeŋ a bʋla pʋ, “A leŋ dɩ kuoro mɩɩsɩŋ duomi.”

¹⁷ Abɩsalɔm pɩɛsɛ Husai, “Ŋ-la nɛ ŋ dagɛ arɩ ŋ cho ŋ nandɔŋɔ nɛɛ? Bɛɛ nɛ tɩɩ ŋ bɩ ŋ nandɔŋɔ harɩŋ to mʋ?”

¹⁸ Husai bʋla pʋ, “Aɩ, mɩ bɩ jaŋ mʋ. Ŋ nɛ La TƖƖNA arɩ Iziral nɩaa lɩɩsɛ ŋ dii kuoruŋ. Ŋ harɩŋ nɛ mɩ jaŋ to a tɩma pɩpɩŋ.

¹⁹ Kʋbɛɛ nɛ maga dɩ mɩ tɩŋ tɩntɩŋŋaa pa? Mɩ nɩhɩaŋ nanʋala dee? Ŋɩɩ mɩ sɩ tɩŋ tɩntɩŋŋaa a pɩ ŋ nyɩmma Devit, ŋɩɩ nɛ maga dɩ mɩ tɩŋ a pɩ ŋ ma.”

²⁰ Abɩsalɔm mɩɩra pɩɛsɛ Ahitofɛl, “Dagɛla wɩɩ-la sɩ maga dɩ la ŋaa. Wʋbɛɛ nɛ maga dɩ la ŋaa?”

²¹ Ahitofɛl bʋl, “Kɛŋ ŋ nyɩmma haala-la ʋ sɩ bile aŋ bɩ jaa a leŋ ba pʋpɔ ʋ kuoru dɩa pɩŋ. Dɩ ŋ nɛ ŋaa ŋɩɩ, Iziral nɩaa kala jaŋ jɩŋ arɩ ŋ dɩ ŋ nyɩmma ŋaa dʋndɔmɔ nɛ. Nɩalɩŋ kala sɩɩ toŋ jaŋ chaasa chɩŋ ŋ harɩŋ.”

²² Ŋɩɩ nɛ ba hɛ lɛbɩŋ kuoru-dɩa lusuŋ nyuŋ a pɩ Abɩsalɔm. Iziral nɩaa kala bibeŋ, ka ʋ kɛŋ ʋ nyɩmma haala-la ʋ sɩ bile aŋ bɩ jaa pɩŋ nɩmɛ.

²³ Bʋa-la lɛ, wɩalɩŋ Ahitofɛl fa sɩ dagɛ Abɩsalɔm fa nagɛ nɩa sɩ nɩɩ wɩaa Wɩa teeŋ nɛ. Devit arɩ Abɩsalɔm kala fa bɩɩna wɩalɩŋ lɩɩ Wɩa teeŋ nɛ.