2 SAMƲƐL 15 - WƖA TENIŊ

Wɩɩ-la Abɩsalɔm sɩ bɩɩna dɩ ʋ ŋaa

¹ Bʋa kʋbala lɛ, Abɩsalɔm chɛ janɩŋ arɩ laalɩŋ janɩŋ torukoba arɩ baalaa mahɩŋ balɩa arɩ fii dɩ ba laa ʋ sɩpaaŋ.

² Ʋ fa yie sii chʋchʋɔ-fɩɛla a lɩɩ chɩŋ wombii-la sɛmɛ lee-la ba sɩ to a mʋmʋ ba jaŋ boi-baalɩŋ. Dɩ nʋʋkala nɛ kɛŋ wɩɩ a kʋkɔ kuoro teeŋ dɩ ʋ wasɛ pʋ, Abɩsalɔm yie yɩrɛ tɩɩna ʋ kɔ ʋ teeŋ ʋ pɩɛsʋ, “Tabɛɛ nɛ ŋ lɩɩ?” Dɩ nɩɩ-la nɛ sɩ ʋ lɩɩ Iziral doho doho-la dɔŋɔ nɛ,

³ Abɩsalɔm yie bʋl, “Ŋ kɩaa sɩma, ama nʋʋ tuo a chɩŋ kuoro naasɩŋ lɛ dɩ ʋ jegile nɩɩ ŋ wɩɩŋ.”

⁴ Ʋ ha yie bɩra bʋl, “Dɩ ba nɛ fa lɩɩsɛmɛ dɩ mɩ ŋaa nɩɩ-la sɩ jaŋ laa nɩaa wɩaa a bʋla wasa pɩpɩba tinteeŋ deeŋ lɛ, dɩ nʋʋkala nɛ kɛŋ kaalɛrɛ koo wɩɩ dɔŋ kɔ mɩ teeŋ, mɩ fa jaŋ leŋ dɩ nʋʋkala na ʋ wɩaa sɩaa.”

⁵ Dɩ nʋʋkala nɛ kʋ kpagɛ Abɩsalɔm a chɩchɛ dɩ ʋ tuu kpirimi ʋ sɩpaaŋ a chʋɔlʋ, ʋ yie guu lɩɩsɛ nɩsɩŋ nɛ, a kɛŋ tɩɩna a guoru.

⁶ Mɛlɛ deeŋ nɛ Abɩsalɔm kɛŋ Iziral tɩmma-la kala sɩ kɛŋ ba wɩaa kʋkɔ kuoro teeŋ dɩ ʋ wasa pɩba lɛ. Ŋɩɩ nɛ ʋ ŋaa nɩalɩŋ kala sɩ hɛ Iziral tinteeŋ lɛ cho ʋ wɩaa.

⁷ Jɩsɩŋ banɛsɛ sɩ bala, Abɩsalɔm bʋla pɩ kuoro, “Mɩɩ sʋlʋŋ, leŋ dɩ mɩ mʋ taŋ-la ba sɩɩ yɩrɛ Hɛbʋrɔŋ a lɩɩsɛ nii-la mɩ sɩ ta La TƖƖNA teeŋ.

⁸ Bʋa-la lɛ mɩ-na ŋ tɩntɩnna fa sɩ hɛ taŋ-la ba sɩɩ yɩrɛ Gesu sɩ hɛ Siiria tinteeŋ lɛ, mɩ fa ta niiŋ nɛ a bʋl, ‘Dɩ La TƖƖNA nɛ kɛmmɛ mɩɩra mʋ Jerusalɛm, mɩ jaŋ zilu Hɛbʋrɔŋ lɛ.’ ”

⁹ Ŋɩɩ nɛ kuoro bʋla pʋ, “Ŋ jaŋ mʋ woruŋ.” Ŋɩɩ nɛ ʋ sii mʋ Hɛbʋrɔŋ.

¹⁰ Abɩsalɔm tɩŋ tɩndaaraa ba lʋara bʋla pɩ Iziral doho doho-la kala, a bʋl, “Dɩ ma nɛ kʋ nɩɩ dɩ ba ŋmʋʋ banyile, má bʋl, ‘Abɩsalɔm dii kuoruŋ Hɛbʋrɔŋ lɛ.’ ”

¹¹ Nɩaa zɔɔ-balɩa nɛ fa lɩɩ Jerusalɛm a to ʋ harɩŋ. Ʋ fa yɩrɛba nɛ, ama ba-na bɩ wɩɩ-la ʋ sɩɩ ŋaa tʋɔŋ wɩɩkala jɩŋ.

¹² Bʋa-la lɛ Abɩsalɔm sɩ kpʋ pʋsʋŋ a sʋsʋl Wɩɩsʋlʋŋ ŋɩɩ, ʋ tɩma yɩrɛ Gilo tɩɩna kʋbala baa yɩrɛ Ahitofɛl, ʋ lɩɩ ʋ jaŋ Gilo kɔ. Baala deeŋ fa ŋaa nɩalɩŋ sɩ bʋl wɩaa chɩchagɩlɛ kuoro Devit dɔŋɔ nɛ. Ŋɩɩ nɛ Abɩsalɔm tʋɔbɩɩna-la wasa dol, ʋ harɩ-tooroo ma pʋŋa pɩpɛ.

Devit lɩɩ fá Jerusalɛm lɛ

¹³ Ŋɩɩ nɛ tɩndaara kɔ Devit teeŋ a bʋla pʋ, “Iziral tɩŋŋaa kala mɩɩra cho Abɩsalɔm nɛ a tutou.”

¹⁴ Ŋɩɩ nɛ Devit bʋla pɩ ʋ tɩntɩnnɩ-hɩasɩ-la kala sɩ hɛ ʋ teeŋ Jerusalɛm lɛ, “Má leŋ dɩ la fá, dɩ ŋɩɩ dee la bɩ jaŋ fori Abɩsalɔm nɩsɩŋ lɛ. Ʋ maga dɩ la ŋaa lɩma nɛ, dɩ ʋ sɩ́ la kʋ puu a yuo diila a kpʋ la dɩ la taŋ-la nɩaa kala.”

¹⁵ Kuoro tɩntɩnnɩ-hɩasɩ-la bʋla pʋ, “La-na ŋ tɩntɩnnaa chɩna gbɛrɛ nɛ dɩ la ŋaa wɩɩ-la kala ŋ-na kuoro la nɩhɩaŋ sɩɩ chɛ.”

¹⁶ Ŋɩɩ nɛ kuoro lɩɩ, ʋ dɩa nɩaa ma kala lɩɩ to ʋ harɩŋ, aŋ leŋ haalaa fii ʋ sɩ bile aŋ bɩ jaa pɔ ʋ kuoru dɩa.

¹⁷ Ʋ sɩ lɩa, ʋ nɩaa ma kala lɩɩ to ʋ harɩŋ ŋɩɩ, ba vɛnɛ mʋ dɩ-bolii mʋa aŋ chɩŋ.

¹⁸ Ʋ laalɩyuoroo kala kʋ kielu bal a pɛ nɩalɩŋ sɩɩ pɔʋ lɛ. Ŋɩɩ nɛ Giti tɩŋŋaa laalɩyuoro-la zɔɔ-balɩdʋ-la ma sɩ to ʋ harɩŋ a lɩɩ Gaf, ba ma kʋ bal.

¹⁹ Kuoro pɩɛsɛ Giti tɩɩna kʋbala baa yɩrɛ Ɩtaɩ sɩ ŋaa Giti tɩmma-la laalɩyuoro sɩpaalaara, “Bɛɛ nɛ tɩɩ ŋ tuto la harɩŋ? Mɩɩra mʋ kuoru-falɩŋ Abɩsalɔm teeŋ. Ŋ ŋaa nɩwogo nɛ, a lɩɩ Gaf tinteeŋ.

²⁰ Ŋ sɩ kɔ daha, ʋ bɩ diene. Bɛɛ nɛ saa tɩɩ mɩ jaŋ leŋ dɩ ŋ tuto mɩ harɩŋ jɩnɩŋ, mɩ paala bɩ jɩŋ lee-la mɩ sɩɩ mʋ. Mɩɩrɛ a kɛŋ ŋ laalɩyuoroo dɩ ma viiri. A leŋ dɩ La TƖƖNA dagɛma ʋ chonuŋ arɩ ʋ wʋtɩtɩɩ.”

²¹ Ɩtaɩ ma bʋla pɩ kuoro, “La TƖƖNA arɩ ŋ-na kuoro sɩ weye wɩaa, lee-la kala ŋ sɩɩ mʋ, nɩmɛ nɛ mɩ ma ŋ tɩntɩnna jaŋ mʋ, dɩ ʋ nɛ ŋaa mɩɩsɩŋ lee koo sʋʋŋ lee.”

²² Devit bʋla pɩ Ɩtaɩ, “Vɛnɛ kʋ mʋ.” Ŋɩɩ nɛ Ɩtaɩ, Giti tɩɩna-la arɩ baala-la arɩ ba dɩa nɩalɩŋ kala sɩ hɛ ʋ teeŋ mʋ.

²³ Nɩalɩŋ kala sɩ hɛ Jerusalɛm lɛ fa faasa ŋmoo niiŋ nɛ bʋa-la lɛ, Devit arɩ ʋ nɩaa sɩɩ lɩɩ. Ŋɩɩ nɛ kuoro mʋ chol Kɩdɩrɔŋ fuonaa-la, ba kala tʋʋlɛ tintee-hɩlɩŋ dɩɩrɩŋ a mʋmʋ.

²⁴ Zadɔk arɩ Abɩata Wɩɩsʋllɩ sɩpaalaaraa fa hɛ nɩmɛ. Levi doho nɩaa ma hɛ nɩmɛ a chʋŋ Wɩa niiriŋ daga-la. Ŋɩɩ nɛ ba chʋgɛ daga-la bil, Abɩata kpʋ pʋsʋŋ a sʋl Wɩɩsʋlʋŋ pɩ La TƖƖNA ŋɩɩ deeŋ deeŋ nɩalɩŋ kala lɩɩ taŋ-la lɛ dɛrɛ.

²⁵ Ŋɩɩ nɛ Devit bʋla pɩ Zadɔk, “Má joŋ Wɩa niiriŋ daga-la a mɩɩra jʋʋ bil Jerusalɛm lɛ. Dɩ La TƖƖNA tʋɔŋ nɛ tɔrɛ mɩ nyuŋ, tapʋlɩɩ dɔŋ ʋ jaŋ kɛmmɛ mɩɩra kɔ, dɩ mɩ na daga-la arɩ ʋ dɩchɩnɩŋ.

²⁶ Ama dɩ ʋ nɛ sɩ, ‘Mɩ tʋɔŋ bɩ ŋ nyuŋ tɔrɔ,’ ŋɩɩ-na, mɩ chɩna gbɛrɛ nɛ dɩ ʋ ŋaamɛ wɩɩ-la kala ʋ sɩ na dɩ ʋ zɔmɔ a pʋ.”

²⁷ Kuoro bɩra pɩɛsɛ Zadɔk, Wɩɩsʋllɩ sɩpaalaara, “Na ŋ ŋaa Wɩa sɩɩ-naarʋ nɛ? Kɛŋ ŋ nanʋala Ahɩmaas, dɩ Abɩata ma kɛŋ ʋ nanʋala Jonataŋ dɩ ma mɩɩra mʋ taŋ tʋɔŋ sɔm.

²⁸ Mɩ jaŋ gbɛrɛma fuo-la lɛ ŋ sɩ yie chol aŋ mʋ tintee-hɩlɩŋ a kaa mʋ bʋa-la lɛ mɩ sɩ jaŋ nɩɩ wɩɩ ma teeŋ.”

²⁹ Ŋɩɩ nɛ Zadɔk arɩ Abɩata joŋ Wɩa niiriŋ daga-la a mɩɩra mʋ Jerusalɛm a hɔŋ nɩmɛ.

³⁰ Ka Devit kiele jɩl peel-la ba sɩɩ yɩrɛ Olif peeliŋ, aŋ yiyel, aŋ joŋ kʋa tɔ ʋ nyuŋ a vɩvɛŋ naabirimee a dɩdagɛ tʋɔ-cheeŋ. Nɩalɩŋ ma kala sɩɩ to ʋ harɩŋ paa kɩaa tɔ ba nyusuŋ aŋ ma yele tuto.

³¹ Nʋʋ bʋla pɩ Devit, “Ahitofɛl ma lɩɩ ŋ harɩŋ nɛ, a chɩŋ Abɩsalɔm harɩŋ.” Ŋɩɩ nɛ Devit chʋɔlɛ Wɩa, “La TƖƖNA, leŋ dɩ wɩalɩŋ Ahitofɛl sɩ jaŋ dagɛ kuoro ŋaa wʋpɛɩba.”

³² Devit sɩ jɩla yi Olif peel-la nyu-gbaŋa, lee-la ba fa sɩɩ chʋɔlɛ Wɩa, dɩ Aakɩ tɩɩna kʋbala baa yɩrɛ Husai fa hɛ nɩmɛ dɩ ʋ chemu. Ʋ gɛnnɩŋ kala kɩɛsɛ, ʋ nyuŋ ma kala ŋaa kʋŋkɔlʋŋ.

³³ Devit bʋla pʋ, “Dɩ ŋ nɛ to mɩ harɩŋ, ŋ jaŋ ŋaa chʋga a pɩmɛ.

³⁴ Ama dɩ ŋ nɛ mɩɩra mʋ taŋ tʋɔŋ a bʋla pɩ Abɩsalɔm, ‘Kuoro, mɩ jaŋ ŋaa ŋ tɩntɩnnʋ, bumbuŋ kala mɩ ŋaa ŋ nyɩmma tɩntɩnnʋ nɛ, ama lɛɛlɛ mɩ jaŋ ŋaa ŋ tɩntɩnnʋ.’ Dɩ ŋ nɛ ŋaa ŋɩɩ, ŋ jaŋ wuo pɛ mɩ lɛ dɩ la kɛŋ wɩalɩŋ kala Ahitofɛl sɩ bɩɩna dɩ ʋ ŋaa a pugo ta.

³⁵ Wɩɩsʋllɩ sɩpaalaaraa, Zadɔk arɩ Abɩata ma jaŋ hɛ ŋ teeŋ. Ŋ jaŋ wuo bʋl wɩɩ-la kala ŋ sɩ nɩa kuoro dɩa lɛ a pɩba.

³⁶ Ba hambolibiisi-la balɩa, Ahɩmaas arɩ Jonataŋ ma jaŋ hɛ nɩmɛ. Tɩmba dɩ ba kʋ bʋl wɩɩ-la kala ŋ sɩ nɩa a pɩmɛ.”

³⁷ Devit nandɔŋɔ Husai yie kʋʋ jʋʋ Jerusalɛm dɩ Abɩsalɔm ma kʋʋ jʋʋ tabal-la tʋɔŋ.