2 SAMƲƐL 14 - WƖA TENIŊ

Abɩsalɔm mɩɩra mʋ Jerusalɛm

¹ Zeruya nanʋala Jʋab jɩma dɩ Devit tʋɔbɩɩnaa kala hɛ Abɩsalɔm lɛ nɛ.

² Ŋɩɩ nɛ ʋ tɩŋ dɩ ba mʋ yɩrɛ haal kʋbala sɩ hɛ taŋ-la ba sɩɩ yɩrɛ Tɛkʋa lɛ a kɛŋ wʋjɩmɩŋ dɩ ʋ kɔ. Haal-la sɩ kɔ, ʋ bʋla pʋ, “Fugo nagɛ arɩ ŋŋ yel yoho nɛ. Laalɛ yo-gɛnnɩŋ, a sɩ́ nʋʋŋ tɩsʋ. Ŋaa a nagɛ haala nʋʋ sɩ sʋba, ʋ tʋɔŋ chei woruŋ ʋ yiyel yoho deeŋ deeŋ.

³ Mʋ kuoro teeŋ a bʋl wɩaa deemba mɩ sɩ jaŋ dagɩŋ a pʋ.” Jʋab dagʋ wɩalɩŋ ʋ sɩ jaŋ bʋl.

⁴ Ŋɩɩ nɛ Tɛkʋa tɩŋŋaa haal-la mʋ kuoro teeŋ a tuu kpirimi ʋ sɩpaaŋ a zilu, aŋ bʋl, “Kuoro, pɛ mɩ lɛ.”

⁵ Kuoro pɩɛsʋ, “Bɛɛ nɩɩ walɩmɩŋ?” Haal-la bʋl, “Mɩ bala sʋba nɛ ka mɩ ŋaa yo-haal.

⁶ Mɩ-na ŋ tɩntɩnna fa kɛŋ hambolibiisiŋ balɩa nɛ. Ba sii a yuyuo dɔŋɔ baga lɛ, nʋʋkala tuo dɩ ʋ kɛmba kɛrɛ. Ŋɩɩ nɛ dɔŋɔ ŋmoo dɔŋɔ a kpʋ.

⁷ Ŋɩɩ nɛ mɩ nyɩŋ-nɩaa kala sii a hosi mɩ-na ŋ tɩntɩnna nyuŋ a bʋl, ‘Joŋ ŋ bile sɩ kpʋ ʋ naambie a pɩla dɩ la ma kpʋʋ, a tɩŋ ʋ sɩ kpʋ ʋ naambie wɩaa. Baa chɛ dɩ ba kpʋʋ nɛ aŋ laa la tinteeŋ.’ Ma sɩɩ-bala sɩ ka, ʋ nɛ baa chɛ dɩ ba togi, dɩ mɩ bala yɩrɩŋ lɛl dʋnɩa lɛ.”

⁸ Kuoro bʋla pɩ haal-la, “Mʋ dɩa, mɩ jaŋ wasɛ wɩɩ-la pɩŋ.”

⁹ Ŋɩɩ nɛ haal-la bʋla pʋ, “Kuoro, mɩ nɩhɩaŋ, wɩɩ-la kala ŋ sɩ jaŋ ŋaa, dɩ cheeriŋ nɛ hɛ ʋ tʋɔŋ, ʋ jaŋ ŋaa mɩ dɩa nɩaa wɩɩ. Ŋ dɩ ŋ dɩa nɩaa-na bɩ cheeriŋ kɛnɛ.”

¹⁰ Kuoro bʋla pʋ, “Dɩ nʋʋkala nɛ bʋl wɩɩ ŋ teeŋ, kɛnʋ kɔ mɩ teeŋ, tɩɩna bɩra bɩ jaŋ walɩmɩŋ.”

¹¹ Haal-la bʋl, “Kuoro, mɩɩ sʋlʋŋ, ŋmɩɛsɛ La TƖƖNA ŋ Wɩa dɩ ʋ pɔ dɩ nɩɩ-la sɩɩ chɛ ʋ kpʋ mɩ bie a tɩŋ mɩ nanʋa-baal-la sɩ sʋba wɩaa, sɩ́ wombiiŋ na a ŋaa ŋɩɩ.” Ŋɩɩ nɛ Devit bʋl, “Mɩ ŋmɩɛsɛ La TƖƖNA sɩ weye, ŋ nanʋala nyu-pʋŋ bala ma bɩ jaŋ churo tel.”

¹² Ŋɩɩ nɛ haal-la bʋl, “Jaaŋ jaaŋ, leŋ dɩ mɩ-na ŋ tɩntɩnna bɩra bʋl wɩɩ ŋ teeŋ.” Kuoro sɩ, “Bʋl wɩɩ-la ŋ sɩ kɛnɛ.”

¹³ Haal-la bɩra bʋl, “Bɛɛ nɛ saa tɩɩ ŋ bɩɩnɛ wɩɩ-la sɩ bɩ zɔŋ a mʋ tɩgɛ Wɩa nɩaa lɛ? Wɩɩ-la ŋ sɩ bʋla, ŋ tɩtɩa nɛ ŋ kɛŋ, ŋ sɩ bɩ leŋe ŋ bile ŋ sɩ kire ta mɩɩra kɔ.

¹⁴ La kala jaŋ sʋʋ, la nagɛ lɩɩŋ sɩ bɩsa ta tinteeŋ nɛ, nʋʋkala bɩ jaŋ wuo paa. Ama Wɩa bɩ laa kpʋ, ʋ yie chɛ wombiiŋ nɛ a kɛsɛ la nɩalɩŋ sɩ lɛlɛ a kaa kʋ kpagɛ ʋ tɩtɩa.

¹⁵ Kuoro, mɩ nɩhɩaŋ, wɩɩ-la mɩ sɩ kaa kɔ dɩ mɩ bʋla pɩŋ nɛ ŋɩɩ, bɛɛ wɩaa nɩalɩŋ ŋaa fawʋllʋŋ kɛmmɛ nɛ. Ŋɩɩ nɛ mɩ-na ŋ tɩntɩnna bɩɩnɛ mɩ tʋɔŋ lɛ, ‘Dɩ mɩ nɛ kʋ bʋl wɩɩ-la a pɩ ŋ-na kuoro, ŋ bɩ pɔ ŋ jaŋ ŋaa wɩɩ-la mɩ-na ŋ tɩntɩnna sɩɩ chɛ.

¹⁶ Ŋ bɩ pɔ ŋ-na kuoro jaŋ sɛɩ, a laa mɩ-na ŋ tɩntɩnna ta baal-la nɩsɩŋ lɛ, nɩɩ-la sɩɩ walɩmɛ dɩ ʋ kpʋ mɩ dɩ mɩ nanʋala, a lɩɩsɛla ta tintee-la Wɩa sɩ joŋo pɩ la lɛ.’

¹⁷ Kuoro, mɩ nɩhɩaŋ, mɩ bʋl mɩ tʋɔŋ lɛ arɩ ŋ wʋbʋlaa jaŋ wuo laamɛ ta dɩ mɩ wiesi, bɛɛ wɩaa ŋ-na kuoro nagɛ Wɩa-tɩndaara nɛ, a jɩŋ wʋzɔmʋŋ arɩ wʋbɔmʋŋ bʋa. A leŋ dɩ La TƖƖNA ŋ Wɩa chɩŋ ŋ harɩŋ.”

¹⁸ Ŋɩɩ nɛ kuoro bʋla pɩ haal-la, “Mɩɩ chɛ mɩ pɩɛsɩŋ wɩɩ nɛ, pʋpɔ ŋ sɩ́ wɩɩ-la bʋbʋɔŋ joŋo faamɛ.” Haal-la bʋl, “Kuoro, mɩ nɩhɩaŋ, pɩɛsɛmɛ wɩɩ-la ŋ sɩ kɛnɛ.”

¹⁹ Kuoro pɩɛsʋ, “Jʋab nɩsɩŋ hɛ wɩaa deemba lɛ nɛɛ?” Ŋɩɩ nɛ haal-la bʋl, “Kuoro, mɩ nɩhɩaŋ, ŋ sɩ hɛ ŋ mɩɩsɩŋ lɛ wɩaa, nʋʋkala bɩ jaŋ wuo joŋ wɩɩ a faaŋ. Wʋtɩtɩɩ, ŋ tɩntɩnna Jʋab nɛ dagɛmɛ wɩalɩŋ mɩ sɩ jaŋ ŋaa arɩ wɩalɩŋ kala mɩ sɩ jaŋ bʋl.

²⁰ Ŋ tɩntɩnna Jʋab ŋaa ŋɩɩ dɩ ʋ kɛŋ ŋ tʋɔbɩɩnaa nɛ a bɩrɩmɛ a mʋ tɩgɛ wɩɩ-la sɩɩ ŋaa lɛ. Mɩ nɩhɩaŋ, ŋ kɛŋ wʋjɩmɩŋ a nagɛ Wɩa-tɩndaara nɛ, ŋ jɩŋ wɩɩkala sɩɩ ŋaa tinteeŋ lɛ nɛ.”

²¹ Ŋɩɩ harɩŋ nɛ kuoro yɩrɛ Jʋab a bʋla pʋ, “Wɩɩ-la ŋ sɩɩ chɛ mɩ ŋaa, mɩ jaŋ ŋaa. Mʋ chɛ kɛŋ Abɩsalɔm kɔ.”

²² Jʋab tuu kpirime kɛŋ sɩaa chu tinteeŋ a zilu, aŋ bʋl, “Wɩa jaŋ pɛ ŋ lɛ. Jɩnɩŋ mɩ-na ŋ tɩntɩnna jɩma arɩ ŋ tʋɔŋ tɔrɛ mɩ nyuŋ nɛ, ŋ ŋaa wɩɩ-la mɩ-na ŋ tɩntɩnna sɩɩ chɛ nɛ.”

²³ Ŋɩɩ nɛ Jʋab sii a mʋ taŋ-la ba sɩɩ yɩrɛ Gesu, a kɛŋ Abɩsalɔm mɩɩra kɔ Jerusalɛm.

²⁴ Ama kuoro bʋla pɩ Jʋab, “Leŋ dɩ ʋ mʋ ʋ dɩa, mɩ bɩ chɛ mɩ naʋ mɩ sɩpaaŋ.” Ŋɩɩ nɛ Abɩsalɔm mʋ ʋ dɩa, ʋ bɩ kuoro sɩpaaŋ kɔ.

²⁵ Iziral tinteeŋ kala lɛ, baal kala fa tuo a zɔŋ nɩaa jɩmʋ a magɛ Abɩsalɔm. A chɩŋ ʋ nyuŋ a kaa tuu ʋ naachɛyɛɛ, ʋ fa bɩ nyɔɔ kala kɛnɛ.

²⁶ Jɩna jɩna nɛ ʋ kaa kɩkɛ ʋ nyuŋ. Dɩ ʋ nyu-pʋnaa nɛ faasa waa dɩ ba kɛ, ba yuŋuŋ yie ŋaa kilo balɩa nɛ, dɩ ba nɛ kɛŋ sanɩa-la ba sɩ kaa mɩmagɩsɛ kɩaa kuoro dɩa lɛ a magɩsɛ.

²⁷ Abɩsalɔm fa lʋl hambolibiisiŋ batori nɛ arɩ tolo kʋbala baa yɩrɛ Tama. Tolo-la fa zɔmɔ nɛ woruŋ.

²⁸ Abɩsalɔm fa hɛ Jerusalɛm lɛ jɩsɩŋ balɩa nɛ, ʋ bɩ wuo kɔ kuoro sɩpaaŋ.

²⁹ Ŋɩɩ nɛ Abɩsalɔm tɩŋ ba yɩrɛ Jʋab dɩ ʋ kɛnʋ a mʋ kuoro teeŋ. Jʋab vɩa. Ʋ bɩra tɩŋ ba yɩrʋ lɩamɩŋ lɛ, ʋ bɩra vɩa.

³⁰ Ŋɩɩ nɛ Abɩsalɔm bʋla pɩ ʋ tɩntɩnnaa, “Jʋab baga kpagɛ mɩ baga nɛ, ʋ mɩaa hɛ nɩmɛ. Má mʋ nyɩgɛ ʋ baga-la.” Abɩsalɔm tɩntɩnna-la mʋ a joŋ nyiniŋ a hɛ baga-la lɛ.

³¹ Ŋɩɩ nɛ Jʋab sii a mʋ Abɩsalɔm dɩa a pɩɛsʋ, “Bɛɛ nɛ tɩɩ ŋ tɩntɩnnaa mʋ nyɩgɛ mɩ baga?”

³² Abɩsalɔm bʋla pɩ Jʋab, “Mɩ tɩma ba yɩrɩŋ nɛ ŋ vɩa. Mɩ faa chɛ dɩ ŋ mʋ kuoro teeŋ a pɩɛsʋ, ‘Bɛɛ nɛ tɩɩ mɩ lɩɩ Gesu a kɔ daha? Ʋ fa jaŋ kpɩa a pɩmɛ dɩ mɩ nɛ ha hɛ nɩmɛ. Lɛɛlɛ mɩ cho dɩ mɩ mʋ kuoro sɩpaaŋ nɛ, dɩ mɩ nɛ ŋaa wɩɩ a chei, leŋ dɩ ʋ kpʋmɛ.’ ”

³³ Ŋɩɩ nɛ Jʋab mʋ kuoro teeŋ, a bʋl wɩalɩŋ kala Abɩsalɔm sɩ bʋla a pʋ. Ʋ yɩrɛ Abɩsalɔm, ʋ kɔ a tuu kpirime yi tinteeŋ kuoro sɩpaaŋ, ŋɩɩ nɛ kuoro guoru.