2 SAMƲƐL 13 - WƖA TENIŊ

Amɩnɔŋ arɩ Tama

¹ Devit nanʋala Abɩsalɔm fa kɛŋ dɩ-haal kʋbala nɛ baa yɩrɛ Tama. Ʋ fa zɔmɔ nɛ woruŋ. Ŋɩɩ nɛ Amɩnɔŋ ma sɩ ŋaa Devit nanʋala chou a hɩhɩɛnʋ.

² Amɩnɔŋ fa sɩ cho ʋ dɩ-haala Tama ŋɩɩ, aŋ bɩ jɩŋ wɩɩ-la kala ʋ sɩ jaŋ ŋaa dɩ ʋ jʋʋ ʋ nɩsɩŋ, aŋ bɩra bɩ jaŋ wuo bʋla pʋ ma arɩ ʋ chou nɛ a hɩhɩɛnʋ, ʋ tɩŋ ŋɩɩ wɩaa wʋwɩɩlɛ. Tolo-la fa ha bɩ baal kala jɩŋ.

³ Dɩ Amɩnɔŋ fa kɛŋ nandɔŋ kʋbala baa yɩrɛ Jonadab. Ʋ ŋaa kuoro Devit naambie Sɩmɩa nanʋala nɛ. Jonadab sɩɩŋ fa waga nɛ woruŋ.

⁴ Ʋ pɩɛsɛ Amɩnɔŋ, “Bɛɛ nɛ tɩɩ ŋ ŋaa kuoro bie, ka tapʋlɩɩ kala ŋ yie kɛŋ sɩaa chei? Bɛɛ kʋŋ nɩɩ walɩmɩŋ?” Amɩnɔŋ bʋla pʋ, “Mɩ cho mɩ naambie Abɩsalɔm dɩ-haala Tama nɛ.”

⁵ Jonadab bʋla pʋ, “Jʋʋ pɩŋ a fugoo wɩɩlɛ. Dɩ ŋ nyɩmma nɛ kɔ dɩ ʋ naŋ, bʋla pʋ, ‘Mɩɩ chɛ mɩ dɩ-haala Tama nɛ kʋ ŋaa kʋdiilee pɩmɛ dɩ mɩ dii. Mɩɩ chɛ dɩ ʋ ŋɩŋaa kʋdiile-la ka dɩ mɩ bibeŋ nɛ, dɩ ʋ nɛ dɛrɛ, ʋ tɩtɩa ŋaa pɩmɛ dɩ mɩ dii.’ ”

⁶ Ŋɩɩ nɛ Amɩnɔŋ jʋʋ pɩŋ a fugo wʋwɩɩlɛ. Kuoro sɩ kɔ dɩ ʋ naʋ, Amɩnɔŋ bʋla pʋ, “Mɩ nyɩmma, mɩɩ sʋlʋŋ, leŋ dɩ mɩ dɩ-haala Tama kɔ dɩ mɩ bibeŋ ka dɩ ʋ chaasa ŋaa kʋdii-zɔŋ a pɩmɛ dɩ mɩ dii.”

⁷ Devit tɩŋ ba mʋ ʋ dɩa a bʋla pɩ Tama: “Mʋ ŋ dɩ-baala Amɩnɔŋ dɩa a ŋaa kʋdiilee pʋ.”

⁸ Ŋɩɩ nɛ Tama mʋ ʋ dɩ-baala Amɩnɔŋ dɩa, dɩ ʋ pɩna. Ʋ ŋaa munuŋ buu, a ŋmʋrɛ, a wasɛ boroboro ʋ sɩɩŋ lɛ,

⁹ a joŋ boroboro-la a hɛ gbaŋa lɛ a kaa mʋ pʋ. Ʋ vɩa dɩ ʋ dii, aŋ bʋla pɩ nɩalɩŋ kala sɩ hɛ dɩa-la tʋɔŋ, “Má kala lɩɩ daha.” Ŋɩɩ nɛ ba kala lɩɩ.

¹⁰ Ba sɩ lɩa, Amɩnɔŋ bʋla pɩ Tama, “Kɛŋ kʋdiile-la kʋ jʋʋ mɩ dɩpɩnɩŋ a ŋaa pɩmɛ dɩ mɩ dii.” Tama joŋ kɩalɩŋ jʋʋ ʋ dɩ-baala Amɩnɔŋ dɩpɩnɩŋ a pʋ.

¹¹ Ʋ sɩ kaa jʋʋ pʋ dɩ ʋ dii ŋɩɩ, ʋ guu kɛnʋ aŋ bʋl, “Kɔ la pɩŋ, mɩ dɩ-haala.”

¹² Tama bʋla pʋ, “Mɩ dɩ-baala, sɩ́ ŋɩɩ ŋaa. Sɩ́ mɩ fʋgʋ. Wʋdoho deeŋ bɩ maga dɩ ʋ ŋaa Iziral tinteeŋ lɛ! Sɩ́ wʋbɔmʋŋ deeŋ ŋaa.

¹³ Dɩ ŋ nɛ ŋaa wɩɩŋ deeŋ mɩ lɛ, nɩɩ nɛ mɩ jaŋ kɛŋ hɩɩsɩ-la to mʋ? Ka ŋ-na tɩtɩa? Ŋ jaŋ nagɛ nɩpɛɩ Iziral tinteeŋ lɛ. Mɩɩ sʋlʋŋ, bʋl wɩɩ-la pɩ kuoro, ʋ jaŋ leŋ dɩ mɩ jaaŋ.”

¹⁴ Ama Amɩnɔŋ bɩ jegile nɩɩ wɩɩ-la ʋ sɩ bʋla. Ʋ sɩ kɛŋ doluŋ a kɩɩ tolo-la ŋɩɩ, ʋ gurigu.

¹⁵ Amɩnɔŋ sɩ gurigu dɛrɛ, ʋ tʋɔŋ mɩɩra lɩɩ tolo-la a kɩɩ ʋ fa sɩ chou ŋɩɩ. Ŋɩɩ nɛ Amɩnɔŋ bʋla pʋ, “Sii lɩɩ daha.”

¹⁶ Tolo-la bʋla pʋ, “Aɩ, sɩ́ mɩ kire ta, dɩ ŋ nɛ ŋaa ŋɩɩ, ŋɩɩ nɛ paala ŋaa wʋbɔmʋŋ a kɩɩ wɩɩ-la ŋ sɩ ŋaa mɩ lɛ.” Ama Amɩnɔŋ bɩ jegile nɩɩ ʋ teeŋ,

¹⁷ aŋ yɩrɛ nɩɩ-la sɩ tɩma pʋpʋ tapʋlɩɩ kala, ʋ kʋ jʋʋ ʋ bʋl, “Kiri haala deeŋ ta dɩ ʋ lɩɩ daha, aŋ kɛŋ boro tɔ a kaa yagɛ.”

¹⁸ Ʋ tɩntɩnnʋ-la kiru ta ʋ lɩɩ, aŋ kɛŋ boro tɔ a kaa yagɛ. Dɩ Tama fa laalɛ gɛrɩ-duduoŋ ba sɩ chaasa kpɩɛrɛ. Gɛrɩ-dosunu-la kuoro toloo ha sɩ bɩ balaba jaa fa sɩɩ laalɛ nɛ ŋɩɩ.

¹⁹ Tama ŋaa tʋɔrʋŋ a bʋgɛ ʋ nyuŋ, aŋ kɛŋ gɛrɩ-la ʋ fa sɩ laala a kɩɛsɛ, aŋ paa nɩsaa chʋŋ nyuŋ lɛ aŋ faasa yele viviiri.

²⁰ Ʋ dɩ-baala Abɩsalɔm sɩ naʋ, ʋ pɩɛsʋ, “Bɛɛ kʋŋ nɛ kɛnɩŋ? Ŋ dɩ-baala Amɩnɔŋ kɛnɩŋ pɩŋ ba? Mɩ dɩ-haala, sɩ wɩɩ-la joŋo hɛ ŋ tʋɔŋ lɛ, Amɩnɔŋ ŋaa ŋ naambii nɛ. Sɩ́ wɩɩ-la bʋla pɩ nʋʋkala.” Ŋɩɩ nɛ Tama mʋ hɛ ʋ dɩ-baala Abɩsalɔm dɩa lɛ, a chaasa ŋaa tʋɔ-chee tɩɩna, a jʋjʋʋ ʋ dʋndʋŋa.

²¹ Kuoro Devit sɩ nɩɩ wɩɩŋ deeŋ, ʋ na baanɩŋ woruŋ.

²² Abɩsalɔm faa ŋaa wɩaa Amɩnɔŋ teeŋ a nagɛ ʋ dɩ Amɩnɔŋ bɩ wɩɩkala kɛnɛ, ama aŋ bɛrʋ woruŋ a tɩŋ ʋ sɩ gurigi ʋ dɩ-haala Tama.

Abɩsalɔm kpʋ Amɩnɔŋ

²³ Jɩsɩŋ balɩa sɩ bala, nɩalɩŋ fa sɩɩ kɛ Abɩsalɔm piesee pʋnaa hɛ taŋ-la ba sɩɩ yɩrɛ Baal Hazɔ lɛ a kpagɛ Efirem tinteeŋ, ŋɩɩ nɛ Abɩsalɔm yɩrɛ kuoro biiriŋ kala dɩ ba kɔ lee-la.

²⁴ Abɩsalɔm mʋ kuoro teeŋ a bʋla pʋ, “Nɩalɩŋ sɩɩ kɛ mɩ-na ŋ tɩntɩnna piesee pʋnaa kɔ nɛ. Kuoro, mɩɩ sʋlʋŋ ŋ dɩ ŋ nɩhɩasɩŋ jaŋ wuo kʋ pɛ la lɛɛ?”

²⁵ Kuoro bʋl, “Aɩ mɩ bii, la kala bɩ jaŋ wuo kɔ, la jaŋ ŋaa chʋga a pɩŋ. Abɩsalɔm vɩa aŋ pɛsɛ, ka ʋ ha vɩa dɩ ʋ mʋ, ama aŋ sʋl Wɩa pʋ.”

²⁶ Ŋɩɩ nɛ Abɩsalɔm bʋl, “Dɩ ŋ nɛ bɩ jaŋ wuo kɔ, leŋ dɩ mɩ naambie Amɩnɔŋ kɔ.” Kuoro pɩɛsʋ, “Bɛɛ nɛ tɩɩ ŋ cho dɩ ʋ kɔ?”

²⁷ Ama Abɩsalɔm ha pɛsɛ, ŋɩɩ nɛ kuoro leŋ Amɩnɔŋ arɩ ʋ hambolibii-kaanaa kala mʋ.

²⁸ Abɩsalɔm fa bʋla pɩ ʋ tɩntɩnnaa, “Má jegile nɩɩ mɩ teeŋ: Dɩ Amɩnɔŋ nɛ faasa nyʋa sɩnɩŋ a bugi, dɩ mɩ nɛ bʋla pɩma, arɩ ma ŋmobu lo, má kpʋʋ. Má sɩ́ fawʋllʋŋ fá. Mɩ-na nɛ pɩma wombiiŋ. Má kɛŋ bɔɩ-duoŋ.”

²⁹ Ŋɩɩ nɛ Abɩsalɔm tɩntɩnnaa ŋaa wɩɩ-la Abɩsalɔm sɩ sɩ ba ŋaa Amɩnɔŋ lɛ a kpʋʋ. Kuoro bii-kaanaa sii a jɩl ba kakusuŋ a fá viiri.

³⁰ Ba fa ha hɛ wombiiŋ lɛ nɛ a mʋmʋ Jerusalɛm, ka duoso mʋ yi kuoro Devit: “Abɩsalɔm kpʋ kuoro biiriŋ kala nɛ, kʋbala ma bɩ ka.”

³¹ Kuoro sii a kɛŋ ʋ gɛrɩŋ a kɩɛsɛ a dɩdagɛ tʋɔ-cheeŋ, aŋ pɩŋ tinteeŋ. Ʋ tɩntɩnnaa ma kala sii chɩŋ a kɛŋ ba gɛnnɩŋ kɩɛsɛ.

³² Ama Devit naambie Sɩmɩa nanʋala Jonadab bʋl, “Mɩ nɩhɩaŋ, ŋ biiriŋ kala dee ba kpʋ, Amɩnɔŋ dʋndʋŋa nɛ sʋba. Wɩɩŋ deeŋ fa hɛ Abɩsalɔm tʋɔŋ lɛ nɛ faafaa kala, a chɩŋ tapʋlɩɩ-la Amɩnɔŋ sɩ gurigi ʋ dɩ-haala Tama.

³³ Kuoro mɩ nɩhɩaŋ, sɩ́ leŋe dɩ wɩɩ-la ŋ sɩ nɩa arɩ ŋ biiriŋ sʋba walɩmɩŋ. Amɩnɔŋ dʋndʋŋa nɛ sʋba.”

³⁴ Bʋa-la lɛ dɩ Abɩsalɔm fá lɛl. Nɩɩ-la sɩɩ pɔ leriŋ beŋ a na nɩ-daŋ dɩ ba to dundolo sɛmɛ a kʋʋ tuu wombii-la sɩɩ mʋ Horonem. Nɩɩ-la sɩɩ pɔ leriŋ mʋ bʋla pɩ kuoro, “Mɩ na nɩaa dɩ ba joŋ wombii-la sɩɩ mʋ Horonem a lɩɩ dundolo sɛmɛ a kʋkɔ.”

³⁵ Jonadab bʋla pɩ kuoro, “Bee na, ŋ biiriŋ nɩɩ kɔ, arɩ ŋɩɩ mɩ sɩ bʋla pɩŋ.”

³⁶ Ʋ yie bʋla dɩdɛrɛ dɩ kuoro biiriŋ kʋ jʋʋ a ŋmuŋmoo niiŋ. Kuoro arɩ ʋ tɩntɩnnaa ma yiyel, ba chaasa yel woruŋ.

³⁷ Abɩsalɔm fá mʋ Gesu kuoro ba sɩɩ yɩrɛ Talɩmaɩ sɩ ŋaa Amihud nanʋala teeŋ. Ka kuoro Devit yiyel ʋ bie lɛ tapʋlɩɩ kala.

³⁸ Abɩsalɔm sɩ fá mʋ Gesu tinteeŋ, ʋ hɛ nɩmɛ jɩsɩŋ batori nɛ.

³⁹ Devit tʋɔŋ sɩ fɩɛla Amɩnɔŋ wɩaa, ʋ bɩra cho dɩ ʋ na Abɩsalɔm ma.