2 SAMƲƐL 12 - WƖA TENIŊ

Netaŋ bʋl Devit teeŋ

¹ La TƖƖNA tɩŋ ʋ wʋlaabʋlla Netaŋ ʋ kɔ Devit teeŋ. Ʋ sɩ kɔ, ʋ bʋla pʋ, “Baalaa balɩa nɛ fa hɛ taŋ kʋbala lɛ. Dɔŋɔ ŋaa kɩaa tɩɩna, ka dɔŋɔ ma ŋaa summu.

² Kɩaa tɩɩna-la fa kɛŋ piesee arɩ nɛsɩŋ nɛ woruŋ.

³ Ama summu-la bɩ kʋŋkala kɛnɛ, pie-kee-bie dʋndʋŋ nɛ ʋ yɔɔ a dɩɛsɛ. Piesu-la arɩ baal-la biiriŋ kala waa hɛ dɔŋɔ ʋ dɩa lɛ. Pie-kee-bie-la pɛ dii kɩalɩŋ baal-la sɩɩ dii, a pɛ nyʋa lɩɩ-la baal-la sɩɩ nyʋa. Ʋ yie kɛŋ piesu-la bil ʋ naasɩŋ lɛ ʋ pɩŋ doŋ. Baal-la fa kɛŋ piesu-la a nagɛ ʋ tolo nɛ.

⁴ Tapʋlɩɩ kʋbala, nʋhʋɔrʋ sii kɔ kɩaa tɩɩna-la teeŋ. Kɩaa tɩɩna-la vɩa dɩ ʋ kɛŋ ʋ tɩtɩa piesee koo nɛsɩ-la dɔŋɔ kpʋ a ŋaa kʋdiilee a pɩ nʋhʋɔrʋ-la sɩ kɔ ʋ teeŋ, aŋ mɩɩra sii kɛŋ summu-la pie-kee-bie-la a kpʋ a ŋaa kʋdiilee pɩ nʋhʋɔrʋ-la.”

⁵ Devit sɩ nɩɩ wɩɩŋ deeŋ, ʋ baanɩŋ chaasa sii kɩaa tɩɩna-la nyuŋ. Ʋ bʋla pɩ Netaŋ, “Mɩ ŋmɩɛsɛ La TƖƖNA sɩ weye, baal-la sɩ ŋaa wɩɩŋ deeŋ maga ʋ sʋʋ nɛ!

⁶ Ʋ maga dɩ ʋ tiŋ pie-kee-bie-la chɩmɩŋ naasɩŋ bʋnɛsɛ nɛ, bɛɛ wɩaa ʋ bɩ summu-la nenige fá aŋ ŋaa wɩɩŋ deeŋ.”

⁷ Ŋɩɩ nɛ Netaŋ bʋla pɩ Devit, “Ŋ nɛ ŋaa baal-la sɩ ŋaa wɩɩ-la. Wɩɩ-la La TƖƖNA Iziral tɩŋŋaa Wɩa sɩ bʋla nɛ ŋ-la: ‘Mɩ nɛ lɩɩsɩŋ ŋ ŋaa kuoro Iziral tinteeŋ lɛ a laaŋ ta Sɔɔl nɩsɩŋ lɛ.

⁸ Mɩ joŋ ŋ nɩhɩaŋ dɩa arɩ ʋ haalaa kala a hɛ ŋ nɩsɩŋ lɛ nɛ. Mɩ joŋ Iziral arɩ Juda tinteeŋ ma kala a pɩŋ nɛ. Dɩ kɩaa deemba kala nɛ fa bɩ yʋgɛ, mɩ fa ha jaŋ pɩŋ kɩaa a kɩɩ ŋɩɩ.

⁹ Bɛɛ nɛ tɩɩ ŋ vɩa mɩ-na ŋ Tɩɩna niiŋ aŋ ŋaa wʋbɔmʋŋ deeŋ? Ŋ leŋe Amɔŋ tɩŋŋaa kpʋ Yuria nɛ laalɩŋ lɛ, ka ŋ laa ʋ haala jaa.

¹⁰ Ŋɩɩ wɩaa ŋ dɩ ŋ doho nɩaa bɩ jaŋ kɔ dɩ ma wiese laalɩŋ lɛ, a tɩŋ ŋ sɩ vɩa mɩ niiŋ, aŋ laa Yuria, Hiti tɩɩna-la haala a jaa.’

¹¹ Wɩɩ-la mɩ-na ma TƖƖNA sɩ bʋla nɛ ŋ-la: ‘Mɩ jaŋ ŋaa dɩ ŋ tɩtɩa dɩa nʋʋ leŋ dɩ wʋlɔrʋŋ jʋʋŋ woruŋ. Ŋ sɩɩŋ lɛ, mɩ jaŋ joŋ ŋ haalaa a pɩ nʋʋ dɔŋ. Ʋ jaŋ kɛmba pɩŋ pʋlʋmʋŋ lɛ.

¹² Ŋ-na lʋara nɛ a ŋaa wʋbɔmʋŋ deeŋ, ama mɩ-na jaŋ leŋ dɩ wɩɩŋ deeŋ ŋaa pʋlʋmʋŋ lɛ, dɩ Iziral tɩŋŋaa kala na.’ ”

¹³ Ŋɩɩ nɛ Devit bʋla pɩ Netaŋ, “Mɩ ŋaa wʋbɔŋ nɛ La TƖƖNA lɛ.” Netaŋ bʋl, “La TƖƖNA joŋ ŋ wʋbɔŋ-la chɛŋ nɛ. Ŋ bɩ jaŋ sʋʋ.

¹⁴ Ama a tɩŋ ŋ sɩ ŋaa wɩɩŋ deeŋ, ŋ leŋe La TƖƖNA dʋndɔŋŋɔɔ tʋʋsɛ ʋ joŋŋoo nɛ. Ŋɩɩ wɩaa, bile haal-la sɩ lʋla pɩŋ jaŋ sʋʋ.”

¹⁵ Netaŋ sɩ mɩɩra mʋ dɩa, La TƖƖNA leŋ bile Yuria haal-la sɩ lʋla pɩ Devit wʋwɩɩlɛ.

¹⁶ Devit sʋl Wɩa dɩ ʋ leŋ dɩ bile duori. Ʋ yie vɩa kʋdiilee aŋ jʋʋ pɩŋ ʋ dɩa tinteeŋ tɩtaŋ na-kala.

¹⁷ Ʋ dɩa nɩhɩasɩŋ yie kʋ chɩŋ ʋ sɛmɛ a nɩnɛrɩgɛ dɩ ʋ sii tintee-la lɛ, ʋ vɩa, aŋ pɔ ʋ bɩ sie ba didii kɩaa.

¹⁸ Bile sɩ wɩɩla ʋ tapʋlaa balɩpɛ chɛɛŋ, ʋ sʋʋ. Fawʋllʋŋ kɛŋ Devit tɩntɩnnaa arɩ ba sɩ jaŋ bʋl bile sʋʋŋ wɩaa pʋ, bɛɛ wɩaa ba sɩ, “Bile fa sɩ paala hɛ ʋ mɩɩsɩŋ lɛ, la bʋl wɩaa a pɩ Devit nɛ, ka ʋ bɩ la teeŋ jegile. Ɛɛ nɛ saa la jaŋ wuo ŋaa a bʋl bile sʋʋŋ wɩaa a pʋ? Dɩ la nɛ ŋaa ŋɩɩ, ʋ jaŋ wuo ŋaa ʋ tɩtɩa wʋbɔŋ.”

¹⁹ Devit sɩ na dɩ ʋ tɩntɩnnaa munso bʋbʋl wɩaa dɔŋɔ ba teeŋ, ʋ jɩŋ arɩ bile sʋba nɛ. Ʋ pɩɛsɛ, “Bile sʋba nɛɛ?” Ba bʋl, “Oo, ʋ sʋba nɛ.”

²⁰ Ŋɩɩ nɛ Devit sii tinteeŋ, a fo lɩɩŋ, a tɩsɛ nʋʋŋ, aŋ paa gɛrɩ-wogusuŋ a laalɛ, a mʋ jʋʋ La TƖƖNA dɩa a dɛnnʋ. Ŋɩɩ harɩŋ ʋ mʋ dɩa, a leŋ ba ŋaa kʋdiilee pʋ, ʋ dii.

²¹ Ʋ tɩntɩnnaa pɩɛsʋ, “Bɛɛ kʋŋ wɩɩ nɛ ŋ ŋaa ŋ-la? Bile fa sɩ weye, ŋ vɩa kʋdiilee nɛ aŋ yiyel, ama bile sɩ sʋba, ŋ sie nɛ a dii kɩaa.”

²² Devit bʋl, “Bile fa sɩ weye, mɩ vɩa kʋdiilee nɛ aŋ yiyel, bɛɛ wɩaa mɩ fa bɩɩna La TƖƖNA jaŋ fá mɩ nenige a leŋ dɩ bile kɛŋ mɩɩsɩŋ.

²³ Ama ʋ sʋba nɛ lɛɛlɛ, bɛɛ nɛ tɩɩ mɩ jaŋ vɩa kʋdiilee? Mɩ bɩra jaŋ wuo ŋaa dɩ ʋ sii? Mɩ-na nɛ tapʋlɩɩ dɔŋɔ jaŋ mʋ ʋ teeŋ, ama ʋ-na bɩra bɩ jaŋ kɔ mɩ teeŋ.”

²⁴ Ŋɩɩ nɛ Devit nyagɛ ʋ haala Bɛfɩsɛba bɔyɛ. Ba pɛ bɔsɔ ʋ kɛŋ luoruŋ. Ʋ lʋl hambolibie, ba hɛ ʋ yɩrɩŋ Solomoŋ. La TƖƖNA fa cho bile nɛ woruŋ.

²⁵ A tɩŋ La TƖƖNA fa sɩ cho bile wɩaa, ʋ tɩŋ ʋ wʋlaabʋlla Netaŋ dɩ ʋ hɛ bile yɩrɩŋ Jɛdɩdɩa. (Yɩrɩ-la bʋbʋɔŋ nɛ, La TƖƖNA chou nɛ.)

²⁶ Bʋa-la lɛ dɩ Jʋab ha hɛ Amɔŋ tɩŋŋaa tinteeŋ a yuyuo tabal-la ba sɩɩ yɩrɛ Raba, a yuo dii ʋ dɩ-duoŋ.

²⁷ Jʋab tɩŋ nɩaa ba mʋ bʋla pɩ Devit, “Mɩ yuo laa Raba lɩɩŋ leriŋ kala nɛ.

²⁸ Yɩrɛ laalɩyuoro-la kʋkaanaa hɛ dɔŋɔ, a kʋ golli tabal-la chu a yuo diiu dɩ ʋ ŋaa ŋ kʋŋ. Dɩ ŋɩɩ dee, ka mɩ yuo diiu, nɩaa jaŋ bʋl mɩ nɛ yuo diiu.”

²⁹ Ŋɩɩ nɛ Devit yɩrɛ laalɩyuori-kaana-la kala hɛ dɔŋɔ a mʋ yuo dii Raba.

³⁰ Ŋɩɩ harɩŋ Devit tɩtɩa mʋ Raba a suri ba kuoru nyunchuulo. Sɛlɩmɛ-la ba sɩ kaa ŋaa nyunchuulo-la yuŋuŋ fa ŋaa kilo mara arɩ fii nɛ. Tabɩɩ-tʋlaa nɛ ba kaa kpɩɛrʋ. Devit chaarɛ tabɩa-la a kpɩɛrɛ ʋ kuoru nyunchuulo a joŋo chu. Devit paa kʋ-dandaŋ nɛ tabal-la lɛ,

³¹ aŋ kɛsɛ nɩalɩŋ fa sɩ hɛ nɩmɛ kʋ lɩɩ a fʋgɛba hɛ ba tɩtɩŋ. Ba kɛŋ sɔɔba, pɩŋgaasɩba arɩ piri-saasɩŋ a kaa tɩtɩŋ, aŋ fʋgɛba hɛ ba ŋɩŋaa tiebiee ma. Ŋɩɩ tɩtɩa nɛ Devit ŋaa Amɔŋ tɩŋŋaa tasɩ-la dɔnsʋŋ ma kala lɛ. Ŋɩɩ nɛ Devit arɩ ʋ laalɩyuoroo kala mɩɩra mʋ Jerusalɛm.