2 SAMƲƐL 11 - WƖA TENIŊ

Devit arɩ Bafɩsɛba

¹ Tafaaŋ, bʋa-la lɛ kuoroo sɩ yie mʋmʋ laalɩŋ, ŋɩɩ nɛ Devit ta Jʋab arɩ ʋ laalɩyuori-hɩasɩŋ arɩ Iziral laalɩyuoroo kala ba mʋ laalɩŋ. Ba mʋ yuo dii Amɔŋ tɩŋŋaa aŋ tɔ ba tabalɩŋ ba sɩɩ yɩrɛ Raba ma hɛ. Ka Devit-na fa hɛ Jerusalɛm lɛ.

² Dɩdaaŋ kʋbala Devit sii doŋ lɛ a gʋgɔllɛ ʋ kuoru dɩa lusuŋ nyuŋ. Nɩmɛ nɛ ʋ hɛ aŋ na haal kʋbala dɩ ʋʋ fo lɩɩŋ. Haal-la fa zɔmɔ nɛ woruŋ.

³ Devit tɩŋ nʋʋ dɩ ʋ mʋ bee na kʋbɛɛ nɛ. Nɩɩ-la mʋ aŋ kʋ bʋl, “Bafɩsɛba nɛ, Ɛlɩam tolo, Hiti tɩɩna-la ba sɩɩ yɩrɛ Yuria, ʋ haala nɛ.”

⁴ Ŋɩɩ nɛ Devit tɩŋ ba mʋ kɛnʋ kɔ. Ʋ sɩ kɔ, ʋ kɛnʋ pɩŋ. (Bʋa-la lɛ dɩ ʋ yie chɛsɛ ʋ tɩtɩa ta dɛrɛ, a tɩŋ ʋ sɩ hɛ tɩŋa.) Ŋɩɩ nɛ ka ʋ mɩɩra mʋ dɩa.

⁵ Ʋ ŋɩɩ harɩŋ, Bafɩsɛba na dɩ ʋ kɛŋ luoruŋ. Ʋ tɩŋ ba mʋ bʋla pɩ Devit, “Mɩ kɛŋ luoruŋ nɛ.”

⁶ Ŋɩɩ nɛ Devit tɩŋ ba mʋ bʋla pɩ Jʋab laalɩŋ lɛ: “Leŋ dɩ Yuria, Hiti tɩɩna-la kɔ.” Jʋab ta Yuria ʋ kɔ Devit teeŋ.

⁷ Yuria sɩ kɔ, Devit pɩɛsʋ Jʋab arɩ laalɩyuoro-la wɩaa arɩ ŋɩɩ laalɩŋ sɩɩ vɛŋ.

⁸ Ŋɩɩ nɛ Devit bʋla pɩ Yuria, “Mʋ dɩa a fo lɩɩŋ.” Yuria sɩ lɩɩ kuoro dɩa lɛ, Devit joŋ kɩaa pa dɩ ba kaa mʋ pʋ.

⁹ Ama Yuria fa bɩ ʋ dɩa mʋa. Ʋ mɩɩra lɩɩ pɩŋ kuoro tɩntɩnnaa teeŋ nɛ boiŋ nii-la ba sɩ to a jʋjʋʋ kuoro dɩa.

¹⁰ Ba sɩ bʋla pɩ Devit arɩ Yuria bɩ dɩa mʋa, ŋɩɩ nɛ Devit yɩrʋ a pɩɛsʋ, “Dɩ-bolii dee ŋ lɩɩ kɔɔ? Bɛɛ nɛ tɩɩ ŋ bɩ dɩa mʋa?”

¹¹ Yuria bʋla pɩ Devit, “Wɩa niiriŋ daga arɩ Iziral tɩŋŋaa arɩ Juda tɩŋŋaa laalɩyuoroo kala hɛ laal-baga lɛ nɛ, mɩ nɩhɩaŋ Jʋab arɩ ʋ nɩaa ma hɛ pɔkɔŋ nyuŋ. Ɛɛ nɛ saa mɩ-na jaŋ wuo mʋ dɩa a dii kɩaa ka mɩ dɩ mɩ haala pɩŋ? Ŋ sɩ hɛ ŋ mɩɩsɩŋ deeŋ lɛ, mɩ bɩ jaŋ kɔ dɩ mɩ ŋaa wʋdoho deeŋ.”

¹² Ŋɩɩ nɛ Devit bʋla pʋ, “Pɩŋ daha jɩnɩŋ bɩra, chie mɩ jaŋ leŋ dɩ ŋ mɩɩra mʋ.” Tapʋlɩɩ-la Yuria chʋa Jerusalɛm lɛ taŋ pʋl ʋ ha bɩra chʋa.

¹³ Devit yɩrʋ, ʋ mʋ ba dii kɩaa aŋ nyʋa. Devit leŋ ʋ nyʋa kɩaa a kala bugi. Dɩdaaŋ-la Yuria bɩra bɩ dɩa mʋa, aŋ lɩɩ pɩŋ ʋ bɔsɔ lɛ ʋ nɩhɩaŋ tɩntɩnnaa teeŋ.

¹⁴ Ba sɩ sii chʋchʋɔ-fɩɛla Devit ŋmʋnsɛ teniŋ a pɩ Yuria dɩ ʋ kaa mʋ pɩ Jʋab.

¹⁵ Teŋ-la lɛ ʋ sɩ, “Jʋab, joŋ Yuria a hɛ laalɩŋ sɩpaaŋ, lee-la sɩ lɩma, aŋ bʋla pɩ laalɩyuoro-la kala dɩ ma nʋga lɩɩ harɩŋ, ka dɩ ba kpʋʋ.”

¹⁶ Jʋab arɩ ʋ nɩaa sɩ gollo dɩ ba yuo taŋ-la, ʋ beŋ a na ʋ dʋndɔŋŋɔɔ laalɩyuori-duoruŋ sɩ hɛ lee-la, a joŋ Yuria hɛ nɩmɛ.

¹⁷ Taŋ-la nɩaa sɩ kʋ lɩɩ a yuo Jʋab arɩ ʋ nɩaa, ba kpʋ kuoro Devit laalɩyuoroo dɔnsʋŋ, Yuria Hiti tɩɩna-la nɛ dɔŋɔ.

¹⁸ Jʋab tɩŋ dɩ ba mʋ bʋl wɩalɩŋ kala sɩ ŋaa laalɩŋ lɛ a pɩ Devit.

¹⁹ Wɩaa deemba nɛ ʋ pɛ bʋla pɩ nɩɩ-la ʋ sɩ tɩma: “Dɩ ŋ nɛ mʋ bʋl wɩalɩŋ kala sɩ ŋaa a pɩ kuoro,

²⁰ ʋ baanɩŋ jaŋ wuo sii dɩ ʋ pɩɛsɩŋ, ‘Bɛɛ nɛ tɩɩ ma faasa mʋ kpagɛ taŋ-la dɩ ma yuoba? Ma bɩ jɩŋ arɩ ba jaŋ to jebiiŋ nyuŋ a yuoma arɩ to-hɛŋŋɛɛ?

²¹ Ma bɩ liise ŋɩɩ ba sɩ kpʋ Jerub-Bɛsɛf nanʋala Abɩmɛlɛk? Haala nɛ joŋ nɔŋ-biiŋ to kɛrɛ a yagʋ kpʋ Tɛbɛs lɛ. Bɛɛ nɛ tɩɩ ma faasa mʋ kpagɛ taŋ-la kɛrɛ?’ Dɩ ʋ nɛ pɩɛsɩŋ wɩaa deemba, bʋla pʋ, ‘Ŋ tɩntɩnna Yuria, Hiti tɩɩna-la ma sʋba nɛ.’ ”

²² Ŋɩɩ nɛ tɩndaarʋ-la mʋ Devit teeŋ a bʋl wɩalɩŋ kala Jʋab sɩ bʋla a pʋ.

²³ Tɩndaarʋ-la bɩra bʋla pɩ Devit, “La dʋndɔmɔ-la fa wuola nɛ, a kirila a jɩl pɔkɔŋ nyuŋ, la ma bɩra kiriba ŋɩɩ a kaa mʋ hɛ ba jaŋ boiŋ niiŋ.

²⁴ Ŋɩɩ nɛ dʋndɔmɔ-la to kɛrɛ a yuo ŋ tɩntɩnnaa arɩ to-hɛŋŋɛɛ a kpʋ ŋ laalɩyuoroo dɔnsʋŋ. Ŋ tɩntɩnna Yuria Hiti tɩɩna-la ma sʋba nɛ.”

²⁵ Devit bʋla pɩ tɩndaarʋ-la, “Bʋla pɩ Jʋab dɩ ʋ sɩ́ leŋe dɩ ʋ tʋɔŋ chei wɩɩ-la sɩ ŋaa lɛ, ŋ bɩ jaŋ wuo jɩŋ nɩɩ-la ba sɩ jaŋ kpʋ laalɩŋ lɛ. Bʋla pʋ ʋ hɛ doluŋ a yuo taŋ-la, a cheyu. Bʋl ŋ-la pɩ Jʋab dɩ ʋ nyuŋ nyaasɛ.”

²⁶ Yuria haala Bɛfɩsɛba sɩ nɩa dɩ ʋ bala sʋba, ʋ yel ʋ lɛ.

²⁷ Ʋ sɩ yel ʋ bala lɛ a dɛrɛ, kuoro Devit tɩŋ ba mʋ kɛnʋ kɔ ʋ dɩa, ʋ ŋaa ʋ haal a lʋl hambolibie a pʋ. Ama La TƖƖNA tʋɔŋ fa bɩ wɩɩ-la Devit sɩ ŋaa lɛ tɔrɔ.