2 SAMƲƐL 10 - WƖA TENIŊ

Devit yuo dii Amɔŋ tɩŋŋaa

¹ Bʋa kʋbala lɛ, Amɔŋ tɩŋŋaa kuoro Nahas sʋʋ, aŋ ka ʋ nanʋala Hanuŋ dii kuoruŋ ʋ nyuŋ lɛ.

² Devit bɩɩnɛ ʋ tʋɔŋ lɛ a bʋl, “Nahas fa dagɛ ʋ chonuŋ kɩŋkɛŋ mɩ lɛ, mɩ ma jaŋ dagɛ mɩ chonuŋ ʋ nanʋala lɛ.” Ŋɩɩ nɛ Devit sii a tɩŋ nɩaa dɩ ba mʋ lɔllɛ Hanuŋ a mʋ tɩgɛ ʋ nyɩmma sʋʋŋ lɛ. Devit nɩalɩŋ sɩ mʋ Amɔŋ tɩŋŋaa tinteeŋ,

³ Amɔŋ tɩŋŋaa nɩhɩasɩŋ pɩɛsɛ ba kuoro Hanuŋ, “Ŋ laa dii arɩ ŋ nyɩmma zile wɩaa nɛ tɩɩ Devit sɛnɛ tɩŋ nɩaa deemba dɩ ba kʋ lɔllʋŋ a tɩŋ ʋ sɩ sʋba wɩaa? Ka Devit bɩ ba tɩma dɩ ba kʋ lʋara beŋ la jaŋ a na ŋɩɩ ba sɩ jaŋ to a yuo diiu nɛɛ?”

⁴ Ŋɩɩ nɛ Hanuŋ kɛsɛ nɩalɩŋ Devit sɩ tɩma, a fʋŋ ba kʋŋkala tɔŋŋɔɔ sɛŋ-kɩa sɛŋ-kɩa, aŋ keri ba gɛnnɩŋ ta, a chɩna magɛ ba bʋbʋɔ-kelee lɛ a kaa tuu, aŋ kiriba ta ba viiri.

⁵ Hɩɩsɩŋ chaasa kɛŋ nɩalɩŋ arɩ ba sɩ jaŋ nagɛ ŋɩɩ mʋ dɩa. Devit sɩ nɩɩ wɩɩ-la, ʋ tɩŋ nɩaa ba mʋ chemba a bʋla pɩba, “Kuoro sɩ, má hɔŋ Jeriko lɛ dɩ ma tɔŋŋɔɔ waa, ka dɩ ma-na kɔ dɩa.”

⁶ Amɔŋ tɩŋŋaa sɩ kʋ jɩŋ arɩ ba chaasa dii Devit baanɩŋ lɛ nɛ, ba sii mʋ chɛ Siiria tɩŋŋaa laalɩyuoro-la sɩɩ vɛŋ naasɩŋ lɛ bʋɩ mara a timba ka dɩ ba kʋ yuo laalɩŋ pɩba. Ba lɩɩ tasɩŋ deemba nɛ: Bɛf Rehob arɩ Zoba, a pɛ Maaka kuoro laalɩyuoroo bʋɩ lɛ, arɩ taŋ-la ba sɩɩ yɩrɛ Tob ma laalɩyuoroo bʋɩ fii arɩ balɩa.

⁷ Devit sɩ nɩɩ wɩɩŋ deeŋ, ʋ leŋ Jʋab kɛŋ ʋ laalɩyuoroo kala mʋ dɩ ba yuoba.

⁸ Ŋɩɩ nɛ Amɔŋ tɩŋŋaa laalɩyuoroo kʋ lɩɩ a chɩŋ ba tabalɩŋ boi-baalɩŋ lɛ, ka Siiria tɩmma-la sɩ lɩɩ tasɩ-la ba sɩɩ yɩrɛ Zoba arɩ Rehob arɩ nɩalɩŋ sɩ lɩɩ Tob arɩ Maaka, ba-na kiele lɩɩ a hɛ pɔkɔŋ nyuŋ.

⁹ Jʋab sɩ na dɩ ba dʋndɔŋŋɔɔ laalɩyuoroo chɩŋ ʋ sɩpaaŋ arɩ ʋ harɩŋ kala dɩ ba yuoba, ŋɩɩ nɛ ʋ tʋɔsɛ nɩalɩŋ sɩ jɩŋ laalɩŋ yuonuŋ woruŋ Iziral tɩŋŋaa laalɩyuoro-la tʋɔŋ dɩ ba yuo Siiria tɩmma-la,

¹⁰ aŋ joŋ laalɩyuori-kaanaa a hɛ ʋ naambie Abɩsaɩ nɩsɩŋ lɛ, dɩ ba ma yuo Amɔŋ tɩmma-la.

¹¹ Jʋab fa bʋla pɩ Abɩsaɩ, “Dɩ Siiria tɩmma-la nɛ kʋ dolie kɩɩmɛ, ʋ maga dɩ ŋ kʋ pɛ mɩ lɛ nɛ, dɩ Amɔŋ tɩmma-la ma nɛ dolie a kɩɩŋ, mɩ ma jaŋ kʋ pɛ ŋ lɛ.

¹² Nyɩrɛ bɔyɛ a kɛŋ bɔɩ-duoŋ dɩ la yuo laa la nɩaa arɩ la Wɩa tasɩŋ. La TƖƖNA jaŋ leŋ dɩ wɩɩ-la sɩ zɔmɔ pʋ chɩŋ.”

¹³ Ŋɩɩ nɛ Jʋab arɩ ʋ laalɩyuoroo mʋ yuo Siiria tɩmma-la, ba fá.

¹⁴ Amɔŋ tɩŋŋaa laalɩyuoroo sɩ na dɩ Siiria tɩmma-la fá, ba ma fá jʋʋ ba taŋ, aŋ leŋ Abɩsaɩ arɩ ʋ laalɩyuoroo. Ŋɩɩ nɛ Jʋab leŋ Amɔŋ tɩmma-la yuonuŋ aŋ mɩɩra kɔ Jerusalɛm.

¹⁵ Siiria tɩmma-la sɩ na dɩ Iziral tɩŋŋaa yuo diiba, ba bɩra yɩrɛ ba laalɩyuoroo kala kʋ hɛ dɔŋɔ.

¹⁶ Kuoro Hadadɛza tɩma yɩrɛ Siiria tɩmma-la kala sɩ hɛ Yufireti fuo-la wɩɩpɔsʋŋ dɩɩrɩŋ ba kɔ. Ŋɩɩ nɛ Sobak sɩ ŋaa Hadadɛza laalɩyuoroo nɩhɩaŋ kɛmba mʋ taŋ-la ba sɩɩ yɩrɛ Helam.

¹⁷ Ba sɩ bʋl wɩɩŋ deeŋ pɩ Devit, ʋ sii yɩrɛ Iziral laalɩyuoroo kala hɛ dɔŋɔ ba chol Jɔdaŋ fuo-la a mʋ Helam. Nɩmɛ nɛ Siiria tɩmma-la hɛ a kɛŋ ba tɩtɩa hɛ dɔŋɔ dɩ ba yuo Devit arɩ ʋ nɩaa.

¹⁸ Ba sɩ suomi laal-la, Devit arɩ ʋ laalɩyuoroo kiriba ba fá. Ka Devit arɩ ʋ laalɩyuoroo kpʋ Siiria tɩmma-la nɩalɩŋ sɩ kɛŋ laalɩŋ janɩŋ torukoba vɩvɛŋ ba nɩaa zɔɔ-balɩpɛ, laalɩyuoro-la ma sɩɩ vɛŋ naasɩŋ lɛ bʋɩ mahɩŋ balɩa, aŋ kpʋ Sobak ma sɩ ŋaa Siiria tɩŋŋaa laalɩyuoroo nɩhɩaŋ.

¹⁹ Kuoro-la kala fa sɩɩ to Hadadɛza sɩ na dɩ Iziral tɩŋŋaa yuo diiba nɛ, ba leŋ ba dɩ Iziral tɩŋŋaa bʋla hɛ dɔŋɔ lɛ. Ba sɛɩ Devit bibemba. Ŋɩɩ nɛ fawʋllʋŋ kɛŋ Siiria tɩmma-la, ba bɩra bɩ chɛ dɩ ba pɛ Amɔŋ tɩŋŋaa lɛ.