Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 Kɔrɩntɩ Nɩaa 7 - WƖA TENIŊ

1 Mɩ naambii-kpɩanaba, Wɩa sɩ folo bʋl dɩ ʋ jaŋ ŋaa wɩaa deemba kala pɩla, má leŋ dɩ la lɩɩsɛ la tɩtɩa disiŋ-na kala lɛ. Dɩ la nɛ bɩ disiŋ kala ŋaa, ŋɩɩ jaŋ dagɛ arɩ wʋtɩtɩɩ, la sɛnɛ ka fá Wɩa nɛ.


Wɩalɩŋ sɩ ŋaa Pɔɔl tʋɔŋ tɔrɛ

2 Má chaasa pʋllɛ ma tʋɔŋ pɩla. La bɩ wɩɩ ŋaa cheima, la bɩ ma nyuŋ ma cheye, la bɩra bɩ ma gʋra maa.

3 Mɩ sɩ bʋl wɩɩŋ deeŋ, ʋ bɩ naga arɩ mɩ sɩ dɩ ma cheye nɛ, bɛɛ wɩaa mɩ laa sɩpaaŋ bʋla pɩma arɩ la choma nɛ. Ŋɩɩ wɩaa, dɩ mɩɩsɩŋ nɛ, la kala jaŋ kɛnʋ, dɩ sʋʋŋ ma nɛ, la kala jaŋ sʋʋ.

4 Mɩ laama dii nɛ woruŋ. A tɩŋ ma wɩaa nɛ tɩɩ mɩ bibigisi mɩ tɩtɩa lɛ, mɩ nyuŋ kala nyaasɛ. Wɩaa jʋʋla nɛ, ama mɩ tʋɔŋ ha faasa tɔrɛ nɛ.

5 La sɩ paala kʋ jʋʋ Masidoonia tinteeŋ, la bɩ wiesee na. Wɩaa jʋʋla nɛ. Nɩaa kɛnla yuo yuosuŋ, fawʋllʋŋ jʋʋla.

6 Ŋɩɩ nɛ la naambie kʋbala baa yɩrɛ Taatɩs kɔ la teeŋ. Ʋ sɩ kɔ ŋɩɩ, la tʋɔŋ tɔrɛ nɛ woruŋ. Wɩa nɛ pɩla tʋɔtɔrʋŋ deeŋ. Ʋ nɛ yie ŋaa nɩalɩŋ tʋɔŋ sɩ cheye na tʋɔtɔrʋŋ.

7 Ʋ sɩ kɔ ŋɩɩ dʋndʋŋa dee bɩ leŋe la tʋɔŋ tɔrɛ. Ʋ bʋla pɩla arɩ ma kɛnʋ woruŋ nɛ ʋ ma tʋɔŋ tɔrɛ. Ʋ bɩra bʋla pɩla arɩ ma cho dɩ ma namɛ nɛ, a bɩra bʋla pɩla arɩ wɩɩ-la mɩ sɩ bʋla pɩma ŋaa ma tʋɔŋ faasa chei nɛ, a bɩra bʋla pɩla arɩ ma cho mɩ wɩaa nɛ. Wɩaa deemba leŋe mɩ tʋɔtɔrʋŋ wasa yʋgɛ nɛ.

8 Teŋ-la mɩ sɩ ŋmʋnsa pɩma leŋe ma tʋɔŋ chei nɛ. Dɩ ma tʋɔŋ nɛ cheye ma, mɩ-na tʋɔŋ bɩ cheye. Mɩ tʋɔŋ fa chei mʋa nɛ teŋ-la wɩaa, ama mɩ jɩma arɩ ma tʋɔŋ bɩ jaŋ chei a dieni.

9 Lɛɛlɛ mɩ tʋɔŋ tɔrɔ nɛ, ʋ saa bɩ naga mɩ sɩ leŋe ma tʋɔŋ chei wɩaa nɛ tɩɩ, ama tʋɔ-chei-la sɩ leŋe ma bɩrɩma lɩɩ ma wʋbɔŋŋɔɔ lɛ nɛ tɩɩ. Ma tʋɔ-chei-la ŋaa wɩɩ Wɩa sɩ cho nɛ, ŋɩɩ wɩaa la bɩ wʋbɔŋ kala ŋaa ma kʋŋkala lɛ.

10 Dɩ Wɩa nɛ leŋe nʋʋ tʋɔŋ chei a tɩŋ ʋ wʋbɔŋŋɔɔ wɩaa, ʋ tɩɩna yie bɩrɩma lɩɩ ʋ wʋbɔŋŋɔɔ lɛ nɛ Wɩa laaʋ ta. Nʋʋkala tʋɔŋ bɩ maga dɩ ʋ chei ŋɩɩ lɛ. Ama dɩ dʋnɩa nɩaa wʋŋaalaa nɛ leŋe dɩ nʋʋ tʋɔŋ chei, ŋɩɩ jaŋ leŋ dɩ ʋ tɩɩna sʋʋ.

11 Má bee na wɩalɩŋ sɩ ŋaa ma lɛ a tɩŋ Wɩa sɩ leŋe ma tʋɔŋ chei. Lɛɛlɛ ma fɩɛsɛ sɩɩŋ nɛ a kɛŋ ma tɩtɩa hɛ dɔŋɔ dɩdagɛ arɩ ma bɩ wɩɩ cheye. Ma na baanɩŋ nɛ a tɩŋ wʋbɔmɔ-la ma sɩ ŋaa wɩaa. Fawʋllʋŋ kɛmma. Ma chomi nɛ a fɩɛsɛ sɩɩŋ dɩ ma namɛ. Ma kɛŋ ma tɩtɩa hɛ dɔŋɔ dɩ ma dɔgɩsɛ nɩɩ-la sɩ ŋaa wʋbɔmʋŋ nɛ ma tʋɔŋ. Ma daga arɩ ma bɩ wɩɩkala cheye wɩɩ-la lɛ.

12 Ŋɩɩ wɩaa teŋ-la mɩ sɩ ŋmʋnsa, ʋ bɩ naga arɩ nɩɩ-la sɩ ŋaa wɩaa chei nɛ tɩɩ mɩ ŋmʋnsɛ. Mɩ bɩra bɩ ŋmʋnsa pɩ nɩɩ-la sɩ na hɛɛŋ a tɩŋ ba sɩ ŋaa wɩɩ-la cheyu lɛ. Ama mɩ ŋmʋnsa nɛ dɩ ma dagɛ Wɩa sɩpaaŋ arɩ ma chola nɛ.

13 Wɩaa deemba kala leŋe la tʋɔŋ pɩŋ dɩ-bala nɛ. Taatɩs sɩ kɔ ma teeŋ, ma kala nɛ leŋe ʋ tʋɔŋ tɔrɛ woruŋ. Ʋ tʋɔbɩɩnaa ma pɩŋ dɩ-bala. Ŋɩɩ nɛ leŋe la ma tʋɔŋ tɔrɛ.

14 Mɩ bigisi ma lɛ nɛ ʋ sɩpaaŋ, ma ma bɩ leŋe hɩɩsɩŋ diimi, wɩalɩŋ kala la sɩ bʋla pɩ Taatɩs a tɩgɛ ma lɛ sɩ ŋaa wʋtɩtɩɩba ŋɩɩ. Ŋɩɩ tɩtɩa nɛ wɩalɩŋ kala la sɩ bʋla pɩma sɛnɛ ŋaa wʋtɩtɩɩ.

15 Dɩ Taatɩs nɛ liisi ŋɩɩ ma sɩɩ to Wɩa niiŋ wɩalɩŋ a chagɛ laaʋ a zilu woruŋ, ŋɩɩ ʋ sɩ choma yie pʋŋaa pɛ nɛ.

16 Mɩ tʋɔŋ tɔrɛ nɛ, mɩ sɩ jaŋ wuo laama dii woruŋ.

©Ghana Institute of Linguistics Literacy and Bible Translation 1984, 2014

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ