2 Kɔrɩntɩ Nɩaa 5 - WƖA TENIŊLa jaŋ kɛŋ yarɩ-falaa Wɩa teeŋ 1 La jɩma la yaraa deemba la sɩ kɛnɛ la mɩɩsɩŋ deeŋ lɛ, dɩ la nɛ sʋba a mʋ Wɩa teeŋ, ʋ jaŋ pɩla yarɩ-falaa. Yarɩ-falɩa-la bɩ dʋnɩa deeŋ lɩa. Ba lɩɩ Wɩa teeŋ nɛ. La jaŋ kɛmba a hɛ Wɩa jaŋ lɛ deeŋ deeŋ. 2 La sɩ hɛ la mɩɩsɩŋ deeŋ lɛ, la faasa yel nɛ. La fa cho dɩ la kɛŋ yara-la Wɩa sɩ jaŋ joŋo pɩla nɛ. 3 Dɩ Wɩa nɛ fa joŋ yara-la pɩla, la fa bɩ jaŋ kɛŋ yarɩ-biree. 4 Yara-la la sɩ kɛnɛ la mɩɩsɩŋ deeŋ lɛ bɩ leŋe la tʋɔŋ tɔrɛ. Ʋ bɩ naga arɩ la cho dɩ la sʋba nɛ, ama la cho dɩ la kɛŋ mɩɩsɩŋ Wɩa teeŋ nɛ. Ʋ ŋɩɩ wɩaa, Wɩa jaŋ joŋ yara-la sɩ bɩ jaŋ sʋʋ, a lenni la yaraa deemba sɩ jaŋ sʋʋ. 5 Wɩa nɛ ŋaa Nɩɩ-la sɩ joŋ yarɩ-falaa deemba a pɩla. Ʋ nɛ saa joŋ ʋ Dɩŋ-zɔmʋŋ ma hɛ la lɛ dɩ la wuo jɩŋ arɩ la jaŋ kɛŋ yarɩ-falaa deemba ʋ teeŋ. 6 Ŋɩɩ wɩaa bʋa na-kala lɛ la nyuŋ yie nyaasɛ nɛ. La sɩ kɛŋ yaraa deemba la mɩɩsɩŋ lɛ, la bɩ La Tɩɩna Yesu kpaga. 7 La bɩ Kirisito ka na, ama la laa ʋ wɩaa dii nɛ a tutou. 8 La nyuŋ nyaasa nɛ, la saa cho dɩ la lɩɩ dʋnɩa deeŋ lɛ a mʋ La Tɩɩna Yesu teeŋ. 9 Ŋɩɩ wɩaa, dɩ la nɛ hɛ dʋnɩa deeŋ lɛ, la cho dɩ la ŋaa wɩaa dɩ ʋ tʋɔŋ tʋtɔrɛ nɛ. Dɩ la nɛ mʋ ʋ teeŋ maa, ŋɩɩ tɩtɩa nɛ la jaŋ ŋɩŋaa, 10 bɛɛ wɩaa la kala jaŋ mʋ chɩŋ Kirisito sɩpaaŋ dɩ ʋ dii la sarɩya. Kirisito jaŋ tiŋ nʋʋkala magɛ ŋɩɩ ʋ sɩ tɩma magɛ dʋnɩa deeŋ lɛ. Dɩ ŋ nɛ faa ŋaa wʋzɔŋŋɔɔ, ʋ jaŋ joŋ wʋzɔŋŋɔɔ timiŋ. Dɩ ŋ nɛ faa ŋaa wʋbɔŋŋɔɔ ma, ʋ jaŋ joŋ wʋbɔŋŋɔɔ timiŋ. A tɩŋ Kirisito wɩaa, la dɩ Wɩa dii nandɔnsʋŋ 11 Laa fá Wɩa nɛ, ŋɩɩ nɛ tɩɩ la bʋl ʋ wɩaa pɩpɩ nɩaa, dɩ ba bɩrɩma lɩɩ ba wʋbɔŋŋɔɔ lɛ a kʋ to Wɩa. Wɩa nɛ jɩŋ ŋɩɩ la sɩ naga. Mɩ saa jɩma arɩ ma tʋɔbɩɩnaa lɛ ma jɩŋ ŋɩɩ la sɩ naga nɛ. 12 Ŋɩɩ nɛ tɩɩ la bɩ chɛ dɩ la dagɛ la tɩtɩa ma teeŋ, ama laa chɛ dɩ ma bʋl wʋtɩtɩɩ-la ma sɩ jɩma a mʋ tɩgɛ la lɛ, dɩ ŋɩɩ leŋ dɩ ma wuo bʋl wɩaa pɩ nɩalɩŋ sɩɩ bigisi nɩaa yaraa wʋŋaalaa lɛ aŋ bɩ ŋɩɩ ba tʋɔŋ sɩ nagɛ Wɩa teeŋ chɩla. 13 Ma bɩɩna arɩ laa nyaasɛ nɛ la sɩɩ bʋl wɩalɩŋ? Dɩ la nɩɩ nyaasʋ, Wɩa wɩaa nɛ tɩɩ, ama dɩ la nyuŋ nɩɩ tɩŋ ma, ma wɩaa nɛ tɩɩ. 14 Kirisito chola nɛ, ʋ chono-la nɛ kɛnla kaa tɩtɩŋ. La saa sɛyɛ arɩ nʋʋkala wɩaa nɛ nɩbala sʋʋ, a tɩŋ ŋɩɩ wɩaa ʋ nagɛ nʋʋkala sʋba nɛ. 15 Nʋʋkala wɩaa nɛ tɩɩ Kirisito sʋʋ. Ʋ sɩ sʋba ŋɩɩ, nɩalɩŋ sɩ to ʋ lɛ a kɛŋ mɩɩsɩŋ, ʋ maga dɩ ba ŋɩŋaa wɩalɩŋ sɩɩ tɔrɛ ʋ tʋɔŋ, aŋ sɩ́ ba tɩtɩa tʋɔtɔrɛ wɩaa ŋaa, a tɩŋ ʋ sɩ sʋʋ ba wɩaa aŋ sii sʋʋŋ lɛ. 16 Ŋɩɩ wɩaa, a lɩɩ jɩnɩŋ kaa mʋmʋ la bɩ chɛ la beŋ nɩaa arɩ dʋnɩa nɩaa sɩɩ beŋ nɩaa ŋɩɩ. Bʋa kʋbala lɛ, la faa beŋ Kirisito ŋɩɩ nɛ, ama lɛɛlɛ la bɩra bɩ ʋ beŋ arɩ la fa sɩɩ benu ŋɩɩ. 17 Ŋɩɩ wɩaa dɩ nʋʋkala nɛ laa Kirisito wɩaa dii, Wɩa kɛnʋ bɩrɩmɛ nɩ-falɩɩ nɛ. Wʋbɩnɩa-la kala bálá nɛ. Wʋfalaa nɛ suomi ʋ mɩɩsɩŋ lɛ. 18 Wʋfalaa deemba kala lɩɩ Wɩa teeŋ nɛ. Wɩa to Kirisito lɛ nɛ a leŋ ʋ dɩ nɩaa sɩŋ. Tɩntɩmɩɩ-la Wɩa sɩ joŋo pɩla nɛ ŋ-la: dɩ la mʋ bʋla pɩ nɩaa dɩ ba kɔ, dɩ ba dɩ Wɩa ŋaa sɩma. 19 Wɩa to Kirisito lɛ nɛ a wuo ŋaa ʋ dɩ dʋnɩa nɩaa kala sɩŋ. Wɩa na dʋnɩa nɩaa arɩ ba ŋaa wʋbɔŋŋɔɔ nɛ, ama ʋ fá ba nenige a joŋ ba wʋbɔmɔ-la a chɛba. Wɩa nɛ sɩ la bʋla pɩ nɩaa arɩ la dɩ Wɩa sɩma nɛ lɛɛlɛ. 20 A tɩŋ ŋɩɩ wɩaa Kirisito naasɩŋ lɛ nɛ la chɩŋ a bʋbʋl wɩaa deemba a pɩpɩ nɩaa. Wɩa to la lɛ nɛ a bʋla pɩma dɩ ma kɔ ʋ teeŋ. A tɩŋ Kirisito wɩaa laa sʋlma dɩ ma kɔ, dɩ ma dɩ Wɩa ŋaa sɩma. 21 Kirisito fa bɩ wʋbɔŋ kɛnɛ, ama a tɩŋ la wɩaa, Wɩa leŋe ʋ sʋʋ a nagɛ wʋbɔŋ ŋaarʋ. Wɩa ŋaa ŋɩɩ dɩ la wuo to Kirisito lɛ nɛ a kɛŋ tʋɔpʋla ʋ teeŋ. |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.