2 Kɔrɩntɩ Nɩaa 3 - WƖA TENIŊ

Nii-falɩɩ-la doluŋ wɩaa

¹ Ma bɩɩna wɩalɩŋ la sɩ bʋla, laa dagɛ la tɩtɩa ŋɩɩ la sɩ naga nɛɛ? Nɩaa dɔnsʋŋ cho dɩ ba ŋmʋnsɛ tenniŋ a dagɛ ba sɩ nagɛ ŋɩɩ nɛ dɩ ba kaa kɔ pɩma. Dɔnsʋŋ ma cho dɩ ba laa tenniŋ ma teeŋ a dagɛ ba sɩ nagɛ ŋɩɩ a pɩ nɩaa, ama la-na bɩ chɛ dɩ la ŋɩŋaa ŋɩɩ.

² Ma-na, ma nɛ saa ŋaa teŋ-la la sɩ ŋmʋnsa, dɩ nɩaa karɩmɛ a jɩŋ ŋɩɩ la sɩ naga. La ŋmʋnsa hɛ la tʋɔŋ nɛ.

³ Ma nɛ saa chaasa dagɛ arɩ ma ŋaa teŋ-la Kirisito sɩ leŋe la ŋmʋnsɛ. Teniŋ deeŋ, ʋ bɩ naga kʋ-la nɩaa sɩ kaa ŋmʋnsɛ tenniŋ nɛ. Wɩa sɩ weye joŋ ʋ Dɩŋ-zɔmʋŋ nɛ a kaa ŋmʋnsɛ wɩalɩŋ hɛ ma tʋɔŋ. Ba saa bɩra bɩ ŋmʋnsa hɛ tabɩɩ-taala lɛ, ama ba ŋmʋnsa hɛ nuhuobiinee tʋɔŋ lɛ nɛ.

⁴ La to Kirisito lɛ nɛ a laa Wɩa dii, ŋɩɩ nɛ tɩɩ la kɛŋ nyuduoŋ a bʋbʋl ʋ wɩaa ŋɩɩ.

⁵ Ʋ ŋɩɩ bɩ naga arɩ tɩntɩmɩɩ-la la sɩɩ tɩŋ, la tɩtɩa kɛŋ ʋ doluŋ nɛ. Wɩa nɛ pɩla doluŋ la tɩtɩŋ.

⁶ Wɩa tɩtɩa nɛ pɩla doluŋ la ŋaa nii-faalɩɩ-la ʋ sɩ hɛ pɩ nuhuobiinee tɩntɩnnaa. Nii-la bɩ naga ʋ ŋaa wɩɩ ba sɩ ŋmʋnsa bil a tuto, ama nii-falɩɩ-la doluŋ lɩɩ Wɩa Dɩŋ-zɔmʋŋ wɩalɩŋ nɛ. Wɩalɩŋ Mosis sɩ ŋmʋnsa bil dɩ nɩaa tuto bɩ nɩaa mɩɩsɩŋ wuo pa, ama Wɩa wʋzɔmɔ-la sɩ lɩɩ ʋ Dɩŋ-zɔŋ-la teeŋ nɩɩ pa mɩɩsɩŋ.

⁷ Wɩalɩŋ Mosis sɩ ŋmʋnsa bil dɩ nɩaa tuto, ba ŋmʋnsa hɛ tabɩɩ-taala lɛ nɛ. Wɩalɩŋ fa bɩ nɩaa mɩɩsɩŋ wuo pa. Bʋa-la lɛ Wɩa sɩ jomba pɩpɩ Mosis, ʋ tʋla fa chaana hɛ ʋ lɛ nɛ. Ŋɩɩ nɛ Mosis sɩaa kala tʋtʋl, Iziral tɩŋŋaa bɩ ʋ sɩaa lɛ wuo beŋ. Ama tʋla-la fa jaŋ lɛl,

⁸ ka Wɩa wʋzɔmɔ-la sɩ lɩɩ Wɩa Dɩŋ-zɔmʋŋ lɛ, ba tʋla kɩkɩɩ ŋɩɩ. Ba-na bɩ jaŋ lɛl.

⁹ Dɩ wɩalɩŋ Mosis sɩ ŋmʋnsa bil dɩ nɩaa tuto nɛ joŋ cheeriŋ pɩpɩ nɩaa aŋ ha kɛŋ tʋla, ŋɩɩ-na wɩalɩŋ sɩ leŋe nɩaa kɛŋ tʋɔpʋla Wɩa teeŋ jaŋ paala kɛŋ tʋla a kɩɩ ŋɩɩ.

¹⁰ Ŋɩɩ-na bumbuŋ kʋ-la fa sɩɩ tʋl bɩra bɩ tʋla kɛnɛ. Ʋ tʋla-la lɛlɛ nɛ, bɛɛ wɩaa kʋŋ dɔŋ nɩɩ tʋl lɛɛlɛ a kɩɩʋ.

¹¹ Dɩ kʋ-la fa sɩ bɩ jaŋ dieni nɛ kɔ a tʋtʋl, ŋɩɩ-na kʋ-la sɩ jaŋ hɛ nɩmɛ deeŋ deeŋ nɛ jaŋ tʋla kɩkɩɩʋ.

¹² Laa yɩɛlɛ Wɩa wʋzɔmɔ-la lɛ nɛ. Ŋɩɩ nɛ tɩɩ la chaasa kɛŋ nyuduoŋ aa tɩŋ.

¹³ Ama la bɩ Mosis naga, nɩɩ-la sɩ joŋ kʋa tɔ ʋ sɩaa dɩ Iziral tɩŋŋaa sɩ tʋla-la fa sɩ hɛ ʋ sɩaa lɛ wuo beŋ. Tʋla-la fa ŋaa kʋŋ sɩɩ lɩɩ nɛ.

¹⁴ Ama Iziral tɩŋŋaa tʋɔbɩɩnaa fa tuo Wɩa wombiiŋ lɛ. Ŋɩɩ wɩaa arɩ jɩnɩŋ kala, dɩ ba nɛ karɩmɛ wɩalɩŋ Wɩa fa sɩ joŋo pɩ Mosis bumbuŋ-la dɩ nɩaa tuto, ba bɩ ba bʋbʋɔŋ jɩŋ. Ʋ naga arɩ kʋ-la Mosis fa sɩ joŋo tɔ ʋ sɩaa dɩ Iziral tɩŋŋaa sɩ́ ʋ sɩaa na, kʋ-la ha tɔ ba sɩaa nɛ dɩ ba sɩ́ Wɩa tʋla na. Ama Yesu Kirisito nɛ jaŋ wuo kɛŋ kʋ-la suri, dɩ ba wuo na Wɩa tʋla.

¹⁵ Arɩ jɩnɩŋ kala, dɩ ba nɛ karɩmɛ wɩalɩŋ Wɩa fa sɩ joŋo pɩ Mosis dɩ nɩaa tuto-na kala, ʋ yie nagɛ arɩ kʋŋ nɛ tɔ ba wʋjɩmɩŋ, dɩ ba sɩ́ wɩalɩŋ bʋbʋɔŋ jɩŋ.

¹⁶ Ama dɩ nʋʋ nɛ bɩrɩma a to La Tɩɩna Yesu, Wɩa jaŋ kɛŋ kʋ-la sɩ kɛrɛ ba wʋjɩmɩŋ kaa dʋɔrɛ.

¹⁷ La Tɩɩna Kirisito arɩ Wɩa Dɩŋ-zɔmʋŋ kala ŋaa kʋbala nɛ. Lee-la kala saa La Tɩɩna Kirisito Dɩŋ-zɔmʋŋ sɩ hɛ, ʋ yie laa nɩalɩŋ ta nɛ.

¹⁸ La nɩalɩŋ kala sɩ laa Yesu wɩaa dii, kʋ-la fa sɩ tɔ la sɩaa, Wɩa kaa suri nɛ. Kirisito tʋla jʋʋ la sɩaa nɛ la tʋtʋl arɩ ʋ sɩɩ tʋl ŋɩɩ. Ʋ kɛnla kaa bɩbɩrɩmɛ nɛ dɩ la wasa tʋtʋl, a kʋ nagʋ. La Tɩɩna Dɩŋ-zɔmʋŋ nɛ ŋaa ŋɩɩ la lɛ.