2 Kɔrɩntɩ Nɩaa 2 - WƖA TENIŊ

¹ Ŋ-la wɩaa nɛ tɩɩ mɩ bɩ ma teeŋ kɔ. Dɩ mɩ nɛ fa kɔ, ma tʋɔŋ fa jaŋ chei.

² Dɩ mɩ nɛ ŋaa dɩ ma tʋɔŋ chei, kʋbɛɛ nɛ hɛ nɩmɛ sɩ jaŋ leŋ dɩ mɩ tʋɔŋ tɔrɛ? Nʋʋkala tuo, see nɩalɩŋ tɩtɩa mɩ sɩ ŋaa ba tʋɔŋ chei.

³ Ŋɩɩ wɩaa nɛ tɩɩ mɩ ŋmʋnsɛ teŋ-la pɩma. Mɩ bɩ chɛ dɩ mɩ kɔ ma teeŋ dɩ ma leŋ dɩ mɩ tʋɔŋ chei, ma nɛ sɩ ŋaa nɩalɩŋ sɩ jaŋ ŋaa dɩ mɩ tʋɔŋ tɔrɛ. Mɩ laa dii arɩ mɩ tʋɔŋ nɛ tɔrɔ, ma ma kala tʋɔŋ jaŋ tɔrɛ.

⁴ Bʋa-la lɛ mɩ sɩ ŋmʋnsɛ teŋ-la dɩ mɩ pɩma, mɩ tʋɔŋ faasa chei nɛ woruŋ, mɩ nɩna hɛɛŋ, mɩ yel kɩŋkɛŋ ma wɩaa. Mɩ bɩ teŋ-la ŋmʋnsa dɩ mɩ chei ma tʋɔŋ, ama dɩ mɩ leŋ dɩ ma jɩŋ arɩ mɩ faasa choma nɛ.

Ʋ maga dɩ la joŋo chɛ nɩɩ-la sɩ ŋaa wɩɩ chei

⁵ Dɩ nʋʋ nɛ ŋaa ma tʋɔŋ chei, mɩ dʋndʋŋa lɛ dee wɩɩ-la jʋʋ, ʋ paala jʋʋ ma lɛ a kɩɩmɛ. Dɩ ʋ nɛ paala bɩ ma kala lɛ jʋa ma, ʋ jʋʋ ma dɔnsʋŋ lɛ nɛ. Mɩ bɩ chɛ dɩ mɩ bʋl wɩɩ-la a kieli.

⁶ Nɩɩ-la sɩ ŋaa ŋɩɩ, ma jesiŋ kala dɔgɩsʋ nɛ, ŋɩɩ wɩaa má leŋ wɩɩ-la ta.

⁷ Lɛɛlɛ-na ʋ maga dɩ ma joŋ wɩɩ-la kala chɛʋ, a pɛ ʋ lɛ dɩ ʋ tʋɔŋ tɔrɛ. Dɩ ŋɩɩ dee, ʋ tʋɔŋ jaŋ faasa chei a kieli dɩ ʋ pʋgʋmɛ.

⁸ Ŋɩɩ wɩaa mɩɩ sʋlma dɩ ma wasa kɛnʋ woruŋ a chou.

⁹ Ŋ-la wɩaa nɛ tɩɩ mɩ ŋmʋnsɛ teniŋ pɩma, dɩ mɩ na dɩ ma jaŋ wuo to wɩɩkala mɩ sɩ bʋla pɩma.

¹⁰ Dɩ ma nɛ joŋ wɩɩ chɛ nʋʋ, mɩ ma joŋo chɛʋ nɛ, dɩ mɩ nɛ fa maga dɩ mɩ joŋ wɩɩ chɛ nʋʋ, mɩ joŋo chɛʋ nɛ, a tɩŋ ma wɩaa. Kirisito sɩpaaŋ nɛ mɩ ŋaa ŋɩɩ, bɛɛ wɩaa

¹¹ mɩ bɩ chɛ dɩ Sɩtaanɩ wuola. La jɩŋ ʋ wʋkɛnɩŋ nɛ.

Pɔɔl tʋɔŋ bɩ dɩ-bala pɩna Tʋrɔwas tinteeŋ

¹² Mɩ sɩ kɔ Tʋrɔwas tinteeŋ dɩ mɩ bʋl Kirisito wʋzɔmɔ-la a pɩba, La Tɩɩna suri wombiiŋ pɩmɛ nɛ,

¹³ ama mɩ tʋɔŋ bɩ dɩ-bala pɩna, bɛɛ wɩaa mɩ naambie Taatɩs fa tuo nɩmɛ. Ŋɩɩ nɛ mɩ sii lee-la a mʋ Masidoonia tinteeŋ.

Kirisito doluŋ lɛ la yuo dii Sɩtaanɩ

¹⁴ Ama, mɩ haa lɔllɛ Wɩa nɛ. Bʋa na-kala, ʋ yie to Kirisito lɛ nɛ a pɛ la lɛ la wuo yuo dii Sɩtaanɩ. Ʋ yie pɛ la lɛ la wuo bʋl Kirisito wɩaa lee-na kala. Kirisito wʋzɔmɔ-la nagɛ tʋlaalɩɩ sɩɩ sʋɔrʋ nɛ, a sʋɔra laa leriŋ kala.

¹⁵ La tɩtɩa nagɛ tʋlaalɩɩ-zɔŋ nɛ Kirisito joŋo pɩ Wɩa. Wɩa jonla gaarɛ nɩalɩŋ ʋ sɩ laa ta arɩ nɩalɩŋ sɩ lɛlɛ tʋɔŋ nɛ.

¹⁶ Nɩalɩŋ sɩ lɛlɛ teeŋ, tʋlaalɩɩ-la sʋɔraa kpʋba nɛ. Ama nɩalɩŋ Wɩa sɩɩ laa ta teeŋ, tʋlaalɩɩ-la sʋɔra ka pɩba mɩɩsɩŋ nɛ. Kʋbɛɛ nɛ saa maga dɩ ʋ tɩŋ tɩntɩmɩŋ deeŋ?

¹⁷ Nɩaa yʋga nɛ a gɔllɔ bʋbʋl Wɩa niiŋ wɩaa a lɩlaa moribiee, ama la-na bɩ ŋɩɩ ŋaa. La-na ŋaa nɩtɩtɩɩba nɛ. Wɩa nɛ lɩɩsɛla dɩ la tɩŋ tɩntɩmɩŋ deeŋ. Kirisito doluŋ lɛ nɛ laa bʋl Wɩa wɩaa.