2 Kɔrɩntɩ Nɩaa 13 - WƖA TENIŊ

Pɔɔl bɩra chagɩlɛ Kɔrɩntɩ nɩaa aŋ chʋɔlɛba

¹ Naansɩɩŋ butori nɛ ŋ-la mɩ sɩɩ kɔ ma teeŋ dɩ mɩ nama. Wɩa teniŋ sɩ, “Nɩaa balɩa koo nɩaa batori nɛ jaŋ pɛ na wɩɩ ka dɩ ʋ na chɩŋ.”

² Mɩ sɩ kɔ ma teeŋ lɩamɩŋ lɛ, mɩ kpʋrɩsɛ nɩalɩŋ sɩ ŋaa wʋbɔŋŋɔɔ arɩ nɩalɩŋ dɔnsʋŋ kala dɩgɩlaa nɛ. Lɛɛlɛ mɩ tuo ma teeŋ, ama mɩ bɩra kpʋrɩsɛ ma dɩgɩlaa nɛ arɩ mɩ nɛ kɔ ma teeŋ torimuŋ lɛ, mɩ bɩ jaŋ taba.

³ Maa chɛ dɩ ma jɩŋ arɩ Kirisito hɛ mɩ lɛ nɛ a bʋbʋl wɩaa. Kirisito bɩ puwuol ŋaa, ʋ kɛŋ doluŋ nɛ ma lɛ, a wuoma ma wɩɩkala lɛ.

⁴ Ba kpaasʋ mɛrɛ daagɛsɛ nyuŋ a nagɛ arɩ ʋ fa bɩ doluŋ kɛnɛ. Ama Wɩa doluŋ lɛ ʋ sie nɛ a kɛŋ mɩɩsɩŋ. La hɛ Kirisito lɛ nɛ a bɩ doluŋ kɛnɛ la tɩtɩa lɛ. Kirisito sɩ weye ŋɩɩ a kɛŋ mɩɩsɩŋ Wɩa doluŋ lɛ, ŋɩɩ tɩtɩa nɛ la ma jaŋ kɛŋ mɩɩsɩŋ Wɩa doluŋ lɛ a tɩma pɩma.

⁵ Má beŋ ma tɩtɩa lɛ a pɛ mɩmagɩsɛ ma tɩtɩa, a na dɩ ma chɩŋ ma wɩalɩŋ ma sɩ laa dii naaŋ lɛ nɛ koo ma bɩ chɩna. Ma bɩ jɩŋ arɩ Yesu Kirisito hɛ ma lɛ nɛɛ? Dɩ ma nɛ bɩ jɩŋ dɩ ʋ hɛ ma lɛ, ŋɩɩ-na ma tele nɛ ŋɩɩ.

⁶ Mɩ laa dii arɩ ma jaŋ na dɩ la-na bɩ tele.

⁷ La sʋl Wɩa pɩpɩma dɩ ma sɩ́ wɩɩkala ŋaa chei. Ʋ bɩ naga laa chɛ dɩ la dagɛ arɩ la-na ŋaa woruŋ nɛ, ama laa chɛ dɩ ma wuo ŋɩŋaa wɩalɩŋ sɩɩ to wombiiŋ nɛ, dɩ ma nɛ paala bɩɩnɛ la-na tele ma,

⁸ bɛɛ wɩaa la bɩ jaŋ wuo lɩɩ wʋtɩtɩɩ-la harɩŋ. Ama la chɩŋ wʋtɩtɩɩ-la lɛ nɛ.

⁹ Dɩ la nɛ bɩ doluŋ kɛnɛ ma, la yie jʋjʋɔsɛ nɛ a tɩŋ dol-la ma sɩ kɛnɛ wɩaa. Wɩɩ-la la sɩ sʋl Wɩa chɩchɛ nɛ, dɩ ŋɩɩ ma laa Kirisito wɩaa dii wasa dol.

¹⁰ Lɛɛlɛ mɩ tuo ma teeŋ, ŋɩɩ nɛ tɩɩ mɩ ŋmʋnsɛ teniŋ pɩpɩma. Dɩ mɩ nɛ kɔ ma teeŋ, mɩɩ chɛ dɩ mɩ dagɛ dol-la La Tɩɩna Wɩa sɩ joŋo pɩmɛ ma teeŋ. Ʋ joŋ dol-la pɩmɛ dɩ mɩ kaa pɛ ma lɛ nɛ dɩ ma wasa dol. Ʋ bɩ sɩ dɩ mɩ kaa cheima.

¹¹ Mɩ naambiiriŋ, mɩ teniŋ dɩdɛrɩŋ nɛ ŋ-la. Maa ŋaa wɩalɩŋ sɩ jaŋ leŋ dɩ ma chaasa ŋaa nɩzɔmɔ. Má jegile nɩɩ wɩalɩŋ mɩ sɩɩ chɛ mɩ bʋla pɩma, má kɛŋ nii-bala a ŋaa sɩma. Dɩ ma nɛ ŋaa ŋɩɩ, Wɩa sɩ cho nɩaa jaŋ hɛ ma teeŋ a leŋ dɩ ma hɔŋ arɩ yarɩfɩɛlaa.

¹² Má kɛŋ tʋɔ-bala a guori dɔŋɔ a chʋchʋɔlɛ dɔŋɔ.

¹³ Wɩa nɩaa kala ka chʋɔlɛma.

¹⁴ Laa sʋl La Tɩɩna Yesu Kirisito dɩ ʋ leŋ dɩ ma jʋʋ ʋ lahɔrɩmɔ, dɩ la Nyɩmma Wɩa ma choma, ka dɩ Wɩa Dɩŋ-zɔmʋŋ ma leŋ dɩ ma ŋaa kʋbala. Amɩɩ.