2 Kɔrɩntɩ Nɩaa 12 - WƖA TENIŊ

Pɔɔl na wɩaa arɩ duosoo tʋɔŋ

¹ Ʋ maga mɩ sɩ bigisi mɩ tɩtɩa lɛ, arɩ ŋɩɩ sɩ bɩ jaŋ pɛ mɩ lɛ ma, ama mɩ ha jaŋ bigisi mɩ tɩtɩa lɛ a bʋl wɩalɩŋ Wɩa sɩ leŋe mɩ na a nagɛ duosoo tʋɔŋ, arɩ wɩalɩŋ ʋ sɩ joŋo dagɛmɛ.

² Mɩ jɩŋ baal kʋbala fa sɩ laa Kirisito wɩaa dii. Ʋ jɩsɩŋ fii arɩ banɛsɛ nɛ ŋ-la Wɩa sɩ guu joŋu kaa jɩl ʋ jaŋ dɩ-bolii-la, a dagʋ wɩaa yʋgɛ, aŋ mɩɩra kɛnʋ kaa kʋ tuu ta. Dɩ Wɩa joŋ ʋ dɩma nɛ koo ʋ yaraa kala nɛ, mɩ bɩ jɩŋ. Wɩa nɛ jɩma.

³ Mɩ jɩma arɩ baala deeŋ Wɩa guu joŋu kaa jɩl Wɩa-jaŋ nɛ. Dɩ Wɩa joŋ ʋ dɩma nɛ koo ʋ yaraa kala nɛ, mɩ bɩ jɩŋ. Wɩa nɛ jɩma.

⁴ Wɩalɩŋ ʋ sɩ nɩa, nuhuobiinee paala bɩ jaŋ wuo bʋlba. Ʋ bɩ maga dɩ ba bʋlba ma.

⁵ Mɩ jaŋ bigisi baala deeŋ lɛ, mɩ-na bɩ mɩ tɩtɩa lɛ wuo bigisi. Ama dɩ mɩ nɩɩ bigisi mɩ tɩtɩa ma lɛ, mɩ jaŋ bigisi mɩ tɩtɩa lɛ a mʋ tɩgɛ kɩalɩŋ sɩ daga arɩ mɩ bɩ doluŋ kɛnɛ lɛ.

⁶ Dɩ mɩ nɩɩ chɛ dɩ mɩ bigisi mɩ tɩtɩa lɛ ma, mɩ bɩ jaŋ bʋl nɩyaarɛ wɩaa. Mɩ jaŋ bʋl wʋtɩtɩɩba. Ama mɩ bɩ jaŋ bigisi mɩ tɩtɩa lɛ, dɩ nʋʋkala sɩ́ wuo na wombiiŋ a bɩɩnɛ arɩ mɩ kɩɩ ŋɩɩ mɩ sɩ maga nɛ, a tɩŋ wɩalɩŋ ba sɩ na mɩ teeŋ, koo a tɩŋ wɩalɩŋ ba sɩ nɩa dɩ mɩɩ bʋl lɛ.

⁷ Wʋkpuŋkperisi-la kala Wɩa sɩ joŋo dagɛmɛ fa jaŋ wuo ŋaa dɩ mɩ bigisi mɩ tɩtɩa lɛ. Ama dɩ mɩ sɩ́ wuo na wombiiŋ a bigisi mɩ tɩtɩa lɛ, Wɩa joŋ hɛɛ kʋbala hɛ mɩ lɛ. Ʋ wʋwɩɩ a nagɛ sɔɔŋ sɩ tɔmɛ. Hɛɛ-la naga ʋ to Sɩtaanɩ lɛ nɛ a kʋ walɩmɛmɛ dɩ mɩ sɩ́ wuo na wombiiŋ a bigisi mɩ tɩtɩa lɛ.

⁸ Mɩ yaraa sɩɩ wɩɩ ŋɩɩ, ŋɩɩ nɛ mɩ sʋl Wɩa naansɩɩŋ butori dɩ ʋ leŋ dɩ mɩ yaraa fɩɛlɛ.

⁹ Ŋɩɩ nɛ Wɩa bʋla pɩmɛ, “Mɩ zile yʋga kɩŋkɛŋ ŋ teeŋ, dɩ ŋ nɛ bɩ doluŋ kɛnɛ ŋɩɩ nɛ mɩ doluŋ yie faasa tɩŋ ŋ lɛ.” Ŋɩɩ wɩaa mɩ tʋɔŋ tɔrɔ nɛ, mɩ jaŋ bigisi mɩ tɩtɩa lɛ a tɩŋ mɩ sɩ bɩ doluŋ kɛnɛ wɩaa, dɩ Kirisito dol-la wuo hɛ mɩ lɛ a tɩtɩŋ.

¹⁰ Ŋɩɩ wɩaa a tɩŋ Kirisito wɩaa dɩ mɩ nɛ bɩ doluŋ kɛnɛ, dɩ ba nɩɩ tʋʋsɛmɛ, dɩ mɩ nɩɩ na hɛɛŋ, dɩ ba nɛ to naasɩŋ dʋdɔgɩsɛmɛ, koo dɩ wɩaa nɛ jʋʋmɛ ma, mɩ tʋɔŋ ha yie tɔrɛ nɛ. Dɩ mɩ nɛ bɩ doluŋ kɛnɛ, Wɩa yie pɩmɛ ʋ doluŋ nɛ.

Kɔrɩntɩ nɩaa wɩaa wɩɩ Pɔɔl

¹¹ Mɩɩ ŋaa wɩaa a nagɛ mɩ ŋaa nɩyaarɩ nɛ. Ma nɛ saa yigimi hɛ ŋɩɩ lɛ. Ma nɛ fa maga dɩ ma bɩbɛsɛ mɩ lɛ. Mɩ jɩma arɩ mɩ bɩ nʋʋ ŋaa, ama nanzɔɔba-la sɩ joŋ ba tɩtɩa arɩ ba nɛ kɩɩ nʋʋkala, ba bɩ mɩ kpɩa.

¹² Mɩ nyalɩma nɛ woruŋ a wuo tɩŋ ma teeŋ. Wɩalɩŋ kala mɩ sɩ ŋaa, wʋmagɩlaa arɩ wʋkpuŋkperisi-la arɩ wɩalɩŋ kala mɩ sɩ ŋaa Wɩa Dɩŋ-zɔmʋŋ doluŋ lɛ daga arɩ mɩ sɛnɛ ŋaa Kirisito nanzɔɔ-tɩtɩɩ nɛ.

¹³ Wɩalɩŋ mɩ sɩ ŋaa ma lɛ, ba tɩtɩa nɛ mɩ ŋaa nɩalɩŋ sɩ laa Yesu wɩaa dii aa hilimi lee-kala lɛ. Wɩɩ-la dʋndʋŋa mɩ sɩ bɩ ŋaa ma lɛ nɛ ŋ-la: Mɩ bɩ ma walɩma dɩ ma pɩmɛ kɩalɩŋ mɩ sɩɩ chɛ. Mɩ saa sʋlma dɩ ma joŋ wɩɩŋ deeŋ chɛmɛ.

¹⁴ Tori nɛ ŋ-la mɩ sɩɩ chɛ dɩ mɩ kʋ nama, dɩ mɩ nɛ kɔ, mɩ bɩ jaŋ walɩmɛma dɩ ma pɩmɛ kʋŋkala. Mɩ bɩ ma kʋŋkala ka chɛ. Ma tɩtɩa nɛ mɩ chɩchɛ, bɛɛ wɩaa hambiisiŋ bɩ jaŋ wuo chɛ kɩaa bil ba nyɩmmaba arɩ ba naamba lɛ. Ama hambiisiŋ nyɩmmaba arɩ ba naamba nɛ maga dɩ ba chɛ kɩaa a bil ba biiriŋ lɛ.

¹⁵ A tɩŋ ma wɩaa mɩ paala faasa cho nɛ dɩ mɩ kɛŋ kʋŋkala mɩ sɩ kɛnɛ arɩ mɩ doluŋ a tɩma pɩma. Ŋɩɩ wɩaa, dɩ mɩ nɛ choma kɩŋkɛŋ, ʋ maga dɩ ma ma chomi nɛ.

¹⁶ Ʋ ŋaa wʋtɩtɩɩ nɛ arɩ mɩ bɩ ma walɩma dɩ ma pɩmɛ kʋŋkala, ama ma dɔnsʋŋ bʋla arɩ mɩ nyɩsa laa ma kɩaa nɛ.

¹⁷ Nɩalɩŋ mɩ sɩ tɩma ba kɔ ma teeŋ, ma bɩɩna mɩ tɩmba dɩ ba kʋ nyɩsa laa ma kɩaa nɛɛ?

¹⁸ Mɩ nɛ tɩŋ Taatɩs arɩ la naambie dɔŋɔ ba kɔ ma teeŋ. Taatɩs sɩ kɔ ma teeŋ, ʋ nyɩsa laa ma kʋŋ nɛɛ? Wɩɩkala la sɩɩ ŋaa lɛ, mɩ dɩ Taatɩs ŋaa kʋbala nɛ. La kala ka to wɛŋ-bala nɛ.

¹⁹ Wɩalɩŋ kala la sɩɩ bʋl, ma jaŋ bɩɩnɛ arɩ laa bʋl ŋɩɩ dɩ la laa la tɩtɩa ma teeŋ nɛ. Ŋɩɩ dee. La hɛ Kirisito lɛ nɛ aa bʋl wɩalɩŋ Wɩa sɩpaaŋ. Mɩ naambii-kpɩanaba, laa ŋaa wɩaa deemba kala dɩ la wuo pɛ ma lɛ nɛ dɩ ma waa wɩalɩŋ ma sɩ laa dii lɛ.

²⁰ Fawʋllʋŋ kɛmmɛ nɛ mɩ sɩ jaŋ kɔ ma teeŋ. Ŋ bɩ pɔ mɩ jaŋ kɔ dɩ ma bɩ ŋɩɩ mɩ sɩ cho naga, ma ma jaŋ na dɩ mɩ ma bɩ ŋɩɩ ma sɩ cho naga. Mɩ bɔyɛ ka joŋ arɩ mɩ nɛ kɔ, mɩ jaŋ nama dɩ maa yuo yuosuŋ, a kɛŋ yarɩ-bieriŋ, a nɩna baanɩŋ dɔŋɔ nyuŋ, a kɛŋ dɔŋɔ pʋpɔrɛ, a chichei dɔŋɔba yɩrɩŋ, a gɩgaa dɔŋɔ harɩŋ, a kɛŋ sɩɩ-duoŋ, a bɩ nii-bala kɛnɛ.

²¹ Mɩ bɔyɛ ka joŋ nɛ dɩ mɩ nɛ bɩra kɔ ma teeŋ, Wɩa jaŋ leŋ dɩ hɩɩsɩŋ kɛmmɛ ma wɩaa, dɩ mɩ yel a tɩŋ ma wʋbɔŋŋɔɔ wɩaa. Nɩaa yʋga a hɛ ma tʋɔŋ a ŋaa wʋbɔŋŋɔɔ, a ŋaa disiniŋ, a ŋaa wʋlɩɩlɩŋ, a gɔllɔ chɛ nɩaa haalaa, aŋ bɩrɩma lɩɩ ba lɛ.