2 Kɔrɩntɩ Nɩaa 11 - WƖA TENIŊ

Pɔɔl bʋl wɩaa a tɩgɛ nɩalɩŋ sɩ nyɩɛ wɩaa bʋl arɩ ba nɛ ŋaa Yesu nanzɔɔba

¹ Mɩɩ sʋlma dɩ ma dii kenyiri mɩ teeŋ. Dɩ mɩɩ bʋl nɩyaarɩ wɩɩ ma, má jegile nɩɩ.

² Wɩa tʋɔŋ sɩɩ wɩɩ ma lɛ ŋɩɩ, ŋɩɩ tɩtɩa nɛ mɩ ma tʋɔŋ wʋwɩɩ ma lɛ. Ma nagɛ hatolo mɩ sɩɩ chɛ dɩ mɩ joŋo pɩ bala nɛ, ma bala nɛ ŋaa Kirisito. Mɩ saa chɛ dɩ ma nagɛ hatolo-la sɩ bɩ baal jɩŋ, a bɩ disiniŋ kɛnɛ nɛ dɩ mɩ jomma a pʋʋ.

³ Ama fawʋllʋŋ kɛmmɛ nɛ, dɩ ba sɩ kʋ nyɩsɛma dɩ ma sɩ́ Kirisito to arɩ tʋɔ-bala arɩ wʋtɩtɩɩ. A nagɛ dɩmɩŋ fa sɩ kɛŋ ʋ wʋjɩmɩŋ a nyɩsɛ Hawa ŋɩɩ.

⁴ Mɩɩ bʋl ŋ-la, bɛɛ wɩaa dɩ nʋʋ dɔŋ nɛ bɩra kɔ ma teeŋ a bʋl wʋtanɩɩ a mʋ tɩgɛ Yesu wɩalɩŋ la sɩ bʋla pɩma lɛ, ma yie laa dii nɛ. Dɩ ba nɛ bɩra bʋl dɩŋ-wogo ma wɩaa sɩ tuo Wɩa Dɩŋ-zɔmʋŋ ma sɩ laa, ma yie sɛɩ nɛ. Dɩ ba nɛ bɩra bʋl wʋwogo ma sɩ tuo Wɩa wʋzɔmɔ-la la sɩ bʋla pɩma, ma yie chagɛ laa nɛ lɩma lɩma.

⁵ Mɩ bɩɩna nɩaa deemba sɩ joŋ ba tɩtɩa arɩ ba nɛ ŋaa Yesu nanzɔɔba a kɩɩ nʋʋkala, ba bɩ mɩ lɛ kpɩa.

⁶ Ama dɩ mɩ nɛ paala bɩ wɩaa bʋlʋŋ jɩŋ ma, mɩ jɩŋ wɩaa nɛ. La chaasa bʋl wɩɩŋ deeŋ pʋlla pɩma nɛ wombii kala lɛ.

⁷ Bʋa-la lɛ mɩ sɩ bʋl Wɩa wʋzɔmɔ-la pɩma, mɩ bɩ kʋŋkala laa ma teeŋ. Mɩ kɛŋ mɩ tɩtɩa muuri nɛ dɩ ma wuo yuŋ. Mɩ sɩ ŋaa ŋɩɩ, ʋ ŋaa wʋbɔŋ nɛɛ?

⁸ Mɩ fa sɩ hɛ ma teeŋ bʋa-la lɛ a tɩtɩŋ, nɩalɩŋ sɩ laa Yesu wɩaa dii aa hilimi a hɛ tasɩŋ dɔnsʋŋ lɛ nɛ faa pɩmɛ kɩalɩŋ mɩ sɩɩ chɛ. Mɩ jaŋ wuo bʋl mɩ fa gʋrɛba nɛ ŋɩɩ a pɩpɩma.

⁹ Bʋa-la lɛ mɩ fa sɩ hɛ ma teeŋ, dɩ mɩ nɩɩ chɛ kʋŋkala, mɩ ha bɩ ma kʋŋkala baŋŋaa lɛ kɛnɛ. La naambiiri-la sɩ hɛ Masidoonia tinteeŋ lɛ nɛ faa pɩmɛ kɩalɩŋ kala mɩ sɩɩ chɛ. Mɩ fa bɩ chɛ dɩ mɩ ŋaa chʋga kʋŋkala ma lɛ. Mɩ saa bɩ chɛ dɩ mɩ ŋaa chʋga ma kʋŋkala lɛ.

¹⁰ Mɩ kɛŋ Kirisito wʋtɩtɩɩ-la nɛ. Nʋʋkala tuo Akaaya tinteeŋ lɛ sɩ jaŋ bʋl dɩ mɩ sɩ́ mɩ tɩtɩa lɛ bigisu wɩɩŋ deeŋ lɛ.

¹¹ Bɛɛ nɛ tɩɩ mɩ bɩ mɩ tɩtɩa joŋo ŋaa chʋga ma lɛ? Ma bɩɩna mɩ bɩ ma cho nɛɛ? Aɩ, Wɩa tɩtɩa jɩma arɩ mɩ choma nɛ.

¹² Mɩ sɩɩ tɩŋ mɩ tɩntɩŋŋaa aŋ bɩ kʋŋkala ka chɛ ma teeŋ ŋɩɩ, mɩ ha jaŋ ŋɩŋaa ŋɩɩ. Mɩ bɩ chɛ dɩ nɩalɩŋ sɩ sɩ ba ŋaa Yesu nanzɔɔba nɛ sɩ wuo na wombiiŋ a bibigisi ba tɩtɩa lɛ arɩ la dɩ ba kala to wɛŋ-bala a tɩtɩŋ tɩntɩŋŋaa.

¹³ Nɩaa deemba nyɩɛ wɩaa nɛ arɩ ba ŋaa Kirisito nanzɔɔba nɛ. Ba bɩra nyɩsɛ nɩaa nɛ ba tɩntɩŋŋaa lɛ. Ba yie fugi a kɛŋ ba tɩtɩa bɩrɩmɛ arɩ ba ŋaa Kirisito nanzɔɔba nɛ.

¹⁴ Ʋ ŋɩɩ saa bɩ wʋkpuŋkpere wɩɩ ŋaa, bɛɛ wɩaa Sɩtaanɩ ma kɛŋ ʋ tɩtɩa a nagɛ dɩ ʋ ŋaa Wɩa tɩndaarʋ sɩ kɛŋ pʋlʋmʋŋ nɛ.

¹⁵ Ʋ saa bɩra bɩ wʋkpuŋkpere wɩɩ ŋaa dɩ Sɩtaanɩ tɩntɩnnaa nɛ kɛŋ ba tɩtɩa ŋaa a nagɛ nɩalɩŋ sɩ kɛŋ tʋɔpʋla. Ba jaŋ timba magɛ ŋɩɩ ba tɩntɩŋŋaa sɩ maga.

Pɔɔl sɩ na hɛɛŋ ŋɩɩ a tɩŋ ʋ sɩ ŋaa Yesu nanzɔɔ

¹⁶ Má leŋ dɩ mɩ bɩra bʋla pɩma arɩ nʋʋkala sɩ́ bɩɩna arɩ mɩ ŋaa nɩyaarɩ nɛ. Ama dɩ ma nɛ jommi arɩ mɩ ŋaa nɩyaarɩ, ŋɩɩ jaŋ leŋ dɩ mɩ bigisi mɩ tɩtɩa lɛ mʋapɩlɩɩ.

¹⁷ Wɩalɩŋ mɩ sɩɩ bʋl aa bigisi mɩ tɩtɩa lɛ nɛ ŋɩɩ, mɩ jɩma Kirisito bɩ ŋɩɩ cho. Ama mɩ jaŋ bʋl nɩyaarɩ wɩalɩŋ a bigisi mɩ tɩtɩa lɛ.

¹⁸ Nɩaa yʋga a bibigisi ba tɩtɩa lɛ a tɩŋ dʋnɩa kɩaa wɩaa. Ŋɩɩ wɩaa mɩ ma jaŋ bigisi mɩ tɩtɩa lɛ.

¹⁹ Ma kɛŋ wʋjɩmɩŋ nɛ a wuo sɩsɛɩ wɩalɩŋ nɩyaaraa sɩɩ bʋl.

²⁰ Dɩ nʋʋ ma nɛ kɛmma bɩrɩmɛ ʋ yosuŋ, koo dɩ ʋ nɛ kɛŋ ma kɩaa kala lɩlaa, koo dɩ ʋ nɩɩ gʋrɛma, koo dɩ ʋ nɛ leŋe ma ŋɩŋaa wɩalɩŋ ʋ sɩɩ chɛ, koo ʋ nɛ fallɛma, ma yie tɔrɛ ma niiŋ nɛ.

²¹ Hɩɩsɩŋ kɛmmɛ nɛ mɩ sɩɩ chɛ dɩ mɩ bʋl wɩɩŋ deeŋ. La-na fa bɩ doluŋ kɛnɛ dɩ la ŋaa wɩaa deemba ma lɛ. Ama mɩ haa bʋl wɩaa arɩ nɩyaarɩ nɛ. Dɩ nʋʋ nɩɩ bigisi ʋ tɩtɩa lɛ a tɩŋ wɩɩ wɩaa, mɩ ma jaŋ wuo bigisi mɩ tɩtɩa lɛ a tɩŋ wɩɩ-la wɩaa.

²² Ba ŋaa Hiburu tɩmma nɛɛ? Mɩ ma ŋaa dɔŋɔ nɛ. Ba ŋaa Iziral tɩmma nɛɛ? Mɩ ma ŋaa dɔŋɔ nɛ. Ba ŋaa Abɩraham doho nɩaa nɛɛ? Mɩ ma ŋaa dɔŋɔ nɛ.

²³ Ba ŋaa Kirisito tɩntɩnna nɛɛ? Mɩɩ bʋl wɩaa arɩ mɩ nyuŋ tuo nɛ. Mɩ ma ŋaa dɔŋɔ nɛ, a paala kɩɩba. Mɩ nɛ paala fɩɛsɛ sɩɩŋ a tɩŋ kɩŋkɛŋ. Ba kɛmmɛ tɔ dɩa a yʋgɛ nɛ. Ba sɩ ŋmoomi kɩŋkɛŋ mɩ ka mʋa dɩ mɩ sʋba, mɩ bɩ ʋ ma niiŋ jɩŋ.

²⁴ Naansɩɩŋ bʋnɔŋ nɛ Juu tɩŋŋaa kɛmmɛ a vɩɩrɛmɛ arɩ kpaasa. Dɩ ba nɛ kɛmmɛ na-kala ba yie vɩɩrɛmɛ kpaasa sɩɩŋ mara arɩ fii arɩ nibi nɛ.

²⁵ Naansɩɩŋ butori nɛ Rom tɩŋŋaa vɩɩrɛmɛ arɩ chɩba. Bʋa kʋbala ma lɛ Juu tɩŋŋaa paa tabɩaa yagɛmɛ dɩ ba kpʋ. Mɩ sɩ jʋʋ lɩɩŋ daborusuŋ a vɩvɛŋ, butori nɛ lɩɩŋ daborusu-la chei lɩɩŋ tʋɔŋ, chɛɛ kʋbala mɩ hɛ lɩɩŋ tʋɔŋ wɩɩhɛyɛ arɩ tɩtaŋɩŋ kala a nɩnɛrɩgɛ dɩ mɩ lɩɩ.

²⁶ Mɩ sɩ vɛnɛɛ vɛŋ wombiiŋ ŋɩɩ, mɩ na hɛɛŋ nɛ woruŋ. Mɩ na hɛɛŋ fuonuŋ choluŋ lɛ. Mɩ na hɛɛŋ wɛmboriroo ma nɩsɩŋ lɛ. Mɩ na hɛɛŋ mɩ tɩtɩa nɩaa nɩsɩŋ lɛ, mɩ na hɛɛŋ nɩalɩŋ sɩ bɩ Juu tɩŋŋaa ŋaa nɩsɩŋ lɛ, mɩ na hɛɛŋ tabalaa lɛ, mɩ na hɛɛŋ tintee-hɩlɩŋ ma tʋɔŋ, mɩ na hɛɛŋ mʋgʋ-balɩŋ tʋɔŋ, mɩ na hɛɛŋ nɩalɩŋ sɩ nyɩɛ wɩaa arɩ ba ŋaa la naambiiriŋ nɩsɩŋ lɛ.

²⁷ Mɩ faasa tɩŋ nɛ woruŋ a kala lɔl. Tapʋlaa yʋga mɩ sɩ bɩ doŋ pɩna, losuŋ arɩ lɩɩnyʋasʋŋ ma kɛmmɛ, mɩ paala bɩ kʋdiilee kɛnɛ dɩ mɩ dii, a bɩ gɛrɩ-yuŋii kɛnɛ dɩ mɩ kaa tɔ waarɩŋ, ka waarɩŋ kpʋmɛ.

²⁸ Dɩ mɩ nɛ paala leŋ wɩɩkala ta ma, nɩalɩŋ sɩ laa Yesu wɩaa dii aa hilimi lee-kala, ba wɩaa yie hɛ mɩ bɔyɛ lɛ nɛ.

²⁹ Dɩ nʋʋ nɛ bɩ doluŋ kɛnɛ, mɩ ma bɩ doluŋ kɛnɛ. Dɩ ba nyɩsɛ nʋʋ dɩ ʋ ŋaa wʋbɔŋ ma, mɩ tʋɔŋ yie faasa chei nɛ.

³⁰ Dɩ mɩ nɩɩ chɛ dɩ mɩ bigisi mɩ tɩtɩa lɛ ma, mɩ jaŋ bigisi mɩ tɩtɩa lɛ a tɩŋ kɩalɩŋ sɩ daga arɩ mɩ bɩ doluŋ kɛnɛ.

³¹ Wɩa sɩ ŋaa La Tɩɩna Yesu Nyɩmma, ʋ yɩrɩŋ jaŋ yɩrɛ deeŋ deeŋ. Ʋ jɩma arɩ mɩ bɩ wɩaa nyɩɛ.

³² Mɩ fa sɩ hɛ Damasɩkʋs lɛ, bʋa-la lɛ dɩ baal kʋbala baa yɩyɩrɛ Ariitas nɛ fa dii kuoruŋ. Ŋɩɩ nɛ nɩɩ-la sɩ chɩŋ tintee-la kuoru-balɩŋ nyuŋ pɩ wombiiŋ dɩ ba pɔ taŋ-la boiŋ niiŋ a kɛmmɛ.

³³ Ama ba jommi a hɛ siŋ-balɩŋ tʋɔŋ, a jommi to tokoro ta jeeŋ harɩŋ. Ŋɩɩ nɛ mɩ wuo lɛl ʋ nɩsɩŋ lɛ.