2 Kɔrɩntɩ Nɩaa 10 - WƖA TENIŊ

Pɔɔl bʋl wɩaa a tɩgɛ tɩntɩŋŋaa ʋ sɩ tɩmaa pɩ Wɩa lɛ

¹ Mɩ-na Pɔɔl tɩtɩa nɩɩ chɛ dɩ mɩ bʋl wɩɩ pɩma. Mɩɩ sʋlma a tɩŋ Kirisito wɩaa, nɩɩ-la sɩaa sɩ fɩɛla, ka ʋ kɛŋ kenyiri ma. Nɩaa dɔnsʋŋ sɩ, dɩ mɩ nɛ hɛ ma teeŋ, mɩ yie pʋɩ nɛ gbɛlɛ gbɛlɛ, ama dɩ mɩ tuo ma teeŋ, mɩ nyuŋ duori weŋgem.

² Dɩ mɩ nɛ kɔ ma teeŋ, mɩ bɩ jaŋ ŋaa nɩhaa arɩ mɩ fa sɩ bɩɩna dɩ mɩ nagɛ ŋɩɩ nɩaa dɔnsʋŋ lɛ, nɩalɩŋ sɩ bɩɩna arɩ la ŋaa wɩaa a nagɛ dʋnɩa nɩaa sɩɩ ŋaa ŋɩɩ.

³ La hɛ dʋnɩa lɛ nɛ a yuyuo laalɩŋ, ama la bɩ dʋnɩa nɩaa doluŋ nɛ kaa yuyuo laal-la.

⁴ La laalɩyuori kɩaa bɩ dʋnɩa kɩaa ŋaa, ama ba lɩɩ Wɩa teeŋ nɛ a faasa kɛŋ doluŋ, a wuo yigi dii-duoruŋ a lulo.

⁵ Ba nɛ la kaa yuo dii nɩalɩŋ sɩ kɛŋ nii-doluŋ a kɛŋ wɩaa kaa lɛrɛ, a dɩdagɛ ba tɩtɩa a pɔ dɩ nɩaa sɩ́ kʋ jɩŋ Wɩa. Ba nɛ la yie bɩra wuo kaa kɛŋ nɩaa tʋɔbɩɩnaa kala bɩrɩmɛ baa to Kirisito niiŋ wɩaa.

⁶ Dɩ ma nɛ sɛnɛ tuto Kirisito niiŋ wɩaa woruŋ, ŋɩɩ-na la jaŋ kɛŋ la tɩtɩa hɛ dɔŋɔ a dɔgɩsɛ nɩalɩŋ sɩ bɩ ʋ niiŋ wɩaa ka to.

⁷ Maa beŋ kɩaa jambaa nɛ. Dɩ nʋʋ nɛ bɩɩna arɩ ʋ ŋaa Kirisito nʋʋ nɛ, ʋ tɩɩna maga dɩ ʋ jɩŋ arɩ la ma ŋaa Kirisito nɩaa nɛ.

⁸ Dɩ mɩ nɛ faasa bigisi mɩ tɩtɩa lɛ mʋa a mʋ tɩgɛ dol-la Wɩa sɩ joŋo pɩla lɛ, hɩɩsɩŋ bɩ jaŋ kɛmmɛ ŋɩɩ wɩaa, Wɩa joŋo pɩla dɩ la kaa wasɛma nɛ, ʋ bɩ sɩ dɩ la kaa cheima.

⁹ Mɩ bɩ chɛ dɩ ma bɩɩnɛ arɩ mɩ yie ŋmʋnsɛ tenniŋ pɩpɩma dɩ mɩ joŋ fawʋllʋŋ nɛ a hɛ ma lɛ.

¹⁰ Ma dɔnsʋŋ yie bʋl dɩ wɩalɩŋ mɩ sɩ yie ŋmʋnsɛ mɩ tenniŋ tʋɔŋ a pɩma, ba dolie nɛ aŋ pɛ hɛɩ, ka mɩ tɩtɩa bɩ sɩɩ ka su. Mɩ wʋbʋlaa ma bɩ sɩŋ.

¹¹ Ʋ maga dɩ nɩdosunuŋ-la jɩŋ arɩ la sɩ yie bɩ kpaga aŋ bʋl wɩalɩŋ tenniŋ tʋɔŋ, dɩ la nɛ kpaga ma, wɩalɩŋ tɩtɩa nɛ la jaŋ bʋl.

¹² La bɩ chɛ dɩ la joŋ arɩ la dɩ nɩaa dɔnsʋŋ magɛ dɔŋɔ nɛ. La bɩra bɩ chɛ dɩ la kɛŋ la tɩtɩa mɩmagɩsɛ nɩalɩŋ sɩɩ dagɛ ba tɩtɩa ma. Nɩaa deemba nɩɩ pagɩsɛ dɔŋɔ a kɛŋ ba tɩtɩa mɩmagɩsɛ dɔŋɔ, ba bɩ wʋjɩmɩŋ kɛnɛ.

¹³ La bɩ jaŋ faasa bigisi la tɩtɩa lɛ a kieli, ama la jaŋ bigise magɛ tɩntɩmɩɩ-la Wɩa sɩ joŋo pɩla lɛ nɛ, tɩntɩmɩɩ-la nɛ la tɩma kʋ yi ma ŋɩɩ.

¹⁴ Ma sɩ pɛ lee-la Wɩa sɩ kere pɩla dɩ la bʋl ʋ wɩaa pɩ nɩaa ŋɩɩ, dɩ la nɛ kʋ bʋl wɩaa pɩma la bɩ la tɩtɩa lɛ bigise kieli. La nɛ laa sɩpaaŋ kɛŋ Kirisito wʋzɔmɔ-la kaa kɔ bʋla pɩma.

¹⁵ La bɩ la tɩtɩa lɛ bigise a tɩŋ tɩntɩmɩɩ-la nɩaa dɔnsʋŋ sɩ tɩma kieli ŋɩɩ Wɩa sɩ kere pɩla lɛ. La kɛŋ yɩɛlaa arɩ ma jaŋ waa wɩalɩŋ ma sɩ laa dii lɛ, dɩ tɩntɩmɩɩ-la la sɩɩ tɩŋ ma teeŋ ma pʋŋa pɛ. Ama la jaŋ tɩma magɛ ŋɩɩ Wɩa sɩ kere pɩla.

¹⁶ Dɩ ŋɩɩ nɛ chɩna, la jaŋ wuo bʋl Wɩa wʋzɔmɔ-la lere-la sɩ paala kielima mʋ sɩpaaŋ. La bɩ chɛ dɩ la bibigisi la tɩtɩa lɛ lee-la nʋʋ dɔŋ sɩ tɩŋ ʋ tɩntɩŋŋaa.

¹⁷ Wɩa teniŋ tʋɔŋ ba sɩ, “Dɩ nʋʋkala nɩɩ bigisi ʋ tɩtɩa lɛ, ʋ maga dɩ ʋ bigisi a mʋ tɩgɛ wɩɩ-la La Tɩɩna sɩ ŋaa lɛ nɛ.”

¹⁸ Nɩɩ-la sɩɩ bɩɩnʋ arɩ ʋ maga dɩ Wɩa lɩɩsʋ dɩ ʋ tɩma pʋpʋ, Wɩa bɩ jaŋ lɩɩsɛ tɩɩna, ama Wɩa tɩtɩa yie lɩɩsɛ nɩɩ-la kala ʋ sɩɩ chɛ dɩ ʋ tɩma puu nɛ.