1 Timoti 3 - WƖA TENIŊ

Wɩa nɩaa tʋɔŋ nɩhɩasɩŋ sɩ maga dɩ ba nagɛ ŋɩɩ

¹ Mɩ bɩraa chɛ dɩ mɩ bʋl wɩɩ sɩ ŋaa wʋtɩtɩɩ nɛ a pɩŋ: Dɩ nʋʋ nɛ fɩɛsɛ sii aa chɛ dɩ ʋ ŋaa Wɩa nɩaa kʋhɩaŋ, tɩntɩŋ-fɩaŋ nɛ ʋ chɩchɛ ŋɩɩ.

² Ŋɩɩ wɩaa dɩ nʋʋ nɛ ŋaa Wɩa nɩaa nɩhɩaŋ, ʋ tɩɩna maga dɩ ʋ wʋŋaalaa kala zɔŋ nɛ. Ʋ maga dɩ ʋ kɛŋ ha-bala dʋndʋŋ nɛ. Ʋ maga dɩ ʋ sɩaa fɩɛlɛ, a wuo kɛŋ ʋ tɩtɩa woruŋ dɩ nɩaa zizilu. Ʋ maga dɩ ʋ wuo laa nʋhʋɔraa ma bibil ʋ dɩa lɛ a wuo dɩdagɛ Wɩa nɩaa woruŋ.

³ Ʋ bɩ maga dɩ ʋ ŋaa sɩ-nyʋarʋ, a sɩ́ baaŋ tɩɩna ma ŋaa. Ama ʋ maga dɩ ʋ ŋaa nɩ-chɩm-chɩm nɛ a sɩ́ yuo-hɛɛrʋ ŋaa. Ʋ bɩ maga dɩ ʋ cho moribiee kɩŋkɛŋ.

⁴ Ʋ maga dɩ ʋ wuo beŋ ʋ dɩa nɩaa nyuŋ woruŋ nɛ. Ʋ maga dɩ ʋ wuo leŋ dɩ ʋ hambiisiŋ tuto ʋ niiŋ a zizilu wɩɩkala lɛ,

⁵ bɛɛ wɩaa dɩ nʋʋ nɛ bɩ ʋ dɩa nɩaa nyuŋ wuo bibeŋ, ʋ bɩ Wɩa nɩaa nyuŋ ma wuo beŋ.

⁶ Dɩ nʋʋ nɛ laa Yesu wɩaa dii ʋ bɩ dieni, ʋ bɩ maga dɩ tɩɩna ŋaa Wɩa nɩaa nɩhɩaŋ. Dɩ tɩɩna nɛ ŋaa Wɩa nɩaa nɩhɩaŋ, ʋ jaŋ dagɛ ʋ tɩtɩa. Dɩ ʋ nɛ ŋaa ŋɩɩ, ʋ jaŋ tel arɩ Sɩtaanɩ sɩ tele ŋɩɩ.

⁷ Wɩa nɩaa nɩhɩaŋ maga dɩ ʋ ŋaa nɩzɔŋ nɛ nɩalɩŋ sɩ bɩ Wɩa ka chʋɔlɛ teeŋ. Dɩ ŋɩɩ dee nɩaa jaŋ wuo chei ʋ yɩrɩŋ, dɩ Sɩtaanɩ to ŋɩɩ lɛ a bɛrɛ kɛnʋ.

Nɩalɩŋ sɩɩ pɛ Wɩa nɩaa nɩhɩasɩŋ lɛ

⁸ Nɩalɩŋ sɩɩ pɛ Wɩa nɩaa nɩhɩasɩŋ ma lɛ, ba maga dɩ ba ma kɛŋ mɛl-zɔmʋŋ nɛ, a kɛŋ wʋtɩtɩɩ. Ʋ bɩ maga dɩ ba faasaa nyʋa sɩnɩŋ koo dɩ ba cho moribiee kɩŋkɛŋ.

⁹ Ʋ maga dɩ ba kɛŋ tʋɔbɩɩŋ zɔŋŋɔɔ a laa Wɩa niiŋ wɩaa dii. Wɩalɩŋ fa faa nɛ, ka lɛɛlɛ Wɩa joŋo dagɛla.

¹⁰ Ʋ bɩra maga dɩ Wɩa nɩaa nɛ laa sɩpaaŋ a beŋ nɩalɩŋ sɩɩ chɛ dɩ ba pɛ Wɩa nɩaa kʋhɩasɩŋ lɛ, a na dɩ ba maga koo dɩ ba bɩ maga. Dɩ ba nɛ maga, ba leŋ dɩ ba pɛ Wɩa nɩaa kʋhɩasɩŋ lɛ.

¹¹ Haalaa ma sɩɩ pɛ Wɩa nɩaa kʋhɩasɩŋ lɛ, ʋ maga dɩ ba kɛŋ mɛl-zɔŋ nɛ a sɩ́ nɩaa harɩŋ ma gɩgaa. Ʋ maga dɩ ba fɩɛlɛ ba sɩaa a pɛ kɛŋ wʋtɩtɩɩ wɩɩ na-kala ba sɩɩ ŋaa lɛ.

¹² Baalaa sɩɩ pɛ Wɩa nɩaa kʋhɩasɩŋ lɛ, ʋ maga dɩ ba jaa ha-bala-bala nɛ. Ʋ maga dɩ ba wuo bibeŋ ba hambiisiŋ arɩ ba dɩa nɩaa kala nyuŋ nɛ woruŋ.

¹³ Dɩ nɩalɩŋ sɩɩ pɛ Wɩa nɩaa kʋhɩasɩŋ lɛ nɩɩ tɩŋ ba tɩntɩŋŋaa woruŋ, nɩaa jaŋ zizilba. Ba jaŋ wuo kɛŋ nyuduoŋ a bʋl wɩalɩŋ ba sɩ laa dii a tɩgɛ Kirisito Yesu lɛ.

¹⁴ Mɩɩ chɛ dɩ mɩ kʋ nama nɛ lɛɛlɛ. Ama mɩ ŋmʋnsɛ teniŋ deeŋ pɩpɩma,

¹⁵ dɩ mɩ nɛ ka diene ma, dɩ ma ha wuo jɩŋ ŋɩɩ Wɩa nɩaa mɛlɛ sɩ maga dɩ ʋ nagɛ. Ba nɛ ŋaa nɩalɩŋ sɩ laa Wɩa-la sɩ weye wɩaa dii aa hilimi. Ba nɛ chagɛ wʋtɩtɩɩ-la Wɩa sɩ daga kɩɩ a nagɛ dɩa gentine arɩ jebiiŋ sɩ yie chagɛ dɩa kɩɩ ŋɩɩ.

¹⁶ Wʋtɩtɩɩ, Wɩɩchʋɔlɛ wombii-la la sɩɩ to ŋaa wʋbal nɛ nʋʋkala bɩ jaŋ wuo kaa lɛrɛ. Wɩɩ-la fa faa nɛ ka Wɩa joŋo dagɛla lɛɛlɛ. Ʋ nɛ ŋ-la: Wɩa bɩrɩmɛ nuhuobiine nɛ a kʋ tuu dʋnɩa. Wɩa Dɩŋ-zɔmʋŋ ma dagɛ arɩ ʋ ŋaa tʋɔpʋl Tɩɩna nɛ. Wɩa tɩndaaraa ma naʋ. Nɩaa bʋl ʋ wɩaa dʋnɩa sɛmɛ-na kala lɛ. Dʋnɩa nɩaa laa ʋ wɩaa dii nɛ, aŋ ka Wɩa joŋu kaa jɩl Wɩa-jaŋ, ʋ laa yɩrɩŋ.