1 Pɩɩta 5 - WƖA TENIŊ

Pɩɩta bʋl wɩaa chagɩlɛ Wɩa nɩaa nɩhɩasɩŋ arɩ bapʋɔsaa

¹ Mɩ kɛŋ wɩɩ nɛ dɩ mɩ bʋla pɩ ma nɩalɩŋ sɩ ŋaa Wɩa nɩaa nɩhɩasɩŋ. Mɩ ma ŋaa Wɩa nɩaa nɩhɩaŋ dɔŋɔ nɛ. Mɩ tɩtɩa sɩɩŋ na hɛɛ-la Kirisito sɩ na nɛ. Ŋɩɩ tɩtɩa nɛ mɩ ma jaŋ na tʋla-la Kirisito sɩ jaŋ na bʋa-la lɛ ʋ sɩ jaŋ mɩɩra kɔ. Ŋ-la nɛ tɩɩ mɩɩ sʋlma

² dɩ ma beŋ Wɩa nɩalɩŋ ʋ sɩ joŋo hɛ ma nɩsɩŋ lɛ, arɩ pie-daaraa sɩɩ beŋ ba piesee nyuŋ ŋɩɩ. Má sɩ́ leŋe dɩ ʋ nagɛ arɩ baa fʋgɛma nɛ dɩ ma bemba, ama má bemba ma tɩtɩa tʋɔtɔrʋŋ lɛ arɩ Wɩa sɩɩ chɛ ŋɩɩ. Má cho tɩntɩmɩɩ-la, aŋ sɩ́ naga arɩ moribiee nɛ maa chɛ.

³ Má sɩ́ doluŋ kaa beŋ nɩalɩŋ Wɩa sɩ joŋo hɛ ma nɩsɩŋ lɛ. Ama má leŋ dɩ ba na arɩ ma mɛlɛ zɔmɔ, dɩ ba tuto ma naabʋɔsʋŋ.

⁴ Dɩ ma nɛ ŋaa ŋɩɩ, tapʋlɩɩ-la Yesu Kirisito sɩ jaŋ mɩɩra kɔ, Nɩɩ-la sɩ ŋaa Pie-daaraa kala Kʋhɩaŋ, ʋ jaŋ joŋ kʋ-la sɩ zɔmɔ a kɩɩ kʋŋkala pɩma. Ʋ-na bɩ jaŋ chei.

⁵ Ma bapʋɔsɩ-biisiŋ ma, má joŋ ma tɩtɩa hɛ ma nɩhɩasɩŋ nɩsɩŋ lɛ. Má kala kɛŋ ma tɩtɩa muuri dɔŋɔba teeŋ. Má liisi arɩ Wɩa teniŋ tʋɔŋ ba bʋla, “Wɩa lɩɩ nɩalɩŋ sɩɩ bigisi ba tɩtɩa lɛ harɩŋ nɛ, ama nɩalɩŋ sɩ kɛŋ ba tɩtɩa muuri, ʋʋ pɛ ba lɛ nɛ.”

⁶ Ŋɩɩ wɩaa, má kɛŋ ma tɩtɩa muuri Wɩa teeŋ. Ʋ nɛ kɛŋ doluŋ aa bemma. Dɩ bʋa-la ʋ sɩɩ chɛ nɛ yie, ʋ jaŋ leŋ dɩ ma ŋaa nɩbalaa.

⁷ Wɩɩ-la kala sɩɩ walɩmɛma, má joŋo hɛ Wɩa nɩsɩŋ lɛ, bɛɛ wɩaa ʋ nɩɩ bemma.

⁸ Má kɛŋ ma tɩtɩa woruŋ, a pɔ ma tɩtɩa lɛ. Ma dʋndɔmɔ Sɩtaanɩ, gɔllɔɔ chɛma nɛ, a nagɛ naachigiŋ sɩ gɔllɔ yele chɩchɛ kʋdiilee.

⁹ Má vɩa Sɩtaanɩ aŋ kɛŋ wɩalɩŋ ma sɩ laa dii kpaŋ kpaŋ. Ma jɩma arɩ nɩalɩŋ ma sɩ laa Wɩa wɩaa dii a ŋaa ma naambiiriŋ a hɛ dʋnɩa sɛmɛ-na kala, ba maa na hɛɛŋ nɛ.

¹⁰ Hɛɛŋ deeŋ ma sɩɩ na bɩ jaŋ dieni. Ʋ ŋɩɩ harɩŋ lɛ, Wɩa sɩ kɛŋ zile kɩŋkɛŋ kɩŋkɛŋ a yɩrɛma dɩ ma ma na tʋla-la Kirisito sɩ kɛnɛ a kaa mʋ wuu. Ʋ nɛ jaŋ kɛmma wasa kɩɩ, a leŋ dɩ ma chaasa chɩŋ arɩ doluŋ.

¹¹ Wɩa nɛ kɛŋ doluŋ a kaa mʋ wuu. Amɩɩ.

Chʋɔlaa

¹² Mɩ nɛ leŋe Sɩlɩvaanʋs ŋmʋnsɛ teniŋ deeŋ pɩpɩma. Mɩ jɩma arɩ ʋ ma ŋaa la naambii-tɩtɩɩ nɛ. Wʋkuu-bie nɛ mɩ ŋmʋnsa pɩma dɩ mɩ ŋaa dɩ ma nyuŋ nyaasɛ. Wʋtɩtɩɩ nɛ, mɩ bʋla pɩma ŋɩɩ Wɩa sɩ pɛ la lɛ. Ŋɩɩ wɩaa má chɩŋ wɩaa deemba lɛ kpaŋ kpaŋ.

¹³ Nɩalɩŋ sɩ laa Yesu wɩaa dii aa hilimi Babɩlɔŋ lɛ, nɩalɩŋ Wɩa sɩ lɩɩsa dɩ ba ŋaa ʋ nɩaa arɩ ʋ sɩ lɩɩsɛ ma ma ŋɩɩ, ba maa chʋɔlɛma. Mɩ nanʋala Maak maa chʋɔlɛma.

¹⁴ Má guori dɔŋɔ a chʋɔlɛ dɔŋɔ, a dagɛ ma sɩ cho dɔŋɔ ŋɩɩ. Ma nɩalɩŋ kala sɩ laa Yesu wɩaa dii, ma jaŋ hɔŋ arɩ yarɩfɩɛlaa.