1 Pɩɩta 4 - WƖA TENIŊ

Má leŋ faafaa wʋŋaalaa

¹ A tɩŋ Kirisito tɩtɩa sɩ na hɛɛŋ ŋɩɩ, má kɛŋ ma tɩtɩa woruŋ dɩ ma na hɛɛ-la doho ʋ sɩ na, bɛɛ wɩaa nɩɩ-la kala sɩ na hɛɛŋ, ʋ leŋ wʋbɔŋŋɔɔ nɛ.

² Ma sɩ hɛ ma mɩɩ-kaanɩŋ deeŋ lɛ, ma bɩra sɩ́ ma tʋɔtɔrɛ wʋŋaalaa lɛ to, ama má tuto Wɩa tʋɔtɔrʋŋ lɛ.

³ Bumbuŋ-la kala lɛ ma faa ŋaa wɩalɩŋ nɩalɩŋ fa sɩ bɩ Wɩa jɩŋ sɩɩ ŋaa nɛ. Ma faa to ma tʋɔtɔrɛ wʋŋaalaa harɩŋ nɛ aa ŋaa wʋlɩɩlɩŋ, a chɩl ma yaraa wʋchɛɛlɛɛ wɩaa, a fa nyʋa sɩnɩŋ bubugi, a ŋɩŋaa wʋtɔɔnʋŋ, a yie gɔllɔ nyʋnyʋa sɩnɩŋ, a faa kpaarɛ vʋɩyaa ma, wɩalɩŋ Wɩa sɩɩ kɩsʋ.

⁴ Lɛɛlɛ ʋ ŋaa wʋkpuŋkpere nɛ a pɩ nɩalɩŋ sɩ bɩ Wɩa jɩŋ, ma bɩra sɩ bɩ ba lɛ pɛ a ŋɩŋaa wʋbɔmɔ-la ba sɩɩ ŋaa. Ŋɩɩ nɛ tɩɩ ba tʋtʋʋsɛma.

⁵ Ama tapʋlɩɩ kʋbala, ba jaŋ dagɛ wɩalɩŋ kala ba sɩ ŋaa a pɩ nɩɩ-la sɩ kɛŋ ʋ tɩtɩa dɩ ʋ dii nɩweyee arɩ nɩsʋʋnʋŋ kala sarɩya.

⁶ Ŋ-la wɩaa nɛ tɩɩ Kirisito bʋl Wɩa wʋzɔmɔ-la a pɩ nɩalɩŋ sɩ sʋba ma, arɩ ba sɩ sʋba ba yaraa lɛ ma kala a nagɛ nʋʋkala sɩ jaŋ sʋʋ ŋɩɩ, dɩ ba dɩnsɩŋ wuo kɛŋ mɩɩsɩŋ arɩ Wɩa sɩ kɛŋ mɩɩsɩŋ ŋɩɩ.

Ŋɩɩ nɩalɩŋ sɩ laa Wɩa wɩaa dii sɩ maga dɩ ba ŋɩŋaa dɔŋɔ lɛ

⁷ Bʋa-la dʋnɩa sɩ jaŋ dɛrɛ kpaga nɛ. Ŋɩɩ wɩaa, má kɛŋ ma tɩtɩa woruŋ a leŋ dɩ ma sɩaa fɩɛlɛ, dɩ ma wuo chʋchʋɔlɛ Wɩa.

⁸ Wɩɩ-la sɩ ŋaa sɩɩfɩaŋ wɩɩŋ nɛ ŋ-la: Má hɛ ma doluŋ kala a faasa cho dɔŋɔ. Dɩ ma nɛ cho dɔŋɔ, ma jaŋ joŋ wʋdaŋ chɩchɛ dɔŋɔ.

⁹ Má hʋhʋɔrɛ dɔŋɔ woruŋ ma dɩɩsɩŋ lɛ, aŋ sɩ́ wɩaa gʋgʋrɩmʋ.

¹⁰ Wɩa joŋ doluŋ pɩ nɩaa dɩ ba kaa tɩŋ tɩntɩŋ-dosunuŋ nɛ. Ŋɩɩ wɩaa nʋʋkala kɛŋ wɩɩ-la Wɩa sɩ joŋo pʋ a kaa pɩpɛ ʋ dɔnsʋŋ tɩŋŋaa lɛ.

¹¹ Dɩ Wɩa nɛ pɩ nʋʋkala doluŋ dɩ ʋ wuo bʋbʋl Wɩa wɩaa, ʋ maga dɩ ʋ bʋl wɩalɩŋ Wɩa doluŋ lɛ nɛ. Dɩ nʋʋ nɛ tɩma pɩpɩ nɩaa, ʋ kɛŋ dol-la Wɩa sɩ joŋo pʋ a tɩma pɩpɩba. Má ŋaa ŋɩɩ dɩ nɩaa wuo to Yesu Kirisito lɛ a dɛnnɛ Wɩa, dɩ ʋ yɩrɩŋ yɩrɛ wɩɩ-na kala lɛ. Ʋ nɛ Nɩɩ-la sɩ kɛŋ doluŋ arɩ yɩrɩŋ a kaa mʋ wuu. Amɩɩ.

Hɛɛ-la nɩalɩŋ sɩ laa Wɩa wɩaa dii sɩɩ na

¹² Mɩ naambii-kpɩanaba, má sɩ́ leŋe dɩ hɛɛ-la ma sɩ faasa nɩna ŋaa wʋkpuŋkpere ma lɛ. Wɩaa deemba kala ka magɩsɛma nɛ. Má sɩ́ leŋe dɩ wɩɩŋ deeŋ ŋaa wʋfalɩɩ ma teeŋ.

¹³ Hɛɛ-la Kirisito sɩ na, má ma na hɛɛ-la tɩtɩa nɛ. Ŋɩɩ wɩaa má jʋjʋɔsɛ. Tapʋlɩɩ-la Kirisito nɛ kɔ arɩ ʋ tʋla, ma jaŋ faasa jʋɔsɛ.

¹⁴ Dɩ ba nɩɩ tʋʋsɛma a tɩŋ Kirisito wɩaa, Wɩa jaŋ pɛ ma lɛ, bɛɛ wɩaa Wɩa Dɩŋ-zɔmʋŋ sɩ kɛŋ doluŋ hɛ ma lɛ nɛ.

¹⁵ Ma kʋŋkala sɩ́ hɛɛŋ na a tɩŋ ʋ sɩ kpʋ nɩaa wɩaa, koo ʋ sɩ ŋaa gaarʋ wɩaa, koo ʋ sɩ ŋaa wʋbɔŋŋɔɔ wɩaa, koo ʋ sɩ ŋaa wʋhɛɛrʋ wɩaa.

¹⁶ Ama nɩɩ-la kala sɩɩ na hɛɛŋ a tɩŋ Kirisito wɩaa, ʋ sɩ́ leŋe dɩ hɩɩsɩŋ kɛnʋ. Ʋ maga dɩ tɩɩna dɛnnɛ Wɩa, a tɩŋ ʋ sɩ ŋaa Kirisito nʋʋ wɩaa.

¹⁷ Bʋa-la Wɩa sɩ jaŋ dii dʋnɩa sarɩya yie nɛ. Ʋ jaŋ laa sɩpaaŋ a suomi Wɩa nɩaa lɛ. Dɩ ʋ nɛ saa suomi ba lɛ, ɛɛ nɛ saa ʋ jaŋ nagɛ nɩalɩŋ sɩ bɩ Wɩa Wʋzɔmɔ-la ka to lɛ?

¹⁸ Ba ŋmʋnsɛ Wɩa teniŋ tʋɔŋ a bʋl, “Ʋ ŋaa wʋhaa nɛ arɩ ŋ ŋaa tʋɔpʋl tɩɩna Wɩa sɩpaaŋ, dɩ ʋ laaŋ ta. Ɛɛ nɛ saa ʋ jaŋ nagɛ nɩalɩŋ sɩ bɩ Wɩa jɩŋ aŋ ŋɩŋaa wʋbɔŋŋɔɔ lɛ?”

¹⁹ Ŋɩɩ wɩaa, nɩalɩŋ sɩɩ na hɛɛŋ a tɩŋ Wɩa tʋɔtɔrɛ wɩaa ŋaanɩŋ lɛ, ʋ maga dɩ ba joŋ ba tɩtɩa kala a hɛ Wʋtɩtɩɩ Tɩɩna-la sɩ ŋaaba nɩsɩŋ lɛ aŋ ha ŋɩŋaa wʋzɔŋŋɔɔ.