1 Pɩɩta 3 - WƖA TENIŊ

Haalaa arɩ ba balaba sɩ maga dɩ baa ŋaa ŋɩɩ dɔŋɔ lɛ

¹ Ŋɩɩ tɩtɩa nɛ ma haalaa, má kɛŋ ma tɩtɩa muuri a tuto ma balaba niiŋ. Dɩ kʋŋ bala nɛ bɩ Wɩa wʋzɔmɔ-la laa dii, ʋ bala-la jaŋ wuo bɩrɩma lɩɩ ʋ wʋŋaalaa lɛ a laa Wɩa wʋzɔmɔ-la dii, dɩ haal-la nɛ paala bɩ Wɩa wʋzɔmɔ-la bʋla pʋ ma,

² bɛɛ wɩaa, ʋ jaŋ na ʋ haala mɛlɛ sɩ zɔmɔ ŋɩɩ arɩ ŋɩɩ ʋ sɩɩ fá Wɩa.

³ Má sɩ́ yaraa kpɩɛraa nɛ kaa dagɛ ma zɔmʋŋ: Ŋɩɩ ma sɩɩ vɔɔ ma nyusuŋ, a lɩlaalɛ sɛlɩmɛ kpɩɛraa arɩ gɛrɩ-zɔŋŋɔɔ.

⁴ Ama má leŋ dɩ ma zɔmʋŋ lɩɩ ma tʋɔŋ nɛ. Má leŋ dɩ ma sɩaa fɩɛlɛ, a kɛŋ ma tɩtɩa muuri. Zɔmʋŋ deeŋ doho-na bɩ lɛl. Ʋ nɛ bɩra kɛŋ nyʋʋrʋŋ ma Wɩa teeŋ.

⁵ Faafaa haala-la sɩɩ to Wɩa niiŋ a joŋ ba yɩɛlaa kala hɛ Wɩa lɛ faa dagɛ ba zɔmʋŋ ŋɩɩ lɛ nɛ. Ba yie kɛŋ ba tɩtɩa muuri nɛ aa to ba balaba niiŋ.

⁶ Ŋɩɩ nɛ haal-la ba sɩɩ yɩrɛ Saara ma fa to ʋ bala Abɩraham niiŋ a kɛnʋ yɩyɩrɛ ʋ tɩɩna. Dɩ ma nɩɩ ŋaa wɩaa ba bʋa lɛ, a bɩ fawʋllʋŋ ka fá, ma ŋaa Saara toloo nɛ.

⁷ Ŋɩɩ tɩtɩa nɛ ma baalaa ma maga dɩ ma leŋ dɩ ma mɛlɛ zɔŋ dɩ ma kɛŋ ma haalaa woruŋ a zizilba. Ma jɩma ma dolie kɩɩba nɛ, ka Wɩa joŋ mɩɩsɩŋ pɩ ma kala. Ma ŋɩŋaa ŋɩɩ, dɩ wɩɩkala sɩ́ ma Wɩɩ-chʋɔlʋŋ chei.

Má sɩ́ wʋbɔŋ joŋo tiŋ wʋbɔmʋŋ chɩmɩŋ

⁸ Wɩɩ-la mɩ sɩɩ chɛ dɩ mɩ bʋl wʋkaanɩŋ nɛ ŋ-la: Má kala kɛŋ tʋɔ-bala, má fɩfá dɔŋɔ nenige, má cho dɔŋɔ, bɛɛ wɩaa ma ŋaa naambiiri nɛ, a kɛŋ zile dɔŋɔ lɛ, a kɛŋ ma tɩtɩa muuri dɔŋɔ teeŋ.

⁹ Má sɩ́ wʋbɔŋ joŋo tiŋ wʋbɔmʋŋ chɩmɩŋ. Dɩ nʋʋ nɛ tʋʋsɛma, má sɩ́ tʋʋsa tiŋ, ama má sʋl Wɩa dɩ ʋ pɛ tɩɩna lɛ, bɛɛ wɩaa Wɩa ma lɩɩsɛma nɛ dɩ ʋ pɛ ma lɛ.

¹⁰ Ba ŋmʋnsɛ Wɩa teniŋ tʋɔŋ a bʋl, “Dɩ nʋʋkala nɩɩ chɛ dɩ ʋ nɩɩ sɩma a na wʋzɔŋŋɔɔ dʋnɩa deeŋ lɛ, tɩɩna sɩ́ wʋbɔŋŋɔɔ bʋbʋl, a sɩ́ wɩaa ma nyɩnyɩa.

¹¹ Tɩɩna maga ʋ lɩɩsɛ ʋ tɩtɩa wʋbɔŋŋɔɔ ŋaanɩŋ lɛ, a ŋɩŋaa wɩalɩŋ sɩɩ to wʋtɩtɩɩ wombiiŋ, a fɩɛsɛ sɩɩŋ chɩchɛ dɩ nii-maga hɛ ʋ dɩ nɩaa pɛgɛ,

¹² bɛɛ wɩaa Wɩa sɩaa kala hɛ nɩalɩŋ sɩɩ ŋaa tʋɔpʋl wɩaa lɛ nɛ, a wuoli ʋ dɩgɩlaa ma a nɩnɩɩ ba Wɩɩsʋlʋŋ. Ama Wɩa joŋ ʋ harɩŋ yɩa nɩbɔŋŋɔɔ nɛ.”

¹³ Dɩ ma nɛ fɩɛsɛ sɩɩŋ aa chɛ dɩ ma ŋɩŋaa wʋzɔŋŋɔɔ, kʋbɛɛ nɛ jaŋ wuo ŋaa wʋbɔŋ ma lɛ?

¹⁴ Ama dɩ ba nɩɩ dɔgɩsɛma a tɩŋ ma tʋɔpʋl wʋŋaalaa wɩaa, Wɩa jaŋ pɛ ma lɛ. Ŋɩɩ wɩaa, má sɩ́ nɩalɩŋ sɩ dɔgɩsɛma fá, a sɩ́ leŋe dɩ wɩɩkala wʋwalɩmɛ ma.

¹⁵ Ama ma tʋɔŋ lɛ má fɩfá Kirisito a leŋ dɩ ʋ ŋaa ma Tɩɩna. Bʋa na-kala lɛ, dɩ nʋʋ nɛ pɩɛsɛma dɩ ʋ jɩŋ wɩɩ-la sɩ tɩɩ ma laa Yesu wɩaa dii, ma kɛŋ ma tɩtɩa woruŋ a to wɩɩ-la naasɩŋ pʋ. Ama ma fɩɛlɛ ma sɩaa a bʋl wɩɩ-la.

¹⁶ Bʋa na-kala lɛ, má leŋ dɩ ma tʋɔbɩɩnaa chesi, dɩ ma wʋŋaalaa dagɛ arɩ maa to Kirisito nɛ. Dɩ ma nɩɩ ŋaa ŋɩɩ, hɩɩsɩŋ jaŋ dii nɩalɩŋ sɩɩ chei ma yɩrɩŋ.

¹⁷ Dɩ ʋ nɛ ŋaa Wɩa tʋɔtɔrʋŋ dɩ ma na hɛɛŋ a tɩŋ ma sɩɩ ŋaa wʋzɔŋŋɔɔ wɩaa, ʋ nɛ kpɩa ma sɩ ŋaa wʋbɔŋŋɔɔ a na hɛɛŋ.

¹⁸ Yesu Kirisito sʋʋ la wʋbɔŋŋɔɔ wɩaa bala nɛ. Ʋ fa ŋaa tʋɔpʋl tɩɩna nɛ, a sʋʋ wʋbɔŋ ŋaaraa wɩaa, dɩ ʋ wuo kɛnla kaa mʋ Wɩa teeŋ. Nuhuobiinee nɛ kpʋ ʋ yaraa, ama Wɩa leŋ ʋ dɩma wei.

¹⁹ Ŋɩɩ harɩŋ ʋ nɩdɩma lɛ ʋ mʋ bʋl Wɩa wʋzɔmɔ-la a pɩ nɩdɩnsɩ-la ba sɩ kaa tɔ dɩa.

²⁰ Nɩaa deemba nɛ fa vɩa dɩ ba to Wɩa niiŋ wɩaa bʋa-la lɛ Nowa fa sɩɩ kpaasɛ lɩɩŋ dabori-bal-la. Bʋa deeŋ lɛ Wɩa fa kɛŋ kenyiri a gbɩgbɛrɛba dɩ ba kʋ jʋʋ lɩɩŋ daboro-la, ka ba vɩa. Nɩaa chori dʋndʋŋ nɛ fa jʋʋ lɩɩŋ dabori-bal-la, a laa ba mɩɩsɩŋ.

²¹ Lɩɩ-la tʋɔŋ ba sɩ duoro lɩɩ naga ba sɩ fo nɩaa Wɩɩchʋɔlɛ lɩɩŋ nɛ. Dɩ ba nɛ foŋ Wɩɩchʋɔlɛ lɩɩŋ, ʋ bɩ naga arɩ ŋ yaraa disiniŋ nɛ ba fo ta. Ama la yie ŋaa ŋɩɩ a dɩdagɛ arɩ la tʋɔbɩɩnaa chesi nɛ Wɩa sɩpaaŋ. Ʋ ŋɩɩ yie laala ta nɛ a tɩŋ Yesu Kirisito sɩ sii sʋʋŋ lɛ wɩaa.

²² Ʋ nɛ lɩɩ dʋnɩa lɛ a jɩl Wɩa-jaŋ a hɔŋ Wɩa nadiiŋ, nɩduoŋ dɩhɔnʋŋ. Ʋ nɛ kɛŋ doluŋ a bibeŋ Wɩa tɩndaaraa arɩ kʋŋkala sɩ kɛŋ doluŋ a hɛ Wɩa-jaŋ lɛ.