1 Pɩɩta 2 - WƖA TENIŊ

Pɩɩta bʋl wɩaa a tɩgɛ mɩɩ-falɩɩ-la la sɩ kɛnɛ lɛ

¹ Ma sɩ kɛŋ mɩɩ-falɩŋ ŋɩɩ, má lɩɩsɛ ma tɩtɩa wʋbɔŋ kala lɛ, a sɩ́ nɩaa nyɩnyɩsʋ, a sɩ́ kanfugi tɩmma ŋaa. Má sɩ́ yarɩ-bieriŋ kɛŋ, a sɩ́ nɩaa harɩŋ gɩgaa.

² Ʋ maga dɩ ma chɩchɛ Wɩa niiŋ wɩalɩŋ nɛ a nagɛ bii-mulluŋ sɩɩ chɛ yɩlɩŋ ŋɩɩ. Dɩ ma nɩɩ chɛ Wɩa wɩaa ŋɩɩ, ma jaŋ waa woruŋ ba lɛ, a mʋ yi tapʋlɩɩ-la Wɩa sɩ jaŋ laama ta.

³ Má ŋaa ŋɩɩ, bɛɛ wɩaa ma tɩtɩa jɩma arɩ La Tɩɩna Wɩa kɛŋ zile ma teeŋ.

⁴ Ŋɩɩ wɩaa, má kʋ kpagɛ La Tɩɩna Kirisito, Nɩɩ-la sɩ nagɛ tabɩɩ-la sɩ kɛŋ mɩɩsɩŋ. Nɩaa vɩaʋ ta nɛ, ama Wɩa nɛ lɩɩsʋ ʋ ŋaa kʋzɔŋ ʋ teeŋ.

⁵ Ma ma nagɛ tabɩɩ-la sɩ kɛŋ mɩɩsɩŋ nɛ. Ŋɩɩ wɩaa, má leŋ dɩ Wɩa kɛmma saa ʋ dɩa, a leŋ dɩ ma ŋaa nɩa sɩ́ bɩ disiniŋ kɛnɛ a laa nɩaa nyuŋ a tɩma pʋpʋ, a nagɛ Wɩɩsʋllɩ sɩpaalaaraa. Wɩa chɛ dɩ ma to Yesu Kirisito lɛ nɛ a ŋaa Wɩɩsʋlɩɩ-la sɩ maga a pʋ.

⁶ Ba ŋmʋnsɛ Wɩa teniŋ tʋɔŋ a bʋl, “Ma bee na, mɩ lɩɩsɛ tabɩɩ-zɔŋ nɛ a joŋo bil Zaayɔŋ lɛ, ʋ ŋaa jegunuŋ tiebiiŋ. Nɩɩ-la kala sɩ laa ʋ wɩaa dii, hɩɩsɩŋ bɩ jaŋ dii ʋ tɩɩna.”

⁷ Ma nɩalɩŋ sɩ laa ʋ wɩaa dii, ʋ ŋaa kʋzɔŋ nɛ ma teeŋ. Ama ba ŋmʋnsɛ Wɩa teniŋ tʋɔŋ a tɩgɛ nɩalɩŋ sɩ bɩ ʋ wɩaa laa dii lɛ, “Tiebii-la dɩɩsaaraa sɩ vɩa, ʋ nɛ mɩɩra kʋ ŋaa jegunuŋ tiebii-duoŋ.”

⁸ Ba bɩra ŋmʋnsa Wɩa teniŋ tʋɔŋ a bʋl, “Ʋ jaŋ nagɛ tabɩɩŋ nɩaa sɩ jaŋ gɛrɛ tel. Tabɩɩ-la ŋaa bʋŋ nɛ, ʋ jaŋ leŋ dɩ ba tel.” Ba jaŋ tel, bɛɛ wɩaa ba vɩa Wɩa niiŋ wɩalɩŋ nɛ. Wɩa bʋl faafaa nɛ arɩ ba jaŋ ŋaa ŋɩɩ.

⁹ Ama Wɩa lɩɩsɛma nɛ dɩ ma ŋaa ʋ nɩaa, a laa nɩaa nyuŋ a tɩma pɩpɩ ma Kuoro. Ma ŋaa nɩa sɩ bɩ disiniŋ kɛnɛ nɛ. Wɩa tɩtɩa nɛ tɩɩma. Ʋ yɩrɛma dɩ ma wuo bʋl wʋkpuŋkperisi-la kala ʋ sɩ ŋaa a pɩ nɩaa arɩ ŋɩɩ ʋ sɩ lɩɩsɛma birimiŋ tʋɔŋ a kaa kʋ jʋʋ ʋ pʋlʋŋ-jalɩɩ-la tʋɔŋ.

¹⁰ Bumbuŋ-la ma fa bɩ kʋŋkala ŋaa, ama lɛɛlɛ ma ŋaa Wɩa nɩaa nɛ. Wɩa fa bɩ ma nenige fá, ama lɛɛlɛ ʋ fá ma nenige nɛ.

Wɩalɩŋ sɩ maga dɩ ma nɩalɩŋ sɩ laa Yesu wɩaa dii ŋɩŋaa

¹¹ Mɩ naambii-kpɩanaba, ma jɩma ma ŋaa nʋhʋɔraa nɛ dʋnɩa deeŋ lɛ. Ŋɩɩ wɩaa, mɩɩ sʋlma, má lɩɩsɛ ma tɩtɩa ma tʋɔtɔrɛ wʋŋaala-la sɩ bɩ zɔŋ lɛ, bɛɛ wɩaa ma tʋɔtɔrɛ wʋŋaalaa bɩ jaŋ sɛɩ dɩ ma ŋaa wɩalɩŋ sɩɩ tɔrɛ Wɩa tʋɔŋ.

¹² Ma sɩ guoli nɩalɩŋ sɩ bɩ Wɩa wɩaa laa dii tʋɔŋ, má kɛŋ ma tɩtɩa woruŋ, dɩ ba sɩ́ wombiiŋ na a bʋl arɩ ma ŋaa nɩbɔmɔ nɛ. Dɩ ba nɛ bʋla arɩ maa ŋaa wʋbɔŋŋɔɔ ma, má leŋ dɩ ba na wʋzɔmɔ-la ma sɩɩ ŋaa, a dɛnnɛ Wɩa dɩ ʋ yɩrɩŋ yɩrɛ tapʋlɩɩ-la ʋ sɩ jaŋ dii nɩaa sarɩya.

¹³ A tɩŋ La Tɩɩna Yesu Kirisito wɩaa, má sɛɩ nɩalɩŋ sɩ kɛŋ doluŋ aa bemma dʋnɩa deeŋ lɛ niiŋ. Má zizil ma tinteeŋ kuoru-balɩŋ, nɩɩ-la sɩɩ beŋ nʋʋkala,

¹⁴ a bɩra zizil nɩalɩŋ kuoru-balɩŋ sɩ lɩɩsa ba chɩŋ ʋ naasɩŋ. Ba yie dʋdɔgɩsɛ nɩalɩŋ sɩɩ ŋaa wʋbɔŋŋɔɔ, aŋ bɩbɛsɛ nɩalɩŋ sɩɩ ŋaa wʋzɔŋŋɔɔ lɛ.

¹⁵ Wɩa tʋɔtɔrʋŋ nɛ ŋ-la, dɩ maa ŋaa wɩalɩŋ sɩ zɔmɔ a leŋ dɩ nɩyaara-la sɩ bɩ wɩɩ jɩŋ, dɩ ba sɩ́ wɩɩ wuo bʋl a tɩgɛ ma lɛ.

¹⁶ Ma tɩɩ ma tɩtɩa nɛ, ŋɩɩ wɩaa má hɔŋ a nagɛ nɩaa sɩ tɩɩ ba tɩtɩa, aŋ sɩ́ leŋe dɩ ŋɩɩ ŋaa dɩ ma ŋaa wʋbɔŋŋɔɔ. Ama má ŋaa wɩalɩŋ sɩ jaŋ dagɛ arɩ ma ŋaa Wɩa tɩntɩnnaa nɛ.

¹⁷ Máa zil nʋʋkala. Má cho nɩalɩŋ ma sɩ laa Yesu wɩaa dii a ŋaa ma naambiiriŋ. Má fá Wɩa a zizil ma kuoru-balɩŋ.

Má to Yesu naabʋɔsʋŋ

¹⁸ Ma nɩalɩŋ sɩ ŋaa tɩntɩnnaa a tɩmaa pɩ nɩaa, má kɛŋ ma tɩtɩa muuri a tuto ma nɩhɩasɩŋ niiŋ a zizilba bʋa na-kala lɛ. Dɩ ba wɩaa zɔmɔ koo dɩ ba nɛ tɛrɛ ma, má zizilba.

¹⁹ Dɩ nʋʋ nɛ bɩ wɩɩ cheye ka baa dɔgɩsʋ, ka dɩ ʋ tɩŋ Wɩa wɩaa nyalɩmɛ, Wɩa jaŋ pɛ tɩɩna lɛ.

²⁰ Dɩ ŋ nɛ ŋaa wʋbɔŋ dɩ ba dɔgʋsʋŋ, ka ŋ wuo dii kenyiri ŋɩɩ lɛ, ʋ bɩ maga dɩ ŋ chɩchɛ dɩ ba lɔllʋŋ. Ama dɩ ŋ nɩɩ ŋaa wʋzɔŋ, ka dɩ baa dɔgʋsʋŋ a tɩŋ wʋzɔŋ-la wɩaa, dɩ ŋ nɛ nyalɩma, Wɩa tʋɔŋ jaŋ tɔrɛ ŋ nyuŋ.

²¹ Wɩa paala yɩrɛma dɩ ma na hɛɛŋ nɛ. Má liisi arɩ Yesu Kirisito tɩtɩa na hɛɛŋ nɛ ma wɩaa a dagɛma ŋɩɩ ma sɩ jaŋ to ʋ naabʋɔsʋŋ.

²² Ʋ bɩ wʋbɔŋ kala ŋaa. Ʋ bɩ wɩaa ma nyɩɛ.

²³ Arɩ nɩaa sɩ tʋʋsʋ ma kala, ʋ bɩ laa tʋʋsɛ. Ba sɩ dɔgɩsʋ kala ma, ʋ bɩ bʋla arɩ ʋ ma jaŋ dɔgɩsɛba. Ʋ ta joŋ wɩɩkala a hɛ Wɩa nɩsɩŋ lɛ nɛ, nɩɩ-la sɩ jaŋ kɛŋ wʋtɩtɩɩ a dii nɩaa sarɩya.

²⁴ Yesu Kirisito tɩtɩa nɛ laa la wʋbɔŋŋɔɔ a chʋŋ, ba kpaasʋ mɛrɛ daagɛsɛ nyuŋ dɩ la joŋ harɩŋ yɩa wʋbɔŋŋɔɔ aŋ ŋɩŋaa tʋɔpʋl wɩaa. Ba vɩɩrʋ ʋ yaraa ŋaa naawɩɩlaa, ŋɩɩ nɛ leŋe la nyanyalaa kala dɛrɛ.

²⁵ Ma fa nagɛ piesee sɩ yeŋŋe nɛ, ama lɛɛlɛ ma mɩɩra kɔ Pie-daarɩ-la teeŋ nɛ, nɩɩ-la sɩɩ beŋ ma mɩɩsɩŋ.