1 Pɩɩta 1 - WƖA TENIŊ

¹ Mɩ-na Pɩɩta sɩ ŋaa Yesu Kirisito nanzɔɔ, mɩ nɛ ŋmʋnsɛ teniŋ deeŋ a pɩpɩ ma nɩalɩŋ kala sɩ laa Yesu wɩaa dii aŋ tɩŋ hɛɛŋ wɩaa a pɩsɛ a hɛ Pɔntɔs lɛ, Galiisia, Kapadoosia, Esia, arɩ Bitiinia tinteeŋ kala lɛ.

² Faafaa kala nɛ la Nyɩmma Wɩa bɩɩnɛ arɩ ʋ maga dɩ ma ŋaa ʋ nɩaa, ŋɩɩ nɛ tɩɩ ʋ lɩɩsɛma a joŋ ʋ Dɩŋ-zɔmʋŋ a hɛ ma lɛ, dɩ ma ŋaa tʋɔpʋl tɩmma ʋ teeŋ a tuto Yesu Kirisito niiŋ. Ʋ nɛ joŋ ʋ chalɩŋ jaasɛ ma wɩaa dɩ ma sɩ́ disiniŋ kɛŋ Wɩa teeŋ. La Tɩɩna Wɩa lahɔrɩmɔ lɛ, fɩɛlɩŋ jaŋ yʋgɛ ma teeŋ.

Wɩalɩŋ la sɩɩ yɩɛlʋ

³ Má leŋ dɩ la dɛnnɛ Wɩa, ʋ nɛ ŋaa La Tɩɩna Yesu Kirisito Nyɩmma. Ʋ fá la nenige nɛ kɩŋkɛŋ a leŋ la kɛŋ mɩɩ-falɩŋ, a tɩŋ ʋ sɩ chɩsɛ Yesu Kirisito sʋʋŋ lɛ. La saa yɩɛlʋ arɩ la jaŋ kɛŋ mɩɩsɩŋ,

⁴ a dii kʋzɔmɔ-la Wɩa sɩ ŋaa bil ʋ nɩaa lɛ ʋ jaŋ lɛ. Kɩalɩŋ bɩ jaŋ pʋa, ba bɩ jaŋ chei ma, ba zɔmʋŋ ma bɩ jaŋ lɩɩ.

⁵ A tɩŋ ma sɩ laa ʋ wɩaa dii ŋɩɩ, Wɩa ka pɔma nɛ arɩ ʋ doluŋ. Dɩ dʋnɩa nɛ kʋ dɩdɛrɛ, ʋ jaŋ dagɛ nɩaa ŋɩɩ ʋ sɩ laama ta.

⁶ Kɩalɩŋ ma sɩ jaŋ na Wɩa teeŋ leŋe ma tʋɔŋ faasa tɔrɛ nɛ. Lɛɛlɛ ŋ-la-na ma tʋɔŋ cheye nɛ bɛɛ wɩaa, wɩaa yʋga nɛ a jʋʋma. Ama ma jɩma arɩ hɛɛ-la sɩ jʋʋma, ʋ bɩ jaŋ dieni.

⁷ Wɩaa deemba jʋʋma dɩ ba magɩsɛ ŋɩɩ ma sɩ laa Wɩa dii nɛ, a leŋ nɩaa wuo na arɩ ʋ sɛnɛ ŋaa wʋtɩtɩɩ nɛ. Ʋ nagɛ sɛlɩmɛ ba sɩ joŋo chɔ a yʋgɩlɛ dɩ ba na ʋ sɛnɛ ŋaa sɛlɩmɛ nɛɛ? Ba sɩ joŋ sɛlɩmɛ chɔ ŋɩɩ ma kala, ʋ bɩ dieni ka dɩ ʋ chei. Ma Wɩa laa diiniŋ nɛ yuŋŋie a kɩɩ sɛlɩmɛ. Ba sɩ magɩsɛma na ŋɩɩ, tapʋlɩɩ-la Yesu Kirisito sɩ jaŋ mɩɩra kɔ, nɩaa jaŋ dɛnnɛ Wɩa a zizilu dɩ ʋ yɩrɩŋ yɩrɛ a tɩŋ wɩalɩŋ ma sɩ laa dii wɩaa.

⁸ Arɩ ma ha sɩ bɩ Yesu Kirisito na ma kala, ma ha chou nɛ. Ma ha sɩ bɩ ʋ na lɛɛlɛ ma, ma laa ʋ wɩaa dii nɛ. Ma tʋɔŋ tɔrɛ nɛ woruŋ, ma paala bɩ jaŋ wuo dagɛ ŋɩɩ ma tʋɔŋ sɩ tɔrɛ magɛ.

⁹ Ma sɩ laa Yesu wɩaa dii, ŋɩɩ nɛ tɩɩ Wɩa laama ta, wɩɩ-la ma sɩɩ chɛ nɛ ŋɩɩ.

¹⁰ Laatanɩŋ deeŋ wɩaa nɛ, Wɩa wʋlaabʋllaa fa gbilli Wɩa teniŋ tʋɔŋ arɩ sɩɩfɩɛsɩŋ dɩ ba na ŋɩɩ Wɩa sɩ jaŋ laa ʋ nɩaa ta. Ba fa bʋla arɩ Wɩa jaŋ joŋ kʋŋ a dii zile nɩaa lɛ.

¹¹ Yesu Kirisito Dɩŋ-zɔmʋŋ fa sɩ hɛ ba lɛ, ʋ nɛ bʋla pɩba ŋɩɩ Kirisito sɩ jaŋ na hɛɛŋ, ka dɩ nɩaa-na zizilu. Ŋɩɩ nɛ ba nɩnɛrɩgɛ dɩ ba na bʋa-la lɛ wɩaa deemba sɩ jaŋ ŋaa arɩ ŋɩɩ ba sɩ jaŋ ŋaa.

¹² Wɩa joŋo dagɛba arɩ ma wɩaa nɛ tɩɩ ba faa bʋl wɩaa deemba, ba tɩtɩa wɩaa dee. Lɛɛlɛ nɩalɩŋ sɩ bʋl Wɩa wʋzɔmɔ-la pɩpɩma, ba dagɛma bumbuŋ wɩaa deemba kala nɛ. Wɩa Dɩŋ-zɔmʋŋ sɩ lɩɩ Wɩa-jaŋ kʋ tuu hɛba lɛ nɛ pɩba doluŋ deeŋ. Wɩa tɩndaaraa ma fa cho dɩ ba na wɩaa deemba nɛ.

Ŋɩɩ Wɩa nɩaa sɩ maga dɩ ba nagɛ

¹³ Ŋɩɩ wɩaa, má kɛŋ ma tʋɔbɩɩnaa hɛ dɔŋɔ lɛ a ŋaa siri dɩ ma tɩŋ. Má kɛŋ ma tɩtɩa woruŋ, a joŋ ma yɩɛlaa kala hɛ kʋ-la Wɩa sɩ jaŋ joŋo pɩma lɛ bʋa-la Yesu Kirisito sɩ jaŋ mɩɩra kɔ.

¹⁴ Má tuto Wɩa niiŋ. Bʋa-la lɛ ma fa sɩ bɩ Wɩa jɩŋ, ma faa to ma tʋɔtɔrɛ wʋŋaalaa sɩ bɩ zɔŋ lɛ nɛ. Má bɩra sɩ́ ba to.

¹⁵ Wɩa bɩ disiniŋ kɛnɛ aŋ yɩrɛma. Ŋɩɩ wɩaa, má ma sɩ́ disiniŋ kɛŋ wɩɩ-na kala ma sɩɩ ŋaa lɛ,

¹⁶ bɛɛ wɩaa ba ŋmʋnsa nɛ Wɩa teniŋ tʋɔŋ arɩ Wɩa sɩ, “Má sɩ́ disiniŋ kɛŋ, bɛɛ wɩaa mɩ ma bɩ disiniŋ kɛnɛ.”

¹⁷ Ma sɩ yie chʋchʋɔlɛ Wɩa a kɛnʋ yɩyɩrɛ ma Nyɩmma ŋɩɩ dɩ ʋ pɛ ma lɛ, ma jɩŋ arɩ ʋ nɩɩ dii nɩaa sarɩya, ʋ bɩ ba kaa pɔrɛ. Ʋ yie dii nʋʋkala sarɩya a magɛ ŋɩɩ ŋ wɩɩŋ sɩ maga nɛ. Má saa fáʋ a leŋ dɩ ma wʋŋaalaa zɔŋ dʋnɩa deeŋ lɛ.

¹⁸ Ma kala jɩma arɩ Yesu Kirisito tiŋ ma chɩmɩŋ nɛ, a lɩɩsɛma wʋpɛɩba-la ma naabalɩmaba fa sɩ joŋo dagɛma, ma ŋɩŋaa lɛ. Ʋ bɩ naga arɩ kɩalɩŋ sɩɩ chei a nagɛ sɛlɩmɛ koo hɔɔ-pʋla nɛ ʋ joŋo time laama.

¹⁹ Ama Yesu Kirisito chalɩŋ sɩ kɛŋ yuŋuŋ kɩɩ kʋŋkala nɛ ʋ joŋo time laama. Yesu nagɛ pie-bie sɩ bɩ nyɔɔ kala kɛnɛ nɛ.

²⁰ Bumbuŋ kala, ka dɩ Wɩa-na ŋaa dʋnɩa, ʋ lɩɩsɛ Yesu Kirisito nɛ dɩ ʋ to ʋ lɛ a laa dʋnɩa nɩaa ta. Ama Wɩa leŋe ʋ kɔ nɛ dʋnɩa deeŋ dɩdɛrɩŋ, ma wɩaa.

²¹ Ma to ʋ lɛ nɛ a laa Wɩa wɩaa dii. Ʋ nɛ chɩsɛ Yesu sʋʋŋ lɛ a pʋ yɩrɩŋ. Ŋɩɩ wɩaa ma laa diiniŋ arɩ ma yɩɛlaa kala hɛ Wɩa lɛ nɛ.

²² A tɩŋ ma sɩɩ to wʋtɩtɩɩ wombiiŋ lɛ ŋɩɩ, ma pɩɩsɛ ma disiniŋ kala ta nɛ. Ma sɛnɛ cho ma naambiiri-la sɩ laa Wɩa wɩaa dii nɛ. Ŋɩɩ wɩaa, má kɛŋ ma tʋɔŋ arɩ ma doluŋ kala a wasa cho dɔŋɔ.

²³ Ʋ naga ba wasa lʋlma nɛ a tɩŋ Wɩa niiŋ wɩaa sɩɩ pɩ nɩaa mɩɩsɩŋ. Ba nɛ pɩma mɩɩ-falɩŋ. Ba bɩ jaŋ pʋa, ba jaŋ hɛ nɩmɛ a kaa mʋ wuu. Ʋ bɩ nagɛ nuhuobiine sɩɩ sʋʋ nɛ pɩma mɩɩsɩŋ deeŋ. Ama Wɩa sɩ bɩ sʋʋ nɛ pɩma.

²⁴ Ba ŋmʋnsɛ Wɩa teniŋ tʋɔŋ a bʋl, “Nuhuobiine kala nagɛ yaŋ nɛ. Ba tʋla ma kala nagɛ ya-fɩɩlaa. Yaŋ-la yie hɩl, ya-fɩɩla-la ma yuori.

²⁵ Ama Wɩa niiŋ wɩaa-na jaŋ hɛ nɩmɛ a kaa mʋ wuu.” Wɩa niiŋ wɩalɩŋ nɛ ŋaa wʋzɔmɔ-la ba sɩ bʋla pɩma.