1 KUOROO 9 - WƖA TENIŊ

La TƖƖNA bɩra kɛŋ ʋ tɩtɩa kʋ dagɛ Solomoŋ

¹ Solomoŋ sɩ saa La TƖƖNA dɩɩ-bal-la arɩ ʋ kuoru dɩa dɛrɛ, a ŋaa wɩalɩŋ kala ʋ sɩɩ chɛ,

² bʋa kʋbala lɛ La TƖƖNA bɩra kɛŋ ʋ tɩtɩa kʋ dagʋ lɩa arɩ ʋ fa sɩ laa sɩpaaŋ ŋaa ŋɩɩ Gibioŋ lɛ.

³ La TƖƖNA bʋla pʋ, “Mɩ nɩɩ ŋ Wɩɩsʋlʋŋ nɛ. Mɩ dɩɩ-balɩŋ deeŋ ŋ sɩ saa dɩ ba dɩdɛnnɛmɛ nɩmɛ, ŋaa mɩ kʋa nɛ, mɩ sɩaa arɩ mɩ tʋɔŋ kala jaŋ hɛ ʋ lɛ bʋa na-kala.

⁴ Ŋ-na Solomoŋ, dɩ ŋ nɛ tomi arɩ wʋtɩtɩɩ a ŋɩŋaa wɩaa ba bʋa lɛ, arɩ ŋɩɩ ŋ nyɩmma Devit fa sɩ tomi, a ŋaa wɩalɩŋ kala mɩ sɩ daga, a to mɩ niiriŋ arɩ wombie-la mɩ sɩ bile,

⁵ mɩ jaŋ leŋ dɩ ŋ kuoruŋ chɩŋ Iziral tinteeŋ lɛ a kaa mʋ wuu, arɩ mɩ fa sɩ hɛ niiŋ ŋɩɩ a pɩ ŋ nyɩmma Devit, bʋa-la lɛ mɩ sɩ sɩ, ‘Ŋ doho nɩaa nɛ jaŋ didii kuoruŋ Iziral lɛ.’

⁶ Ama dɩ ŋ-na, koo dɩ ŋ doho nɩaa kʋŋ nɛ vɩamɛ a bɩ wɩalɩŋ mɩ sɩ daga arɩ mɩ niiriŋ ka to, aŋ mɩɩra mʋ tuto vesiŋ a kpʋkpaarɛba,

⁷ ŋɩɩ-na, mɩ jaŋ kiri ma Iziral tɩŋŋaa ta tintee-la mɩ sɩ joŋo pɩma lɛ, aŋ vɩa mɩ dɩɩ-balɩŋ deeŋ mɩ sɩ lɩɩsa ʋ ŋaa mɩ kʋŋ dɩ ba dɩdɛnnɛmɛ nɩmɛ ta. Dɩ ŋɩɩ nɛ ŋaa, ma Iziral tɩŋŋaa kala jaŋ mɩɩra ŋaa nɩtɔɔnɩ dɩ nɩaa kala mʋmɔmma.

⁸ Lɛɛlɛ-na mɩ dɩɩ-balɩŋ deeŋ kɛŋ yɩrɩŋ nɛ woruŋ, ama dɩ ŋɩɩ nɛ ŋaa, nʋʋkala sɩ jaŋ to dɩa deeŋ bʋbʋɔŋ bɩbal jaŋ naʋ dɩ ʋ ŋaaʋ wʋkpuŋkpere dɩ ʋ pɩɛsɛ, ‘Bɛɛ nɛ tɩɩ La TƖƖNA ŋaa tinteeŋ deeŋ arɩ Wɩa dɩɩ-balɩŋ deeŋ ŋ-la?’

⁹ Nɩaa jaŋ bʋla pɩba, ‘Ba vɩa dɩ ba to ba TƖƖNA, ba nyɩmmaba Wɩa sɩ kɛmba kaa kʋ lɩɩ Ijipiti tinteeŋ lɛ nɛ, aŋ mɩɩra tuto vesiŋ a kpʋkpaarɛba, ŋɩɩ nɛ tɩɩ ʋ joŋ wʋlɔrʋnʋŋ deemba kala ŋaa ba lɛ.’ ”

Solomoŋ tɩntɩŋŋaa dɔnsʋŋ

¹⁰ Jɩsɩŋ mara nɛ Solomoŋ fa joŋ a saa La TƖƖNA dɩɩ-bal-la arɩ ʋ kuoru dɩa.

¹¹ Kuoro Solomoŋ fa joŋ tasɩŋ mara nɛ Galilii tinteeŋ lɛ a pɩ Taaya kuoro Hɩram, bɛɛ wɩaa Hɩram nɛ fa pʋ kuolu daasɩŋ arɩ bʋtʋma daasɩŋ arɩ sɛlɩmɛ-la kala ʋ fa sɩɩ chɛ.

¹² Ama Hɩram fa sɩ sii lɩɩ Taaya a mʋ na tasɩ-la Solomoŋ sɩ joŋo pʋ, ʋ tʋɔŋ fa bɩ ba nyuŋ tɔrɔ.

¹³ Ʋ pɩɛsɛ, “Bɛɛ kɩaa tasɩŋ nɛ ŋ-la ŋ joŋo pɩmɛ, mɩ naambii?” Ŋɩɩ nɛ ʋ hɛ tasɩ-la yɩrɩŋ Kabʋl. (Ʋ bʋbʋɔŋ nɛ: Ba bɩ bʋbʋɔ kɛnɛ.) Tasɩ-la yɩrɩŋ nɛ ha ŋɩɩ arɩ jɩnɩŋ kala.

¹⁴ Hɩram fa joŋ sɛlɩmɛ yuŋuŋ sɩ ŋaa kilo bʋɩ banɔŋ nɛ a pa ba kaa mʋ pɩ kuoro.

¹⁵ Kuoro Solomoŋ sɩ fʋgɛ ʋ tɩntɩnnaa hɛ ba saa La TƖƖNA dɩɩ-bal-la arɩ ʋ kuoru dɩa dɛrɛ, ʋ leŋ ba chʋŋ hagɩla a dɩŋ Jerusalɛm wɩɩpɔsʋŋ dɩɩrɩŋ, aŋ saa kɛrɛ a golli taŋ-la, a wasa saa tasɩŋ deemba ma: Hazɔ, Mɛgɩdɔ arɩ Gɛza.

¹⁶ Ijipiti tinteeŋ kuoro fa yuo dii Gɛza nɛ, a joŋ nyiniŋ hɛ ʋ dii. Kɛnaŋ tɩŋŋaa nɛ fa hɔŋ nɩmɛ. Ʋ kpʋ ba kala aŋ joŋ taŋ-la dii zile pɩ ʋ tolo-la sɩ jaa Solomoŋ.

¹⁷ Ŋɩɩ nɛ Solomoŋ wasa saa Gɛza. Ʋ fa wasa saa Bɛf Horoŋ sɛmɛ-la ma sɩ hɛ bʋbʋɔŋ nɛ,

¹⁸ arɩ Baalaf, arɩ Tama ma sɩ hɛ Juda tintee-hɩlɩŋ lɛ,

¹⁹ a pɛ tasɩ-la kala lɛ ʋ sɩ saa ʋ chʋgʋsʋŋ dɩ-bilee arɩ tabala-la lɛ ʋ janɩŋ arɩ laalɩŋ janɩŋ torukoba sɩɩ chɩŋ. Ʋ saa dɩa na-kala ʋ sɩ cho nɛ Jerusalɛm lɛ arɩ Lɛbanɔŋ tinteeŋ lɛ arɩ lere-la kala ʋ sɩɩ beŋ lɛ.

²⁰ Nɩalɩŋ fa sɩ ka tintee-la lɛ nɛ ŋaa: Amɔrɩ tɩŋŋaa, Hiti tɩŋŋaa, Pɛrɛs tɩŋŋaa, Hivi tɩŋŋaa arɩ Jebus tɩŋŋaa (nɩaa deemba fa bɩ Iziral tɩmma ŋaa).

²¹ Nɩalɩŋ doho nɩkaana-la Iziral tɩŋŋaa fa sɩ bɩ kpʋa nɛ ŋɩɩ. Ba nɛ Solomoŋ leŋ ba ŋaa ʋ yosuŋ ʋ fʋga hɛ ba tɩtɩŋ tɩntɩŋŋaa, arɩ jɩnɩŋ kala.

²² Ama Solomoŋ fa bɩ leŋe Iziral tɩɩna kala ŋaa yomo. Ba nɛ fa ŋaa ʋ laalɩyuoroo, arɩ ʋ tɩntɩnnɩ-hɩasɩŋ, arɩ sɩpaalaaraa arɩ ʋ laalɩyuori-hɩasɩŋ arɩ ʋ laalɩŋ janɩŋ torukoba nɩhɩasɩŋ arɩ nɩalɩŋ sɩ kɛŋ torukoba-la vɩvɛŋ.

²³ Ba nɛ fa bɩra ŋaa tɩntɩnnɩ-hɩasɩ-la zɔɔ-banɔŋ arɩ mahɩŋ balɩa arɩ fii Solomoŋ sɩ lɩɩsa ba bibeŋ nɩalɩŋ sɩɩ saa ʋ dɩɩsɩŋ.

²⁴ Solomoŋ haala Ijipiti tinteeŋ kuoro tolo-la sɩ lɩɩ Devit tabal-la lɛ a kɔ kuoru dɩa-la Solomoŋ sɩ saa pʋ, Solomoŋ bɩra leŋ ba chʋŋ hagɩla a dɩŋ tabal-la wɩɩpɔsʋŋ dɩɩrɩŋ.

²⁵ Jɩna tʋɔŋ, naansɩɩŋ butori nɛ Solomoŋ yie kpʋ pʋsʋŋ a ŋaa kʋnyɩgaa Wɩɩsʋlʋŋ arɩ nii-magɛ dɔŋɔ Wɩɩsʋlʋŋ a nyɩgɛ kʋsʋɔrʋsʋŋ koru-la ʋ sɩ saa nyuŋ a pɩ La TƖƖNA. Ʋ lɛɛlɛ saa Wɩa dɩɩ-bal-la dɛrɛ nɛ ŋɩɩ.

²⁶ Kuoro Solomoŋ fa bɩra kpaasɛ lɩɩŋ daborusuŋ ma nɛ taŋ-la ba sɩɩ yɩrɛ Ɛzɩɔŋ Geba lɛ, a kpagɛ Ɛlaf sɩ hɛ Ɛdɔm tinteeŋ, Mʋgʋ-fɩaŋ niiŋ.

²⁷ Hiram hɛ ʋ nɩalɩŋ sɩ jɩŋ lɩɩŋ daborusuŋ kaa vɛnɩŋ, ba mʋ pɛ Solomoŋ nɩaa lɛ ba tɩtɩŋ mʋgʋ-bal-la tʋɔŋ.

²⁸ Ba duoro mʋ tintee-la ba sɩɩ yɩrɛ Ofi a kɛŋ sɛlɩmɛ yuŋuŋ sɩ yi kilo bʋɩ fii arɩ banɛsɛ a kaa mɩɩra kʋ pɩ kuoro Solomoŋ.