1 KUOROO 7 - WƖA TENIŊ

Solomoŋ saa ʋ kuoru dɩa

¹ Solomoŋ fa joŋ jɩsɩŋ fii arɩ batori nɛ a kaa saa ʋ kuoru dɩa dɛrɛ.

^2-3 Ʋ saa kuoru dɩa-la dɩɩsɩŋ dɔŋɔ ʋ yʋgɛ nɛ woruŋ ba kaa yɩyɩrɛ Lɛbanɔŋ duuŋ. Ʋ duomuŋ ŋaa naakieliŋ mahɩŋ balɩa arɩ fii, jalɩŋ ma ŋaa naakieliŋ mara arɩ banɔŋ, ka leŋiŋ ma ŋaa naakieliŋ fii arɩ banɔŋ. Ba fa pɛ kuolo daasɩŋ naaderee banɛsɛ nɛ. Naaderi kala kɛŋ daasɩŋ fii arɩ banɔŋ. Ba joŋ kuolo doloo a gɛrɛ kɩalɩŋ sɩ pɛ lɛ. Kuolu daasɩ-la tɩtɩa nɛ ba kaa pilimi dɩa-la nyuŋ.

⁴ Ʋ hɛ dɩa-la tokoroba batori batori nɛ sɛmɛ kala a leŋ ba chaasɛ dɔŋɔ.

⁵ Dɩa-la boiŋ niiree ŋaa batori batori nɛ sɛmɛ na-kala a kɛŋ gʋnaa banɛsɛ banɛsɛ a chaasa dɔŋɔ dɩɩ-bal-la sɩpaaŋ.

⁶ Ʋ saa dɩɩ-balɩŋ dɔŋɔ ma, ʋ duomuŋ ŋaa naakieliŋ mara arɩ banɔŋ, jalɩŋ ma ŋaa naakieliŋ fii arɩ banɔŋ. Ba saa jebii-duduo-biisiŋ a hɛ zawʋra dɩa-la sɩpaaŋ.

⁷ Ŋɩɩ nɛ Solomoŋ saa dɩa-la lɛ ʋ kuoru kpasa sɩɩ chɩŋ. Nɩmɛ nɛ ʋ hɔnɔ didii sarɩya. Kuolu daasɩŋ nɛ ʋ kaa kɩɛla tɔ ʋ kala, a chɩŋ tinteeŋ a jɩla yagɛ chosuŋ lɛ.

⁸ Kuoru dɩa-la sɛmɛ-la Solomoŋ tɩtɩa fa sɩɩ jʋʋ hɛ dɩa-la lɛ ʋ sɩ hɔnɔ didii sarɩya harɩŋ nɛ. Ʋ dɩ sarɩya dɩ-diiliŋ dɩa-la kala nagɛ dɔŋɔ. Dɩa-la dɔŋɔ tɩtɩa nɛ ʋ saa pɩ Ijipiti tinteeŋ kuoro tolo-la ʋ sɩ jaa.

⁹ Dɩɩsɩŋ deemba kala, a chɩŋ ba gentine a kaa jɩl dɩdɛrɩŋ arɩ kaalɩ-jalɩɩ-la, tabɩɩ-duoruŋ ba sɩ kɛŋ sɔɔba wasa ta ba magɛ dɔŋɔ nɛ, ba kaa saaba.

¹⁰ Tabɩɩ-duoruŋ sɩ jalɩa nɛ ba kaa bil dɩɩsɩŋ deemba gentine. Tabɩa-la dɔnsʋŋ duomuŋ ŋaa naakieliŋ bʋnɔŋ nɛ, dɔnsʋŋ ma naakeliŋ bʋnɛsɛ.

¹¹ Ba bɩra joŋ tabɩɩ-duoruŋ dɔnsʋŋ ba sɩ yɛrɛ ba magɛ dɔŋɔ arɩ kuolu doloo a daŋa pɛ dɩa-la gentine tabɩaa lɛ.

¹² Kuoru dɩa-la kaalɩ-balɩŋ ba kɛŋ tabɩa-la ba sɩ wasa ta nɛ a kaa saa ʋ kɛrɛ. Dɩ ba nɛ saa tiebiee batori na-kala, ba yie joŋ kuolu daaŋ a daŋ, arɩ ba sɩ saa La TƖƖNA dɩɩ-bal-la kaalɩ-bie arɩ zawʋra-la ŋɩɩ.

Wɩa dɩɩ-bal-la tʋɔŋ kɩaa

¹³ Ŋɩɩ nɛ Solomoŋ tɩŋ nɩaa ba mʋ taŋ-la ba sɩɩ yɩrɛ Taaya a kɛŋ baal kʋbala ba sɩɩ yɩrɛ Huram kɔ.

¹⁴ Ʋ naaŋ fa ŋaa yo-haal nɛ, a lɩɩ Nafɩtalɩ doho nɩaa tʋɔŋ. Ʋ nyɩmma ma fa ŋaa Taaya tɩɩna nɛ a tɩtɩŋ kɔlɩɩŋ tɩntɩŋŋaa. Huram fa jɩŋ kɔlɩɩŋ tɩntɩŋŋaa nɛ woruŋ, a kaa tɩŋ tɩntɩŋ-dosunuŋ kala. Ʋ kɔ a sɛɩ kɔlɩɩŋ tɩntɩmɩa-la kala Solomoŋ sɩ sɩ ʋ tɩŋ Wɩa dɩɩ-bal-la lɛ.

¹⁵ Ʋ kɛŋ kɔlɩɩŋ a libi kɩaa balɩa sɩ nagɛ jebie. Ba leŋiŋ ŋaa naakieliŋ nibi, ba barɩmɩŋ ma ŋaa naakieliŋ bʋlɩdʋ.

¹⁶ Ʋ bɩra kɛŋ kɔlɩɩ-la nɛ a libi kɩaa ba nagɛ nyunchuulo a sagɛ jebie-la nyuŋ. Ba kʋŋkala leŋiŋ ŋaa naakieliŋ bʋlɩa arɩ kpaa magɛ dɔŋɔ.

¹⁷ Kɩalɩŋ lɛ ba libi chɔrʋmɔɔ a hɛ a kpɩɛrɛba a sagɛ jebie-la nyuŋ, naaderee balɩpɛ.

¹⁸ Ʋ bɩra libi kɩaa ba nagɛ kampoi nɛnɛɛ a kɩɛlɛ naaderee balɩa a kpɩɛrɛ kɩalɩŋ sɩ nagɛ nyunchuuluŋ a sagɛ jebie-la nyuŋ a golli. Ʋ ŋaa ŋɩɩ nɛ ba kʋŋkala lɛ.

¹⁹ Kɩalɩŋ sɩ nagɛ nyunchuuluŋ a sagɛ jebie-la sɩ hɛ zawʋra-la lɛ, ba kʋŋkala nagɛ tɩɩfɩɩlaa nɛ, ba leŋiŋ ŋaa naakieliŋ bʋlɩa.

²⁰ Chɔrʋmɔ-la ba sɩ ŋaa a kpɩɛra hɛ kɩalɩŋ sɩ nagɛ nyunchuuluŋ lɛ fa hɛ jebie-la balɩa nyuŋ nɛ. Ka ba ŋaa kɩalɩŋ sɩ nagɛ kampoi nɛnɛɛ zɔɔ-balɩa a kɩɛla golliba.

²¹ Huram joŋ kɔlɩɩŋ jebie-la balɩa a pɛ zawʋra-la sɩ hɛ Wɩa dɩɩ-bal-la boiŋ niiŋ sɛsɩŋ. Kʋ-la sɩ hɛ wɩɩpɔsʋŋ nadiiŋ ʋ hɛ ʋ yɩrɩŋ Jakɩŋ, kʋ-la ma sɩ hɛ wɩɩpɔsʋŋ nagʋa, ʋ hɛ ʋ yɩrɩŋ Bʋas.

²² Ka kɩalɩŋ sɩ nagɛ tɩɩfɩɩlaa hɛ jebie-la nyuŋ. Ŋɩɩ nɛ ʋ tɩŋ jebie-la tɩntɩŋŋaa dɛrɛ.

²³ Ŋɩɩ nɛ Huram kɛŋ kɔlɩɩŋ a libi taasɩ-gbaŋ-balɩŋ ʋ ŋaa gulogulo. Ʋ jalɩŋ ŋaa naakieliŋ bʋnɔŋ a chɩŋ niiŋ dɔŋɔ a mʋmʋ dɔŋɔ, ʋ luŋuŋ ma ŋaa naakieliŋ bʋlɩa arɩ kpaa magɛ dɔŋɔ. Ʋ gulluŋ ma ŋaa naakieliŋ fii arɩ banɔŋ.

²⁴ Gbaŋa-la niipiniŋ lɛ, ʋ kɛŋ kɔlɩɩŋ a ŋaa lonnuŋ naaderee balɩa a mɛrɛ golli ʋ kala. Naakieliŋ kpaa magɛ dɔŋɔ na-kala pɛgɛ, lonnuŋ fii nɛ hɛ nɩmɛ.

²⁵ Taasɩ-gbaŋ-bal-la sagɛ nɛ-belliŋ fii arɩ balɩa nyuŋ nɛ. Nɛ-belli-la batori sɩaa chaasɛ wɩɩpɔsʋŋ nagʋa dɩɩrɩŋ nɛ, batori ma sɩaa chaasɛ wɩɩjʋʋlʋŋ dɩɩrɩŋ, ka batori sɩaa chaasɛ wɩɩpɔsʋŋ nadiiŋ dɩɩrɩŋ, ka batori ma sɩaa chaasɛ wɩɩpɔsʋŋ dɩɩrɩŋ. Gbaŋa-la sagɛ ba nyuŋ nɛ ka ba kala bʋbʋɔŋ chaasɛ dɔŋɔ.

²⁶ Taasɩ-gbaŋa-la barɩmɩŋ ŋaa vama nɛ, aŋ ka ʋ niipiniŋ nagɛ nyʋnyʋala niipiniŋ, a nagɛ tɩɩfɩɩlaa. Ʋ tʋɔŋ lɩɩŋ ŋaa galamba bʋɩ fii arɩ kʋbala arɩ zɔɔ-banɔŋ nɛ.

²⁷ Huram bɩra kɛŋ kɔlɩɩŋ a libi kɩaa sɩɩ vɛŋ a nagɛ torukoba, ba kɩaa fii. Ba kʋŋkala duomuŋ ŋaa naakieliŋ bʋlɩa, jalɩŋ ma ŋaa naakieliŋ bʋlɩa ka leŋiŋ ŋaa naakieli bala arɩ kpaa magɛ dɔŋɔ.

²⁸ Ŋɩɩ ʋ sɩ ŋaa kɩalɩŋ nɛ ŋ-la: Ʋ ŋaaba ba kɛŋ sɛsɩŋ banɛsɛ nɛ, aŋ hɛ hɔɔ-daaterigeba gʋnaa lɛ, a joŋ hɔɔtaalɩŋ hɛ ba pɛgɩsɩŋ.

²⁹ Hɔɔtaalɩ-la lɛ, ʋ ŋaa kɩaa ba nagɛ naachigee, nɛ-belliŋ arɩ kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ a hɛ. Naachige-la arɩ nɛ-belli-la nyuŋ arɩ bʋbʋɔŋ kala, ʋ libi kɩaa sɩ nagɛ tɩɩfɩɩlaa nɛ a kaa kpɩɛrɛ.

³⁰ Torukoba-la kʋŋkala kɛŋ kɔlɩɩŋ gɩrɩŋgɩrɩmba banɛsɛ nɛ, hɔɔ-daaterigeba tʋʋ ba lɛ, a kɛŋ gʋnaa banɛsɛ, taasɩ-gbaŋa-la daŋ ʋ nyuŋ. Ʋ kpɩɛrɛ kɩalɩŋ sɩ chagɛ gbaŋa-la kɩɩ arɩ kɩalɩŋ ʋ sɩ libe ba nagɛ tɩɩfɩɩlaa.

³¹ Torukoba-la tʋɔŋ fa kɛŋ bʋa nɛ a ŋaa gulogulo, ʋ luŋuŋ ŋaa naakieliŋ kpaa magɛ dɔŋɔ arɩ mʋa, gbaŋa-la sɩ tagɩlɛ kʋ-la lɛ ma niiŋ ŋaa gulogulo. Kʋ-la nyuŋ ʋ sɩ saga ŋaa naakieli bala arɩ mʋa nɛ. Ba saa kɩaa nɛ a golli torukoba-la niiŋ a golli. Torukoba-la niiŋ ŋaa gʋnaa banɛsɛ nɛ, ʋ bɩ gulogulo ŋaa.

³² Gɩrɩŋgɩrɩmba-la banɛsɛ nɛ hɛ torukoba-la bʋbʋɔŋ, ba hɔɔ-daaterigeba fa mɛrɛ torukoba-la lɛ nɛ. Gɩrɩŋgɩrɩmba-la kʋŋkala jalɩŋ ŋaa naakieliŋ kpaa magɛ dɔŋɔ arɩ mʋa nɛ.

³³ Gɩrɩŋgɩrɩmba-la fa nagɛ laalɩŋ janɩŋ torukoba kɩaa nɛ. Ba hɔɔŋ daaterigeba, gɩrɩŋgɩrɩmba, ba sipuusiba arɩ hɔpʋba kala kɔlɩɩŋ nɛ ʋ kaa libi.

³⁴ Torukoba-la kʋŋkala lɛ, dɩ-kɛnɛɛ banɛsɛ nɛ hɛ nɩmɛ a mɛrɛ gʋnaa lɛ.

³⁵ Toruko-la nyuŋ, kʋgugulii nɛ ʋ libe hɛ, ʋ luŋuŋ ŋaa naakieliŋ mʋa tuo kpaa magɛ dɔŋɔ. Kɩalɩŋ sɩ chagɛ gbaŋa-la kɩɩ arɩ hɔɔtaalɩ-la kala mɛrɛ torukoba-la lɛ nɛ.

³⁶ Ʋ higi kɩalɩŋ sɩ kɛŋ kɩŋkɛnsɩŋ a nagɛ Wɩa tɩndaaraa, naachigee arɩ abɛ tɩɩsɩŋ a hɛ kɩalɩŋ sɩ chagɛ torukoba-la, lee na-kala wuoluŋ sɩ hɛ. Ʋ joŋ kɩalɩŋ sɩ nagɛ tɩɩfɩɩlaa a kpɩɛrɛ ʋ kala a golli.

³⁷ Ŋɩɩ Huram sɩ libi torukoba-la fii nɛ ŋɩɩ. Ʋ libiba ba kala nagɛ dɔŋɔ nɛ, a magɛ dɔŋɔ ma.

³⁸ Ʋ bɩra kɛŋ kɔlɩɩŋ a libi taasɩ-gbansɩŋ fii. Ba kʋŋkala tʋɔŋ ka jʋʋ lɩɩŋ galamba zɔɔ-balɩa arɩ mara arɩ fii nɛ. Ba kʋŋkala jalɩŋ ŋaa naakieliŋ bʋlɩa nɛ. Ba joŋ taasɩ-gbansɩ-la kʋŋ kʋŋ a daŋ torukoba-la nyuŋ.

³⁹ Ʋ joŋ torukoba-la kɩaa banɔŋ a bil Wɩa dɩɩ-bal-la tʋɔŋ wɩɩpɔsʋŋ nadiiŋ, aŋ joŋ banɔŋ ma a bil wɩɩpɔsʋŋ nagʋa, aŋ joŋ taasɩ-gbaŋa-la ma a bil wɩɩpɔsʋŋ nadiiŋ arɩ wɩɩpɔsʋŋ dɩɩrɩŋ gʋnʋŋ lɛ.

⁴⁰ Huram bɩra libi taasɩ-gbansɩŋ, safʋlba arɩ kʋmɩsɩrɩ gbansɩŋ. Ŋɩɩ nɛ ʋ tɩŋ tɩntɩmɩa-la kala kuoro Solomoŋ sɩ sɩ dɩ ʋ tɩŋ La TƖƖNA dɩɩ-bal-la lɛ a dɛrɛ. Kɩalɩŋ dɔnsʋŋ ʋ sɩ ŋaa nɛ ŋ-la:

⁴¹ Jebie-la balɩa, kɩalɩŋ balɩa ʋ sɩ libe ba nagɛ gbaŋa a sagɛ jebie-la balɩa nyuŋ arɩ kɩalɩŋ balɩa ba sɩ ŋaa ba nagɛ chɔrʋmɔɔ ba kaa kpɩɛrɛ gbansɩ-la sɩ sagɛ jebie-la nyuŋ,

⁴² kɩalɩŋ sɩ nagɛ kampoi nɛnɛɛ zɔɔ-banɛsɛ ʋ sɩ kɛŋ kɔlɩɩŋ libi tʋŋ-bʋlɩa (a kɛmba kɩɛlɛ naadere-la balɩa, a kpɩɛrɛ kɩalɩŋ sɩ nagɛ gbaŋa a sagɛ kɔlɩɩŋ jebie-la nyuŋ),

⁴³ torukoba fii arɩ ba taasɩ-gbansɩŋ ma fii,

⁴⁴ taasɩ-gbaŋ-bal-la arɩ nɛ-belli-la fii arɩ balɩa nyuŋ ʋ sɩ saga,

⁴⁵ puposuŋ, safʋlba arɩ kʋmɩsɩrɩ gbansɩ-la. Kɩaa deemba kala Huram sɩ ŋaa a pɩ Solomoŋ ʋ bil La TƖƖNA dɩɩ-bal-la lɛ, kɔlɩɩŋ nɛ ʋ kaa ŋaa.

⁴⁶ Kuoro leŋe ba chɔ kɔlɩɩŋ nɛ a bɩsa hɛ chʋrʋŋ ba sɩ kaa mɛ kɩaa lɛ a ŋaa kɩalɩŋ Sʋkɔf arɩ Zarɛtaŋ pɛgɛ, Jɔdaŋ tintee-taala-la lɛ.

⁴⁷ Solomoŋ fa bɩ leŋe ba magɩsɛ kɔlɩɩŋ kɩaa deemba kala ʋ jɩŋ ba yuŋuŋ, bɛɛ wɩaa ba fa yʋga nɛ kɩŋkɛŋ. Ʋ bɩ wuo jɩŋ kɔlɩɩ-la sɩ magɛ ŋɩɩ ba kaa ŋaaba.

⁴⁸ Solomoŋ bɩra leŋ ba kɛŋ sɛlɩmɛ a ŋaa La Tɩɩna dɩɩ-bal-la kɩaa deemba: Wɩɩsʋllɩ koruŋ, teebʋl-la nyuŋ ba sɩ yie joŋ boroboro daŋ La TƖƖNA sɩpaaŋ,

⁴⁹ arɩ chaaŋ daasɩŋ. Banɔŋ hɛ nadiiŋ, banɔŋ ma hɛ nagʋa, a chɩŋ Wɩa dɩa-la lee-la sɩ chaasa zɔŋ sɩpaaŋ. Tɩɩ-fɩɩlaa, chaanaa arɩ chɛŋŋɛɛ,

⁵⁰ gbansɩŋ, kɩalɩŋ ba sɩ kaa kikeri chaaŋ ŋmɛnɩŋ, kʋmɩsɩrɩ gbansɩŋ, kʋsʋɔrʋsʋŋ hɛnsɩŋ arɩ nyiniŋ hɛntɛrɛɛ, Wɩa dɩa-la lee-la zɔmʋŋ sɩ bɩ magɩa kɛnɛ borusuŋ wenjeba, arɩ Wɩa dɩa-la dɩɩ-balɩŋ borusuŋ.

⁵¹ Solomoŋ sɩ tɩŋ La TƖƖNA dɩɩ-bal-la tɩntɩŋŋaa kala dɛrɛ, ʋ paa kɩalɩŋ kala ʋ nyɩmma Devit fa sɩ joŋo pɩ La TƖƖNA a kaa jʋʋ bil La TƖƖNA dɩɩ-bal-la tʋɔŋ, ba dʋa dɩ-biliŋ. Kɩalɩŋ nɛ sɛlɩmɛ arɩ hɔpʋla arɩ kɩaa dɔnsʋŋ.