1 KUOROO 6 - WƖA TENIŊ

Solomoŋ saa Wɩa dɩɩ-balɩŋ

¹ Iziral tɩŋŋaa sɩ lɩɩ Ijipiti tinteeŋ lɛ, ʋ jɩsɩŋ zɔɔ-banɛsɛ arɩ mahɩŋ banɛsɛ lɛ, bʋa-la lɛ dɩ Solomoŋ ma sɩ dii kuoruŋ Iziral tinteeŋ lɛ ʋ jɩsɩŋ banɛsɛ nɛ ŋɩɩ. Jɩ-nɛsɛ-la tʋɔŋ chɛŋ-lɩa ba sɩɩ yɩrɛ Zif lɛ nɛ ʋ suomo sɩsaa La TƖƖNA dɩɩ-balɩŋ.

² Dɩɩ-bal-la kuoro Solomoŋ sɩ saa pɩ La TƖƖNA tʋɔŋ duomuŋ ŋaa naakieliŋ mara arɩ fii nɛ. Ʋ jalɩŋ ma ŋaa naakieliŋ fii, ka ʋ leŋiŋ ma ŋaa naakieliŋ fii arɩ banɔŋ.

³ Wɩa dɩɩ-bal-la zawʋra ŋ sɩ jaŋ jʋʋ aŋ-na jʋʋ dɩa-la tɩtɩa tʋɔŋ jalɩŋ ŋaa naakieliŋ fii nɛ, ʋ dɩ dɩa-la jalɩŋ kala magɛ dɔŋɔ, ka ʋ duomuŋ ŋaa naakieliŋ bʋnɔŋ.

⁴ Wɩa dɩɩ-bal-la tokoroba fa muuro nɛ dɩ ŋ nɛ chɩŋ jeeŋ harɩŋ aŋ beŋ, aŋ ka tʋɔŋ, ba jal.

⁵ Ʋ saa dɩɩsɩŋ batori nɛ a sugili dɔŋɔ lɛ a mɛrɛ Wɩa dɩɩ-bal-la jeeŋ lɛ a golli.

⁶ Bʋbʋɔŋ dɩa-la dɩɩsɩŋ jalɩŋ ŋaa naakieliŋ bʋlɩa arɩ kpaa magɛ dɔŋɔ nɛ, tʋtʋɔbaanɩŋ kɩaa jalɩŋ ma ŋaa naakieliŋ butori, ka nyuŋ kɩaa ma ŋaa naakeliŋ butori arɩ kpaa magɛ dɔŋɔ. Solomoŋ fa leŋe ba saa Wɩa dɩɩ-bal-la ʋ kɛŋ gʋnaa nɛ harɩŋ, dɩ daasɩ-la daŋ ba nyuŋ aŋ sɩ́ jebii-la jʋʋ.

⁷ Tabɩa-la ba sɩ kaa saa Wɩa dɩɩ-bal-la, ba wasɛ ba kala ta nɛ lee-la ba sɩɩ yɛrɛ tabɩaa, ŋɩɩ wɩaa bʋa-la lɛ ba sɩɩ saa dɩa-la, ba bɩra bɩ hama koo hɔɔŋ kʋŋkala dɔmɔ nɩa lee-la ka ba saa dɩa-la dɛrɛ.

⁸ Boi-la ba sɩ to jʋjʋʋ bʋbʋɔŋ dɩa-la hɛ wɩɩpɔsʋŋ nadiiŋ nɛ, aŋ ka lusuŋ-choluŋ hɛ nɩmɛ a jɩjɩl tʋtʋɔbaanɩŋ dɩa-la arɩ dɩɩ-tori-la.

⁹ Ŋɩɩ nɛ Solomoŋ saa Wɩa dɩɩ-bal-la a dɛrɛ, a kɛŋ kuolu doloo arɩ kuolu daaborusuŋ a yuo.

¹⁰ Dɩɩ-biisiŋ ʋ sɩ saa a golli Wɩa dɩɩ-bal-la, ba kʋŋkala leŋiŋ ŋaa naakieliŋ bʋlɩa arɩ kpaa magɛ dɔŋɔ nɛ a yelli Wɩa dɩɩ-bal-la jebiiŋ ka kuolu daasɩ-la mʋ tɩgɛ Wɩa dɩɩ-bal-la lɛ.

¹¹ Ŋɩɩ nɛ La TƖƖNA bʋl wɩaa a pɩ Solomoŋ:

¹² “Mɩ dɩɩ-balɩŋ deeŋ ŋ sɩɩ saa, dɩ ŋ nɛ to mɩ niiŋ arɩ mɩ wombiee arɩ wɩalɩŋ kala mɩ sɩ daga, mɩ jaŋ to ŋ lɛ a ŋaa wɩalɩŋ kala mɩ fa sɩ bʋla pɩ ŋ nyɩmma Devit.

¹³ Mɩ jaŋ guoli mɩ nɩaa Iziral tɩŋŋaa tʋɔŋ, mɩ bɩ jaŋ vɩaba ta.”

¹⁴ Ŋɩɩ nɛ Solomoŋ saa Wɩa dɩɩ-bal-la a dɛrɛ.

¹⁵ Ʋ joŋ kuolo daasɩŋ a kɩɛlɛ tɔ tʋɔŋ jeeŋ kala, a chɩŋ tinteeŋ a jɩla yagɛ nyuŋ, aŋ joŋ bʋtʋma daborusuŋ ma a kɩɛlɛ tɔ tinteeŋ kala.

¹⁶ Wɩa dɩɩ-bal-la tʋɔŋ sɩpaaŋ, ba kɛŋ kuolo daborusuŋ nɛ a kaa saa keri, a chɩŋ tinteeŋ a jɩlaa yagɛ nyuŋ, ʋ duomuŋ ŋaa naakieliŋ fii nɛ a lɩɩsɛ Wɩa dɩɩ-bal-la lee-la zɔmʋŋ sɩ bɩ magɩa kɛnɛ.

¹⁷ Wɩa dɩɩ-bal-la dɩ-balɩŋ tɩtɩa jalɩŋ ŋaa naakieliŋ mara nɛ, a hɛ lee-la zɔmʋŋ sɩ bɩ magɩa kɛnɛ sɩpaaŋ.

¹⁸ Kuolu daaŋ nɛ ba fa kaa kɩɛla tɔ Wɩa dɩɩ-bal-la tʋɔŋ jeeŋ kala dɩ tabɩa-la ba sɩ kaa saa sɩ́ nyɩɩsʋ, aŋ saa kɩaa hɛ daasɩ-la lɛ ba nagɛ lonnuŋ arɩ tɩɩfɩɩlaa dɩ ʋ zɔŋ.

¹⁹ Solomoŋ fa wasɛ Wɩa dɩɩ-bal-la lee-la zɔmʋŋ sɩ bɩ magɩa kɛnɛ nɛ, dɩ ʋ joŋ La TƖƖNA niiriŋ daga-la bil nɩmɛ.

²⁰ Dɩa-la lee-la zɔmʋŋ sɩ bɩ magɩa kɛnɛ duomuŋ ŋaa naakieliŋ fii nɛ, ʋ jalɩŋ arɩ ʋ leŋiŋ ma kala ŋaa naakieliŋ fii fii. Solomoŋ fa joŋ sɛlɩmɛ sɩ zɔmɔ woruŋ nɛ a taara tɔ dɩa-la tʋɔŋ kala, arɩ Wɩɩsʋlʋŋ koru-la ba sɩ kɛŋ kuolo daaŋ ŋaa.

²¹ Solomoŋ fa taarɛ Wɩa dɩɩ-bal-la tʋɔŋ kala tɔ nɛ arɩ sɛlɩmɛ sɩ zɔmɔ woruŋ, a joŋ chɔrʋmɔɔ ba sɩ kɛŋ sɛlɩmɛ ŋaa a saga kɛrɛ Wɩa dɩɩ-bal-la sɩpaaŋ lee-la zɔmʋŋ sɩ bɩ magɩa kɛnɛ sɩpaaŋ.

²² Wɩa dɩɩ-bala-la tʋɔŋ kala nɛ ʋ fa taarɛ arɩ sɛlɩmɛ. Ʋ fa kɛŋ sɛlɩmɛ taarɛ Wɩɩsʋlʋŋ koru-la sɩ hɛ Wɩa dɩɩ-bal-la sɩpaaŋ lee-la zɔmʋŋ sɩ bɩ magɩa kɛnɛ nɛ.

²³ Wɩa dɩɩ-bal-la sɩpaaŋ, lee-la zɔmʋŋ sɩ bɩ magɩa kɛnɛ lɛ, Solomoŋ kɛŋ Olif daaŋ nɛ ŋaa kɩaa balɩa sɩ nagɛ Wɩa tɩndaaraa a kɛŋ kɩŋkɛnsɩŋ, ba kʋŋkala leŋiŋ ŋaa naakieliŋ bʋnɔŋ.

²⁴ Kɩalɩŋ sɩ nagɛ Wɩa tɩndaaraa, bumbuŋ kʋa kɩŋkɛŋɛ kala duomuŋ ŋaa naakieliŋ bʋlɩa arɩ kpaa magɛ dɔŋɔ nɛ. Kɩŋkɛnsɩ-la balɩa kala duomuŋ ŋaa naakieliŋ bʋnɔŋ nɛ.

²⁵ Lɩamɩŋ kʋa ma leŋiŋ magɛ ŋɩɩ tɩtɩa, ba kala balɩa fa nagɛ dɔŋɔ nɛ, a magɛ dɔŋɔ ma.

²⁶ Ba kʋŋkala leŋiŋ ŋaa naakieliŋ bʋnɔŋ nɛ.

²⁷ Ba joŋ kɩalɩŋ a kaa jʋʋ bil Wɩa dɩɩ-bal-la lee-la zɔmʋŋ sɩ bɩ magɩa kɛnɛ lɛ. Ba chɩna challɛ dɔŋɔ, ba kɩŋkɛnsɩŋ kʋʋ digi dɔŋɔ dɩa-la tʋtʋɔbaanɩŋ, ka kɩŋkɛnsɩŋ dɔnsʋŋ ma mʋ tɩgɛ jeeŋ lɛ.

²⁸ Ʋ kɛŋ sɛlɩmɛ taara tɔ kɩalɩŋ ma kala.

²⁹ Wɩa dɩɩ-bal-la tʋɔŋ dɩɩsɩŋ arɩ harɩŋ dɩɩsɩŋ jeyee kala lɛ, ʋ saa kɩalɩŋ sɩ nagɛ Wɩa tɩndaaraa, abɛ tɩɩsɩŋ arɩ kɩalɩŋ sɩ nagɛ tɩɩfɩɩlaa a kaa kpɩɛrɛ ʋ kala golli.

³⁰ Sɛlɩmɛ-la nɛ ʋ ha kaa taarɛ dɩɩsɩ-la tinteeŋ ma kala.

³¹ Boiŋ-nii-la sɩɩ jʋʋ Wɩa dɩɩ-bal-la lee-la zɔmʋŋ sɩ bɩ magɩa kɛnɛ lɛ, ʋ kɛŋ olif daaŋ nɛ a ŋaa boru-kparaa a hɛ. Boro-la nyuŋ dɩɩrɩŋ jɩla ŋaa gulogulo.

³² Borusu-la lɛ, ʋ saa kɩaa sɩ nagɛ Wɩa tɩndaaraa, abɛ tɩɩsɩŋ arɩ kɩaa sɩ nagɛ tɩɩfɩɩlaa nɛ a hɛ, a kɛŋ sɛlɩmɛ a taara tɔ.

³³ Ba kɛŋ olif daaŋ nɛ a ŋaa boru-kparaa a hɛ Wɩa dɩɩ-bal-la boi-baalɩŋ ma lɛ.

³⁴ Bʋtʋma daaŋ nɛ ʋ bɩra kaa ŋaa boru-kparaa balɩa,

³⁵ a saa kɩalɩŋ sɩ nagɛ Wɩa tɩndaaraa, abɛ tɩɩsɩŋ arɩ kɩalɩŋ sɩ nagɛ tɩɩfɩɩlaa a hɛ ba ma lɛ, a kɛŋ sɛlɩmɛ taara tɔ, ba magɛ dɔŋɔ.

³⁶ Ŋɩɩ nɛ ba kɛŋ tabɩaa ba sɩ wasa ta a saa kaalɩ-bie Wɩa dɩɩ-bal-la sɩpaaŋ. Dɩ ba nɛ saa tie-biee batori na-kala, ba yie joŋ kuolu doloo ma a daŋ bala a golli.

³⁷ Solomoŋ sɩ dii kuoruŋ, ʋ jɩ-nɛsɛ tʋɔŋ chɛnɛ-la ba sɩɩ yɩrɛ Zif lɛ nɛ ba suomo bil Wɩa dɩɩ-bal-la gentine.

³⁸ Jɩŋ fii arɩ kʋbala tʋɔŋ, chɛŋ chori-la ba sɩɩ yɩrɛ Bʋl, ʋ tʋɔŋ nɛ ba saa Wɩa dɩɩ-bal-la a ŋaa wɩɩkala ba sɩ daga dɛrɛ. Jɩsɩŋ balɩpɛ nɛ Solomoŋ joŋo saa dɩa-la.