1 KUOROO 5 - WƖA TENIŊ

Solomoŋ kɛŋ ʋ tɩtɩa hɛ dɔŋɔ dɩ ʋ saa Wɩa dɩɩ-balɩŋ

¹ Taaya tɩŋŋaa kuoro Hiram sɩ nɩa dɩ Solomoŋ nɛ ba lɩɩsɛ ʋ laa ʋ nyɩmma Devit nyuŋ a dii kuoruŋ, ʋ tɩŋ ʋ tɩntɩnnɩ-hɩasɩŋ dɩ ba mʋ lɔllɛ Solomoŋ, bɛɛ wɩaa ʋ dɩ Devit fa ŋaa nandɔsʋ nɛ.

² Solomoŋ mɩɩra tɩma pɩ Hiram:

³ “Ŋ jɩma laalɩŋ fa sɩ golli mɩ nyɩmma Devit hɛ ŋɩɩ, ʋ bɩ wuo na wombiiŋ a saa Wɩa dɩɩ-balɩŋ, dɩ ba dɛnnɛ ʋ Tɩɩna Wɩa nɩmɛ, a kaa mʋ yi bʋa-la lɛ La TƖƖNA sɩ leŋe ʋ yuo dii ʋ dʋndɔŋŋɔɔ kala.

⁴ Ama lɛɛlɛ mɩ TƖƖNA Wɩa leŋe mɩ hɔŋ arɩ fɩɛlɩŋ nɛ wɩɩkala bɩ mɩɩ walɩmɛ.

⁵ La TƖƖNA fa hɛ niiŋ pɩ mɩ nyɩmma Devit nɛ arɩ ʋ nanʋal-la sɩ jaŋ laa ʋ nyuŋ a dii kuoruŋ nɛ jaŋ saa ʋ dɩɩ-balɩŋ a pʋ. Ŋɩɩ tʋɔbɩɩnaa nɛ mɩ kɛŋ dɩ mɩ saa dɩɩ-balɩŋ a pɩ mɩ Tɩɩna Wɩa.

⁶ Ŋɩɩ wɩaa leŋ dɩ ŋ nɩaa keri kuolu daasɩŋ Lɛbanɔŋ lɛ a pɩmɛ. Mɩ jaŋ leŋ dɩ mɩ nɩaa kʋ pɛ ŋ nɩaa lɛ dɩ ba keri daasɩ-la. Magɛ ŋɩɩ kala ŋ sɩɩ chɛ dɩ mɩ tiŋ ŋ nɩaa, mɩ jaŋ time pɩŋ. Ŋ jɩma, la bɩ nɩaa kɛnɛ ba jɩŋ daasɩŋ keriŋ a magɛ ŋ nɩaa.”

⁷ Hiram sɩ nɩɩ Solomoŋ tɩndaarɩɩ-la, ʋ tʋɔŋ faasa tɔrɛ, ʋ bʋl, “Mɩɩ dɛnnɛ La TƖƖNA jɩnɩŋ ʋ sɩ joŋ hambolibie sɩ kɛŋ wʋjɩmɩŋ a pɩ Devit dɩ ʋ beŋ tintee-balɩŋ deeŋ.”

⁸ Ŋɩɩ nɛ Hiram tɩŋ ba mʋ bʋla pɩ Solomoŋ, “Mɩ laa tɩndaarɩ-la ŋ sɩ tɩma nɛ, mɩ jaŋ ŋaa wɩɩ-la kala ŋ sɩɩ chɛ. Mɩ jaŋ leŋ dɩ mɩ nɩaa keri kuolo arɩ bʋtʋma doloo a kaa kʋ pɩŋ.

⁹ Mɩ nɩaa jaŋ paa dolo-la a lɩɩ Lɛbanɔŋ a kaa kʋ tuu mʋgʋ-balɩŋ niiŋ, a vɔɔ paa hɛ lɩɩŋ lɛ dɩ ba duoro kɔ lee-la ŋ sɩ daga. Nɩmɛ nɛ mɩ nɩaa jaŋ puriba dɩ ŋ nɩaa paa kaa viiri. Wɩɩ ŋ ma sɩ jaŋ ŋaa nɛ, ŋ pɩ mɩ dɩ mɩ nɩaa kʋdiilee.”

¹⁰ Ŋɩɩ nɛ Hiram pɩ Solomoŋ kuolo arɩ bʋtʋma dolo-la kala ʋ sɩɩ chɛ.

¹¹ Jɩna na-kala Solomoŋ ma yie pɩ Hiram mɛmpɛ bɔtɔba bʋɩ mara nɛ, Olif nʋʋŋ ma galamba bʋɩ zɔlɔ arɩ mara, ʋ laa pɩ ʋ nɩaa.

¹² La TƖƖNA pɩ Solomoŋ wʋjɩmɩŋ arɩ ʋ fa sɩ bʋl ŋɩɩ pʋ. Solomoŋ arɩ Hiram pɛgɛ fa zɔmɔ nɛ woruŋ, ba hɛ niiŋ a pɩ dɔŋɔ.

¹³ Kuoro Solomoŋ fa tʋɔsɛ tɩntɩnnaa bʋɩ mara arɩ fii nɛ Iziral tinteeŋ kala lɛ a fʋgɛba hɛ dɩ ba mʋ keri Wɩa dɩɩ-bal-la doloo.

¹⁴ Ʋ fa leŋe Adoniram nɛ ŋaa tɩntɩnna-la nɩhɩaŋ. Solomoŋ kɛŋ nɩalɩŋ kpaa leree batori nɛ. Bʋɩ fii yie mʋ Lɛbanɔŋ a tɩŋ chɛnɛ aŋ mɩɩra kʋ wiesi dɩa lɛ chɛnsɩŋ balɩa. Bʋɩ fii ma bɩra mʋ a tɩŋ chɛnɛ aŋ mɩɩra kɔ dɩa chɛnsɩŋ balɩa.

¹⁵ Solomoŋ fa kɛŋ nɩaa bʋɩ mahɩŋ banɛsɛ ma nɛ sɩɩ yɛrɛ tabɩaa dundolluŋ nyuŋ, ka nɩaa bʋɩ mahɩŋ batori arɩ fii ma chʋchʋŋ tabɩa-la.

¹⁶ Ʋ lɩɩsɛ nɩaa bʋɩ batori arɩ zɔɔ-batori nɛ ba bibeŋ tɩntɩnna-la a dɩdagɛba tɩntɩŋŋaa.

¹⁷ Ŋɩɩ nɛ ʋ bʋla pɩ tɩntɩnna-la dɩ ba yɛrɛ tabɩɩ-duoruŋ sɩ jalɩa dɩ ba kaa bil Wɩa dɩɩ-bal-la gentine.

¹⁸ Solomoŋ arɩ Hiram tɩntɩnnaa arɩ taŋ-la ba sɩɩ yɩrɛ Gɛbal tɩŋŋaa baalaa nɛ keri doloo, a yɛrɛ tabɩaa ba kaa saa Wɩa dɩɩ-bal-la.